Isaiah 60

Romani Ursari 2018 (Biblia Ande Chib Romani)

← Chapter 59 Jump to: Chapter 61 →

1Uste, klichisar soke avilo cho villelo, ta o blagosipi e Devleko avilo pe tute.

2Soke o truniariko ka avel upral pe phuv ta ni ka avel villelo pe forura, a upral pe tute ka llivosaol o Del, ta upral pe tute ka dikhol leko blagosipe.

3Ta e phuvia ka phiren pe cho villelo ta e charura po villelo katar chi thiarin.

4Vazde che akha truial ta dik, sa gala chidinaile, avile tute, che chave ka aven duratar, ta che cheen ka anen len ande va.

5Ondaka ka dikhe ta ka klichi, cho lio ka buliol ta ka chudilpe soke irisaile tute katar e mora but llene ta soke o barvalipe katar e phuvia avilo tute.

6But deve ka ucharen tut, katar o Madian ta o Efa, sa ka aven katar o Saba, ka anen sunakai ta taimano, ta ka sikaven o blagosipe e Devleko.

7Sa e stoke katar o Kedar ka chiden len chuke, busne katar o Nebaiot ka thoven angla tute, ka del len veselimaia upral pe mo altar, ta ka blagosiv o cher katar mo blagosipe.

8¿Ko si gala kai furian sargo oblakura ta sargo gulubura pe lenge penllerave?

9E llene kai zivin pasa e mora ka aduricharen man, ta e llimie katar o Tarsis mai anglal te aven che chaurren duratar, ka anen po sunakai ta po rup Kai o Gazda cho Del, ta kai o Santo katar o Israel kai blagosisarda tut.

10Ta e llene katar aver phuvia ka vazden ka vazden che zidura, ta lenge charura ka radin chuke soke ande mi joli dukhadem tut, a soke sem lacho ka avel mange zalba tutar.

11Suako llive ka aven putarde che udara, ni ka phanglion ni ollivesea, ni orachaia, te sai anen tute o barvalipe e phuviengo ta te anen len tute lenge charura.

12Soke e phuv ta o foro kai ni ka radil chuke, ka merel ta ka avel zatrime katar sa.

13O blagosipe katar o Libano ka avel tute, a mai lache kasta katar o Libano ka aven thode te dikhol sukar pe mo santuario ta me ka blagosiv o than me porrnengo.

14Ta ka aven tute lallaimaia e chave katar gola kai dukhade tut, ta pe che estope ka bangon sa gola kai dukhavena tut, ta ka ikharen tut foro e Devleko, Sion katar o Santo e Israeleko.

15Gia pusti sana ta gachin murzina pe tute, kai niko ni nakhela tutar, a me ka cherav te ave iek blagosipe ostade ta e dragostia katar sa o vreme.

16Ka pravare tut katar o thud e phuviengo, o barvalipe katar e charura ka avel cho jape, ta ka llane kai me o Del sem cho braduimari ta gua kai braduil tut, o Zuralo katar o Jakob.

17Po than katar o tuch me ka thovav sunakai, a po than katar o sastri ka thovav rup, po than katar e kotora kastune ka thovav tuch, ta po than katar e barra ka thovav sastri, ta ka thovav pas te gazdaril tut ta o chachipe te sikavel tut.

18Nikada ios ni ka asundol o silnope ande chi phuv, ni zatrania ni phagipe, soke che zidura ka ikhare len braduipe, ta che udara ka ikhare len blagosipe.

19Nikada ios ni ka trubul tut o kham te kletosarel pe tute ollivesea, ni o kham ni ka trubul te klichil chuke, soke o Del ka avel cho villelo ostade ta cho Del ka avel cho blagosipe.

20Nikada ni ka perel cho kham, ta ni ka chikniol cho chon, soke o Del ka avel chuke o villelo ostade, ta e llivesa katar cho zalosno ka getonpe.

21Ta cho foro, saurre ka aven chache, e phuv ka achel lenge ostade, o nevipe murno katar mo vostano, so me cherdem me vastenchar, te blagosin man.

22O mai minono ka cherdol milia, o mai terno ka cherdol iek foro zuralo, Me o Del, ka cherav te cherdon gala ezgode oma.

← Chapter 59 Jump to: Chapter 61 →