Isaiah 44

Romani Ursari 2018 (Biblia Ande Chib Romani)

← Chapter 43 Jump to: Chapter 45 →

1Akana asun Jakob, mo sluga, ta tu Israel kai me esvirisardem tut.

2Gia phenel o Del, kai cherda te ave ta kai cherda tut sar kana sana ando lli, a kai ka pomozil tut: Na dara Jakob mo sluga, ta tu, Jerusalem, kai me esvirisardem tut.

3Soke me ka chudav pai po sukipe, ta paia pe phuv prajali, ka chudav mo duo pe cho porodo, ta mo blagosipe pe che minone,

4ta ka barion maskar e char, sargo e kasta kai barion pasa o pai.

5Vou ka phenel: Me sem e Devleko, o gua ka avel leko anav katar o Jakob, ta aver ka pisil pe vastea: E Devleke, ta leko duito anav ka avel katar o Israel.

6Gia phenel o Del Charo katar o Israel, ta leko braduimari, o Del kai si le sa e zor: Me sem o purvo, ta o mai angle, ta inai aver del avri mandar.

7¿Ko ka phenel so si te avelpe, ka phenel le ta ka thovel pe po than gola ezgode angla mande, gia sar cherav le me sar kana cherdem o purano foro?

8Na izdra ta na dara, ¿Ni cherdem te asune le, ta ni phendem le chuke? Tumen sen gola kai dikhlen le. Inai aver del samo me sem Del. Inai aver zuralo, ni pinllarav avere.

9E llene kai cheren pe vastenchar e delen, saurre ni mol len niso, ta lengi ezgoda mai sukaripe ni mol la niso, ta isto von dikhenle ta ni llanen so ka cheren, soke e dela ni dikhen ta ni acharen.

10¿Ko cherda iek del, o ko bilavel te cherel iek estatua kai ni blazil nisoke?

11Sa leke llene ka aven ando lallao, soke gola kai cheren len si manusa. Saurre ka chidiniaon, ka aven, ka chudinpe ta ka aven thode ando lallao saurre.

12O kovachi lel o kliasto, radil ande iag, cherel len e chokanoia, ta radil pe lende ande zor pe vasteki, mapalal bokhaol ta jasarel e zor, ni piel pai ta baldilpe.

13O lleno kai radil e kasta llinel o kas iekhe thavea, pisil pe lete, zumavel o kas, ikanel letar kotora e cheskaia ta cherel letar iek estatua, prema sar si iek murus sukar, te sai thovel le ande po cher.

14Chinel kasta katar o sedro, lel sipresura ta ensine kai barion maskar e kasta katar o vos, thovel te barion pinura te barion po bursin.

15Mapalal o manus lel letar e kasta te cherel iak ta te tatol, phabarel lea e furnava ta pekel o marrno, ta i cherel lea iek estatua katar iek del, ta blagosil le, cherel iek slika ta del changenchar angla la.

16Vareso katar o kas phabarel le ande iag, ta aver kotor pekel lea o mas, cherel lea iek pekipe ta chaliol, mapalal tatol pe iag ta phenel: ¡Ioi! dia man tatipe, dikhlem e iag,

17ta so achel katar o kas cherel lea iek estatua katar iek del, iek del piro, del changenchar angla le, blagosil le ta molilpe leke ta phenel: Braduisar man soke mo del tu san.

18Ni llanen ta ni acharen, soke lenge akha si phangle te na dikhen, ta lengo lio phanglo te na acharen.

19Ni mislilpe, ni llanel so si orta te phenel: Iek kotor katar gava kas phabardem, ta upral pe leke angara peklem o marrno ta i o mas, ta jalem le. ¿Ta katar so achel ka cherav iek gadope? ¿Ka dav changenchar angla iek kotor kas?

20Pravarenpe katar o prajo e iagako, lengo lio kojadino ikanen le katar o drom te na braduil po zivoto, ta te na phenel kai ande leko va o chacho si iek ezgoda kai kojavel.

21De tut golli katar gala ezgode Jakob, ta o Israel, soke san mo sluga. Me cherdem tut, tu san mo sluga, Israel, na bristar tut mandar.

22Me koslem sargo iek oblako cho bilachipe, sargo tufina e ezgode bilache kai cherdan, irisao mande soke me braduisardem tut.

23Llilabe miloso, soke o Del cherda le, urkisar veselimaia, phuv chak andral, blagosin ando baro avazi burdura ta vos, ta suako kas kai si andre, soke o Del braduisarda e Jakobo ta ando Israel ka avel blagosime.

24Gia phenel o Del, cho Braduimari, kai cherda tut chak kana sana ando lli: Me o Del, kai cherav le sa, kai buliardem korkorre o miloso, kai buliardem e phuv me korkorre,

25kai muriu so cheren gola kai apogodin ta diliarav golen kai cheren e chirimate, kai cherav te den palpale e bizai, ta bilavav lengo bizaipe.

26Me kai cherav o alav katar mo sluga, ta cherav te llal sukar me bichaldenge. Me phenav kai pale ka zivin ando Jerusalem ta kai vazden pale e phuvia katar o Juda, me ka cherav te usten katar o phagipe.

27Me phenav morake: Sukiu ta ka cherav te sukon e paia katar che lena,

28Me phenav katar o Siro; Vou si mo chobano ta ka cherel sa so me mangav, ta phenav e Jerusalemeke: Va ave vazdini ta e chereke katar o Del: Ka thodon che barra kai ande phuv.

← Chapter 43 Jump to: Chapter 45 →