Joshua 13

Shan

← Chapter 12 Jump to: Chapter 14 →

1မိူဝ်ႈဢၼ် ယေႃးသူႉ ထဝ်ႈလႄႈ ဢသၢၵ်ႈၵႄႇထူၼ်ႈယဝ်ႉၼၼ်ႉၸိုင်၊ ထႃႇဝရႃႉၽြႃး မီးဢမိင်ႉတီႈမၼ်းလႄႈဝႃႈ၊ မႂ်းၼႆႉထဝ်ႈလႄႈဢသၢၵ်ႈ ၵႄႇထူၼ်ႈယဝ်ႉ။ လိၼ်ဢၼ်တၵ်းလႆႈသိမ်းဢဝ်ၵေႃႈ ယင်းၵိုတ်းယင်းၵျၢၼ်ႇယူႇၼမ်ၼႃႇလူးၵွၼ်ႇဢေႃႈ။-

2လိၼ်ဢၼ်ယင်းၵိုတ်းယင်းၵျၢၼ်ႇယူႇၸမ်ႉ၊ ပဵၼ်မိူင်း ၽီႉလိတ်ႉတီႉ တင်းမိူင်း ဢိၵ်ႇတင်းမိူင်းၵူၼ်း ၵေႇသူႉရီႉ တင်းသဵင်ႈတင်းမူတ်း၊-

3ဢဝ်ၵႃႈတီႈၸႃႉၸဵမ် ၼမ်ႉႁွင်ႈ သီႉႁေႃႇရႃႉ ဝၼ်းဢွၵ်ႇမိူင်း ဢေႇၵိပ်ႉတူႉ တေႃႇထိုင်ႁွတ်ႈလႅၼ်လိၼ်ဝဵင်း ဢေႇၵြုၼ်ႇ ၵႃႈတီႈၽၢႆႇတၢင်းႁွင်ႇၼၼ်ႉ၊ မိူင်းဢၼ်မၢတ်ႈပဵၼ်မိူင်းၵူၼ်း ၶႃႇၼၼီႉ ၊ ဢၼ်ဝႃႈမိူင်းၶုၼ် ၽီႉလိတ်ႉတီႉ ႁႃႈပႃး တီႈဢၼ်ၵူၼ်း ၵႃႇၸႃႇသီႉ ၊ ၵူၼ်း ဢႃႇၸေႃႇတီႉ ၊ ၵူၼ်း ဢေးသၵလေႃးၼီႉ ၊ ၵူၼ်း ၵိတ်ႉတီႉ ၊ ၵူၼ်း ဢေးၵျေႃးၼီႉ ဢိၵ်ႇတင်း ၵူၼ်း ဢႃႇဝိမ်ႇ ဢၼ်မီးၵႃႈတီႈၽၢႆႇတၢင်းၸၢၼ်းၼၼ်ႉယူႇၼၼ်ႉ၊-

4မိူင်းၵူၼ်း ၶႃႇၼၼီႉ တင်းသဵင်ႈတင်းမူတ်းဢိၵ်ႇတင်း မေႇရႃႉ ဢၼ်ၵူၼ်းမိူင်း ၸီႉတုၼ်ႇ ပိူင်ႇၼၼ်ႉ တေႃႇထိုင်ႁွတ်ႈဝဵင်း ဢႃႇၽႅၵ်ႉ ၸူးတီႈလႅၼ်လိၼ်မိူင်း ဢႃႇမေႃးရီႉ ၼၼ်ႉ၊-

5မိူင်းၵူၼ်း ၵေႇပလႃႉ ၊ မိူင်း လေႇပၼုၼ်ႇ တင်းသဵင်ႈတင်းမူတ်း ၽၢႆႇတၢင်းၵၢင်ဝၼ်းဢွၵ်ႇ ဢဝ်ၵႃႈတီႈၸႃႉၸဵမ်ဝဵင်း ပႃႉလၵတ်ႉ ၵႃႈတီႈတိၼ်လွႆ ႁေႇရမုၼ်ႇ တေႃႇထိုင်ႁွတ်ႈတီႈဢၼ်ၶဝ်ႈၸူးၵႃႈၼႂ်းမိူင်း ႁႃႇမတ်ႉ ၼၼ်ႉၸိူဝ်းၼၼ်ႉဢေႃႈ။-

6ၵူၼ်းဢၼ်ယူႇၵႃႈၼိူဝ်ႁၢၼ်ႉလွႆ ဢဝ်ၵႃႈတီႈၸႃႉၸဵမ်လွႆ လေႇပၼုၼ်ႇ တေႃႇထိုင်ႁွတ်ႈဝဵင်း မီႉသရၽေႃႇသမိမ်ႈ ၼၼ်ႉ တင်းသဵင်ႈတင်းလူင်ဢၼ်ဝႃႈ ၵူၼ်း ၸီႉတေႃးၼီႉ တင်းသဵင်ႈတင်းလူင်ၸိူဝ်းၼၼ်ႉၸိုင်၊ ၵဝ်တၵ်းႁေႃႈဢွၵ်ႇပႅတ်ႈသေၵႃႈတီႈၽၢႆႇၼႃႈၵူၼ်းမဵဝ်း ဢီႉသရေႇလႃႉ တင်းလၢႆဢေႃႈ။ ၵူၺ်းၵႃႈ မႂ်းႁဵတ်းတၢင်းဢၼ်တူၵ်းၸႃႇၵွၵ်ႈသေလႄႈ မႅင်ႇၽႄလိၼ်ၼၼ်ႉပၼ်တီႈၵူၼ်းမဵဝ်း ဢီႉသရေႇလႃႉ တင်းလၢႆ ၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉတီႈမႂ်းၼၼ်ႉတႃႉ။-

7မိူဝ်ႈလဵဝ်ၼႆႉ ၽႄမိူင်းၼႆႉမႅင်ႇပၼ်ဢမူၺ်ႇတီႈ မဵဝ်းၵဝ်ႈမဵဝ်း ဢိၵ်ႇတင်းမဵဝ်း မၼႃႇသေႇ ၶိုင်ႈၼိုင်ႈၼၼ်ႉတႃႉ၊ ဝႃႈၼင်ႇၼႆဢေႃႈ။

8ဢိၵ်ႇတင်းမဵဝ်းၼၼ်ႉၶိုင်ႈၼိုင်ႈလႄႈ မဵဝ်း ရူႉပိၼ်ႇ ၊ မဵဝ်း ၵၢတ်ႉ ၸိူဝ်းၼၼ်ႉ လႆႈၶၢမ်ႇဢဝ်ဢမူၺ်ႇၶဝ်ဢၼ် မူဝ်းသေႇ ပၼ်တီႈၶဝ်ၵႃႈတီႈၽၢႆႇဝၼ်းဢွၵ်ႇၼမ်ႉႁွင်ႈ ယေႃးတၢၼ်ႇ ၼၼ်ႉ ၸွမ်းၵႃႈၼင်ႇဢၼ် မူဝ်းသေႇ ၶႃႈထႃႇဝရႃႉၽြႃး ပၼ်တီႈၶဝ်ၼၼ်ႉယဝ်ႉ။-

9လိၼ်ၼၼ်ႉၸမ်ႉ၊ ဢဝ်ၵႃႈတီႈၸႃႉၸဵမ်ဝဵင်း ဢႃႇရေႃႇ ဢၼ်မီးၵႃႈႁိမ်းပၢင်ႇႁူၺ်ႈ ဢႃႇၼုၼ်ႇ ဢိၵ်ႇတင်းဝဵင်းဢၼ်မီးၵႃႈတီႈၶိုင်ႈၵၢင်ပၢင်ႇႁူၺ်ႈၵႂႃႇလႄႈ ပႃးတင်းပၢင်ႇပဵင်း မေႇတေႇၽႃႉ တင်းသဵင်ႈတင်းမူတ်းတေႃႇထိုင်ႁွတ်ႈဝဵင်း တီႉၽုၼ်ႇ ၼၼ်ႉ၊-

10ၵႃႈပဵၼ်ဝဵင်း သီႉႁုၼ်ႇ ၶုၼ်ႁေႃၶမ်း ဢႃႇမေႃးရီႉ ဢၼ်ႁဵတ်းၶုၼ်ၵႃႈၼႂ်းဝဵင်း ႁေႇသၽုၼ်ႇ ၼၼ်ႉၸိူဝ်းၼၼ်ႉ တေႃႇထိုင်ႁွတ်ႈလႅၼ်လိၼ်မိူင်းၵူၼ်းမဵဝ်း ဢမ်ႇမုၼ်ႇ ၼၼ်ႉ၊-

11မိူင်း ၵီႉလတ်ႉ လိၼ်ဢၼ်ၵူၼ်း ၵေႇသူႉရီႉ တင်းၵူၼ်း မႃႇၶႃႇသီႉ ယူႇၼၼ်ႉ၊ လွႆ ႁေႇရမုၼ်ႇ ၵႃႈမီး၊ မိူင်း ပႃႇသၢၼ်ႇ တင်းသဵင်ႈတင်းမူတ်း တေႃႇထိုင်ႁွတ်ႈမိူင်း သႃႇလၵႃႉ ။-

12မိူင်း ဢေႃႇၶႃႉ ၶုၼ်ႁေႃၶမ်း ပႃႇသၢၼ်ႇ ဢၼ်ႁဵတ်းၶုၼ်ၵႃႈၼႂ်းဝဵင်း ဢႃႇသတႃႇရုတ်ႉ တင်းဝဵင်း ဢေႇတြီႉ ဢၼ်ပဵၼ်ၵေႃႉဢၼ်ၵိုတ်းဢၼ်ၵျၢၼ်ႇဝႆႉၼႂ်းမဵဝ်းၵူၼ်း ဢၼ်ယႂ်ႇၼႃႇႁႅင်းၼႃႇၼၼ်ႉၸိူဝ်းၼၼ်ႉဢေႃႈ။ ၶဝ်ၼၼ်ႉၸိုင်၊ မူဝ်းသေႇ တိုၵ်းတေႃးယႃႉပႅတ်ႈလႄႈ ႁေႃႈဢွၵ်ႇပႅတ်ႈဢေႃႈ။-

13ၼႂ်းဝႃႈၼၼ်သေၵေႃႈ ၵူၼ်းမဵဝ်း ဢီႉသရေႇလႃႉ တင်းလၢႆ ဢမ်ႇႁေႃႈၵူၼ်း ၵေႇသူႉရီႉ ဢိၵ်ႇတင်းၵူၼ်း မႃႇၶႃႇသီႉ ၸိူဝ်းၼၼ်ႉဢွၵ်ႇပႅတ်ႈ။ ၵူၼ်း ၵေႇသူႉရီႉ တင်းၵူၼ်း မႃႇၶႃႇသီႉ ၸိူဝ်းၼၼ်ႉ လႆႈယူႇလူၺ်ႈၵၼ်တင်းၵူၼ်းမဵဝ်း ဢီႉသရေႇလႃႉ တင်းလၢႆယူႇ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။-

14ၵူၺ်းၵွမ်ႉ တီႈၵူၼ်းမဵဝ်း လေႇဝီႉ ၵူၺ်း မၼ်းၸဝ်ႈဢမ်ႇပၼ်ဢမူၺ်ႇ။ ယိတ်ႈဢၼ်ဢဝ်တင်းၽႆးပုၵ်ႈၸေႃႇတီႈထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ ၼၼ်ႉ ပဵၼ်ဢမူၺ်ႇမၼ်း ၸွမ်းၵႃႈၼင်ႇဢၼ်မၼ်းၸဝ်ႈမီးဢမိင်ႉဝႆႉတီႈမၼ်းၼၼ်ႉဢေႃႈ။

15မူဝ်းသေႇ ပၼ်ဢမူၺ်ႇတီႈၵူၼ်းမဵဝ်း ရူႉပိၼ်ႇ တင်းလၢႆ ၸွမ်းလူၺ်ႈမဵဝ်းပီႈမဵဝ်းၼွင်ႉၶဝ်ႁင်းၽႂ်ႁင်းမၼ်းဢေႃႈ။-

16ၶွပ်ႇၼမ်ႉလႅၼ်လိၼ်ၶဝ်ၸမ်ႉ၊ ၸႃႉၸဵမ်ဝဵင်း ဢႃႇရေႃႇ ဢၼ်မီးၵႃႈႁိမ်းပၢင်ႇႁူၺ်ႈ ဢႃႇၼုၼ်ႇ ဢိၵ်ႇတင်းဝဵင်းဢၼ်မီးၵႃႈတီႈၶိုင်ႈၵၢင်ပၢင်ႇႁူၺ်ႈၼၼ်ႉလႄႈ ပၢင်ႇပဵင်း မေႇတေႇၽႃႉ တင်းသဵင်ႈတင်းမူတ်း၊-

17ဝဵင်း ႁေႇသၽုၼ်ႇ ဢိၵ်ႇတင်းဝဵင်းမၼ်းၵႃႈဢၼ်မီးၵႃႈတီႈပၢင်ႇတီႈပဵင်း၊ ဝဵင်း တီႉၽုၼ်ႇ ၊ ဝဵင်း ပႃႇမုတ်ႉပႃႇလႃႉ ၊ ဝဵင်း ပႅတ်ႉပႃႇလမွင်ႇ ၊-

18ဝဵင်း ယႃႇႁႃႉၸႃႇ ၊ ဝဵင်း ၵေႇတမုတ်ႉ ၊ ဝဵင်း မေႇၽတ်ႉ ၊-

19ဝဵင်း ၵီႉရႃႉယသိမ်း ၊ ဝဵင်း ၸီႉပမႃႇ ၊ ဝဵင်း ၸႃႇရိတ်ႉသႃႇႁႃႉ ဢၼ်မီးၵႃႈၼိူဝ်လွႆ ဢၼ်မီးၵႃႈၼႂ်းၶူင်ႈႁူၺ်ႈ၊-

20ဝဵင်း ပႅတ်ႉပေႇၵူႉရႃႉ ၊ ပဵမ်ႉလွႆ ပီႉသၵႃႇ ၊ ဝဵင်း ပႅတ်ႉယေႇသီႉမုတ်ႉ ၊-

21ဝဵင်းၵႃႈဢၼ်မီးၵႃႈတီႈပၢင်ႇတီႈပဵင်း ဢိၵ်ႇတင်းမိူင်း သီႉႁုၼ်ႇ ၶုၼ်ႁေႃၶမ်း ဢႃႇမေႃးရီႉ ဢၼ်လႆႈႁဵတ်းၶုၼ် ၵႃႈၼႂ်းဝဵင်း ႁေႇသၽုၼ်ႇ ၊ ဢၼ် မူဝ်းသေႇ တိုၵ်းတေႃးယႃႉပႅတ်ႈလူၺ်ႈၵၼ်တင်း ၶုၼ်လူင် မီႉတျၼ်ႇ ဢၼ်ဝႃႈ ဢေးဝီႉ၊ ရေႇၵိမ်ႇ၊ ၸူႉရႃႉ၊ ႁူႉရႃႉ၊ ရေးၽႃႉ ဢၼ်ပဵၼ်ၶုၼ်တႂ်ႈ သီႉႁုၼ်ႇ လႄႈ ယူႇၵႃႈၼႂ်းမိူင်းမၼ်းၼၼ်ႉဢေႃႈ။-

22ပႃႇလၢမ်ႇ လုၵ်ႈၸၢႆး ပေႃးရႃႉ ဢၼ်ႁဵတ်းပရေႃးၽႅတ်ႈၼၼ်ႉၵေႃႈ ၵူၼ်းမဵဝ်း ဢီႉသရေႇလႃႉ တင်းလၢႆ ဢဝ်လၢပ်ႇၶႃႈၽၼ်းပႅတ်ႈပႃးလူၺ်ႈၵၼ်တင်းၶဝ်ၸိူဝ်းဢၼ် လႆႈၶၢမ်ႇတၢႆၼၼ်ႉဢေႃႈ။-

23ၶွပ်ႇၼမ်ႉလႅၼ်လိၼ်တီႈယူႇၵူၼ်းမဵဝ်း ရူႉပိၼ်ႇ ၸိူဝ်းၼၼ်ႉၸမ်ႉ၊ ပဵၼ်ၼမ်ႉႁွင်ႈ ယေႃးတၢၼ်ႇ ဢိၵ်ႇတင်း ၽင်ႇမၼ်းႁိမ်းမၼ်းဢေႃႈ။ ဢၼ်ၼႆႉၸမ်ႉ၊ ပဵၼ်ဝၢၼ်ႈပဵၼ်ဝဵင်း ဢၼ်ၵူၼ်းမဵဝ်း ရူႉပိၼ်ႇ ၶဝ်လႆႈၶၢမ်ႇဢမူၺ်ႇ ၸွမ်းလူၺ်ႈမဵဝ်းပီႈမဵဝ်းၼွင်ႉၶဝ် ႁင်းၽႂ်ႁင်းမၼ်းၼၼ်ႉဢေႃႈ။

24မူဝ်းသေႇ ပၼ်ဢမူၺ်ႇတီႈၵူၼ်းမဵဝ်း ၵၢတ်ႉ တင်းလၢႆ ၸွမ်းလူၺ်ႈမဵဝ်းပီႈမဵဝ်းၼွင်ႉၶဝ်ႁင်းၽႂ်ႁင်းမၼ်းဢေႃႈ။-

25ၶွပ်ႇၼမ်ႉလႅၼ်လိၼ်ၶဝ်ၸမ်ႉ၊ ၸႃႉၸဵမ်ဝဵင်း ယႃႇၸႃႇ လႄႈ ဝဵင်း ၵီႉလတ်ႉ ၵႃႈမီး၊ မိူင်းၵူၼ်းမဵဝ်း ဢမ်ႇမုၼ်ႇ ၶိုင်ႈၼိုင်ႈတေႃႇထိုင်ႁွတ်ႈဝဵင်း ဢႃႇရေႃႇ ဢၼ်မီးၵႃႈတီႈၽၢႆႇၼႃႈဝဵင်း ရပ်ႉပႃႇ ၼၼ်ႉ၊-

26လႆႈသမ်ႉ ၸႃႉၸဵမ်ဝဵင်း ႁေႇသၽုၼ်ႇ ၊ တေႃႇထိုင်ႁွတ်ႈဝဵင်း ရႃႇမတ်ႉမီႉၸပႃႇ တင်းဝဵင်း ပေႇတေႃႇၼိမ်း ၼၼ်ႉ၊ လႆႈသမ်ႉ ၸႃႉၸဵမ်ဝဵင်း မႁႃႇၼိမ်ႇ တေႃႇထိုင်ႁွတ်ႈလိၼ်ဝဵင်း လိတ်ႉပီႉရႃႉ ၼၼ်ႉ၊-

27ၵႃႈတီႈၼႂ်းပၢင်ႇႁူၺ်ႈၵေႃႈ ဝဵင်း ပေႇသႃႇရမ်ႇ ၊ ဝဵင်း ပႅတ်ႉၼီႉမရႃႉ ၊ ဝဵင်း သူႉၵုတ်ႉ ၊ ဝဵင်း ၸႃႇၽုၼ်ႇ ၊ ၵႃႈဢၼ်ၵိုတ်းဢၼ်ၵျၢၼ်ႇဝႆႉၵႃႈတီႈမိူင်း သီႉႁုၼ်ႇ ၶုၼ်ႁေႃၶမ်း ႁေႇသၽုၼ်ႇ ၊ ၼမ်ႉႁွင်ႈ ယေႃးတၢၼ်ႇ ဢိၵ်ႇတင်းၽင်ႇမၼ်းႁိမ်းမၼ်း တေႃႇထိုင်ႁွတ်ႈတီႈသုတ်းတီႈသဵင်ႈၼမ်ႉၼွင် ၵိၼ်ႇၼီႇသရႅတ်ႉ ၵႃႈတီႈၽၢႆႇဝၼ်းဢွၵ်ႇၼမ်ႉႁွင်ႈ ယေႃးတၢၼ်ႇ ၼၼ်ႉဢေႃႈ။-

28ဢၼ်ၼႆႉၸမ်ႉ၊ ပဵၼ်ဝၢၼ်ႈပဵၼ်ဝဵင်းဢၼ်ၵူၼ်းမဵဝ်း ၵၢတ်ႉ ၶဝ်လႆႈၶၢမ်ႇဢမူၺ်ႇၸွမ်းလူၺ်ႈ မဵဝ်းပီႈမဵဝ်းၼွင်ႉၶဝ်ႁင်းၽႂ်ႁင်းမၼ်းၼၼ်ႉဢေႃႈ။

29မူဝ်းသေႇ ပၼ်ဢမူၺ်ႇတီႈၵူၼ်းမဵဝ်း မၼႃႇသေႇ ၶိုင်ႈၼိုင်ႈလႄႈ ၵူၼ်းမဵဝ်း မၼႃႇသေႇ ၶိုင်ႈၼိုင်ႈၸိူဝ်းၼၼ်ႉ လႆႈၶၢမ်ႇဢမူၺ်ႇၸွမ်းလူၺ်ႈမဵဝ်းပီႈမဵဝ်းၼွင်ႉၶဝ်ႁင်းၽႂ်ႁင်းမၼ်းဢေႃႈ။-

30ၶွပ်ႇၼမ်ႉလႅၼ်လိၼ်ၶဝ်ၸမ်ႉ၊ ၸႃႉၸဵမ်ဝဵင်း မႁႃႇၼိမ်ႇ လႄႈ မိူင်း ပႃႇသၢၼ်ႇ တင်းသဵင်ႈတင်းမူတ်းဢၼ်ဝႃႈ မိူင်း ဢေႃႇၶႃႉ ၶုၼ်ႁေႃၶမ်း ပႃႇသၢၼ်ႇ ၼၼ်ႉတင်းသဵင်ႈတင်းမူတ်း၊ ၵႃႈပဵၼ်ဝဵင်း ယႃႇဢီႉရႃႉ ဢၼ်ပႃးၵႃႈတီႈမိူင်း ပႃႇသၢၼ်ႇ ၼၼ်ႉ ႁူၵ်းသိပ်းဝဵင်းၼၼ်ႉဢေႃႈ။-

31မိူင်း ၵီႉလတ်ႉ ၶိုင်ႈၼိုင်ႈ၊ ဝဵင်း ဢႃႇသတႃႇရုတ်ႉ တင်းဝဵင်း ဢေႇတြီႉ ဢၼ်ပဵၼ်ဝဵင်းၵႃႈၼႂ်းမိူင်း ဢေႃႇၶႃႉ ၵႃႈတီႈမိူင်း ပႃႇသၢၼ်ႇ ၼၼ်ႉၸိူဝ်းၼၼ်ႉၸိုင်၊ ပဵၼ်ပုၼ်ႈၵူၼ်းမဵဝ်း မႃႇၶီႉရႃႉ လုၵ်ႈၸၢႆး မၼႃႇသေႇ ဢၼ်ဝႃႈပုၼ်ႈ ၵူၼ်းမဵဝ်း မႃႇၶီႉရႃႉ ၶိုင်ႈၼိုင်ႈၼၼ်ႉ ၸွမ်းလူၺ်ႈမဵဝ်းပီႈမဵဝ်းၼွင်ႉၶဝ်ႁင်းၽႂ်ႁင်းမၼ်းဢေႃႈ။-

32ဢၼ်ၼႆႉၸမ်ႉ၊ ပဵၼ်ဢမူၺ်ႇ ဢၼ် မူဝ်းသေႇ ၽႄမႅင်ႇပၼ် ၵႃႈၼႂ်းပၢင်ႇပဵင်း မေႃႇၽႃႉ ၊ ၵႃႈတီႈၽၢႆႇပုၼ်ႉၼမ်ႉႁွင်ႈ ယေႃးတၢၼ်ႇ သိုဝ်ႈဝဵင်း ယေႇရီႉၶူဝ်း ၽၢႆႇဝၼ်းဢွၵ်ႇၼၼ်ႉဢေႃႈ။-

33တီႈမဵဝ်း လေႇဝီႉ ၸိုင်၊ မူဝ်းသေႇ ဢမ်ႇမႅင်ႇဢမ်ႇပၼ်ဢမူၺ်ႇ။ ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ ပဵၼ်ဢမူၺ်ႇၶဝ် ၸွမ်းၵႃႈၼင်ႇဢၼ်မၼ်းၸဝ်ႈမီးဢမိင်ႉဝႆႉတီႈၶဝ်ၼၼ်ႉဢေႃႈ။

← Chapter 12 Jump to: Chapter 14 →