Isaiah 24

Romani Ursari 2018 (Biblia Ande Chib Romani)

← Chapter 23 Jump to: Chapter 25 →

1O Del ka mukel pusti ta nangi e phuv, bangarel e phuv ta rispil e llenen kai zivin pe late.

2Ta so ka nakhel o foro ka nakhel le i o popo, so ka nakhel o sluga, ka nakhel i o gazda, so ka nakhel e sluga, ka nakhel i laki gazda so ka nakhel gua ka chinel, ka nakhel i gua kai bichinel, so ka nakhel gua kai del unllile, ka nakhel i gua kai lel unllile, so ka nakhel gua kai lel chari ka nakhel i gua kai lel o chari.

3Pe sa e phuv ni ka avel niko, ta sa lake ezgode ka aven ikande, soke o Del phenda le gia.

4Zatrisaili, nasuaili, pelitar sa e phuv, nasualie e forura bare pe phuv.

5E phuv melaili tala lenge porrne, soke nakhle pe zakonura, bangarde so si orta, phagle e sovel kai si ostade.

6Goleke e armaia zatrisarde e phuvia, ta e llenen kai zivina pe late, goleke avile zatrime e llene kai zivina pe phuv ta cherdile mai cherricha manusa.

7Jasaili e mol, nasuaili e drak, sa gola kai saia veselo lengo lio, rovde zalbatar.

8Achili e dragostia katar e panderura, ni asundon gola kai veselinpe, lachili e veselia katar e arpa.

9Ni ka llilaben ta ka pien mol, e rachia ka avel cherki golenge kai ka pien la.

10Zatrime si o foro pala so ni mol le niso, sa e chera phanglile te na del niko andre.

11Roven pe droma soke inai mol, suako veselia cherdili truniariko, e veselia avili tradini katar o foro.

12O foro achilo pusto, ta ando phagipe perade o udar.

13Gia ka avel ande phuv, e phuvia ka aven chinome sargo o kas e maslinkengo, sargo so achel kana chiden e septelie.

14Gola kai ka achen ka urkin, ka llilaben vesele pala o baripe e Devleko, katar e mora ka asundol lengo avazi.

15Goleke blagosin e Devle ande umalia, pasa e mora phenen o anav katar o Gazda, o Del e Israeleko.

16But duratar asundol asundam e llilia: blagosime o chacho. Ta me phendem: ¡Ioi savi bibaj, savi bibaj, tesko mange! e kojamne cheren iek baro kojaipe.

17Dar, anadipe ande phuv ta mreza pe tute, tu kai zivi pe phuv.

18Gua kai ka mangel te nasel katar o avazi darano ka perel ando anadipe, ta gua kai likela katar o anadipe ka achel phanglo ande mreza, soke upral ka putaon penllerave ta ka dermolpe e phuv chak telal.

19Sa zatrime ka avel e phuv, sa drobome ka avel e phuv but zurale ka dermolpe e phuv.

20E phuv ka dermolpe sargo iek mato, ta ka avel ikando sargo iek cherorro kastuno, ta ka bariol pe late lako bilachipe, ta ka perel ta nikada ios ni ka ustel.

21Ande gua llive, o Del ka dukhavel e boñikonen katar o miloso, ta e charonen kai si pe gaia phuv.

22Ta ka chiden len pe umpe gia sar chiden e phanglen ande rubie, ta ande rubie ka achen phangle ta ka aven dukhade kana ka nakhel but vreme.

23O chon ka lallal, ta o kham ni ka llanel so ka cherel, kana o Del kai si le sa e zor ka gazdaril po burdo katar o Sion ando Jerusalem ta kana leke phure ka dikhen leki zor.

← Chapter 23 Jump to: Chapter 25 →