Isaiah 8

Romani Ursari 2018 (Biblia Ande Chib Romani)

← Chapter 7 Jump to: Chapter 9 →

1Mapalal o Del phenda mange: Le iek bari chikla ta pisisar pe late letre bare kai phenen katar o Maer, o Salal ta o Jasbaz.

2Ta andem manchar llenen chache te dikhen, avilo manchar o Urias, o Zakarias chavo katar o Jeberekias.

3Ta sovtem e poraukaia, kai achili phari ta avilala iek minono. Ta o Del phenda: Thou leko anav Maer Salal Jasbaz.

4Soke mai anglal o minono te phenel: Dade ta male, ka avel ikando o barvalipe katar o Damasko ta u llubri katar e Samaria ka anen kai o charo.

5Pale o Del dia manchar orba ta phenda mange:

6Sar ni mangla gava foro o pai katar o Siloe, kai llan poloke, ta sar veselisailo e Rezinea ta e chavea katar o Remalias,

7Goleke akana o Del cherel te vazdiniaon pe lende e bare paia, o charo katar e Asiria kai si but zuralo ta ka avel upral pe sa leke paia ta ka nakhel pe ogoia rig,

8ka nakhel katar o Juda, ta ka pherel le pai llik kai lengi korr ta ka llal angle, ka buliarel pe pakha sargo iek chirikli ta ka pherel sa chi phuv ioi Emanuel.

9Chidiniaon forura ta gola kai si dukhade, asunen sa gola kai zivin dur ande aver phuvia, lacharentumen ta ka aven zatrime lacharentumen ta ka aven phage.

10Len bizaipe ta ka avel phago, den orba ta ni ka avel zurali, soke o Del si amenchar.

11Soke o Del phenda mange gia zoriaia ta sikada man te na cherav so cherel gava foro ta phenda:

12Na phenen kai si kojaipe sa so von phenen kai si kojaipe ta na daran katar so von daran, na daran.

13E Devla kai si le sa e zor, le blagosin, samo letar si te daran ta te den liubao.

14Vou ka avel iek santuario, a e duie cherenge katar o Israel ka avel iek bar te eskonban ta ka avel lenge iek solo ta iek mreza e llenenge kai zivin ando Jerusalem.

15Ta but llene maskar lende ka eskomban, ka peren ta ka aven zatrime, ka achadon ta ka aven phangle.

16Phande e orba e chachi, thov o sello po zakono maskar me disipulura.

17Ka aduricharav e Devle kai ni dikhla po cher katar o Jakob ta ka uzdiu man ande lete.

18Me ta e chaurre kai dia man o Del sam iek bari ezgoda ando Israel e Devletar kai si le sa e zor, kai zivin po burdo katar o Sion.

19A te phende tumenge: Puchen golen kai duricharen ta golen kai cheren chirimate, kai den orba poloke, tumen phenen lenge gia: ¿Ni ka del orba o foro pe Devlea? ¿Ka del orba e mulenchar pala e llunde?

20Te na phende prema o zakono te prema e orba e chachi, si soke ni llivosaila lenge.

21Ta ka nakhen katar e phuv chinie ta bokhale ta kana ka avel lenge bok, ka dikhen upre po miloso ta ka proketin pe charo ta pe Devle.

22Ka dikhen pe phuv ta ka dikhen burkania, truniariko ta nuzda ta ka aven andre ando truniariko.

← Chapter 7 Jump to: Chapter 9 →