Isaiah 19

Romani Ursari 2018 (Biblia Ande Chib Romani)

← Chapter 18 Jump to: Chapter 20 →

1E poroka po Ejipto. O Del llan upral pe iek oblako lokho, ta ka del ando Ejipto, ta e dela katar o Ejipto ka izdran angla le, ta ka phagol o lio katar e ejipsiura.

2Ka cherav te vazdiniaol o ejipsio po ejipsio, ta suako iek ka marelpe pe phlalea, ta suako iek ka marelpe e llenea kai si pasa le, foro foroia ta charoina charoinaia.

3Ka muriu so mangen te cheren ta ka jasarel sa pi zor o Ejipto. Ka puchen pe delen, e llenen kai cheren chirimate, pe bizaien ta golen kai apogodin.

4Ka thovav e ejipsionen ande va katar iek gazda bilacho. Iek charo bilacho ka gazdaril pe lende. O Del kai si le sa e zor phenel le.

5Ka llaltar o pai katar e mora ta ka sukol o pai katar o Nilo.

6E lena ka durion, ka nakhen ta ka sukon e droma e paienge ka sukon, e raniorra ta e patra ka aven chinde.

7Sa e umalia kai si pasa o pai, pe iek rig katar e len, ka sukon, ka jasaon ta ni ka aven ios.

8I e macharia ka pherdon zao, ka aven zalosne sa gola kai chuden e udicha ando pai, ka jasaren e vlaga gola kai chuden e mreza upral po pai.

9Gola kai cheren o chiti lino lacho ta gola kai cheren e mreze ni ka llanen so te cheren,

10soke ka lenge mreze ka aven chinde, ta ka tristompe sa gola kai bariaren machen.

11Gia dile si e mai glamne llene katar o Soan, inai bizaipe ande kris kai dela orba e Faraonoke. ¿Sar ka phene e Faraonoke: Me sem chavo katar e llene bizai ta chavo katar e purane charura?

12¿Kaitalen akana che bizai llene? te phenen chuke akana, o te sikaven chuke so mangel te cherel po Ejipto o Del kai si le sa e zor.

13E glamne llene katar o Soan si jasarde, kojadile e glamne llene katar o Menfis, ta e mai glamne llene katar e familie cherde te kojadol o Ejipto.

14O Del thoda maskar lende iek duo kai zalil, ta cherde te jasarel o Ejipto ande sogo cherela, sargo iek mato kai zalilpe ta chadelpe.

15Ta ni chitilpe leke so cherela o soro ni e pori, ni e kastorra ni e patra.

16Ande gua vreme e murusa ka aven sargo diskinie, soke ka chudinpe ta ka daran kana ka vazdel pe lende po va o Del kai si le sa e zor.

17Ta o Ejipto ka daral katar e phuv e Judaeki, sa e murusa kai ka denpe golli letar ka daral pala so mangla te cherel lenge o Del kai si le sa e zor.

18Ande gua vreme ka aven panch forura pe phuv katar o Ejipto kai ka den orba ande chib katar o Kanaan, kai ka jan suvel ando anav katar o Del kai si le sa e zor, iek ka avel ikhardo o foro katar o Eres.

19Ande gua vreme ka avel iek than e kurbanoke ando Ejipto, ta ka vazden iek barr ando anav e Devleko po than kai resel llik kote lengi phuv.

20Ta ka avel te dikhol ta te sikavel katar o Del kai si le sa e zor ande phuv katar o Ejipto, soke ka mangen katar o Del pala gola kai dukhaven len, ta vou ka bichalel lenge iek braduimari ta glamno te mukliarel len.

21Ta o Del ka avel pinllardo ando Ejipto ta e llene katar o Ejipto ka pinllaren e Devle ande gua llive ta ka cheren kurbano ta ka anen ezgode dine, ka jan sovel e Devleke ta ka cheren len.

22Ta o Ejipto ka avel dukhado e Devletar, ka avel dukhado a ka sastol, ta ka denpe kai o Del, ta ka avel leke zao ta ka sastarel len.

23Ande gua vreme ka avel iek drom katar o Ejipto kai e Asiria ta e asiriura ka den ando Ejipto ta e ejipsiura ande Asiria ta e ejipsiura ka radin e Devleke.

24Ande gua vreme ka aven ande iek than o Israel, o Ejipto ta e Asiria ta ka avel blagosime e phuv,

25soke o Del kai si le sa e zor ka blagosil len ta ka phenel: Blagosime mo foro o Ejipto ta e Asiria kai cherdem la me vastenchar ta o Israel kai si murni.

← Chapter 18 Jump to: Chapter 20 →