Joshua 5

Shan

← Chapter 4 Jump to: Chapter 6 →

1မိူဝ်ႈဢၼ်ၶုၼ်လူင် ဢႃႇမေႃးရီႉ ဢၼ်ယူႇၽၢႆႇဝၼ်းတူၵ်းၼမ်ႉႁွင်ႈ ယေႃးတၢၼ်ႇ တင်းသဵင်ႈတင်းလူင် ဢိၵ်ႇတင်းၶုၼ်လူင် ၶႃႇၼၼီႉ ဢၼ်ယူႇၵႃႈႁိမ်းပၢင်ႇလၢႆႇတင်းသဵင်ႈတင်းလူင်ၼၼ်ႉ ႁူႉငိၼ်းလွင်ႈဢၼ်ထႃႇဝရႃႉၽြႃး ႁႂ်ႈၼမ်ႉၼႂ်းၼမ်ႉႁွင်ႈ ယေႃးတၢၼ်ႇ ယူတ်းႁႅင်ႈၵႂႃႇၵႃႈတီႈ ၽၢႆႇၼႃႈၵူၼ်းမဵဝ်း ဢီႉသရေႇလႃႉ တင်းလၢႆ တေႃႇထိုင်ႁွတ်ႈႁဝ်းထၼ်ႈပေႃးလႆႈၶၢမ်ႈမႃးၼၼ်ႉၸိုင်၊ ႁူဝ်ၸႂ်ၶဝ်ၸိူမ်ႈယၢႆႈၵႂႃႇလႄႈ တၢင်းဢၼ်ၵတ်ႉၶၼ်ႁတ်းႁၢၼ်ၶဝ်ဢမ်ႇၵိုတ်းဢမ်ႇၵျၢၼ်ႇဝႆႉတီႈၶဝ်လႃးလႃး ၵွပ်ႈပိူဝ်ႈၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉဢေႃႈ။

2မိူဝ်ႈၼၼ်ႉ ထႃႇဝရႃႉၽြႃးမီးဢမိင်ႉတီႈ ယေႃးသူႉ လႄႈဝႃႈ၊ မႂ်းဢဝ်မၢၵ်ႇႁိၼ်လဵၵ်းပၢႆႇႁဵတ်းမိတ်ႈသေလႄႈ၊ သမ်ႉပၼ်မင်ႇၵလႃႇ တၢင်းဢၼ်ထိူဝ်ႁိမ်း တီႈၵူၼ်းမဵဝ်း ဢီႉသရေႇလႃႉ တင်းလၢႆထႅင်ႈပွၵ်ႈၼိုင်ႈတႃႉ၊ ဝႃႈၼင်ႇၼႆသေယဝ်ႉ၊-

3ယေႃးသူႉ ဢဝ်မၢၵ်ႇႁိၼ်လဵၵ်းပၢႆႇႁဵတ်းမိတ်ႈလႄႈ ပၼ်မင်ႇၵလႃႇတၢင်းဢၼ်ထိူဝ်ႁိမ်းပၢႆၼင် တီႈၵူၼ်းမဵဝ်း ဢီႉသရေႇလႃႉ တင်းလၢႆ ၵႃႈတီႈလွႆပၢႆၼင်ၼၼ်ႉဢေႃႈ။-

4လွင်ႈဢၼ် ယေႃးသူႉ လႆႈပၼ်မင်ႇၵလႃႇတၢင်းဢၼ်ထိူဝ်ႁိမ်းၸိူဝ်ႉၼင်ႇၼၼ်ၼၼ်ႉၸမ်ႉ၊ ၵႃႈပဵၼ်ၵူၼ်းၸၢႆးဢၼ်ပဵၼ်ၵူၼ်းသိုၵ်း ဢၼ်ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၸိူဝ်းၼၼ်ႉ တၢႆၵႃႈၼႂ်းထိူၼ်ႇၸွမ်းတႃႈၸွမ်းတၢင်း လိုၼ်းသေဢၼ်ၶဝ်ဢွၵ်ႇသေၵႃႈၼႂ်း မိူင်း ဢေႇၵိပ်ႉတူႉ မႃးၼၼ်ႉဢေႃႈ။-

5ၶဝ်ၸိူဝ်းဢၼ်ဢွၵ်ႇသေၵႃႈၼႂ်းမိူင်းၼၼ်ႉမႃးတင်းသဵင်ႈတင်းလူင်ၼၼ်ႉၸိုင်၊ လႆႈၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်းဝႆႉယဝ်ႉ။ ၶဝ်ၸိူဝ်းဢၼ်ၵိူတ်ႇလဵင်ႉၵႃႈၼႂ်းထိူၼ်ႇၸွမ်းတႃႈၸွမ်းတၢင်း တင်းသဵင်ႈတင်းလူင်ၼၼ်ႉၸမ်ႉ၊ ဢမ်ႇပႆႇလႆႈၶၢမ်ႇမင်ႇၵလႃႇ တၢင်းဢၼ်ထိူဝ်ႁိမ်း။-

6ၵူၼ်းမဵဝ်း ဢီႉသရေႇလႃႉ တင်းလၢႆ လႆႈလႄႇၵႂႃႇလႄႇမႃးယူႇၵႃႈၼႂ်းထိူၼ်ႇသီႇသိပ်းပီႊတဵမ်တဵမ် တေႃႇထိုင်ႁွတ်ႈၵူၼ်းၸၢႆးဢၼ်ပဵၼ် ၵူၼ်းသိုၵ်းဢၼ်ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃး တင်းသဵင်ႈတင်းလူင်ၼၼ်ႉထၼ်ႈပေႃးတၢႆ ၵွပ်ႈပိူဝ်ႈဢၼ်ၶဝ်ဢမ်ႇထွမ်ႇဢမ်ႇဢဝ်ၵႂၢမ်းထႃႇဝရႃႉၽြႃးၼၼ်ႉဢေႃႈ။ ထႃႇဝရႃႉၽြႃးတိူင်ႇဝႃႈဝႆႉလွင်ႈဢၼ်ၶဝ်တၵ်းဢမ်ႇလႆႈႁၼ်မိူင်းဢၼ်ထႃႇဝရႃႉၽြႃး တိူင်ႇဝႃႈဝႆႉလွင်ႈဢၼ်တၵ်းပၼ်တီႈႁဝ်းၼၼ်ႉ တီႈပူႇမွၼ်ႇႁဝ်းဢၼ်ဝႃႈ မိူင်းဢၼ်ၼမ်ႉၼူမ်းတင်းၼမ်ႉၽိုင်ႈၸၢင်ႈလႆယူႇၼၼ်ႉဝႆႉယဝ်ႉ။-

7တီႈလုၵ်ႈလၢင်းၶဝ်ဢၼ်မၼ်းၸဝ်ႈႁႂ်ႈပဵၼ်တၢင်တူဝ်ၶဝ်ၸိူဝ်းၼၼ်ႉၸမ်ႉ၊ ယေႃးသူႉ ပၼ်မင်ႇၵလႃႇ တၢင်းဢၼ်ထိူဝ်ႁိမ်းတီႈၶဝ် ၵွပ်ႈပိူဝ်ႈဢၼ်ၶဝ်ဢမ်ႇပႆႇလႆႈၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်း ပိူဝ်ႈဢၼ်ပိူၼ်ႈဢမ်ႇပၼ်မင်ႇၵလႃႇ တီႈၶဝ်ၸွမ်းတႃႈၸွမ်းတၢင်းၼၼ်ႉဢေႃႈ။-

8ၵူၼ်းတင်းသဵင်ႈတင်းလူင်ၸိူဝ်းၼၼ်ႉ ဢွၼ်ၵၼ်ၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်းသေယဝ်ႉ၊ ယူႇၵႃႈၼႂ်းတီႈယူႇၶဝ်ၵႃႈၼႂ်းတပ်ႉ တေႃႇထိုင်ႁွတ်ႈ တၢင်းၸဵပ်းၶဝ်ထၼ်ႈပေႃးႁၢႆၼၼ်ႉဢေႃႈ။-

9ထႃႇဝရႃႉၽြႃးၵေႃႈလၢတ်ႈတီႈ ယေႃးသူႉ လႄႈဝႃႈ၊ ဝၼ်းမိူဝ်ႈၼႆႉၵဝ်ပႄႇလွင်ႈတၢင်းဢၼ်လီသႄႉသွမ်းဢၼ်ၸၢပ်ႈသႅင်ႇၵၼ်တင်း မိူင်း ဢေႇၵိပ်ႉတူႉ ၼၼ်ႉ ပႅတ်ႈသေၵႃႈတီႈသူယဝ်ႉ၊ ဝႃႈၼင်ႇၼႆဢေႃႈ။ ပိူဝ်ႈၼႆလႄႈ ၵႃႈတီႈၼၼ်ႈ လႆႈၶၢမ်ႇတၢင်းဢၼ်ႁွင်ႉႁဵၵ်ႈၸိုဝ်ႈ ၵီႉလႃႉၵႃႇလႃႉ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။

10ၵူၼ်းမဵဝ်း ဢီႉသရေႇလႃႉ တင်းလၢႆ ၶျႃးတပ်ႉယူႇၵႃႈၼႂ်းတီႈ ၵီႉလႃႉၵႃႇလႃႉ ၼၼ်ႉလႄႈ ၶၢမ်ႇပွႆး ပႃႉသၶႃႇ ၵႃႈၼႂ်းပၢင်ႇပဵင်း ယေႇရီႉၶူဝ်း ၼၼ်ႉၼႂ်းလိူၼ်ၼၼ်ႉ လႆႈသိပ်းသီႇဝၼ်း ၶိင်ႇႁူဝ်ၶမ်ႈဢေႃႈ။-

11ၶဝ်ၶၢမ်ႇပွႆး ပႃႉသၶႃႇ သေယဝ်ႉ၊ ဝၼ်းမိူဝ်ႈၽုၵ်ႈၼၼ်ႉ၊ ၶဝ်လႆႈၵိၼ်ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈတင်းၶဝ်ႈတႅၵ်ႇ ဢၼ်ဢဝ်ၶဝ်ႈမိူင်းၼၼ်ႉႁဵတ်းၼၼ်ႉ ၼႂ်းဝၼ်းၼၼ်ႉၵမ်းလဵဝ်ဢေႃႈ။-

12လိုၼ်းသေဢၼ်ၶဝ်ၵိၼ်ၶဝ်ႈမိူင်း ၶႃႇၼၢၼ်ႇ ၼၼ်ႉယဝ်ႉၼၼ်ႉ၊ ဝၼ်းမိူဝ်ႈၽုၵ်ႈၼၼ်ႉ မၼ်ႇၼႃႉ ထၢတ်ႇၵႂႃႇသေဢေႃႈ။ ၵမ်းလိုၼ်း ၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉဢမ်ႇလႆႈ မၼ်ႇၼႃႉ ။ ၼႂ်းပီႊၼၼ်ႉၶဝ်လႆႈၵိၼ်မၢၵ်ႇၵိၼ်ႁူင်း ဢၼ်ပဵၼ်ၵႃႈတီႈမိူင်း ၶႃႇၼၢၼ်ႇ ၼၼ်ႉဢေႃႈ။

13ယေႃးသူႉ ၼၼ်ႉ ၼႂ်းမိူဝ်ႈဢၼ်ယင်းတိုၵ်ႉမီးယူႇၵႃႈတီႈႁိမ်းဝဵင်း ယေႇရီႉၶူဝ်း ၼၼ်ႉၸိုင်၊ မုင်ႈတူၺ်းလႄႈလႆႈႁၼ်ၵူၼ်းၵေႃႉၼိုင်ႈ ထွတ်ႇလၢပ်ႇယိပ်းၵမ်ယူႇသေလႄႈ ၸုၵ်းၶႂၢင်ယူႇၼၼ်ႉသေယဝ်ႉ၊ ယေႃးသူႉ ၵႂႃႇၸူးၵႃႈတီႈမၼ်းၼၼ်ႉလႄႈထၢမ်ဝႃႈ၊ မႂ်းပဵၼ်ၵေႃႉဢၼ်ယူႇၽၢႆႇႁဝ်းႁိုဝ်။ ပဵၼ်ၵေႃႉဢၼ်ယူႇၽၢႆႇရၢၼ်ႇသူႇႁဝ်းႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

14မၼ်းၼၼ်ႉလၢတ်ႈလႄႈဝႃႈ၊ ဢမ်ႇၸႂ်ႈၸိူဝ်ႉၼင်ႇၼၼ်၊ ပဵၼ်ၶုၼ်ပူဝ်ႇဢၼ်ဢုပ်ႉပိူင်ႇပူဝ်ႇပႃႇထႃႇဝရႃႉၽြႃးလႄႈ ၵဝ်မႃးတေႃႈလဵဝ်ၼႆႉဢေႃႈ၊ ဝႃႈၼင်ႇၼႆဢေႃႈ။ ယေႃးသူႉ ၵေႃႈမူပ်ႇတဵတ်ႇၵႃႈၼိူဝ်လိၼ်လႄႈ ၵူဝ်းၵႂၢႆႇယူႇသေလႄႈ လဝ်ႊထၢမ်လႄႈဝႃႈ၊ ၸဝ်ႈႁဝ်းတၵ်းမီးဢမိင်ႉတီႈၶႃႈၸဝ်ႈႁဝ်းၼႆႉၸိူဝ်ႉၼင်ႇႁိုဝ်ၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

15ၶုၼ်ပူဝ်ႇဢၼ်ဢုပ်ႉပိူင်ႇပူဝ်ႇပႃႇထႃႇဝရႃႉၽြႃးၼၼ်ႉ လၢတ်ႈတီႈ ယေႃးသူႉ လႄႈဝႃႈ၊ ထွတ်ႇၶႅပ်းတိၼ်မႂ်းသေၵႃႈတီႈတိၼ်မႂ်းတႃႉ။ တီႈဢၼ်မႂ်းယဵပ်ႇၼၼ်ႉၸမ်ႉ၊ ပဵၼ်ဢၼ်မူတ်းၸၢင်ႇဢေႃႈ၊ ဝႃႈၼင်ႇၼႆလႄႈ၊ ယေႃးသူႉ ႁဵတ်းၸွမ်းၸိူဝ်ႉၼင်ႇၼၼ်ဢေႃႈ။

← Chapter 4 Jump to: Chapter 6 →