Isaiah 55

Romani Ursari 2018 (Biblia Ande Chib Romani)

← Chapter 54 Jump to: Chapter 56 →

1Sa gola kai si trusale, aven kai e paia, a gola kai inai len love, aven, chinen ta jan. Aven, chinen bilovenchar, mol ta thud.

2¿Soke jan tumare love ande so inai marrno, ta trudintumen ande so ni chaliarel? Asunen man ta thove mange sama ta jan katar o lachipe, ta ka veselintumen pala o glamno jape.

3Thoven sama ta asunen, ta aven mande, asunen, ta ka zivin, ta ka achav tumenchar pe iek alav ostade, e sovlia volimake kai jalem e Davideke.

4Me thodem le te dikhel o chachipe e phuvienge, te avel gazda ta te sikavel e foronen.

5Ka ikhare llenen ka ni pinllarea, ta llenen kai ni pinllarde tut ka prasten tute, pala o Gazda cho Del, ta pala o Santo katar o Israel kai blagosisarda tut.

6Rode e Devle kana sai malave le, ikhar le kana si pase.

7Te mukel po drom o lleno kai ni pachal ta o manus bilacho pe mislura bilache, ta te irilpe kai o Gazda, soke ka avel leke zalba letar ta amaro Del ka del le baro prostipe.

8Soke me mislura inai tumare mislura, ni tumare droma inai murne droma, gia phenda o Del.

9Gia sar si mai upre o miloso katar e phuv, gia si me droma mai upre neko tumare droma, ta me mislura neko tumare mislura.

10Soke gia sar perel katar o miloso o pai ta o iv ta ni irinpe incha, ta perel upral pe phuv ta cherel te bariol te zelenil ta del simiche gole kai radil la, ta del le o marrno te jal,

11gia ka avel mo alav kai likel katar mo mui, ni ka irilpe mande chucho, ka cherel so me mangav ta ka avel blagosime pe so bichaldem le.

12Soke veselimaia ka liken ta ande pas ka irin tumen, sa e burdura ka llilaben angla tumende, ta sa e kasta katar o vos ka maren ande palme.

13Po than katar e karrne ka barion e siprese, ta po than katar e chiknite ka barion e arraiane, ka bariarel o anav e Devleko ka dikhol ostade ta ni ka avel ikando nikada.

← Chapter 54 Jump to: Chapter 56 →