Judges 7

Romani Baltic Latin (Biblija - Pe Baltitko Romani čib (Romanes) 2019)

← Chapter 6 Jump to: Chapter 8 →

1Iierovaalo, jov isyn i Giedieóno, uštyi tasiárles (ránes) pe zlóko i saré manušá, savé sys lésa, i jone terdiné stanósa pašé Xarodoskiri sýgno rékica (lenorí); Madiamoskiro stáno sys léstyr ke paš-rat (sieviero) pašé Morjoskiri bérgica dre dólo.

2I phendiá Raj Devél Giedieonoske: “Manušén túsa isyn drieván but, na mogináva Me te otdav Madianitianen dre léngire vastá, sob (kaj) te na zaphutjol angíl Mánde Izrailjo i te na phenél: ‘Miro vast zrakhciá man,’

3i adiáke de te džinén (ob'iavin) dre šunybén manušénge i phen: ‘Kon daréla i isyn namurškano, odová mek te risjol i te džal pale bergátyr Galaadostyr.’” I risiné bište duj tysjoncy manušén, a deš tysjoncy jačnépe.

4I phendiá Raj Devél Giedieonoske: “Usajékh isyn but manušá; lýdža len ke paní, odój Me vykedava len túke: pal konéste Me phenáva; mek te džal túsa, odová i mek te džal túsa; a pal konéste phenáva túke, naštý te džal túsa, odová mek i te na džal.”

5Jov jandiá manušén ke paní. I phendiá Raj Devél Giedieonoske: “Kon javéla te lokčynel paní péskire čibása, syr lokčynela džukel, odolés čhuv dre rig, adiáke-pac' i odolén sarén, savé javéna te bandjon pe péskire čangá i te p'jen.”

6I sys manušá, savé lokčyndle péskire mósa vastéstyr trinšelá manušá; saré palatuné manušá bandjonas pe péskire čangá te p'jen paní.

7I phendiá Raj Devél Giedieonoske: “Triné šelenca manušénca, savé lokčyndle paní, Me zrakháva tumen i otdáva Madianitianen dre tumaré vastá, a saré javír manušá mek te džán, kažno pe péskiro štéto.”

8I lyné jone skedynó xabén manušéndyr péske i léngire rógi (truby), i otmekhcia Giedieóno sarén Izrail'tianén pir šátry, i urikirdia péste trinšelá manušén; Madiamoskiro stáno sys léste telál pe dólo.

9Dre doiá rat phendiá léske Raj Devél: “Uštý, zadžá dre stáno, Me otdáva les dre tyré vastá;

10kóli tu daresa te džas jekhdžinó, tedy džá dro stáno tu i Fura, tyró dynári;

11i šunesa, so rakiréna, i tedy jačéna zoraledýr tyré vastá, i džása dre stáno.” I gijá telé jov i Fura, léskiro dynári, ke sámo jagóro (krajo) polko, savó sys dro stáno.

12Madianitiani i Amalikitiani, i saré vastokoskire manušá, terdiné pe dólo adakicyk but, syr saranča; vierbliudenge lengirenge na sys ginybén, len sys but, syr práho pe morjoskiro (derjavéskiro) brégo.

13Giedieóno javdiá. I, ĥáda, jekh rosphenéla javireske sunó, i rakiréla: “Dykhcjom suné me, sýrby krenglo labo giveskiro maró katyndiape pir stáno Madiamoskiro, i podkatyndiape ke šátra, i pekadiá dre láte adiáke, so joj pyjá, piriskirdia la, i šátra rospyjape.”

14Javír phendiá dre otphenybén léske: “Davá nane so javír so, syr kurtála Giedieonoskire-čhaveskiri Izrail'tianinoskiri; otdyjá Devél dre léskire vastá Madianitianen i saró stáno.”

15Giedieóno šundiá suneskiro rosphenyben i léskiro piriphenyben, pomangdiape Ráske-Devléske, i risijá dre Izrailjoskiro stáno, i phendiá: “Uštén! Otdyjá Raj Devél dre tumaré vastá Madiamoskiro stáno.”

16I roskerdiá (podielindia) trinšelá manušén pe trin otriády, i dyjá sarénge lénge dre vastá rógi (truby) i čhučé khoré (kuvšyny), i dre khoré momolytka (svietil'niki).

17I phendiá lénge: “Dykhén pe mánde i kerén dová-pac' (dová sámo); ĥáda, me poddžava ke stáno, i so javáva te keráv, dová i tumé kerén;

18kiéli me i manušá, savé mánca zatrubinasa rogosa, trubinen i tumé rogénca tumarenca pašýl péskiro stáno i godlen: ‘Devléskiri kurtála i Giedieonoskiri!’”

19I podgíia Giedieóno i šel manušén lésa ke stáno, dre anglypén (načalo) maškiratuny stréga (straža), i rozdžingade rakhibnar'jen, a jone naĥara čhudé rakhibnar'jen i zatrubindle rogénca, i rozmarde khoré (kuvšyny), savé sys dre léngire vastá.

20I zatrubinde saré trin otriády rogénca, i rozmarde khoré, i rikirde dro zérvo (liévo) péskiro vast momolytka (svietil'niki), a dro čačó vast rógi, i trubindle, i godlyne: “Devléskiri kurtála i Giedieonoskiri!

21I kažno (sváko) manúš sys terdó pe péskiro štéto pašýl stáno; i lyné te prastan Madianitiani dro saró stáno, i godlyne, i obrisine dro našyben.

22Kiéli trinšelá manušá trubindle rogénca, obriskirdia Raj Devél jekheskiri kurtála pe javiréste dro saró stáno, i prastándyja opolčenijo (otriado) ke Biefšyta ke Carera, ke Avielmieholoskire rigá, nádur Tabafatyr.

23I khardé ke pe Izrail'tiáni Niefalimoskire rodóstyr, Asiroskire i saré Manasijáskire rodóstyr, i tradynepe pal Madianitianende.

24Giedieóno bičhadiá manušén pe sarí Jefriemóskiri bérga te phenén: “Vydžán gil Madianitianenge, i piriuhtylen léndyr piriprava (pirigiiben) pir paní ke Biefvara i Iordáno.” I skedynépe saré Jefriemliani, i piriuhtylde piripravy pir paní ke Biefvara i Iordáno.

25I uhtyldé jone dujén Madiamskone thagar'jen: Orivos i Zivos i domardé Orivos dre Cur-Orivo, a Zivos dre Jekiev-Zivo i tradynepe pal Madianitianende: šeré Orivoskiro i Zivoskiro jandlé ke Giedieóno pal Iordáno.

← Chapter 6 Jump to: Chapter 8 →