Isaiah 65

Romani Ursari 2018 (Biblia Ande Chib Romani)

← Chapter 64 Jump to: Chapter 66 →

1Rodie man gola kai ni puchena mandar, malade man gola kai ni rodena man. E llenenge kai ni ikharena man phendem gia: Kate sem, kate sem.

2Inzardem me va sorro llive karing iek foro kai ni kandel, kai llal katar iek drom kai inai lacho, ta llan pala pire mislura,

3iek foro kai suako sa o vreme dela man joli, kai cherena kurbano ando vostano ta phabarena o taimano upral pe chikle,

4kai achen ande limoria, ta pe thana gurudine nakhen a riat, kai jan mas balikano, ta ande lenge kavie si o pai katar o chiradipe katar e ezgode kai si melale te jampe,

5ta phenen: Achi pe cho than, te na ave pasa mande, soke sem mai blagosime neko tu, von si thuv ande mi joli, iag kai phabol sorro llive.

6Pisime si angla mande, me ni ka achav, lligo ni ka pochinav lenge pe lengo brek,

7pala tumaro bilachipe, gia phenel o Del, ta pala o bilachipe kai cherde tumare papura, kai phabarde o taimano pe burdura, ta pe burdura kusle man, goleke me ka llinav lenge so cherde pe lengo brek.

8Gia phenda o Del: Sargo kana vareko malavel iek krango drakhengo ta phenel: Na chude le, soke blagosipe si ande lete, isto gia ka cherav pala me sluge, ni ka zatriv sa.

9Ka ikanav porodo katar o Jakob, ta katar o Juda kai ka achen leke me burdura ta e llene kai esvirisardem ka gazdarin pe phuv kai ka achel lenge ta me sluge ka zivin kote.

10Ta o Saron ka pherdol bakre, ta ande umal katar o Akor ka avel e stoka guruvengi me foroke kai rodel man.

11A tumen kai muken e Devle, kai bristaren tumen katar mo santo burdo, kai thoven sinia e Gadeke ta den pipe e Menieke,

12i me ka dav tumen kai o jarni ta sa tumen ka den changenchar te chinen tumaro soro, soke ikhardem ta ni asunden, diem orba ta ni asunden, cherden o bilachipe angla mande ta esvirisarden so inai mange drago.

13Goleke, gia phenda o Del o Gazda: Me sluge ka jan, a tumen ka nakhen bok, me sluge ka pien, a tumenge ka avel trus, me sluge ka veselinpe, a tumenge ka avel lallao,

14me sluge ka llilaben e liea veselimatar, a tumen ka roven dukhatar katar tumaro lio, ta ka kukin pala o phagipe katar tumaro duo.

15Tumen ka muken te proketin tumaro anav me sluge ta o Del ka mundarel tut ta pe slugenge ka thovel aver anav.

16Ko mangela te avel blagosime pe phuv, o Del katar o chachipe ka blagosil le, a ko jala sovel pe phuv, po del katar o chachipe ka jal sovel, soke e purvo zalbe ka aven bristarde, ta ka aven ucharde katar me akha.

17Soke me ka cherav nevo miloso ta nevi phuv, ta katar so saia omanglal ka avel bristardo, ta ni ka avel a ios ande mislura.

18Ka veselintumen ta ka avel dragostia ostade e ezgode kai me cherdem, soke me anav ando Jerusalem e veselia, ta e dragostia leke foroke.

19Ta ka veseliu man pala o Jerusalem ta ka avel mange dragostia pala mo foro, ta nikada ios ni ka asundol andre roipe ni avazi kai rovel.

20Ni ka avel kote minono kai ka merel llivesengo, ni phuro te na resel kai pe bursa, soke o minono ka merel stotina bursengo, ta o lleno bilacho stotina bursengo ka avel proketo.

21Ka vazden chera, ta ka zivin andre, ta thoven te bariol e drak ta ka jan latar.

22Ni ka vazden chera te zivin aver, ta ni ka thoven e simiche te barion te jan aver, soke mo foro ka zivil so zivin e kasta, ta me llene e esvirime ka avel lenge dragostia e ezgode kai cherde pe vastenchar.

23Ni ka radin pala niso, ta ni ka avel len minone ta aven proketime, soke si porodo katar e blagosime e Devletar, ta lengo porodo lenchar.

24Ta mai anglal te mangen, me ka dav lenge anglal, mai anglal te geton pi orba me asundem len.

25O ruv ta o bakro ka arakhen len ande iek than o liono ka jal char sargo o guruv, ta o sap ka jal e chik. Ni ka dukhaven ta ni ka cheren o bilachipe ande mo santo burdo, gia phenda o Del.

← Chapter 64 Jump to: Chapter 66 →