Isaiah 42

Romani Ursari 2018 (Biblia Ande Chib Romani)

← Chapter 41 Jump to: Chapter 43 →

1Etalo mo sluga, me dav le zor, ta mo duo veselilpe pala le, upral pe lete thodem mo duo, vou ka anel o chachipe kai e phuvia

2Ni ka urkil ta ni ka vazdel po avazi ta ni ka asundol leko avazi pe drom.

3Ni ka phagel o kastorro kai si chaladino, ta ni ka mundarel e memeli kai thuvarel, pala so si orta ka anel o chachipe.

4Ni ka chiniol ta ni ka jasarel e vlaga lligo ni ka thovel pe phuv o chachipe, ta e forura kai si pasa e mora ka aduricharen leki kris.

5Gua phenel o Del o Gazda, kai cherda o miloso, gua kai buliarel le, gua kai buliarel e phuv ta e ezgode kai del, gua kai del zivoto e llenen kai zivin pe phuv ta kai del o duo golen kai phiren pe late:

6Me o Del ikhardem tut ando chachipe, ta ka istarav tut e vastetar, ka arakhav tut ta tu ka ave o alav kai ka dav e foro ta villelo e phuvienge,

7te putare e akha e correnge, te ikane katar o rubie e phanglen, ta katar o phandipe golen kai zivin ando truniariko.

8Me o Del, gava si mo anav, ta avere ni ka dav mo liubao, ta ni mo blagosipe e sliken.

9E purve ezgode cherdile, ta me phenav neve ezgode, mai anglal te dikhon me ka sikavav len tumenge.

10Llilaben e Devleke iek llili nevi, te asundol pe suako rig kai blagosin le, gola kai fulien ande mora ta sa so si andre, e ezgode kai zivin andre ta sogo si andre.

11Te urkil o pusto ta leke forura, e forichura kai zivil o Kedar, te llilaben e llene katar e Petra, urkisaren upral pe burdura.

12Blagosin e Devle, ta phenen katar leko blagosipe pasa e mora.

13O Del ka likel sargo iek lleno tromano, sargo iek lleno kai llal po maripe ka joliavel, vazdel po avazi ta urkil sikavel po tromanipe pe dusmanonenge.

14But vreme ni diem orba, ni phendem niso, ta achilem, Ka urkiu sargo e diskinia kai maladol kake.

15Ka mukav puste e burdura ka sukarav sa e char katar e burdura, ka cherav te chidiniaon pe iek than lenge paia, ta ka sukarav o pai kai likel katar e phuv.

16Ka inllarav e korre katar iek drom kai ni pinllarena, katar e dromorra kai ni llanena ka thovav len te phiren. Angla lende ka pharuvav o truniariko ando villelo ta ka ortou o bangipe. Gala ezgode ka chereu lenge ta ni ka mukav len korkorre.

17A golen kai pachan ande slike ka chereu te na acharen, gola kai phenen gia e sastrune slikenge: Tumen sen amare Deva.

18Kasukalen, asunen, korralen, acharen ta dikhen.

19Niko inai gia korro ta kasuko sargo mo sluga, gua kai bichaldem le, ta niko inai gia korro ta kasuko sargo mo bichaldo, o sluga e Devleko,

20kai dikhel but ezgode ta ni acharel, kai putarel pe kan ta ni asunel.

21O Del pala o volipe ka si le pe po chachipe mangla te blagosil ta te bariarel o zakono.

22A gale foro kai chorde le, ta ustade le, ta sa achile phangle andre ande burdura ta gurudine ande rubie, sa lie lendar, ta inai ko te braduil len, inai len niso ta inai ko te phenel: irin len pe lengo than.

23¿Ko tumendar ka asunel gaia ezgoda? ¿Ko ka thovel sama te asunel so ka avelpe?

24¿Ko e Jakobo sargo kana vou saia iek ezgoda chordani ta ko dia e Israele kai e chorane? ¿Ni cherdam amen o bilachipe e Devleke? Nikamle te llan pe leke droma ta ni asunde leko zakono.

25Goleke, cherda te perel pe lete pi joli ta pi zor marimaki, thoda truial letar e iag ta ni acharda, ta phabarda le, a ni thoda sama.

← Chapter 41 Jump to: Chapter 43 →