Isaiah 58

Romani Ursari 2018 (Biblia Ande Chib Romani)

← Chapter 57 Jump to: Chapter 59 →

1Urkisar surale, te na ache, vazde cho avazi sargo tuturuga ta phen me foroke kai ni kanden ta e chereke katar o Jakob lengo bilachipe.

2Kai roden man suako llive, ta mangen te pinllaren me droma sargo llene kai cherde o chachipe, ta sargo kana ni mukle o zakono e Devleko, mangen mandar chachune krisa ta mangen te aven pasa o Del.

3¿Soke phenen, allunisardam ta ni thodan amenge sama, peradam amaro lio, ta ni llanglan niso? A tumen ando llive katar tumaro alluno cheren so si tumenge drago ta dukhaven e llenen kai radin tumenge.

4Tumen allunin te maren tumen ta te jan tumen ta te den dumukhenchar dilimaia, na allunin sargo allive, te sai asundol tumaro avazi chak upre.

5¿Gia si o alluno kai me esvirisardem, ando llive te dukhavel po lio o manus, te bangarel po sargo iek ran ta te inzol po prajo? ¿Gua si o alluno, ta llive sukar e Devleke?

6O alluno kai me esvirisardem, si te putara e sole katar o bilachipe, te mukliara o pharipe katar o gazdaripe, ta te mukliara e llenen kai si dukhade ta te phagen suako ezgoda kai phandel.

7Te alluni si te de marrno gole kai si bokhalo, te ane kai cho cher e llenen kai inai len kai te llan, kana ka dikhe vareka bi patavenchar, te uchare le ta te na gurudo katar cho phlal.

8Ondaka cho villelo ka avel sargo e thiarin, ta oma ka dikhol cho braduipe, ta cho chachipe ka llal angla tute, ta e zor e Devleki ka arakhel che zea.

9Ondaka ka mange, ta o Del ka asunel tut, ka moli tut, ta vou ka phenel: Kate sem. Te ikandan tutar e ezgode kai phanden, o silnope, ta e orbe kai ni mol len niso,

10ta te dian cho marrno gole kai si bokhalo ta te chaliare gole kai si dukhado, cho villelo ka klichin ando truniariko ta cho truniariko ka avel sargo ollivesea.

11O Del ka sikavel chuke o drom sa o vreme ta kana ka sukol o pai vou ka phagel chi trus, ta ka del tut zor ande che kokala, ta ka ave sargo o vostano kai chingarel le o pai, ta sargo pai kai likel katar e phuv, pai kai nikada ni getolpe.

12Ta che llene ka vazden o phagipe purano, e zidura katar kai si ande phuv ka vazde kai sea katar e viche e purane, ta ka thoven cho anav gua kai lacharel o putardipe, gua kai lacharel e droma kai phiren len.

13Te na cherea so tu mange, ando sabado kai si mo llive santo, ta te ikhare le dragostia, santo ta blagosime e Devletar, ta te blagosi le ta te na chere so tu mange, ta ni sogo misli tut, ta te na de chire orbe,

14Ondaka ka avel chuke dragostia ando Del ta me ka thovav tut chak upral katar e phuv, ta ka cherav te pravare tut katar e phuv kai mukla cho dad o Jakob, soke o Del phenda le.

← Chapter 57 Jump to: Chapter 59 →