Joshua 10 — Shan

1မိူဝ်ႈဢၼ် ဢတေႃးၼီႉၸေႇတႅၵ်ႉ ၶုၼ်လူင် ယေႇရူႉသလႅမ်ႇ ငိၼ်းလွင်ႈဢၼ် ယေႃးသူႉ တိုၵ်းဢဝ်ဝဵင်း ဢႃႇဢီႉ လႄႈ ယႃႉၽဵဝ်ႈပႅတ်ႈမူတ်းမူတ်းသဵင်ႈသဵင်ႈဢၼ်ဝႃႈႁဵတ်းတီႈဝဵင်း ဢႃႇဢီႉ တင်းၶုၼ်လူင်မၼ်း မိူၼ်ၸိူဝ်ႉၼင်ႇဢၼ်ႁဵတ်းတီႈဝဵင်း ယေႇရီႉၶူဝ်း တင်းၶုၼ်လူင်မၼ်းၼၼ်ႉ ဢိၵ်ႇတင်းလွင်ႈဢၼ်ၵူၼ်းဝဵင်း ၵီႉပွင်ႇ ၸိူဝ်းၼၼ်ႉ ႁဵတ်းမိၵ်ႉသႃႇႁႃယႃႉတၢင်းဢၼ်ထုၵ်ႇၵၼ်တင်းၵူၼ်းမဵဝ်း ဢီႉသရေႇလႃႉ တင်းလၢႆလႄႈ ယူႇလူၺ်ႈၵၼ်တင်းၶဝ်ၼၼ်ႉၸိုင်၊-

2ၶဝ်ၵူဝ်ႁႄၼႃႇလူင်လၢင်ၵွပ်ႈပိူဝ်ႈဢၼ်ဝဵင်း ၵီႉပွင်ႇ ၼၼ်ႉ ပဵၼ်ဝဵင်းဢၼ်ယႂ်ႇၼႃႇ မိူၼ်ၸိူဝ်ႉၼင်ႇဝဵင်းၸဝ်ႈၼၼ်ႉ ဢိၵ်ႇတင်း ၵွပ်ႈပိူဝ်ႈဢၼ်ယႂ်ႇၼႃႇသေဝဵင်း ဢႃႇဢီႉ လႄႈ ၵူၼ်းၸၢႆးဝဵင်းၼၼ်ႉၵႃႈမီး ပဵၼ်ၵူၼ်းဢၼ်ႁႅင်းယႂ်ႇၼႃႇၼၼ်ႉဢေႃႈ။-

3မိူဝ်ႈၼၼ်ႉ ဢတေႃးၼီႉၸေႇတႅၵ်ႉ ၶုၼ်လူင် ယေႇရူႉသလႅမ်ႇ ပွႆႇၸႂ်ႉၸူးၵႃႈတီႈ ႁေႃႇႁၢမ်ႇ ၶုၼ်လူင် ႁေႇပြုၼ်ႇ၊ ပီႉရမ်ႇ ၶုၼ်လူင် ယႃႇမုတ်ႉ၊ ယႃႇၽျႃႉ ၶုၼ်လူင် လႃႇၶီႉသႃႉ၊ တေႇပီႉရႃႉ ၶုၼ်လူင် ဢေႇၵလုၼ်ႇ ၸိူဝ်းၼၼ်ႉလႄႈဝႃႈ၊-

4ဢွၼ်ၵၼ်မႃးၵႃႈတီႈၵဝ်လႄႈ ၸွႆႈထႅမ်ၵဝ်ႁႂ်ႈလႆႈတိုၵ်းတေႃးယႃႉပႅတ်ႈဝဵင်း ၵီႉပွင်ႇ သေၵမ်း။ လွင်ႈမၼ်းၸမ်ႉ ဝဵင်းၼၼ်ႉႁဵတ်းမိၵ်ႉသႃႇႁႃယႃႉတၢင်းဢၼ်ထုၵ်ႇၵၼ်တင်း ယေႃးသူႉ တင်းၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉယဝ်ႉ၊ ဝႃႈၼင်ႇၼႆလႄႈ၊-

5ၶုၼ်လူင် ဢႃႇမေႃးရီႉ ႁႃႈပႃးဢၼ်ဝႃႈ ၶုၼ်လူင် ယေႇရူႉသလႅမ်ႇ ၊ ၶုၼ်လူင် ႁေႇပြုၼ်ႇ ၊ ၶုၼ်လူင် ယႃႇမုတ်ႉ ၊ ၶုၼ်လူင် လႃႇၶီႉသႃႉ ၊ ၶုၼ်လူင် ဢေႇၵလုၼ်ႇ ၸိူဝ်းၼၼ်ႉ ၸူႉၵၼ်တုမ်ၵၼ်လႄႈ ပႃးဢဝ်တင်းပူဝ်ႇပႃႇ ၵူၼ်းသိုၵ်းၶဝ်ၵႃႈမီးၶီႇသိုၵ်းမႃးလႄႈ ၶျႃးတပ်ႉၵႃႈတီႈၽၢႆႇၼႃႈဝဵင်း ၵီႉပွင်ႇ သေလႄႈ တိုၵ်းတေႃးဢေႃႈ။-

6ၵူၼ်းဝဵင်း ၵီႉပွင်ႇ ၸိူဝ်းၼၼ်ႉ ပွႆႇၸႂ်ႉၸူးၵႃႈတီႈ ယေႃးသူႉ ၵႃႈတီႈတပ်ႉၵႃႈၼႂ်း ၵီႉလႃႉၵႃႇလႃႉ လႄႈ လဝ်ႊလၢတ်ႈလႄႈဝႃႈ၊ ယႃႇပေႁႂ်ႈမိုဝ်းၸဝ်ႈႁဝ်း ႁဵတ်းထိူင်းႁဵတ်းၼၢၼ်းတီႈၶႃႈၸဝ်ႈႁဝ်းၶဝ်သေၵမ်းတီႈၶႃႈ၊ မႃးၶၼ်ၶၼ်ၽႂ်းၽႂ်းသေလႄႈ ၸွႆႈထႅမ်ၵႄႇသႄႇဢဝ်ၶႃႈၸဝ်ႈႁဝ်းၶဝ်သေၵမ်းတီႈၶႃႈ၊ ၶုၼ်လူင် ဢႃႇမေႃးရီႉ ၵႃႈဢၼ်ယူႇၵႃႈၼိူဝ်ႁၢၼ်ႉလွႆၸိူဝ်းၼၼ်ႉ ၸူႉၵၼ်တုမ်ၵၼ်ႁႂ်ႈလႆႈတိုၵ်းတေႃးၶႃႈၸဝ်ႈႁဝ်းၶဝ်တီႈၶႃႈယဝ်ႉ၊ ဝႃႈၼင်ႇၼႆဢေႃႈ။-

7ယေႃးသူႉ ၵေႃႈဢိၵ်ႇတင်းၶဝ်ၸိူဝ်းဢၼ်ၸၢင်ႈမေႃဢမူႉသိုၵ်း တင်းၵူၼ်းသိုၵ်းဢၼ်ႁႅင်းယႂ်ႇၼႃႇတင်းသဵင်ႈတင်းလူင်ၼၼ်ႉ ဢွၼ်ၵၼ်လုၵ်ႉသေၵႃႈတီႈဝဵင်း ၵီႉလႃႉၵႃႇလႃႉ ၶိုၼ်ႈၵႂႃႇဢေႃႈ။-

8ထႃႇဝရႃႉၽြႃးမီးဢမိင်ႉတီႈ ယေႃးသူႉ လႄႈဝႃႈ၊ ယႃႇပေၵူဝ်ပေႁႄၶဝ်။ ၵဝ်တၵ်းဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းမႂ်းဢေႃႈ။ ၽူႈလႂ်သေၵေႃႉသေၵူၼ်း တၵ်းဢမ်ႇၸုၵ်းၶၢမ်ႇယူႇၵႃႈတီႈၽၢႆႇၼႃႈမႂ်းလႆႈ၊ ဝႃႈၼင်ႇၼႆဢေႃႈ။-

9ယေႃးသူႉ ၵိုင်ႉၵၢင်ႉႁူပ်ႉထူပ်းတိုၵ်းတေႃးၶဝ်ၵမ်းလဵဝ် ၵွပ်ႈပိူဝ်ႈဢၼ်မၼ်းလုၵ်ႉသေၵႃႈတီႈ ၵီႉလႃႉၵႃႇလႃႉ ၶီႇၵႂႃႇတင်းၶိုၼ်းၼၼ်ႉသေယဝ်ႉ၊-

10ထႃႇဝရႃႉၽြႃးႁႂ်ႈၶဝ်တူၵ်းသုမ်းၵႃႈတီႈ ၽၢႆႇၼႃႈၵူၼ်းမဵဝ်း ဢီႉသရေႇလႃႉ တင်းလၢႆလႄႈ ႁဵတ်းတၢင်းဢၼ်ဢဝ်တၢႆဢၼ်ယႂ်ႇၼႃႇဢဝ်ၶဝ်တၢႆ ၵႃႈတီႈႁိမ်းဝဵင်း ၵီႉပွင်ႇ သေလႄႈ လိုပ်ႈၸွမ်းလမ်းၸွမ်းၶဝ် ၵႃႈၼႂ်းသဵၼ်ႈတၢင်းဢၼ်ၶိုၼ်ႈၸူးၵႃႈတီႈဝဵင်း ပေႇသေႃႇရုၼ်ႇ ၼၼ်ႉလႄႈ တိုၵ်းတေႃးယႃႉပႅတ်ႈတေႃႇထိုင်ႁွတ်ႈ ဝဵင်း ဢၸေႇၵႃႇ ဢိၵ်ႇတင်းၵႃႈတီႈဝဵင်း မိၵ်ႉၵတႃႇ ပုၼ်ႉဢေႃႈ။-

11ၼႂ်းမိူဝ်ႈဢၼ်ၶဝ်ၼၼ်ႉဢွၵ်ႇပၢႆႈသေၵႃႈတီႈၽၢႆႇၼႃႈၵူၼ်းမဵဝ်း ဢီႉသရေႇလႃႉ တင်းလၢႆလႄႈ ယင်းတိုၵ်ႉမီးယူႇၵႃႈၼႂ်းသဵၼ်ႈတၢင်းဢၼ် လူင်းၸူးဝဵင်း ပေႇသေႃႇရုၼ်ႇ ယူႇၼၼ်ႉၸိုင်၊ ထႃႇဝရႃႉၽြႃးဢဝ်မၢၵ်ႇႁဵပ်းဢၼ်ယႂ်ႇၼႃႇ ၶျႃးသေၵႃႈၼိူဝ်ၵၢင်ႁၢဝ်တူၵ်းလူင်းသႂ်ႇ ၵႃႈၼိူဝ်ၶဝ်တေႃႇထိုင်ႁွတ်ႈဝဵင်း ဢၸေႇၵႃႇ လႄႈ ၶဝ်ၼၼ်ႉတၢႆဢေႃႈ။ ၶဝ်ၸိူဝ်းဢၼ်တၢႆလူၺ်ႈမၢၵ်ႇႁဵပ်းၸိူဝ်းၼၼ်ႉ ယဵင်ႈၶႅၼ်းၼမ်ၼႃႇသေ ၶဝ်ၸိူဝ်းဢၼ်ၵူၼ်းမဵဝ်း ဢီႉသရေႇလႃႉ တင်းလၢႆဢဝ်တၢႆလူၺ်ႈလၢပ်ႇလူၺ်ႈလႅဝ်းၼၼ်ႉဢေႃႈ။-

12ၼႂ်းဝၼ်းဢၼ်ထႃႇဝရႃႉၽြႃး ဢဝ်ၵူၼ်း ဢႃႇမေႃးရီႉ ၸိူဝ်းၼၼ်ႉဢၢပ်ႈပၼ်တီႈၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉ၊ ယေႃးသူႉ သူးတွင်းတီႈထႃႇဝရႃႉၽြႃးသေယဝ်ႉ၊ လၢတ်ႈဢွၵ်ႇသူပ်းသိုဝ်ႈၼႃႈတႂ်ႈတႃၵူၼ်းမဵဝ်း ဢီႉသရေႇလႃႉ တင်းလၢႆလႄႈဝႃႈ၊ ၵၢင်ဝၼ်းဢိူၺ်း၊ မႂ်းယူႇၼိမ်ၼိမ်ၵႃႈၼိူဝ်ဝဵင်း ၵီႉပွင်ႇ လႄႈ၊ လိူၼ်ဢိူၺ်း၊ မႂ်းယူႇၼိမ်ၼိမ်ၵႃႈၼိူဝ်ၶူင်ႈႁူၺ်ႈ ဢႃႇယလုၼ်ႇ တႃႉ၊ ဝႃႈၼင်ႇၼႆလႄႈ၊-

13ၵၢင်ဝၼ်းယူႇၼိမ်ၼိမ်လႄႈ လိူၼ်ၵေႃႈၵိုတ်းသဝ်းယူႇတေႃႇထိုင်ႁွတ်ႈၵူၼ်းမဵဝ်းၶဝ်လႆႈပၼ်တၢမ်ႇဢပႅတ်ႈတီႈရၢၼ်ႇသူႇၶဝ်ၸိူဝ်းၼၼ်ႉ ထၼ်ႈပေႃးယဝ်ႉတူဝ်ႈယဝ်ႉၼၼ်ႉဢေႃႈ။ ဢၼ်တႅမ်ႈဝႆႉမီးယူႇၵႃႈၼႂ်းလိၵ်ႈ ယႃႇသႃႇ ၼၼ်ႉၸမ်ႉ၊ ၵၢင်ဝၼ်းၵိုတ်းသဝ်းယူႇၵႃႈၼႂ်းၵၢင်ၽႃႉၵၢင်ႁၢဝ်လႄႈ ဢမ်ႇႁဵတ်းႁိပ်ႈႁဵတ်းၼႅတ်ႈႁႂ်ႈလႆႈတူၵ်းလႄႈ ယူႇသေဝၼ်းၼိုင်ႈၸမ်ၸမ်ဢေႃႈ၊ ဝႃႈၼင်ႇၼႆယူႇဢမ်ႇၸႂ်ႈႁိုဝ်။-

14ထႃႇဝရႃႉၽြႃးထွမ်ႇဢဝ်ၵႂၢမ်းၵူၼ်းလႄႈ ၵႃႈပူၼ်ႉမႃးဢမ်ႇတွၼ်ႉပဵၼ်ဝၼ်းၸိူဝ်ႉၼင်ႇၼၼ်သေဝၼ်း။ လိုၼ်းၼၼ်ႉၵေႃႈဢမ်ႇပဵၼ်။ လွင်ႈမၼ်းၸမ်ႉ ထႃႇဝရႃႉၽြႃးယူႇၽၢႆႇမဵဝ်း ဢီႉသရေႇလႃႉ သေလႄႈတိုၵ်းသိုၵ်းဢေႃႈ။-

15လိုၼ်းၼၼ်ႉ ယေႃးသူႉ ဢိၵ်ႇတင်းၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉ ၶိုၼ်းမိူဝ်းၸူးၵႃႈတီႈတပ်ႉ ၵီႉလႃႉၵႃႇလႃႉ သေဢေႃႈ။

16ၶုၼ်လူင်ႁႃႈပႃးၼၼ်ႉဢွၵ်ႇပၢႆႈလႄႈ တဵတ်ႇမႅပ်ႉယူႇၵႃႈၼႂ်းႁူးထမ်ႈ မိၵ်ႉၵတႃႇ ဢေႃႈ။-

17ပိူၼ်ႈလဝ်ႊလၢတ်ႈတီႈ ယေႃးသူႉ လႄႈဝႃႈ၊ လႆႈထူပ်းႁၼ်ၶုၼ်လူင်ႁႃႈပႃးၼၼ်ႉ တဵတ်ႇမႅပ်ႉယူႇၵႃႈၼႂ်းႁူးထမ်ႈ မိၵ်ႉၵတႃႇ ၼၼ်ႉတီႈၶႃႈယဝ်ႉ၊ ဝႃႈၼင်ႇၼႆသေယဝ်ႉ၊-

18ယေႃးသူႉ သင်ႇလၢတ်ႈလႄႈဝႃႈ၊ ဢဝ်မၢၵ်ႇႁိၼ်ဢၼ်ယႂ်ႇဢၼ်လူင်ၵိင်ႈသႂ်ႇဝႆႉၵႃႈတီႈပၢၵ်ႇထမ်ႈၼၼ်ႉလႄႈ ဝႆႉၵူၼ်းၵႃႈတီႈႁိမ်းမၼ်း ႁႂ်ႈလႆႈပႂ်ႉယူႇတႃႉ။-

19သူၸမ်ႉ၊ ယႃႇပေၵိုတ်းယူႇသဝ်းယူႇ။ ဢွၼ်ၵၼ်လိုပ်ႈၸွမ်းလမ်းၸွမ်းရၢၼ်ႇသူႇသူလႄႈ တိုၵ်းတေႃးယႃႉပႅတ်ႈၵႃႈဢၼ်တူၵ်းလိုၼ်းလင်သုတ်းပိူၼ်ႈၸိူဝ်းၼၼ်ႉတႃႉ။ ယႃႇပေႁႂ်ႈၶဝ်လႆႈၶဝ်ႈၵႃႈၼႂ်းဝဵင်းၶဝ်။ ထႃႇဝရႃႉၽြႃး ၽြႃးပဵၼ်ၸဝ်ႈသူ ဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းသူယဝ်ႉ၊ ဝႃႈၼင်ႇၼႆဢေႃႈ။-

20မိူဝ်ႈဢၼ် ယေႃးသူႉ ဢိၵ်ႇတင်းၵူၼ်းမဵဝ်း ဢီႉသရေႇလႃႉ တင်းလၢႆ ႁဵတ်းတၢင်းဢၼ်ဢဝ်တၢႆဢၼ်ယႂ်ႇၼႃႇလူင်လၢင်ဢဝ်ၶဝ်တၢႆယဝ်ႉတူဝ်ႈယဝ်ႉ တေႃႇထိုင်ႁွတ်ႈၶဝ်ထၼ်ႈပေႃးလႆႈၶၢမ်ႇတၢင်းဢၼ်ပႄႇၽဵဝ်ႈပႅတ်ႈၼၼ်ႉလႄႈ ၶဝ်ၸိူဝ်းဢၼ် ယင်းၵိုတ်းယင်းၵျၢၼ်ႇၼၼ်ႉ လႆႈၶဝ်ႈယူႇၼႂ်းဝဵင်းဢၼ်မၼ်ႈၶိူင်ႇတင်းလၢႆယဝ်ႉၼၼ်ႉၸိုင်၊-

21ၵူၼ်းတင်းသဵင်ႈတင်းလူင်ၼၼ်ႉ ဢွၼ်ၵၼ်ၶိုၼ်းမႃးၸူးၵႃႈတီႈတပ်ႉတီႈ ယေႃးသူႉ ၵႃႈတီႈ မိၵ်ႉၵတႃႇ ၼၼ်ႉၼိမ်ၼိမ်လီလီဢေႃႈ။ ၽူႈလႂ်သေၵေႃႉသေၵူၼ်းဢမ်ႇလႆႈမႅပ်ႈလိၼ်ႉၸူးတီႈၵူၼ်းမဵဝ်း ဢီႉသရေႇလႃႉ သေၵေႃႉသေၵူၼ်း။-

22မိူဝ်ႈၼၼ်ႉ ယေႃးသူႉ ၵေႃႈသင်ႇလၢတ်ႈလႄႈဝႃႈ၊ ၽုၺ်ႇပၢၵ်ႇထမ်ႈၼၼ်ႉသေလႄႈ ဢဝ်ၶုၼ်လူင်ႁႃႈပႃးၼၼ်ႉဢွၵ်ႇသေၵႃႈၼႂ်းထမ်ႈလႄႈ ဢဝ်မႃးၵႃႈတီႈၵဝ်ၼႆႉတႃႉ၊ ဝႃႈၼင်ႇၼႆလႄႈ၊-

23ၶဝ်ႁဵတ်းၸိူဝ်ႉၼင်ႇၼၼ်လႄႈ ဢဝ်ၶုၼ်လူင်ႁႃႈပႃးၼၼ်ႉ ဢၼ်ဝႃႈၶုၼ်လူင် ယေႇရူႉသလႅမ်ႇ ၊ ၶုၼ်လူင် ႁေႇပြုၼ်ႇ ၊ ၶုၼ်လူင် ယႃႇမုတ်ႉ ၊ ၶုၼ်လူင် လႃႇၶီႉသႃႉ ၊ ၶုၼ်လူင် ဢေႇၵလုၼ်ႇ ၸိူဝ်းၼၼ်ႉဢွၵ်ႇသေၵႃႈၼႂ်းထမ်ႈမႃးတီႈမၼ်းဢေႃႈ။-

24မိူဝ်ႈဢၼ်ၶဝ်ဢဝ်ၶုၼ်လူင်ၸိူဝ်းၼၼ်ႉဢွၵ်ႇမႃးၸူးၵႃႈတီႈ ယေႃးသူႉ ယဝ်ႉၼၼ်ႉၸိုင်၊ ယေႃးသူႉ ႁွင်ႉဢဝ်ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် မႃးသေလႄႈလၢတ်ႈတီႈၶုၼ်ပူဝ်ႇဢၼ်ၶီႇသိုၵ်းလူၺ်ႈၵၼ်တင်းမၼ်းၸိူဝ်းၼၼ်ႉလႄႈဝႃႈ၊ ဢွၼ်ၵၼ်သုတ်ႉၸပ်းသုတ်ႉၸူးသေလႄႈ ဢဝ်တိၼ်သူတၢင်ႇသႂ်ႇၵႃႈၼိူဝ်ၵွင်ႇၵေႃႈၶုၼ်လူင်ၸိူဝ်းၼႆႉတႃႉ၊ ဝႃႈၼင်ႇၼႆလႄႈ ၶဝ်ဢွၼ်ၵၼ်သုတ်ႉၸပ်းသုတ်ႉၸူးလႄႈ ဢဝ်တိၼ်ၶဝ်တၢင်ႇသႂ်ႇၵႃႈၼိူဝ်ၵွင်ႇၵေႃႈၶဝ်ၼၼ်ႉဢေႃႈ။-

25ယေႃးသူႉ ၵေႃႈသမ်ႉလၢတ်ႈတီႈၶဝ်လႄႈဝႃႈ၊ ယႃႇပေၵူဝ်ပေႁႄ။ ယႃႇပေၸႂ်လူႉ။ ဢဝ်ႁႅင်းလႄႈမီးၸႂ်ဢၼ်ႁတ်းႁၢၼ်တႃႉ။ လွင်ႈမၼ်းၸမ်ႉ ထႃႇဝရႃႉၽြႃးတၵ်းႁဵတ်းၸိူဝ်ႉၼင်ႇၼႆတီႈရၢၼ်ႇသူႇသူ ၵႃႈဢၼ်သူလႆႈတိုၵ်းတေႃးၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊-

26လိုၼ်းၼၼ်ႉ ယေႃးသူႉ ပေႃႉတႅင်းၶဝ်ၼၼ်ႉလႄႈ ဢဝ်ၶဝ်တၢႆသေယဝ်ႉ၊ ဢဝ်ႁွႆႈဝႆႉၵႃႈတီႈတူၼ်ႈမႆႉႁႃႈတူၼ်ႈဢေႃႈ။ ၶဝ်ႁွႆႈဝႆႉၵႃႈတီႈတူၼ်ႈမႆႉၸိူဝ်းၼၼ်ႉတေႃႇထိုင်ႁွတ်ႈၶိင်ႇႁူဝ်ၶမ်ႈလႄႈ၊-

27မိူဝ်ႈဢၼ်ထိုင်ႁွတ်ႈၶိင်ႇဢၼ်ၵၢင်ဝၼ်းတူၵ်းၼၼ်ႉၸိုင်၊ ယေႃးသူႉ မီးဢမိင်ႉလႄႈဢွၼ်ၵၼ်ဢဝ်ၶဝ်ၼၼ်ႉ ၶျႃးတူၵ်းၵႃႈတီႈတူၼ်ႈမႆႉသေယဝ်ႉ၊ ဢဝ်ၶဝ်ပႅတ်ႈသႂ်ႇဝႆႉၵႃႈၼႂ်းထမ်ႈ တီႈဢၼ်ၶဝ်တဵတ်ႇမႅပ်ႉယူႇၼၼ်ႉသေလႄႈ ဢဝ်မၢၵ်ႇႁိၼ်ဢၼ်ယႂ်ႇဢၼ်လူင်ၵွင်သႂ်ႇဝႆႉၵႃႈတီႈပၢၵ်ႇထမ်ႈၼၼ်ႉလႄႈ မီးယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။

28ၼႂ်းဝၼ်းၼၼ်ႉ ယေႃးသူႉ တိုၵ်းဢဝ်ဝဵင်း မိၵ်ႉၵတႃႇ လႄႈ တိုၵ်းတေႃးယႃႉပႅတ်ႈဝဵင်းၼၼ်ႉ ဢိၵ်ႇတင်းၶုၼ်လူင်မၼ်း လူၺ်ႈၶူမ်းလၢပ်ႇၶူမ်းလႅဝ်းသေလႄႈ ယင်းဢမ်ႇႁႂ်ႈလႆႈၵိုတ်းၵျၢၼ်ႇဝႆႉသေၵေႃႉသေၵူၼ်းလႄႈ ယႃႉၽဵဝ်ႈၶဝ် ဢိၵ်ႇတင်းၵႃႈဢၼ်မီးၵႃႈၼႂ်းဝဵင်းၼၼ်ႉၸိူဝ်းၼၼ်ႉပႅတ်ႈသဵင်ႈသဵင်ႈမူတ်းမူတ်းဢေႃႈ။ မၼ်းႁဵတ်းတီႈၶုၼ်လူင် မိၵ်ႉၵတႃႇ မိူၼ်ၸိူဝ်ႉၼင်ႇဢၼ်မၼ်းႁဵတ်းတီႈၶုၼ်လူင် ယေႇရီႉၶူဝ်း ၼၼ်ႉဢေႃႈ။-

29လိုၼ်းၼၼ်ႉ ယေႃးသူႉ ဢိၵ်ႇတင်းၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၼၼ်ႉ ၶီႇဢွၵ်ႇသေၵႃႈတီႈဝဵင်း မိၵ်ႉၵတႃႇ ၼၼ်ႉ ၸူးၵႃႈတီႈဝဵင်း လီႉပၼႃႉ လႄႈ တိုၵ်းတေႃးဝဵင်း လီႉပၼႃႉ ၼၼ်ႉလႄႈ၊-

30ထႃႇဝရႃႉၽြႃးဢဝ်ဝဵင်းၼၼ်ႉ ဢိၵ်ႇတင်းၶုၼ်လူင်မၼ်း ဢၢပ်ႈပၼ်ၵႃႈၼႂ်းမိုဝ်းၵူၼ်းမဵဝ်း ဢီႉသရေႇလႃႉ တင်းလၢႆလႄႈ မၼ်းတိုၵ်းတေႃးယႃႉပႅတ်ႈဝဵင်းၼၼ်ႉ ဢိၵ်ႇတင်းၵူၼ်းၵႃႈဢၼ်မီးၵႃႈၼႂ်းမၼ်းၼၼ်ႉ လူၺ်ႈၶူမ်းလၢပ်ႇၶူမ်းလႅဝ်းလႄႈ ဢမ်ႇႁႂ်ႈလႆႈၵိုတ်းၵျၢၼ်ႇဝႆႉသေၵေႃႉသေၵူၼ်း။ မၼ်းႁဵတ်းတီႈၶုၼ်လူင်ၼၼ်ႉမိူၼ်ၸိူဝ်ႉၼင်ႇဢၼ် မၼ်းႁဵတ်းတီႈၶုၼ်လူင်ဝဵင်း ယေႇရီႉၶူဝ်း ၼၼ်ႉဢေႃႈ။-

31ယေႃးသူႉ ဢိၵ်ႇတင်းၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၼၼ်ႉ သမ်ႉၶီႇဢွၵ်ႇသေၵႃႈတီႈဝဵင်း လီႉပၼႃႉ ၼၼ်ႉၸူးၵႃႈတီႈဝဵင်း လႃႇၶီႉသႃႉ လႄႈၶျႃးတပ်ႉသေယဝ်ႉ၊ တိုၵ်းတေႃးဝဵင်းၼၼ်ႉဢေႃႈ။-

32ထႃႇဝရႃႉၽြႃး ဢဝ်ဝဵင်း လႃႇၶီႉသႃႉ ၼၼ်ႉ ဢၢပ်ႈပၼ်ၵႃႈၼႂ်းမိုဝ်းၵူၼ်းမဵဝ်း ဢီႉသရေႇလႃႉ တင်းလၢႆသေယဝ်ႉ၊ ၼႂ်းဝၼ်းတူႉတီႉယႃႉၼၼ်ႉ မၼ်းလႆႈဝဵင်းၼၼ်ႉလႄႈ တိုၵ်းတေႃးယႃႉပႅတ်ႈဝဵင်းၼၼ်ႉ ဢိၵ်ႇတင်းၵူၼ်းၵႃႈဢၼ်မီးၵႃႈၼႂ်းမၼ်းၼၼ်ႉ လူၺ်ႈၶူမ်းလၢပ်ႇၶူမ်းလႅဝ်းမိူၼ်ၸိူဝ်ႉၼင်ႇဢၼ် မၼ်းႁဵတ်းတီႈဝဵင်း လီႉပၼႃႉ ၼၼ်ႉဢေႃႈ။-

33မိူဝ်ႈၼၼ်ႉ ႁေႃႇရမ်ႇ ၶုၼ်လူင် ၵေႇၸႃႇ ၊ မႃးႁႂ်ႈလႆႈၸွႆႈထႅမ်မႃႉၸႃႉ ဝဵင်း လႃႇၶီႉသႃႉ ၼၼ်ႉလႄႈ ယေႃးသူႉ တိုၵ်းတေႃးယႃႉပႅတ်ႈမၼ်းၼၼ်ႉ ဢိၵ်ႇတင်းၵူၼ်းမၼ်းတင်းလၢႆ တေႃႇထိုင်ႁွတ်ႈထၼ်ႈပေႃးဢမ်ႇၵိုတ်းဢမ်ႇၵျၢၼ်ႇသေၵေႃႉသေၵူၼ်းဢေႃႈ။-

34ယေႃးသူႉ ဢိၵ်ႇတင်းၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၼၼ်ႉ သမ်ႉၶီႇဢွၵ်ႇသေၵႃႈတီႈဝဵင်း လႃႇၶီႉသႃႉ ၼၼ်ႉ ၸူးၵႃႈတီႈဝဵင်း ဢေႇၵလုၼ်ႇ လႄႈ ၶျႃးတပ်ႉသေယဝ်ႉ၊ တိုၵ်းတေႃးဝဵင်းၼၼ်ႉဢေႃႈ။-

35ၶဝ်လႆႈၼႂ်းဝၼ်းၼၼ်ႉၵမ်းလဵဝ်လႄႈ တိုၵ်းတေႃးယႃႉပႅတ်ႈဝဵင်းၼၼ်ႉ လူၺ်ႈၶူမ်းလၢပ်ႇၶူမ်းလႅဝ်းလႄႈ ယႃႉၽဵဝ်ႈၵူၼ်းၵႃႈဢၼ်မီးၼႂ်းမၼ်းၼၼ်ႉပႅတ်ႈမူတ်းမူတ်းသဵင်ႈသဵင်ႈမိူၼ်ၸိူဝ်ႉၼင်ႇဢၼ် မၼ်းႁဵတ်းတီႈဝဵင်း လႃႇၶီႉသႃႉ ၼၼ်ႉဢေႃႈ။-

36ယေႃးသူႉ ဢိၵ်ႇတင်း ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၼၼ်ႉ သမ်ႉၶီႇဢွၵ်ႇသေၵႃႈတီႈဝဵင်း ဢေႇၵလုၼ်ႇ ၼၼ်ႉ ၸူးၵႃႈတီႈဝဵင်း ႁေႇပြုၼ်ႇ လႄႈ တိုၵ်းတေႃးဝဵင်းၼၼ်ႉဢေႃႈ။-

37ၶဝ်လႆႈဝဵင်းၼၼ်ႉလႄႈ တိုၵ်းတေႃးယႃႉပႅတ်ႈဝဵင်းၼၼ်ႉ၊ ၶုၼ်လူင်မၼ်း၊ ဝဵင်းၵႃႈဢၼ်ၸၢပ်ႈသႅင်ႇၵၼ်တင်းမၼ်း တင်းၵူၼ်း ၵႃႈဢၼ်မီးၵႃႈၼႂ်းမၼ်းလူၺ်ႈၶူမ်းလၢပ်ႇၶူမ်းလႅဝ်းဢေႃႈ။ မၼ်းယင်းဢမ်ႇႁႂ်ႈၵိုတ်းၵျၢၼ်ႇဝႆႉသေၵေႃႉသေၵူၼ်းလႄႈ ပႄႇၽဵဝ်ႈဝဵင်းၼၼ်ႉဢိၵ်ႇတင်းၵူၼ်းၵႃႈဢၼ်မီးၵႃႈၼႂ်းမၼ်းၼၼ်ႉပႅတ်ႈ မူတ်းမူတ်းသဵင်ႈသဵင်ႈ မိူၼ်ၸိူဝ်ႉၼင်ႇဢၼ်မၼ်းႁဵတ်းတီႈဝဵင်း ဢေႇၵလုၼ်ႇ ၼၼ်ႉဢေႃႈ။-

38ယေႃးသူႉ ဢိၵ်ႇတင်း ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၼၼ်ႉဢွၼ်ၵၼ်ၶိုၼ်းမႃးၸူးၵႃႈတီႈဝဵင်း တေႇပီႉရႃႉ လႄႈ တိုၵ်းတေႃးဝဵင်းၼၼ်ႉဢေႃႈ။-

39မၼ်းလႆႈဝဵင်းၼၼ်ႉဢိၵ်ႇတင်းၶုၼ်လူင်မၼ်း တင်းဝဵင်းၵႃႈဢၼ်ၸၢပ်ႈသႅင်ႇၵၼ်တင်းမၼ်းလႄႈ တိုၵ်းတေႃးယႃႉပႅတ်ႈၶဝ်လူၺ်ႈၶူမ်းလၢပ်ႇၶူမ်းလႅဝ်းလႄႈ ပႄႇၽဵဝ်ႈၵူၼ်းၵႃႈဢၼ်မီးၵႃႈၼႂ်းမၼ်းၼၼ်ႉပႅတ်ႈမူတ်းမူတ်းသဵင်ႈသဵင်ႈ ထၼ်ႈပေႃးဢမ်ႇႁႂ်ႈၵိုတ်းၵျၢၼ်ႇဝႆႉသေၵေႃႉသေၵူၼ်းဢေႃႈ။ မၼ်းႁဵတ်းတီႈဝဵင်း တေႇပီႉရႃႉ ဢိၵ်ႇတင်းၶုၼ်လူင်မၼ်း မိူၼ်ၸိူဝ်ႉၼင်ႇဢၼ်မၼ်းႁဵတ်းတီႈ ႁေႇပြုၼ်ႇ တင်းၶုၼ်လူင်မၼ်း ဢိၵ်ႇတင်းတီႈ လီႉပၼႃႉ တင်းၶုၼ်လူင်မၼ်းၼၼ်ႉဢေႃႈ။-

40ၼင်ႇၼၼ်လႄႈ ယေႃးသူႉ တိုၵ်းတေႃးယႃႉပႅတ်ႈမိူင်းတင်းမိူင်းဢၼ်ဝႃႈ ၵႃႈၼိူဝ်ႁၢၼ်ႉလွႆ၊ ၵႃႈတီႈပွတ်းတၢင်းၸၢၼ်း၊ ၵႃႈတႂ်ႈတီႈဢၼ်ပၢင်ႇဢၼ်ပဵင်း၊ ၵႃႈတီႈပဵမ်ႉလွႆ ဢိၵ်ႇတင်းၶုၼ်လူင်တင်းသဵင်ႈတင်းလူင်လႄႈ ယင်းဢမ်ႇႁႂ်ႈၵိုတ်းၵျၢၼ်ႇဝႆႉသေၵေႃႉသေၵူၼ်းလႄႈ ပႄႇၽဵဝ်ႈၵႃႈဢၼ်ထူၺ်ႈၸႂ်ဢွၵ်ႇထူၺ်ႈၸႂ်ၶဝ်ႈယူႇၼၼ်ႉပႅတ်ႈ မူတ်းမူတ်းသဵင်ႈသဵင်ႈၸွမ်းၵႃႈၼင်ႇဢၼ်ထႃႇဝရႃႉၽြႃး ၽြႃးပဵၼ်ၸဝ်ႈ ၵူၼ်းမဵဝ်း ဢီႉသရေႇလႃႉ တင်းလၢႆ သင်ႇလၢတ်ႈဝႆႉၼၼ်ႉဢေႃႈ။-

41ယေႃးသူႉ တိုၵ်းတေႃးယႃႉပႅတ်ႈၶဝ် ဢဝ်ၵႃႈတီႈဝဵင်း ၵႃႇတေႇသပႃႇၼႃႇ တေႃႇထိုင်ႁွတ်ႈဝဵင်း ၵႃႇၸႃႉ ၼၼ်ႉ ဢိၵ်ႇတင်းဢဝ် ၵႃႈတီႈမိူင်း ၵေႃးသိၼ်ႇ တင်းသဵင်ႈတင်းမူတ်း တေႃႇထိုင်ႁွတ်ႈဝဵင်း ၵီႉပွင်ႇ ၼၼ်ႉလႄႈ၊-

42ၵွပ်ႈပိူဝ်ႈဢၼ်ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ တိုၵ်းသိုၵ်းယူႇၽၢႆႇၵူၼ်း ဢီႉသရေႇလႃႉ ၼၼ်ႉ၊ တိုၵ်းဢဝ်ၵႃႈပဵၼ်ၶုၼ်လူင်ၸိူဝ်းၼၼ်ႉ ဢိၵ်ႇတင်းမိူင်းၶဝ်ၼၼ်ႉၵမ်းလဵဝ်ၵၼ်ဢေႃႈ။-

43လိုၼ်းၼၼ်ႉ ယေႃးသူႉ ဢိၵ်ႇတင်းၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ဢွၼ်ၵၼ်ၶိုၼ်းမိူဝ်းၸူး ၵႃႈတီႈတပ်ႉ ၵီႉလႃႉၵႃႇလႃႉ သေဢေႃႈ။