Isaiah 11

Romani Ursari 2018 (Biblia Ande Chib Romani)

← Chapter 10 Jump to: Chapter 12 →

1Katar gua kas e Joseeko likel iek patrin zeleni, iek patrin likel katar leke zile.

2Ka achel pe lete o duo e Devleko, o duo ka del le bizaipe ta llanglipe, ka cherel le te del orbe kai sikaven ta kai den zor, o duo ka cherel le te avel bizai ta te del liubao e Devle.

3Leki dragostia ka avel ando liubao karing o Del. Ni ka chinel kris prema so dikhel ta ni ka jalpe pala so asunel,

4vou ka chinel kris e llenenge kai si chorre ta ka jalpe pala e llene proste katar e phuv, leki orba ka avel iek kas kai ka dukhavel e phuvia ta o duo katar leki orba ka mundarel e bilachen.

5Ta o chachipe ta so si orta ka aven sargo iek kavisi pe leko maskar.

6O ruv ka zivil e bakrea ta o liono makhlo ka inzol e busnurrea, o telcho ta o liono ta e zivirinia kai bariaren ando cher ka phiren iek pasa o gua, ta iek minono ka inllarel len.

7O guruvmi ta e melleda ka jan char, lenge minone ka inzon iek pasa o gua, ta o liono ta o guruv ka jan e char suki.

8O minono kai piel kolin ka chelelpe upral po than kai zivil o sap ta o minono kai mukla o kolin ka thovel po va andre kote kai zivil o sap.

9Ni ka cheren o bilachipe ta ni ka dukhaven soke pe phuv ka avel but bizaipe e Devleko gia sar si o pai upral pe mora.

10Kana ka avel gua llive, e phuvia ka llan te roden e zila katar o Isai, ta ka avel thodi sargo iek bariako e phuvienge, ka roden la e llene ta lako than ka avel glamno.

11Kana ka avel gia llive, o Del pale ka vazdel po va te iril pete e llene kai achile katar leko foro kai ka achen ande Asiria, ando Ejipto, ando Patros, ande Etiopia, ando Elam, ando Sinar ta ando Jamat ta ande forura kai si pasa e mora.

12Ta ka vazdel bariako e phuvienge ta ka chidel e llenen kai sea tradine ta ka anel pe iek than e llenen kai sea rispime katar o Juda katar e star riga e phuviake.

13Ta e joli po Efrain ka llaltar ta e dusmanura katar o Juda ka aven zatrime. O Efrain ni ka joliaol po Juda ni o Juda po Efrain,

14ta von ka juten pe zea katar e filisteura katar e rig kai likel o kham, ta ka choren e llenen ande phuvia kai perel o kham, o Edom ta o Moab ka radin lenge ta e chave katar o Amon ka kandel len.

15Ta o Del ka sukarel e mora ando Ejipto ta ka achel sargo iek chib, ta ka vazdel po va ande zor katar po duo po pai ta ka ikanel efta katar iek, ta ka cherel te nakhen letar ande sinele.

16Ta ka putarel drom golenge kai ka achen katar leko foro gola kai achile katar e Asiria, gia sar saia le drom o Israel kana likisto katar o Ejipto.

← Chapter 10 Jump to: Chapter 12 →