Isaiah 54

Romani Ursari 2018 (Biblia Ande Chib Romani)

← Chapter 53 Jump to: Chapter 55 →

1Veselisao tu kai nasti bianea, tu kai nasti avena tut minone, llilabe ta urkisar veselimatar tu kai nikada ni sana po khamnipe, soke mai but si e minone katar goia kai achili korkorre, neko katar goia kai si la rrom, gia phenda o Del.

2Buliar chi chara ta e chitura katar che sobe, na estedi bariar che chilodoria, ta mar che chile.

3Soke ka bulio pe rig e chachi ta i pe rig stingo, ta cho porodoke ka achen e phuvia, ta ka zivin ande phuvia zatrime.

4Na dara, soke ka llene so te chere, na lalla, soke ni ka kusen tut. Ka bristare tut katar o lallao kai nakhlan ande cho ternipe, ta katar o lallao katar cho phivlipe ni ka de tut golli ios.

5Soke cho rrom si gua kai cherda tut, o Del kai si le sa e zor gia si leko anav, ta cho Braduimari, o Santo katar o Israel, Del katar sa e phuv kai ikharen le.

6Soke o Del ikharda tut sargo iekhe diskinia kai mukle le ta kai si tristome lako lio, ta sargo iek rromi kai muken la, cho Del phenda:

7Cherricha vreme ka mukav tut, ta ka avel manga bari zalba tutar ta ka lav tut.

8Me sema cherricha joliariko ta gurudem mo mui tutar, a ostade ka avel mange zalba tutar, gia phenda o Del cho Braduimari.

9Soke mange ka avel sargo ande llivesa katar o Noe, kana diem mo alav kai nikada ios ni ka nakhel o pai pe phuv isto gia diam mo alav kai ni ka joliaivav pe tute ta ni ka thovav chuke kasti.

10Soke e burdura ka miskonpe, ta e burdichura ka izdran, a tutar ni ka duriol mi zalba, ta ni mo alav katar mi pas ni ka phagav, gia phenda o Del, gua kai si leke zalba tutar.

11Iani, chiñi katar o bursin, inai ko te del la zor me ka thovav che zidura upral pe barra lole ta pe safirura.

12Che penllerave ka cherav len katar e barra kuch, che udara katar e barra lole, ta sa che zidura katar e barra kuch.

13Ta sa che chaurren ka sikavel len o Del ta ka bariol e pas katar che chaurre.

14O chachipe ka dikhol sukar pe tute, ni ka dara ios te gazdarin pe tute ta e dar ka llaltar tutar ta nikada ios ni ka avel pasa tute.

15Ko mangela te marelpe tuia, me ni ka avav lea, ko ka mangel te marelpe tuia, ka perel angla tute.

16Me cherdem e llene kai radil ando o sastri, ka phurdel pe iag ta ikanel po alato te radil, ta me cherdem gole kai zatril, te zatril.

17Ni iek ezgoda cherdi te marelpe manchar ni ka llal lake sukar, ta kogo dela orba bilachi tutar pe kris ka dosare le. Gava si so mukla e slugenge katar o Del, ta lengo braduipe ka avel mandar, gia phenda le o Del.

← Chapter 53 Jump to: Chapter 55 →