Joshua 22

Shan

← Chapter 21 Jump to: Chapter 23 →

1မိူဝ်ႈၼၼ်ႉ ယေႃးသူႉ ႁွင်ႉဢဝ်ၵူၼ်းမဵဝ်း ရူႉပိၼ်ႇ ၊ ၵူၼ်းမဵဝ်း ၵၢတ်ႉ ၊ ၵူၼ်းမဵဝ်း မၼႃႇသေႇ ၶိုင်ႈၼိုင်ႈၸိူဝ်းၼၼ်ႉလႄႈ သင်ႇလၢတ်ႈတီႈၶဝ်လႄႈဝႃႈ၊-

2သူႁဵတ်းၸွမ်းၵႃႈဢၼ် မူဝ်းသေႇ ၶႃႈထႃႇဝရႃႉၽြႃးသင်ႇလၢတ်ႈဝႆႉတီႈသူၼၼ်ႉလႄႈ ထွမ်ႇဢဝ်ၵႂၢမ်းၵႃႈဢၼ်ၵဝ်သင်ႇလၢတ်ႈတီႈသူၼၼ်ႉယဝ်ႉ။-

3သူယင်းဢမ်ႇၸုၼ်ႉဢမ်ႇပႅတ်ႈပီႈၼွင်ႉသူ မိုဝ်ႉဝၼ်းၼမ်ၼႃႇလူင်လၢင်ၼၼ်ႉ ထၼ်ႈပေႃးတေႃႇထိုင်ႁွတ်ႈဝၼ်းမိူဝ်ႈၼႆႉလႄႈ ပႂ်ႉၸွမ်းၵႃႈဢၼ်ထႃႇဝရႃႉၽြႃး ၽြႃးပဵၼ်ၸဝ်ႈသူၸီႇယၢင်ႇသင်ႇလၢတ်ႈဝႆႉၼၼ်ႉယဝ်ႉ။-

4တေႃႈလဵဝ်ၼႆႉ ထႃႇဝရႃႉၽြႃး ၽြႃးပဵၼ်ၸဝ်ႈသူပၼ်ဢၶႂၢင်ႉတၢင်းဢၼ် ၼိမ်လီယဵၼ်လီတီႈပီႈၼွင်ႉသူတင်းလၢႆ ၸွမ်းၵႃႈၼင်ႇဢၼ်မၼ်းၸဝ်ႈမီးၵတီႉဝႆႉၼၼ်ႉယဝ်ႉ။ ပိူဝ်ႈၼႆလႄႈ သူဢွၼ်ၵၼ်ဝၢႆႇၶိုၼ်းလႄႈ မိူဝ်းၵႂႃႇၸူးၵႃႈတီႈမူဝ်းၵႃႇတီႈယူႇသူ ဢိၵ်ႇတင်းလိၼ်တီႈဢၼ်သူပိူင်ႇဢၼ် မူဝ်းသေႇ ၶႃႈထႃႇဝရႃႉၽြႃးပၼ်တီႈသူ ၵႃႈတီႈၽၢႆႇပုၼ်ႉၼမ်ႉႁွင်ႈ ယေႃးတၢၼ်ႇ ပုၼ်ႉၼၼ်ႉတႃႉ။-

5ၵူၺ်းၵႃႈ ၵႆႉၵျူဝ်းၸႃးလႄႈ ဢွၼ်ၵၼ်ႁဵတ်းသတီႉႁႂ်ႈလႆႈၵမ်ၵျၢင်ႉပိင်းၺၢပ်ႈ ဢိၵ်ႇတင်းတြႃးဢၼ် မူဝ်းသေႇ ၶႃႈထႃႇဝရႃႉၽြႃးသင်ႇလၢတ်ႈဝႆႉတီႈသူၼၼ်ႉလႄႈ ပွင်ႁဵတ်းဢမူႉတၢင်းဢၼ်ပႃးတင်းႁူဝ်ၸႂ်သဵင်ႈသဵင်ႈ ႁၵ်ႉထႃႇဝရႃႉၽြႃး ၽြႃးပဵၼ်ၸဝ်ႈသူ၊ တၢင်းဢၼ်ၵႂႃႇမႃးၵႃႈၼႂ်းသဵၼ်ႈတၢင်းမၼ်းၸဝ်ႈၵႃႈမီး၊ တၢင်းဢၼ်ပႂ်ႉၸွမ်းပိင်းၺၢပ်ႈမၼ်းၸဝ်ႈ၊ တၢင်းဢၼ်ႁွႆႈၸပ်းယူႇၵႃႈတီႈမၼ်းၸဝ်ႈၼၼ်ႉတႃႉ၊ ဝႃႈၼင်ႇၼႆသေယဝ်ႉ၊-

6ယေႃးသူႉ ပၼ်တၢင်းလီတီႈၶဝ်လႄႈ ပွႆႇၶဝ်မိူဝ်းၵႂႃႇသေဢေႃႈ။ ၶဝ်ၵေႃႈမိူဝ်းၵႂႃႇၸူးၵႃႈတီႈ မူဝ်းၵႃႇတီႈယူႇၶဝ်ၼၼ်ႉသေဢေႃႈ။-

7ၵႃႈတီႈမဵဝ်း မၼႃႇသေႇ ၶိုင်ႈၼိုင်ႈၼၼ်ႉၸိုင် မူဝ်းသေႇ ဢဝ်လိၼ်ၵႃႈတီႈမိူင်း ပႃႇသၢၼ်ႇ ပၼ်ဝႆႉယဝ်ႉ။ တီႈမဵဝ်းၼၼ်ႉၶိုင်ႈၼိုင်ႈၸမ်ႉ၊ ယေႃးသူႉ ပၼ်လိၼ်လူၺ်ႈၵၼ်တင်းပီႈၼွင်ႉၶဝ် ၵႃႈတီႈၽၢႆႇဝၼ်းတူၵ်းၼမ်ႉႁွင်ႈ ယေႃးတၢၼ်ႇ ၼႆႉဢေႃႈ။ ယေႃးသူႉ ၵေႃႈပွႆႇၶဝ်မိူဝ်းၵႂႃႇၸူးၵႃႈတီႈမူဝ်းၵႃႇတီႈယူႇၶဝ်ၼၼ်ႉလႄႈ ပၼ်တၢင်းလီတီႈၶဝ်လႄႈဝႃႈ၊-

8ဢွၼ်ၵၼ်ဢဝ်ၸေးၸိမ်ႇတၢင်းဢၼ်မၢၵ်ႈမီးၼမ်ၼႃႇ၊ တရိၵ်ႈသၢၼ်ႇၼမ်ၼႃႇ၊ ငိုၼ်းၶမ်း၊ တွင်းလိူင်၊ လဵၵ်း၊ ၶိူင်ႈၼုင်ႈၶိူင်ႈမႆၼမ်ၼႃႇလႄႈ ၶိုၼ်းမိူဝ်းၵႂႃႇၵႃႈတီႈမူဝ်းၵႃႇတီႈယူႇသူၼၼ်ႉတႃႉ။ ဢဝ်ဢုၵ်ႉၸႃႇဢၼ်ႁိမ်ဢဝ်ၵႃႈတီႈရၢၼ်ႇသူႇသူလႄႈလႆႈၸိူဝ်းၼၼ်ႉ ၽႄမႅင်ႇပၼ်တီႈပီႈတီႈၼွင်ႉသူၼၼ်ႉတႃႉ၊ ဝႃႈၼင်ႇၼႆဢေႃႈ။-

9ၵူၼ်းမဵဝ်း ရူႉပိၼ်ႇ ၊ ၵူၼ်းမဵဝ်း ၵၢတ်ႉ ၊ ၵူၼ်းမဵဝ်း မၼႃႇသေႇ ၶိုင်ႈၼိုင်ႈၸိူဝ်းၼၼ်ႉ ဢွၼ်ၵၼ်ဢွၵ်ႇသေၵႃႈၼႂ်းၵူၼ်းမဵဝ်း ဢီႉသရေႇလႃႉ တင်းလၢႆ ၵႃႈၼႂ်းဝဵင်း သီႉလေႃႇ ဢၼ်မီးၵႃႈၼႂ်းမိူင်း ၶႃႇၼၢၼ်ႇ ၼၼ်ႉလႄႈ မိူဝ်းၵႂႃႇႁႂ်ႈလႆႈႁွတ်ႈထိုင် ၵႃႈတီႈမိူင်း ၵီႉလတ်ႉ ၊ လိၼ်ဢၼ်ၶဝ်ထိူၵ်ႈပိူင်ႇ ၸွမ်းၵႃႈၼင်ႇဢၼ်ထႃႇဝရႃႉၽြႃး ဢဝ်တင်း မူဝ်းသေႇ မီးဢမိင်ႉဝႆႉၼၼ်ႉဢေႃႈ။

10မိူဝ်ႈဢၼ်ၶဝ်ႁွတ်ႈထိုင်ၵႃႈတီႈႁိမ်းၼမ်ႉႁွင်ႈ ယေႃးတၢၼ်ႇ ဢၼ်မီးၼႂ်းမိူင်း ၶႃႇၼၢၼ်ႇ ၼၼ်ႉၸိုင်၊ ၵူၼ်းမဵဝ်း ရူႉပိၼ်ႇ ၊ ၵူၼ်းမဵဝ်း ၵၢတ်ႉ ၊ ၵူၼ်းမဵဝ်း မၼႃႇသေႇ ၶိုင်ႈၼိုင်ႈၸိူဝ်းၼၼ်ႉ ဢွၼ်ၵၼ်တႄႇႁဵတ်းယိတ်ႈပလၢင်ႇၵႃႈတီႈႁိမ်းၼမ်ႉႁွင်ႈ ယေႃးတၢၼ်ႇ ၊ ယိတ်ႈပလၢင်ႇလူင် ဢၼ်ထၢင်ႇသႃးၼႃႇလူင်လၢင်ၼၼ်ႉဢေႃႈ။-

11ၵူၼ်းမဵဝ်း ဢီႉသရေႇလႃႉ တင်းလၢႆ ငိၼ်းပိူၼ်ႈလၢတ်ႈလႄႈဝႃႈ၊ ၵူၼ်းမဵဝ်း ရူႉပိၼ်ႇ ၊ ၵူၼ်းမဵဝ်း ၵၢတ်ႉ ၊ ၵူၼ်းမဵဝ်း မၼႃႇသေႇ ၶိုင်ႈၼိုင်ႈၸိူဝ်းၼၼ်ႉ ဢွၼ်ၵၼ်တႄႇႁဵတ်းယိတ်ႈပလၢင်ႇတီႈဢၼ်သိုဝ်ႈမိူင်း ၶႃႇၼၢၼ်ႇ ၵႃႈတီႈႁိမ်းၼမ်ႉႁွင်ႈ ယေႃးတၢၼ်ႇ ၊ တီႈဢၼ်ၵူၼ်းမဵဝ်း ဢီႉသရေႇလႃႉ တင်းလၢႆ လႆႈၶၢမ်ႈၵႂႃႇယဝ်ႉၼၼ်ႉဢေႃႈ၊ ဝႃႈၼင်ႇၼႆဢေႃႈ။-

12မိူဝ်ႈဢၼ်ၵူၼ်းမဵဝ်း ဢီႉသရေႇလႃႉ တင်းလၢႆ ငိၼ်းလွင်ႈမၼ်းတၢင်းမၼ်းၸိူဝ်ႉၼင်ႇၼၼ်ၼၼ်ႉၸိုင်၊ ပရဵၵ်ႈသၢတ်ႈၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ၸူႉၵၼ်တုမ်ၵၼ်ၵႃႈတီႈဝဵင်း သီႉလေႃႇ ႁႂ်ႈလႆႈၶီႇသိုၵ်းၸူးၶဝ်ၼၼ်ႉဢေႃႈ။-

13ၵူၼ်းမဵဝ်း ဢီႉသရေႇလႃႉ တင်းလၢႆ ပွႆႇၸႂ်ႉယိတ်ႈပရေႃးႁဵၵ်ႈ ၽီႉၼႁတ်ႉ လုၵ်ႈၸၢႆး ဢေးလႃႇၸႃႇ ၊-

14ဢိၵ်ႇတင်းၶုၼ်သိပ်းၼိုင်ႈ ဢၼ်ပဵၼ်ၶုၼ်ၼႂ်းမဵဝ်းပူႇမဵဝ်းပေႃႈ ယေႈမဵဝ်းယေႈပႃး ၼႂ်းမဵဝ်းၵူၼ်း ဢီႉသရေႇလႃႉ ၵူႈမဵဝ်းၼၼ်ႉ ၵႂႃႇၵႃႈတီႈမိူင်း ၵီႉလတ်ႉ တီႈဢၼ်ၵူၼ်းမဵဝ်း ရူႉပိၼ်ႇ ၊ ၵူၼ်းမဵဝ်း ၵၢတ်ႉ ၊ ၵူၼ်းမဵဝ်း မၼႃႇသေႇ ၶိုင်ႈၼိုင်ႈၸိူဝ်းၼၼ်ႉမီးၼၼ်ႉဢေႃႈ။ ၶဝ်ၼၼ်ႉ ပဵၼ်ငဝ်ႈပဵၼ်ႁူဝ်တီႈမဵဝ်းပူႇမဵဝ်းပေႃႈၶဝ်ၼၼ်ႉ ႁင်းၽႂ်ႁင်းမၼ်း ၵႃႈၼႂ်းၵူၼ်းမဵဝ်း ဢီႉသရေႇလႃႉ ပဵၼ်ႁဵင်ပဵၼ်မိုၼ်ႇဢေႃႈ။-

15ၶဝ်ႁွတ်ႈထိုင်ၵႃႈတီႈ ၵူၼ်းမဵဝ်း ရူႉပိၼ်ႇ ၊ ၵူၼ်းမဵဝ်း ၵၢတ်ႉ ၊ ၵူၼ်းမဵဝ်း မၼႃႇသေႇ ၶိုင်ႈၼိုင်ႈၸိူဝ်းၼၼ်ႉၵႃႈတီႈမိူင်း ၵီႉလတ်ႉ လႄႈ ဢွၼ်ၵၼ်လၢတ်ႈတီႈၶဝ်ၼၼ်ႉလႄႈဝႃႈ၊-

16ပရဵၵ်ႈသၢတ်ႈထႃႇဝရႃႉၽြႃး တင်းသဵင်ႈတင်းလူင်ၼၼ်ႉသင်ႇလၢတ်ႈမႃးလႄႈဝႃႈၸမ်ႉ၊ ဢပႅတ်ႈဢၼ်သူၽိတ်းပိူင်ႈၽြႃးပဵၼ်ၸဝ်ႈမဵဝ်း ဢီႉသရေႇလႃႉ ႁႂ်ႈဢမ်ႇလႆႈၸွမ်းလင်ထႃႇဝရႃႉၽြႃးလႄႈ ပိူင်ႈၵႂႃႇဝၼ်းမိူဝ်ႈၼႆႉ လူၺ်ႈလွင်ႈတၢင်းဢၼ်သူတႄႇႁဵတ်းယိတ်ႈပလၢင်ႇ ႁႂ်ႈလႆႈပုင်ႇၵၢၼ်ႇထႃႇဝရႃႉၽြႃးၼၼ်ႉၼႆႉၸမ်ႉ၊ ပဵၼ်ၸိူဝ်ႉၼင်ႇႁိုဝ်။-

17လွင်ႈၼင်ႇႁိုဝ်သူတၵ်းဢမ်ႇၸွမ်းလင်ထႃႇဝရႃႉၽြႃးလႄႈ ပိူင်ႈၵႂႃႇၼၼ်ႉၸိုင်၊ ဢပႅတ်ႈ ပေႇၵူႉရႃႉ ဢၼ်ၽေးလူင် ထၼ်ႈပေႃးႁွတ်ႈထိုင် ၵႃႈၼိူဝ်ပရဵၵ်ႈသၢတ်ႈထႃႇဝရႃႉၽြႃးယဝ်ႉသေၵေႃႈ ႁဝ်းယင်းဢမ်ႇပႆႇမူတ်းပႆႇသႂ်ယူႇ တေႃႇထိုင်ႁွတ်ႈဝၼ်းမိူဝ်ႈၼႆႉၼၼ်ႉ ဢမ်ႇပေႃးဢမ်ႇၵုမ်ႇပုၼ်ႈႁဝ်းႁိုဝ်။-

18သူပုင်ႇၵၢၼ်ႇထႃႇဝရႃႉၽြႃးဝၼ်းမိူဝ်ႈၼႆႉလႄႈ ဝၼ်းမိူဝ်ႈၽုၵ်ႈမၼ်းၸဝ်ႈတၵ်းၸႂ်မႆႈၶႆႈၸႃႉတီႈပရဵၵ်ႈသၢတ်ႈမဵဝ်း ဢီႉသရေႇလႃႉ တင်းသဵင်ႈတင်းလူင်ဢေႃႈ။-

19ၵူၺ်းၵႃႈ ပေႃးလိၼ်တီႈဢၼ်သူပိူင်ႇၼႆႉ ပဵၼ်ဢၼ်ၵူဝ်ႈၵိူၵ်ႇၸိုင်၊ ၶၢမ်ႈၵႂႃႇၸူးၵႃႈတီႈလိၼ်ဢၼ်ထႃႇဝရႃႉၽြႃးပိူင်ႇဢဝ်လႄႈ သုမ်ႉထဵင်ၸဝ်ႈမီးယူႇၼၼ်ႉသေယဝ်ႉ၊ ပိူင်ႇဢဝ်ႁူမ်ႈလူၺ်ႈၵၼ်တင်းႁဝ်းတႃႉ။ ယႃႇပေပုင်ႇၵၢၼ်ႇထႃႇဝရႃႉၽြႃး။ ယႃႇပေပုင်ႇၵၢၼ်ႇႁဝ်း လူၺ်ႈလွင်ႈဢၼ်သူတႄႇႁဵတ်းယိတ်ႈပလၢင်ႇပုၼ်ႈသူ ၼွၵ်ႈသေယိတ်ႈပလၢင်ႇထႃႇဝရႃႉၽြႃး ၽြႃးပဵၼ်ၸဝ်ႈႁဝ်းၼၼ်ႉ။-

20ဢႃႇၶၼ်ႇ လုၵ်ႈၸၢႆး ၸေးရႃႉ ၼၼ်ႉ ၽိတ်းပိူင်ႈလူၺ်ႈလွင်ႈတၢင်းဢၼ်ထုၵ်ႇၵိၼ်ႇထုၵ်ႇဝႃႈၼၼ်ႉလႄႈ တၢင်းၸႂ်မႆႈၶႆႈၸႃႉၸဝ်ႈ တူၵ်းႁွတ်ႈၵႃႈၼိူဝ်ပရဵၵ်ႈသၢတ်ႈ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ဢမ်ႇၸႂ်ႈႁိုဝ်။ ၵေႃႉၼၼ်ႉလႆႈတၢႆၵေႃႉလဵဝ်ၵူၺ်းမၼ်း ၵွပ်ႈပိူဝ်ႈဢပႅတ်ႈဢၼ်မၼ်းၽိတ်းပိူင်ႈၼၼ်ႉဢမ်ႇၸႂ်ႈ၊ ဝႃႈၼင်ႇၼႆယဝ်ႉ၊ ဝႃႈၼင်ႇၼႆဢေႃႈ။

21မိူဝ်ႈၼၼ်ႉ ၵူၼ်းမဵဝ်း ရူႉပိၼ်ႇ ၊ ၵူၼ်းမဵဝ်း ၵၢတ်ႉ ၊ ၵူၼ်းမဵဝ်း မၼႃႇသေႇ ၶိုင်ႈၼိုင်ႈၸိူဝ်းၼၼ်ႉ ဢွၼ်ၵၼ်ၶိုၼ်းလၢတ်ႈတီႈၶုၼ်ဢၼ်ပဵၼ်ငဝ်ႈပဵၼ်ႁူဝ် ၵႃႈၼႂ်းၵူၼ်းမဵဝ်း ဢီႉသရေႇလႃႉ ပဵၼ်ႁဵင်ပဵၼ်မိုၼ်ႇၸိူဝ်းၼၼ်ႉလႄႈဝႃႈ၊-

22ထႃႇဝရႃႉၽြႃး ၽြႃးၼိူဝ်ၽြႃးတင်းလၢႆ၊ ထႃႇဝရႃႉၽြႃး ၽြႃးၼိူဝ်ၽြႃးတင်းလၢႆၼၼ်ႉ တူဝ်မၼ်းၸဝ်ႈႁူႉယူႇလႄႈ၊ မဵဝ်း ဢီႉသရေႇလႃႉ ၵေႃႈ တူဝ်ၶဝ်တၵ်းလႆႈႁူႉဢေႃႈ။ ပေႃးႁဝ်းမီးတၢင်းၵျၢမ်ႇတၢင်းပွင် ဢၢင်ႈတၵ်းပုင်ႇၵၢၼ်ႇ၊ တၢင်းၵျၢမ်ႇတၢင်းပွင် ဢၼ်တၵ်းၽိတ်းပိူင်ႈထႃႇဝရႃႉၽြႃးလႄႈ တႄႇႁဵတ်းယိတ်ႈပလၢင်ႇ ႁႂ်ႈဢမ်ႇလႆႈၸွမ်းလင်ထႃႇဝရႃႉၽြႃးလႄႈ ဝႄႈပိူင်ႈၵႂႃႇၸိုင်၊ ယႃႇပေႁႂ်ႈလွတ်ႈၽေး ဝၼ်းမိူဝ်ႈၼႆႉသေၵမ်းလူၺ်ႈ။-

23ပေႃးမီးတၢင်းၵျၢမ်ႇတၢင်းပွင် ဢၢင်ႈတၵ်းဢဝ်ယိတ်ႈဢၼ်တုတ်ႇၽႆး၊ ၶိူင်ႈပုၵ်ႈၸေႃႇၽေႃးၸဵၼ်ႇ ပုၵ်ႈၸေႃႇ၊ ၶိူင်ႈပုၵ်ႈၸေႃႇမိၵ်ႉသႃႇႁႃယႃႉ ပုၵ်ႈၸေႃႇၵႃႈၼိူဝ်ယိတ်ႈပလၢင်ႇၵေႃႈ ႁႂ်ႈထႃႇဝရႃႉၽြႃးၼၼ်ႉ တူဝ်မၼ်းၸဝ်ႈ ၸႅတ်ႈထၢမ်ၸႅတ်ႈတူၺ်းသေၵမ်းလူၺ်ႈ။-

24ၵူၺ်းၵႃႈ ႁဝ်းႁဵတ်းၸိူဝ်ႉၼင်ႇၼႆၵွပ်ႈပိူဝ်ႈဢၼ်မႆႈၸႂ်ၵွပ်ႈလႄႈ ၵျၢမ်ႇပွင်လွင်ႈဢၼ်ထုၵ်ႇလီႁဵတ်းၼၼ်ႉလႄႈဝႃႈ၊ ၶိင်ႇၵႃႇလႃႉမိူဝ်ႈၵမ်းလိုၼ်းပုၼ်ႉ၊ လုၵ်ႈသူလၢၼ်သူ တၵ်းလၢတ်ႈတီႈလုၵ်ႈႁဝ်းလၢၼ်ႁဝ်းလႄႈဝႃႈ၊ သူၸၢပ်ႈသႅင်ႇၵၼ်တင်းထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ ၼၼ်ႉ ၸိူဝ်ႉၼင်ႇႁိုဝ်။-

25ထႃႇဝရႃႉၽြႃးၼၼ်ႉ ၶၼ်ႈၶႅၼ်ႈၵႃႈတီႈဝူင်ႈၵၢင်ႁဝ်းတင်းသူသေလႄႈ ဝႆႉၼမ်ႉႁွင်ႈ ယေႃးတၢၼ်ႇ ယဝ်ႉ။ ၵူၼ်းမဵဝ်း ရူႉပိၼ်ႇ ၶဝ်တင်းၵူၼ်းမဵဝ်း ၵၢတ်ႉ ၶဝ်ဢိူၺ်း၊ သူဢမ်ႇမီးပုၼ်ႈမီးတႃႇ ၼႂ်းထႃႇဝရႃႉၽြႃးလႃးလႃး၊ ဝႃႈၼင်ႇၼႆၼၼ်ႉလႄႈ၊ လုၵ်ႈသူလၢင်းသူတၵ်းႁဵတ်းႁႂ်ႈလုၵ်ႈႁဝ်းလၢင်းႁဝ်း ယင်းဢမ်ႇၵူဝ်ဢမ်ႇႁႄထႃႇဝရႃႉၽြႃးၼၼ်ႉလႄႈယူႇဢေႃႈ၊ ဝႃႈၼင်ႇၼႆဢေႃႈ။-

26ပိူဝ်ႈၼႆလႄႈ ႁဝ်းဝႃႈ၊ ဢွၼ်ၵၼ်မႄးႁႅၼ်းႁႂ်ႈလႆႈတႄႇႁဵတ်းယိတ်ႈပလၢင်ႇတႃႉႁဝ်း၊ ဝႃႈၼင်ႇၼႆလႄႈ ႁဵတ်းတၢင်းၵျၢမ်ႇတၢင်းပွင် ဢၼ်တၵ်းပုၵ်ႈၸေႃႇယိတ်ႈဢၼ်တုတ်ႇၽႆး၊ ဢိၵ်ႇတင်းယိတ်ႈတၢင်ႇၸိူဝ်ႉတၢင်ႇမဵဝ်းဢမ်ႇၸႂ်ႈ။-

27ယိတ်ႈပလၢင်ႇၼႆႉ တၵ်းပဵၼ်သၢၵ်ႈသေႇၵႃႈတီႈဝူင်ႈၵၢင်ႁဝ်းတင်းသူ၊ ဝူင်ႈၵၢင်လုၵ်ႈႁဝ်းလၢၼ်ႁဝ်းတင်းလုၵ်ႈသူလၢၼ်သူ လွင်ႈဢၼ်ႁဝ်းတၵ်းလႆႈႁဵတ်းၸႃႉၸဵမ်ယိတ်ႈဢၼ်တုတ်ႇၽႆးလႄႈ ယိတ်ႈတၢင်ႇၸိူဝ်ႉတင်းမဵဝ်း၊ တင်းၶိူင်ႈပုၵ်ႈၸေႃႇမိၵ်ႉသႃႇႁႃယႃႉသေလႄႈ ပွင်ႁဵတ်းဢမူႉထႃႇဝရႃႉၽြႃး ၵႃႈတီႈၽၢႆႇၼႃႈမၼ်းၸဝ်ႈ ဢိၵ်ႇတင်းလွင်ႈဢၼ်လုၵ်ႈသူလၢၼ်သူတၵ်းဢမ်ႇလႆႈလၢတ်ႈတီႈလုၵ်ႈႁဝ်းလၢၼ်ႁဝ်း ၶိင်ႇၵႃႇလႃႉၵမ်းလိုၼ်းပုၼ်ႉလႄႈဝႃႈ၊ သူဢမ်ႇမီးပုၼ်ႈမီးတႃႇၼႂ်းထႃႇဝရႃႉၽြႃးလႃးလႃး၊ ဝႃႈၼင်ႇၼႆၼၼ်ႉဢေႃႈ။-

28ပိူဝ်ႈၼႆလႄႈ ႁဝ်းဝႃႈ၊ ပေႃးၶဝ်လၢတ်ႈတီႈႁဝ်းဢိၵ်ႇတင်းလုၵ်ႈႁဝ်းလၢၼ်ႁဝ်းၵႃႈတီႈၶိင်ႇၵႃႇလႃႉၵမ်းလိုၼ်းပုၼ်ႉလႄႈ ဝႃႈၸိူဝ်ႉၼင်ႇၼၼ်ၸိုင်၊ ႁဝ်းတၵ်းမီးတီႈဢၼ်ၶိုၼ်းလၢတ်ႈလႄႈဝႃႈ၊ သူတူၺ်းပုင်ႇႁၢင်ႈယိတ်ႈပလၢင်ႇထႃႇဝရႃႉၽြႃး ဢၼ်ပေႃႈႁဝ်းၸိူဝ်းၼၼ်ႉ ႁဵတ်းဝႆႉႁႂ်ႈလႆႈပုၵ်ႈၸေႃႇၸႃႉၸဵမ်ယိတ်ႈဢၼ်တုတ်ႇၽႆးလႄႈ ယိတ်ႈတၢင်ႇၸိူဝ်ႉတၢင်ႇမဵဝ်းဢမ်ႇၸႂ်ႈ၊ ႁဵတ်းဝႆႉႁႂ်ႈလႆႈပဵၼ် သၢၵ်ႈသေႇၵႃႈတီႈဝူင်ႈၵၢင်ႁဝ်းတင်းသူၼၼ်ႉတႃႉ၊ ဝႃႈၼင်ႇၼႆၼၼ်ႉယဝ်ႉ။-

29ႁႂ်ႈဢမူႉတၢင်းဢၼ်ပုင်ႇၵၢၼ်ႇထႃႇဝရႃႉၽြႃးလႄႈ ယင်းဢမ်ႇၸွမ်းလင်မၼ်းၸဝ်ႈလႄႈ ဝႄႈပိူင်ႈၵႂႃႇလူၺ်ႈတၢင်းဢၼ် တႄႇႁဵတ်းယိတ်ႈပလၢင်ႇတၢင်ႇၸိူဝ်ႉတၢင်ႇဢၼ် ၼွၵ်ႈသေယိတ်ႈပလၢင်ႇထႃႇဝရႃႉၽြႃး ၽြႃးပဵၼ်ၸဝ်ႈႁဝ်းဢၼ်မီး ၵႃႈတီႈၽၢႆႇၼႃႈသုမ်ႉထဵင်ၸဝ်ႈၼၼ်ႉသေလႄႈ ႁဵတ်းၸႃႉၸဵမ်ယိတ်ႈဢၼ်တုတ်ႇၽႆးလႄႈ ယိတ်ႈတၢင်ႇၸိူဝ်ႉတၢင်ႇမဵဝ်း တင်းၶိူင်ႈပုၵ်ႈၸေႃႇၽေႃးၸဵၼ်ႇၼၼ်ႉ ၵႆၵၼ်တင်းႁဝ်းသေၵမ်းလူၺ်ႈ၊ ဝႃႈၼင်ႇၼႆဢေႃႈ။

30မိူဝ်ႈဢၼ်ယိတ်ႈပရေႃးႁဵၵ်ႈ ၽီႉၼႁတ်ႉ ဢိၵ်ႇတင်းၶုၼ်ပရဵၵ်ႈသၢတ်ႈတင်းလၢႆ ဢၼ်ဝႃႈၶဝ်ၸိူဝ်းဢၼ်ပဵၼ်ငဝ်ႈပဵၼ်ႁူဝ် ၵူၼ်းမဵဝ်း ဢီႉသရေႇလႃႉ ပဵၼ်ႁဵင်ပဵၼ်မိုၼ်ႇၸိူဝ်းၼၼ်ႉလႄႈ မီးလူၺ်ႈၵၼ်တင်းမၼ်းၼၼ်ႉ လႆႈငိၼ်းၵႂၢမ်းဢၼ်ၵူၼ်းမဵဝ်း ရူႉပိၼ်ႇ ၊ ၵူၼ်းမဵဝ်း ၵၢတ်ႉ တင်းၵူၼ်းမဵဝ်း မၼႃႇသေႇ လၢတ်ႈၼၼ်ႉၸိုင်၊ ပဵၼ်ဢၼ်ထုၵ်ႇၸႂ်ၵျိူၵ်ႈၸႂ်ၶဝ်ဢေႃႈ။-

31ယိတ်ႈပရေႃးႁဵၵ်ႈ ၽီႉၼႁတ်ႉ လုၵ်ႈၸၢႆး ဢေးလႃႇၸႃႇ ၼၼ်ႉၵေႃႈ လၢတ်ႈတီႈၵူၼ်းမဵဝ်း ရူႉပိၼ်ႇ ၊ ၵူၼ်းမဵဝ်း ၵၢတ်ႉ တင်းၵူၼ်းမဵဝ်း မၼႃႇသေႇ ၸိူဝ်းၼၼ်ႉလႄႈဝႃႈ၊ ဝၼ်းမိူဝ်ႈၼႆႉ ႁဝ်းႁူႉႁၼ်လွင်ႈဢၼ်ထႃႇဝရႃႉၽြႃး မီးယူႇၵႃႈၼႂ်းႁဝ်းၵွပ်ႈပိူဝ်ႈဢၼ်သူဢမ်ႇႁဵတ်းၽိတ်းႁဵတ်းပိူင်ႈ ထႃႇဝရႃႉၽြႃးၼၼ်ႉၼႆဢေႃႈ။ တေႃႈလဵဝ်ၼႆႉ သူၵႄႇသႄႇလိတ်ႈဢဝ် ၵူၼ်းမဵဝ်း ဢီႉသရေႇလႃႉ တင်းလၢႆ ၵႃႈၼႂ်းမိုဝ်းထႃႇဝရႃႉၽြႃးယဝ်ႉ၊ ဝႃႈၼင်ႇၼႆဢေႃႈ။-

32မိူဝ်ႈၼၼ်ႉ ယိတ်ႈပရေႃးႁဵၵ်ႈ ၽီႉၼႁတ်ႉ လုၵ်ႈၸၢႆး ဢေးလႃႇၸႃႇ ဢိၵ်ႇတင်းၶုၼ်ၸိူဝ်းၼၼ်ႉဢွၼ်ၵၼ်ၽၢတ်ႇသေ ၵူၼ်းမဵဝ်း ရူႉပိၼ်ႇ တင်းၵူၼ်းမဵဝ်း ၵၢတ်ႉ ၸိူဝ်းၼၼ်ႉလႄႈ ဢွၵ်ႇသေၵႃႈတီႈမိူင်း ၵီႉလတ်ႉ ၶိုၼ်းမိူဝ်းၵႂႃႇၵႃႈတီႈမိူင်း ၶႃႇၼၢၼ်ႇ ၸူးတီႈၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉလႄႈ ၶိုၼ်းမွၵ်ႇလၢတ်ႈၵႂၢမ်းၶဝ်ၼၼ်ႉသေယဝ်ႉ၊-

33ၵႂၢမ်းၼၼ်ႉပဵၼ်ဢၼ်ထုၵ်ႇၸႂ်ၵျိူၵ်ႈၸႂ် ၵူၼ်းမဵဝ်း ဢီႉသရေႇလႃႉ တင်းလၢႆလႄႈ ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ ဢွၼ်ၵၼ်ယွင်ႈယေႃးၵျေးၸူးၽြႃးပဵၼ်ၸဝ်ႈဢေႃႈ။ လိုၼ်းၼၼ်ႉ ၶဝ်ဢမ်ႇလၢတ်ႈလွင်ႈဢၼ်တၵ်းၶီႇသိုၵ်းၶိုၼ်ႈ ႁႂ်ႈလႆႈယႃႉပႅတ်ႈမိူင်းတီႈဢၼ်ၵူၼ်းမဵဝ်း ရူႉပိၼ်ႇ တင်းၵူၼ်းမဵဝ်း ၵၢတ်ႉ ၸိူဝ်းၼၼ်ႉယူႇၼၼ်ႉထႅင်ႈ။-

34ၵူၼ်းမဵဝ်း ရူႉပိၼ်ႇ တင်းၵူၼ်းမဵဝ်း ၵၢတ်ႉ ၸိူဝ်းၼၼ်ႉၵေႃႈ ႁွင်ႉႁဵၵ်ႈၸိုဝ်ႈယိတ်ႈပလၢင်ႇၼၼ်ႉ ဢေတႃႉ ဢေႃႈ။ လွင်ႈမၼ်းၸမ်ႉ ၶဝ်ဝႃႈ၊ မၼ်းၶၢမ်ႇသၢၵ်ႈသေႇ ၵႃႈတီႈဝူင်ႈၵၢင်ႁဝ်း လူၺ်ႈလွင်ႈဢၼ်ထႃႇဝရႃႉၽြႃး ပဵၼ်ၽြႃးပဵၼ်ၸဝ်ႈၼၼ်ႉဢေႃႈ၊ ဝႃႈၼင်ႇၼႆဢေႃႈ။

← Chapter 21 Jump to: Chapter 23 →