Judges 19

Romani Baltic Latin (Biblija - Pe Baltitko Romani čib (Romanes) 2019)

← Chapter 18 Jump to: Chapter 20 →

1Dre dolé dyvesá, kiéli na sys pe Izrailjo kralís, dživdiá jekh Lievito pe Jefriemóskire-bergákiro zgiiben. Jov lyjá péske bisovlahakirja džuvliá (naložnica) Vifliejemostyr dre Judéia.

2Léskiri naložnica na sys čačuný léske [kosciape lésa] i gijá péske léstyr dro péskire-dadéskiro kher dro Judejákiro Vifliejémo, i sys odój štar čhoná.

3Lákiro rom uštyjá i gijá pal láte, sob (kaj) te rakirél ke lákiro iló i te riskirél la ke pe. Lésa sys léskiro dynári (sluga) i duj osly (miegárja). Joj zalydžijá les dre péskire-dadéskiro kher.

4Adalé terné-džuvliákiro dad, dykhí les, radymása strenindia les, i urikirdia les léskiro sastro, terné-džuvliákiro dad. I sys jov léste trin dyvesá; jone xané i piné, i rat'kirde odój.

5Pe štárto dyvés jone uštyné pe zlóko, i jov uštyjá, sob (kaj) te džal. I phendiá terné-džuvliákiro dad péskire ziatjoske: “Zorjakir tyró iló kotere marésa i tén'či (potom) tumé džána.”

6Jone jačnépe, i dujdžiné khetané xané i piné. I phendiá terné-džuvliákiro dad odolé manušéske: “Jačpe iščo (inké) pe rat, i mek te poradynelpe tyró iló.”

7Odová manúš uštyi sys, sob (kaj) te džal, ne léskiro sastro umangdia les, i jov nevés (znoko) rat'kirdia odój.

8Pe pándžto dyvés uštyjá jov pe zlóko, sob (kaj) te džal. I phendiá odolé terné – džuvliákiro dad: “Zorjakir tyró iló marésa, i užakiren, paka prodžála dyvés.” I dujdžiné xané jone.

9I uštyjá odová manúš, sob (kaj) te džal, kokoró jov, léskiri naložnica i léskiro dynári. I phendiá léske léskiro sastro, terné-džuvliákiro dad: “Ĥáda, dyvés gijá ke bevel', rat'kiren adái, me mangáva; ĥáda, dyveseske syg kónco (jagóro), rat'kir adái, mek te poradynelpe tyró iló; atasiá pe zlóko (ránko) uštena dre tumaró drom i džása dre kher tyró.”

10Ne lákiro rom na zdyjape pe léskiri godý te rat'kirel, uštyjá i gijá; i javdiá ke Iievuso, so kakaná isyn Jerusalimo; lésa sys duj nav'iučyna osly (miegárja) i léskiri naložnica lésa.

11Kiéli jone sys pašýl Iievuso, dyvés drieván syg progijá. I phendiá dynári péskire xuláske: “Zadžasa dre davá fóro Iievusiejengiro i rat'kirasa dre léste.”

12Léskiro xuláj phendiá léske: “Nad, na džása dro javire-rodoskiro fóro, savé isyn na Izrailjoskire čhavéndyr, ne džása ke Givá.”

13I phendiá péskire dynaríske: “Dodžasa ke jekh dolé šteténdyr i rat'kirasa dre Givá, ci dre Ráma.”

14I giné, i džánas, i ĥaradyja kham pašýl Vieniaminoskiri Givá.

15I riskirdé jone odorík, sob (kaj) te džán te rat'kiren dre Givá. I javdiá jov, i bestiá pe vulíca (gása) dro fóro; ne nikón na khardiá len dre kher te rat'kiren.

16I ĥáda, džála jekh phuró péskire butiátyr feldatyr, bel'veliakiro; jov rodosa sys Jefriemóskire bergátyr i dživdiá ke Givá. Dalé štetoskire manušá sys Vieniaminóskire čhavé.

17Jov ĥazdyjá péskire jakhá, dykhciá manušés, savó gijá pir foróskiri gása. I phendiá phuró: “Karik tu džása? I katýr tu javdián?”

18Jov phendiá léske: “Ame džása Judejákire Vifliejemostyr ke Jefriemóskiri bérga, odothýr me; me psirdjom dro Vifliejémo Judejákiro, a kakaná me džáva ke Ráskire-Devléskiro Kher; i nikón na kharéla man dro kher;

19aménde isyn i phus, i vaš amaré oslenge xabén; adiáke-pac' maró i mol (vino) vaš mánge i vaš tyré pisharicake i vaš adalé dynaríske, savó isyn tyré dynar'jende; ni dro so nane nauhtylyben.”

20Phuró phendiá léske: “Jav nadieimo: saró tyró nauhtylyben te javél pe mánde; jekh so na rat'kir pe vulíca (gása).”

21I zalydžijá les dre péskiro kher, i dyjá léskire oslenge xabén, a kokoré jone obmorde péskire ĥerá, i xané, i piné.

22Tedy, syr jone obradyndle péskire ile, ĥáda, foróskire manušá, rozmekne manušá, zauhtylde kher, griukindle dre vudará i rakirdé phureske, kheréskire xuláske: “Vylydža manušés, savó zagijá dre tyró kher, ame ĥaljovasa les.”

23Kheréskiro xuláj vygijá ke jov i phendiá léske: “Nad, miré pšála, na kerén fuipén, kiéli adavá manúš zagijá dro miro kher, na kerén davá dylnypén;

24ĥáda, mánde isyn napaloromitko čhaj, i léste naložnica, vylydžava me len, len len i kerén lénca, so tuménge trej; adalé manušésa na kerén davá dylnypén.”

25Ne jone na kamlé te šunén les. Tedy rom lyjá peskirjá naložnica i vylydžijá la ke jone pe gása. Jone udžinde la i sandlepe látyr sarí rat ke ránko. I otmekhne la pe ránko.

26I javdiá džuvlý angíl ránko, i pyjá pašýl adalé – manušéskire kheréskire vudará, savéste isys lákiro xulái, i pasijá ke svéto.

27Lákiro xuláj uštyi rankosa, otphandia kheréskire vudará i vygijá, sob (kaj) te džal dre péskiro drom: i ĥáda, léskiri naložnica sys pašty pašýl kheréskire vudará, i lákire vastá pe progo.

28Jov phendiá láke: “Uštý, javén.” Ne otphenybén na sys, pal-dová so joj myjá. Jov čhudiá la pe osloste, uštyjá i gijá dro péskiro štéto.

29Javi dro péskiro kher, lyjá čhuri, i, lyjá peskirjá naložnica, rosčhindia la pir lákire koterá pe dešudúj pašá i bičhadiá dre saré Izrailjoskire rigá.

30Kažno (sváko), kon dykhciá davá, rakirdiá: “Na sys i na sys bicialó dasavo, syr davá isyn, syr Izrailjoskire čhavé vyginé dolé dyveséstyr Jegiptóskire phuvjátyr ke davá dyvés. Dykhén pe davá, obrakiren i phenén.”

← Chapter 18 Jump to: Chapter 20 →