Joshua 2

Shan

← Chapter 1 Jump to: Chapter 3 →

1မိူဝ်ႈၼၼ်ႉ ယေႃးသူႉ လုၵ်ႈၸၢႆး ၼုၼ်ႇ ၼၼ်ႉ တဵတ်ႇတဵတ်ႇပွႆႇၸႂ်ႉၶဵဝ်လွတ်ႈၽၢႆႇၼႂ်းသွင်ၵေႃႉ ဢွၵ်ႇသေၵႃႈတီႈဝဵင်း သိတ်ႇတိမ်ႇ ၵႂႃႇလႄႈ သင်ႇလၢတ်ႈဝႃႈ၊ ၵႂႃႇလႄႈလူတူၺ်းမိူင်းဢိၵ်ႇတင်းဝဵင်း ယေႇရီႉၶူဝ်း ၼၼ်ႉတႃႉ၊ ဝႃႈၼင်ႇၼႆသေယဝ်ႉ၊ သွင်ၶႃၼၼ်ႉၵႂႃႇလႄႈ ၶဝ်ႈၵႃႈၼႂ်းႁိူၼ်းမႄႈမွၵ်ႇယႃႈ ဢၼ်လႆႈၸိုဝ်ႈ ရႃႇၶပ်ႉ သေလႄႈ ယူႇၵႃႈတီႈၼၼ်ႈဢေႃႈ။-

2ပိူၼ်ႈလဝ်ႊလၢတ်ႈတီႈၶုၼ်ႁေႃၶမ်း ယေႇရီႉၶူဝ်း လႄႈဝႃႈ၊ ၵူၼ်းမဵဝ်း ဢီႉသရေႇလႃႉ ၵမ်ႈၽွင်ႈၶဝ်ႈမႃးၵႃႈၼႂ်းဝဵင်းၼႆႉၶမ်ႈၼႆႉႁႂ်ႈလႆႈလွမ်တူၺ်းမိူင်းၼႆႉၶႃႈယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

3ၶုၼ်ႁေႃၶမ်း ယေႇရီႉၶူဝ်း ၼၼ်ႉပွႆႇၸႂ်ႉၵႂႃႇၵႃႈတီႈ ရႃႇၶပ်ႉ လႄႈမီးဢမိင်ႉဝႃႈ၊ ဢဝ်ၶဝ်ၸိူဝ်းဢၼ်ႁွတ်ႈမႃးၵႃႈတီႈမႂ်းလႄႈ ၶဝ်ႈၵႃႈၼႂ်းႁိူၼ်းမႂ်းၼၼ်ႉ ဢၢပ်ႈတႃႉ။ ၶဝ်ႁွတ်ႈမႃးႁႂ်ႈလႆႈလွမ်တူၺ်းမိူင်းၼႆႉတင်းမိူင်းယဝ်ႉ၊ ဝႃႈၼင်ႇၼႆဢေႃႈ။-

4မႄႈယိင်းၼၼ်ႉဢဝ်သွင်ၶႃၼၼ်ႉသိူင်ႇဝႆႉသေယဝ်ႉ၊ ၶိုၼ်းလၢတ်ႈလႄႈဝႃႈ၊ ၸႂ်ႈတႄႉ။ ၵူၼ်းႁွတ်ႈမႃးၵႃႈတီႈၵဝ်ၶႃႈၶႃႈဢေႃႈ။ ၵူၺ်းၵႃႈ ၵဝ်ၶႃႈဢမ်ႇႁူႉလွင်ႈဢၼ်ၶဝ်လုၵ်ႉသေၵႃႈတီႈလႂ်မႃးၼၼ်ႉၶႃႈ။-

5မိူဝ်ႈဢၼ်ၵၢင်ဝၼ်းၶမ်ႈလႄႈထိုင်ၶိင်ႇဢၼ်ဢိုတ်းၽၵ်းတူၼၼ်ႉၸိုင်၊ သွင်ၶႃၼၼ်ႉဢွၵ်ႇၵႂႃႇသေၶႃႈဢေႃႈ။ ၵဝ်ၶႃႈဢမ်ႇႁူႉလွင်ႈဢၼ်သွင်ၶႃဢွၵ်ႇၵႂႃႇၵႃႈတီႈလႂ်ၼၼ်ႉၶႃႈ။ လိုပ်ႈၸွမ်းလမ်းၸွမ်းၶၼ်ၶၼ်ဝႆးဝႆးၶႃႈတႃႉ။ လီၶိုတ်းတၵ်းၶိုတ်းၶႃႈဢေႃႈ၊ ဝႃႈၼင်ႇၼႆဢေႃႈ။-

6ၵူၺ်းၵႃႈ မၼ်းဢဝ်သွင်ၶႃၶိုၼ်ႈၵႃႈၼိူဝ်မုင်းႁိူၼ်းသေလႄႈ ဢဝ်သိူင်ႇဝႆႉၵႃႈၼႂ်းၵၢၼ်ႈတူၼ်ႈပၢၼ်ႇ ဢၼ်မၼ်းၽႄႇသိူဝ်ႇဝႆႉ ၵႃႈၼိူဝ်မုင်းႁိူၼ်းၼၼ်ႉယဝ်ႉ။-

7ၵူၼ်းၸိူဝ်းၼၼ်ႉဢွၼ်ၵၼ်လိုပ်ႈၸွမ်းလမ်းၸွမ်းၵႃႈၼႂ်းသဵၼ်ႈတၢင်းဢၼ်ၵႂႃႇၸူးၵႃႈတီႈၼမ်ႉႁွင်ႈ ယေႃးတၢၼ်ႇ ၼၼ်ႉ တေႃႇထိုင်ႁွတ်ႈတိုဝ်ႉတႃႈတီႈဢၼ်ၶၢမ်ႈၼမ်ႉႁွင်ႈၼၼ်ႉဢေႃႈ။ မိူဝ်ႈဢၼ်ၶဝ်ၸိူဝ်းဢၼ်လိုပ်ႈၸွမ်းလမ်းၸွမ်းၼၼ်ႉ ႁွတ်ႈၵႃႈတီႈၼွၵ်ႈဝဵင်းယဝ်ႉၼၼ်ႉၸိုင် ၶဝ်ဢိုတ်းၽၵ်းတူဝဵင်းဝႆႉသေဢေႃႈ။

8ၸူဝ်ႈဢၼ်သွင်ၶႃၼၼ်ႉဢမ်ႇပႆႇၼွၼ်းၼၼ်ႉၸိုင် မၼ်းၼၼ်ႉၶိုၼ်ႈၵႃႈၼိူဝ်မုင်းႁိူၼ်းတီႈဢၼ်သွင်ၶႃမီးၼၼ်ႉသေလႄႈလၢတ်ႈလႄႈဝႃႈ၊-

9ၵဝ်ၶႃႈႁူႉလွင်ႈဢၼ်ထႃႇဝရႃႉၽြႃး ဢဝ်မိူင်းၼႆႉပၼ်တီႈသူၸဝ်ႈ ဢိၵ်ႇတင်းလွင်ႈဢၼ်ၵူဝ်ဢၼ်ႁႄသူၸဝ်ႈဢၼ်ယႂ်ႇၼႃႇလူင်လၢင်ၼၼ်ႉတူၵ်းႁွတ်ႈၵႃႈၼိူဝ်ႁဝ်းၶႃႈလႄႈ ႁူဝ်ၸႂ်ၵူၼ်းဝၢၼ်ႈၵူၼ်းမိူင်းၵႃႈမီးၸိူမ်ႈယၢႆႈၵႂႃႇ ၵွပ်ႈပိူဝ်ႈသူၼၼ်ႉၶႃႈဢေႃႈ။-

10ႁဝ်းၶႃႈလႆႈငိၼ်းလွင်ႈဢၼ်ထႃႇဝရႃႉၽြႃး ႁႂ်ႈၼမ်ႉပၢင်ႇလၢႆႇ ဢေႇတုမ်ႇ ယူတ်းႁႅင်ႈၵႂႃႇၵႃႈတီႈၽၢႆႇၼႃႈသူၸဝ်ႈ ၼႂ်းမိူဝ်ႈဢၼ်သူၸဝ်ႈ ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉ ဢိၵ်ႇတင်းလွင်ႈဢၼ်သူၸဝ်ႈႁဵတ်းတီႈၶုၼ်ႁေႃၶမ်း ဢႃႇမေႃးရီႉ သွင်ပႃးဢၼ်ယူႇ ၵႃႈတီႈၽၢႆႇပုၼ်ႉၼမ်ႉႁွင်ႈ ယေႃးတၢၼ်ႇ ဢၼ်ဝႃႈ သီႉႁုၼ်ႇ တင်း ဢေႃႇၶႃႉ ဢၼ်သူၸဝ်ႈယႃႉပႅတ်ႈမူတ်းမူတ်းၼၼ်ႉၶႃႈယဝ်ႉ။-

11မိူဝ်ႈဢၼ်ႁဝ်းၶႃႈငိၼ်းလွင်ႈမၼ်းတၢင်းမၼ်းၼၼ်ႉၸိုင်၊ ႁူဝ်ၸႂ်ႁဝ်းၶႃႈၸိူမ်ႈယၢႆႈၵႂႃႇလႄႈ တၢင်းဢၼ်ၵတ်ႉၶၼ်ႁတ်းႁၢၼ် ဢမ်ႇၵိုတ်းၵျၢၼ်ႇဝႆႉၵႃႈတီႈသေၵေႃႉသေၵူၼ်းလႃးလႃး ၵွပ်ႈပိူဝ်ႈသူၸဝ်ႈၶႃႈယဝ်ႉ။ လွင်ႈမၼ်းၸမ်ႉ ထႃႇဝရႃႉၽြႃး ၽြႃးပဵၼ်ၸဝ်ႈသူၸဝ်ႈၼၼ်ႉ ပဵၼ်ၽြႃးၵႃႈၼႂ်းၽုင်ႇၵၢင်ႁၢဝ်ၵႃႈၼိူဝ် ဢိၵ်ႇတင်းၵႃႈတီႈလိၼ်မိူင်းၵႃႈတႂ်ႈၶႃႈဢေႃႈ။-

12ပိူဝ်ႈၼႆလႄႈ သွင်ၸဝ်ႈဢဝ်ထႃႇဝရႃႉၽြႃး တိူင်ႇဝႃႈလူၺ်ႈလွင်ႈဢၼ် ၵွပ်ႈပိူဝ်ႈဢၼ်ၵဝ်ၶႃႈႁဵတ်းၵျေးၸူးတီႈသွင်ၸဝ်ႈလႄႈ သွင်ၸဝ်ႈၵေႃႈတၵ်းႁဵတ်းၵျေးၸူးတီႈပီႈၼွင်ႉၸိူဝ်ႉၶိူဝ်းပေႃႈၵဝ်ၶႃႈတင်းလၢႆၼၼ်ႉလႄႈ ဢဝ်လၢၵ်ႈၶၼႃႇသၢၵ်ႈသေႇ ဢၼ်ၸိုဝ်ႈဢၼ်ၸႂ်ႈပၼ်ဝႆႉတီႈၵဝ်ၶႃႈ၊-

13ဢိၵ်ႇတင်းလွင်ႈဢၼ်သူၸဝ်ႈယင်းဢမ်ႇဢဝ်ပေႃႈၵဝ်ၶႃႈမႄႈၵဝ်ၶႃႈ၊ ပီႈၸၢႆးၼွင်ႉၸၢႆးၵဝ်ၶႃႈ၊ ပီႈၼၢင်းၼွင်ႉယိင်းၵဝ်ၶႃႈ၊ ဢိၵ်ႇတင်း ၵူၼ်းၵႃႈဢၼ်ၸၢပ်ႈသႅင်ႇၵၼ်တင်းၶဝ်ၼၼ်ႉတၢႆလႄႈ၊ တၵ်းပၼ်ၵတ်းယဵၼ်ၶျၢမ်းသႃႇတီႈႁဝ်းၶႃႈၼၼ်ႉသေၵမ်းၶႃႈ၊ ဝႃႈၼင်ႇၼႆသေယဝ်ႉ၊ သွင်ၶႃၼၼ်ႉ ႁပ်ႉတုင်းဢဝ်လႄႈဝႃႈ၊-

14ပေႃးမႂ်းဢမ်ႇၽုၺ်ႇဢွၵ်ႇၼႄပျႃးဢမူႉႁႃးၼႆႉၸိုင်၊ ႁႂ်ႈဢသၢၵ်ႈႁႃးၼႆႉ ပဵၼ်တၢင်းဢၼ်ႁပ်ႉတုင်းဢဝ်ပုၼ်ႈဢသၢၵ်ႈမႂ်းတႃႉ။ မိူဝ်ႈဢၼ်ထႃႇဝရႃႉၽြႃး ဢဝ်မိူင်းၼႆႉပၼ်တီႈႁဝ်းၼၼ်ႉၸိုင်၊ ႁဝ်းတၵ်းႁဵတ်းၵျေးၸူးတီႈမႂ်းလႄႈ ပႂ်ႉသဵတ်ႈၸႃႇယူႇဢေႃႈ၊ ဝႃႈၼင်ႇၼႆဢေႃႈ။-

15ၵွပ်ႈပိူဝ်ႈဢၼ်ႁိူၼ်းမၼ်းမီးၵႃႈၼိူဝ်လမ်းဝဵင်း မၼ်းယူႇၵႃႈၼိူဝ်လမ်းဝဵင်းၼၼ်ႉလႄႈ မၼ်းဢဝ်ၸိူၵ်ႈဢဝ်သွင်ၶႃၼၼ်ႉယွၼ်ႇတူၵ်းသေ ၵႃႈၼိူဝ်ႁူးလၢင်းတဵၼ်ယူႇသေလႄႈ သင်ႇလၢတ်ႈလႄႈဝႃႈ၊-

16လွင်ႈၼင်ႇႁိုဝ်ၶဝ်ၸိူဝ်းဢၼ်လိုပ်ႈၸွမ်းလမ်းၸွမ်းသွင်ၸဝ်ႈၼၼ်ႉ တၵ်းဢမ်ႇလႆႈႁူပ်ႉထူပ်းသွင်ၸဝ်ႈၸိုင် ပၢႆႈၵႂႃႇၸူးၵႃႈတီႈၼိူဝ်လွႆသေလႄႈ တဵတ်ႇယူႇသေသၢမ်ဝၼ်းၼိုင်ႈတေႃႇထိုင်ႁွတ်ႈၶဝ်ၸိူဝ်းဢၼ်လိုပ်ႈၸွမ်းလမ်းၸွမ်းၼၼ်ႉၶိုၼ်းမႃးယဝ်ႉၼၼ်ႉသေၵမ်း။ လိုၼ်းၼၼ်ႉၸင်ႇၵႂႃႇသေၵမ်း၊ ဝႃႈၼင်ႇၼႆဢေႃႈ။-

17သွင်ၶႃၼၼ်ႉလၢတ်ႈတီႈမၼ်းလႄႈဝႃႈ၊ ႁႃးတၵ်းၵၢင်းလွတ်ႈတင်းဢပႅတ်ႈၼႂ်းၵႂၢမ်းသဵတ်ႈၸႃႇဢၼ်မႂ်းႁႂ်ႈႁႃးၵိၼ်ႇဝႃႈၼၼ်ႉဢေႃႈ။-

18တူၺ်းလူး၊ မိူဝ်ႈဢၼ်ႁဝ်းႁွတ်ႈထိုင်ၵႃႈၼႂ်းမိူင်းၼႆႉၼၼ်ႉၸိုင်၊ မႂ်းတၵ်းလႆႈဢဝ်ၸိူၵ်ႈဢၼ်လႅင်သဵၼ်ႈၼႆႉ မတ်ႉဝႆႉၵႃႈၼႂ်းႁူးလၢင်းတဵၼ် ဢၼ်မႂ်းဢဝ်ႁႃးယွၼ်ႇတူၵ်းၼႆႉလႄႈ ႁွင်ႉဢဝ်ပေႃႈမႂ်းမႄႈမႂ်း၊ ပီႈၸၢႆးၼွင်ႉၸၢႆးမႂ်းဢိၵ်ႇတင်း ၵူၼ်းႁိူၼ်းၵူၼ်းယေးပေႃႈမႂ်းၵႃႈမီးၼၼ်ႉ ဝႆႉၵႃႈၼႂ်းႁိူၼ်းမႂ်းဢေႃႈ။-

19ၵူၺ်းၵႃႈ ၵေႃႉဢၼ်ဢွၵ်ႇသေၵႃႈၼႂ်းၽၵ်းတူႁိူၼ်းမႂ်းလႄႈ ၵႂႃႇၵႃႈတီႈၵၢင်တၢင်းၼၼ်ႉၸမ်ႉ၊ ႁႂ်ႈလိူတ်ႈမၼ်းတူၵ်းႁွတ်ႈၵႃႈၼိူဝ်ႁူဝ်မၼ်းတႃႉ။ ႁႃးၸမ်ႉ၊ တၵ်းၵၢင်းလွတ်ႈဢေႃႈ။ ၵေႃႉဢၼ်မီးယူႇလူၺ်ႈၵၼ်တင်းမႂ်းၵႃႈၼႂ်းႁိူၼ်းၼႆႉၼၼ်ႉၸမ်ႉ၊ ပေႃးမိုဝ်းသေၵေႃႉသေၵူၼ်းႁွတ်ႈထိုင်ၵႃႈၼိူဝ်မၼ်းၸိုင်၊ ႁႂ်ႈလိူတ်ႈမၼ်းၼၼ်ႉ တူၵ်းႁွတ်ႈၵႃႈၼိူဝ်ႁႃးတႃႉ။-

20ပေႃးမႂ်းၽုၺ်ႇဢွၵ်ႇၼႄပျႃးဢမူႉႁႃးၵေႃႈ ႁႃးတၵ်းၵၢင်းလွတ်ႈတင်းၵႂၢမ်းသဵတ်ႈၸႃႇဢၼ်မႂ်း ႁႂ်ႈႁႃးၵိၼ်ႇဝႃႈၼႆႉဢေႃႈ၊ ဝႃႈၼင်ႇၼႆလႄႈ၊-

21မၼ်းၼၼ်ႉလၢတ်ႈလႄႈဝႃႈ၊ ႁႂ်ႈပဵၼ်ၸွမ်းၵႃႈၼင်ႇၵႂၢမ်းသွင်ၸဝ်ႈၼၼ်ႉသေၵမ်းတႃႉ၊ ဝႃႈၼင်ႇၼႆသေယဝ်ႉ၊ မၼ်းပွႆႇသွင်ၶႃၼၼ်ႉၵႂႃႇလႄႈ သွင်ၶႃၼၼ်ႉၵႂႃႇဢေႃႈ။ မၼ်းၵေႃႈဢဝ်ၸိူၵ်ႈဢၼ်လႅင်ၼၼ်ႉမတ်ႉဝႆႉၵႃႈၼႂ်းႁူးလၢင်းတဵၼ်ဢေႃႈ။-

22သွင်ၶႃၼၼ်ႉၵႂႃႇလႄႈႁွတ်ႈထိုင်ၵႃႈၼိူဝ်လွႆသေယဝ်ႉ၊ ယူႇသၢမ်ဝၼ်းတေႃႇထိုင်ႁွတ်ႈ ၶဝ်ၸိူဝ်းဢၼ် လိုပ်ႈၸွမ်းလမ်းၸွမ်းၼၼ်ႉ ထၼ်ႈပေႃးၶိုၼ်းမိူဝ်းယဝ်ႉၼၼ်ႉဢေႃႈ။-

23သွင်ၶႃၼၼ်ႉဝၢႆႇၶိုၼ်းလႄႈ လူင်းသေၵႃႈၼိူဝ်လွႆသေလႄႈ ၶၢမ်ႈၼမ်ႉႁွင်ႈလႄႈႁွတ်ႈထိုင်ၵႃႈတီႈ ယေႃးသူႉ လုၵ်ႈၸၢႆး ၼုၼ်ႇ သေယဝ်ႉ၊ ဢွၼ်ၵၼ်မွၵ်ႇလၢတ်ႈ ၵႃႈဢၼ်ပဵၼ်တီႈသွင်ၶႃၼၼ်ႉဢေႃႈ။-

24သွင်ၶႃလဝ်ႊလၢတ်ႈတီႈ ယေႃးသူႉ လႄႈဝႃႈ၊ ထႃႇဝရႃႉၽြႃး ဢဝ်မိူင်းၼၼ်ႉတင်းသဵင်ႈတင်းမူတ်းဢၢပ်ႈပၼ်တီႈႁဝ်းၶႃႈဢမၢၼ်ႇၶၼ်ပဵၼ်ၶႃႈယဝ်ႉ။ ႁူဝ်ၸႂ်ၵူၼ်းဝၢၼ်ႈၵူၼ်းမိူင်းၵႃႈမီးၼၼ်ႉ ၸိူမ်ႈယၢႆႈၵႂႃႇၵွပ်ႈပိူဝ်ႈႁဝ်းၶႃႈယဝ်ႉၶႃႈဢေႃႈ၊ ဝႃႈၼင်ႇၼႆဢေႃႈ။

← Chapter 1 Jump to: Chapter 3 →