Joshua 24

Shan

← Chapter 23 Jump to:

1ယေႃးသူႉ ႁႂ်ႈမဵဝ်း ဢီႉသရေႇလႃႉ ၵူႈမဵဝ်းၸူႉၵၼ်တုမ်ၵၼ် ၵႃႈတီႈဝဵင်း သေႇၶိမ်ႇ လႄႈ ႁွင်ႉဢဝ်ၵူၼ်းဢၼ်ပဵၼ်ၵႄႇပဵၼ်ႁူဝ် ၵႃႈၼႂ်းမဵဝ်း ဢီႉသရေႇလႃႉ ၊ ၵူၼ်းဢၼ်ပဵၼ်ငဝ်ႈပဵၼ်ႁူဝ်ၶဝ်၊ ၵူၼ်းဢၼ်ၸီႇယၢင်ႇတြႃးၶဝ် တင်းဢရႃႇသီႉၶဝ်တင်းလၢႆသေယဝ်ႉ၊ ၶဝ်ၼၼ်ႉဢွၼ်ၵၼ်သုတ်ႉၸပ်းသုတ်ႉၸူး ၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။-

2မိူဝ်ႈၼၼ်ႉ ယေႃးသူႉ ႁေႃးလၢတ်ႈ တီႈၵူၼ်းတင်းသဵင်ႈတင်းလူင်လႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ မီးဢမိင်ႉလႄႈဝႃႈၸမ်ႉ၊ ပူႇမွၼ်ႇသူဢၼ်ဝႃႈ တေႇရႃႉ ဢၼ်ပဵၼ်ပေႃႈ ဢႃႇပြႃႇႁၢမ်ႇ တင်း ၼႃႇၶေႃႇ ၸိူဝ်းၼၼ်ႉၼၼ်ႉ ယူႇၵႃႈတီႈၽၢႆႇပုၼ်ႉၼမ်ႉႁွင်ႈလူင်ၶိင်ႇၵႃႇလႃႉမိူဝ်ႈဢွၼ်ၼႆႉၼၼ်ႉသေလႄႈ ႁဵတ်းဝၢတ်ႈတီႈၽြႃးတၢင်ႇသူႇတၢင်ႇပႃးဢေႃႈ။-

3ပေႃႈသူ ဢႃႇပြႃႇႁၢမ်ႇ ၼၼ်ႉၸမ်ႉ၊ ၵဝ်ႁွင်ႉဢဝ်သေၵႃႈတီႈၽၢႆႇပုၼ်ႉၼမ်ႉႁွင်ႈလူင်လႄႈ ဢဝ်သူင်ႇႁွတ်ႈၵႃႈၼႂ်းမိူင်း ၶႃႇၼၢၼ်ႇ ၵူႈတီႈၵူႈလႅၼ်သေယဝ်ႉ၊ ႁႂ်ႈမဵဝ်းၸိူဝ်ႉၶိူဝ်းမၼ်းယႂ်ႇၽႄႈၼမ်ၵိုၼ်းမႃးယူႇသေလႄႈ ပၼ် ဢီႉၸၢၵ်ႈ တီႈမၼ်းဢေႃႈ။-

4တီႈ ဢီႉၸၢၵ်ႈ ၵေႃႈ ၵဝ်ပၼ် ယႃႇၵုပ်ႈ တင်း ဢေးသေႃး လႄႈ တီႈ ဢေးသေႃး ၵေႃႈ ၵဝ်ပၼ်ပိူင်ႇလွႆ ၸီႉရႃႉ ဢေႃႈ။ ယႃႇၵုပ်ႈ ဢိၵ်ႇတင်းလုၵ်ႈမၼ်းလၢင်းမၼ်း ဢွၼ်ၵၼ်လူင်းၵႂႃႇၵႃႈတီႈမိူင်း ဢေႇၵိပ်ႉတူႉ ဢေႃႈ။-

5ၵဝ်ပွႆႇၸႂ်ႉ မူဝ်းသေႇ တင်း ဢႃႇရုၼ်ႇ သေလႄႈ သင်ႇသွၼ်သုင်းမႃႉမိူင်း ဢေႇၵိပ်ႉတူႉ ၸွမ်းၵႃႈၼင်ႇဢၼ် ၵဝ်ႁဵတ်းၵႃႈၼႂ်းမၼ်းၼၼ်ႉဢေႃႈ။ လိုၼ်းသေၼၼ်ႉ ၵဝ်ၸင်ႇၼုၵ်ႈဢဝ်သူဢွၵ်ႇမႃးဢေႃႈ။-

6ၼင်ႇၼၼ်လႄႈ ၵဝ်ၼုၵ်ႈဢဝ်ပေႃႈသူတင်းလၢႆဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ လႄႈ ၶဝ်ႁွတ်ႈထိုင်ၵႃႈတီႈပၢင်ႇလၢႆႇသေယဝ်ႉ၊ ၵူၼ်း ဢေႇၵိပ်ႉတူႉ တင်းလၢႆၼၼ်ႉပႃးဢဝ်ရထႃး ဢိၵ်ႇတင်းၵူၼ်းသိုၵ်းၶီႇမႃႉလိုပ်ႈၸွမ်းလမ်းၸွမ်းပေႃႈသူၸိူဝ်းၼၼ်ႉ တေႃႇထိုင်ႁွတ်ႈပၢင်ႇလၢႆႇ ဢေႇတုမ်ႇ ၼၼ်ႉဢေႃႈ။-

7မိူဝ်ႈဢၼ်ၶဝ်ႁွင်ႉသႅၼ်ႇတီႈထႃႇဝရႃႉၽြႃးၼၼ်ႉၸိုင်၊ ၵဝ်ဢဝ်ဢၼ်လပ်းသိင်ႇဝႆႉၵႃႈတီႈဝူင်ႈၵၢင်သူတင်းၵူၼ်း ဢေႇၵိပ်ႉတူႉ ၸိူဝ်းၼၼ်ႉလႄႈ ႁႂ်ႈၼမ်ႉပၢင်ႇလၢႆႇႁွတ်ႈထိုင်ၵႃႈၼိူဝ်ၶဝ်လႄႈ ထူမ်ႈႁူမ်ႇၶဝ်ပႅတ်ႈဢေႃႈ။ မၢၵ်ႇတႃသူလႆႈႁၼ်လွင်ႈတၢင်းဢၼ်ၵဝ်ႁဵတ်းၵႃႈၼႂ်း မိူင်း ဢေႇၵိပ်ႉတူႉ ၼၼ်ႉမႃးယဝ်ႉ။ ၵႃႈၼႂ်းထိူၼ်ႇၵေႃႈ၊ သူလႆႈယူႇမိုဝ်ႉဝၼ်းၼမ်ၼႃႇလူင်လၢင်ဢေႃႈ။-

8လိုၼ်းၼၼ်ႉ ၵဝ်ဢဝ်သူသူင်ႇႁွတ်ႈၵႃႈတီႈမိူင်းၵူၼ်း ဢႃႇမေႃးရီႉ ဢၼ်ယူႇၵႃႈတီႈၽၢႆႇပုၼ်ႉၼမ်ႉႁွင်ႈ ယေႃးတၢၼ်ႇ ၼၼ်ႉလႄႈ မိူဝ်ႈဢၼ်ၶဝ်တိုၵ်းၵၼ်တင်းသူၼၼ်ႉၸိုင်၊ ၵဝ်ဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းသူလႄႈ သူလႆႈသိမ်းဢဝ်လိၼ်ၶဝ်ၼၼ်ႉဢေႃႈ။ ၵဝ်ပႄႇၽဵဝ်ႈၶဝ်ပႅတ်ႈသေၵႃႈတီႈၽၢႆႇၼႃႈသူဢေႃႈ။-

9ပႃႇလၵ်ႈ လုၵ်ႈၸၢႆး ၸီႉၽေႃႇ ၶုၼ်ႁေႃၶမ်း မေႃႇၽႃႉ ၼၼ်ႉ လုၵ်ႉလႄႈတိုၵ်းတေႃးမဵဝ်း ဢီႉသရေႇလႃႉ သေယဝ်ႉ၊ ပွႆႇၸႂ်ႉလႄႈႁွင်ႉဢဝ် ပႃႇလၢမ်ႇ လုၵ်ႈၸၢႆး ပေႃးရႃႉ မႃးႁႂ်ႈလႆႈၵိၼ်ႇဝႃႈသူဢေႃႈ။-

10ၵူၺ်းၵႃႈ ၵွပ်ႈပိူဝ်ႈဢၼ်ၵဝ်ဢမ်ႇထွမ်ႇဢမ်ႇဢဝ်ၵႂၢမ်း ပႃႇလၢမ်ႇ ၼၼ်ႉလႄႈ၊ မၼ်းၼၼ်ႉ ပၼ်တၢင်းလီတီႈသူယူႇၶိူဝ်းၶိူဝ်းယႂ်းယႂ်းလႄႈ ၵဝ်ၵႄႇသႄႇၼုၵ်ႈဢဝ်သူသေၵႃႈၼႂ်းမိုဝ်းမၼ်းၼၼ်ႉဢေႃႈ။-

11လိုၼ်းၼၼ်ႉ သူၶၢမ်ႈၼမ်ႉႁွင်ႈ ယေႃးတၢၼ်ႇ လႄႈ ႁွတ်ႈထိုင်ၵႃႈတီႈဝဵင်း ယေႇရီႉၶူဝ်း သေယဝ်ႉ၊ ၵူၼ်း ယေႇရီႉၶူဝ်း ၵူၼ်း ဢႃႇမေႃးရီႉ ၊ ၵူၼ်း ၽေႇရၸီႉ ၊ ၵူၼ်း ၶႃႇၼၼီႉ ၊ ၵူၼ်း ႁိတ်ႉတီႉ ၊ ၵူၼ်း ၵီႉရၵႃႇသီႉ ၊ ၵူၼ်း ႁီႉဝီႉ ၊ ၵူၼ်း ယေႇပူႉသီႉ ၸိူဝ်းၼၼ်ႉဢွၼ်ၵၼ်တိုၵ်းတေႃးသူလႄႈ ၵဝ်ဢဝ်ၶဝ်ၼၼ်ႉဢၢပ်ႈပၼ်ၵႃႈၼႂ်းမိုဝ်းသူဢေႃႈ။-

12ၵဝ်ပွႆႇၸႂ်ႉတေႃႇလႂ်တႅၼ်လႂ်ၵႂႃႇဢွၼ်တၢင်းသူသေလႄႈ ႁေႃႈၶုၼ်လူင် ဢႃႇမေႃးရီႉ သွင်ပႃးဢွၵ်ႇပႅတ်ႈသေၵႃႈတီႈၽၢႆႇၼႃႈသူဢေႃႈ။ ယင်းဢမ်ႇပႃးလၢပ်ႇသူၵၢင်ႇသူလႄႈပဵၼ်ဢေႃႈ။-

13ၵဝ်ဢဝ်လိၼ် ဢၼ်သူဢမ်ႇႁဵတ်း ဢိၵ်ႇတင်းဝဵင်းဢၼ်သူဢမ်ႇတႄႇၼၼ်ႉပၼ်တီႈသူလႄႈ သူလႆႈယူႇဢေႃႈ။ သူလႆႈၵိၼ်သူၼ်ဢူးယဵၼ်ႇမၢၵ်ႇၸပိတ်ႈ ဢိၵ်ႇတင်းသူၼ်ဢူးယဵၼ်ႇ သၢၼ်ႇလုၼ်ႇ ဢၼ်သူဢမ်ႇၽုၵ်ႇဢမ်ႇသွမ်ႈၼၼ်ႉဢေႃႈ၊ ဝႃႈၼင်ႇၼႆယဝ်ႉ။

14တေႃႈလဵဝ်ၼႆႉ ဢွၼ်ၵၼ်ၵူဝ်ႁႄထႃႇဝရႃႉၽြႃးလႄႈ မီးတၢင်းဢၼ်ၸႂ်ၽိူၵ်ႇၸႂ်ၶၢဝ်တၢင်းဢၼ်ပႂ်ႉသဵတ်ႈၸႃႇသေလႄႈ ႁဵတ်းဝၢတ်ႈတီႈမၼ်းၸဝ်ႈတႃႉ။ ပႄႇပႅတ်ႈၽြႃးဢၼ်ပူႇပေႃႈသူႁဵတ်းဝၢတ်ႈၵႃႈတီႈၽၢႆႇပုၼ်ႉၼမ်ႉႁွင်ႈလူင် ဢိၵ်ႇတင်းၵႃႈတီႈမိူင်း ဢေႇၵိပ်ႉတူႉ ၸိူဝ်းၼၼ်ႉသေလႄႈ ႁဵတ်းဝၢတ်ႈတီႈထႃႇဝရႃႉၽြႃးၵူၺ်းတႃႉ။-

15ဢမ်ႇၼၼ်ၵေႃႈ ပေႃးသူထၢင်ႇလႄႈဝႃႈ၊ ဢမ်ႇလီႁဵတ်းဝၢတ်ႈတီႈထႃႇဝရႃႉၽြႃး၊ ဝႃႈၼင်ႇၼႆၸိုင်၊ ဝၼ်းမိူဝ်ႈၼႆႉ လိူၵ်ႈၵဵပ်းဢဝ်လွင်ႈဢၼ်တၵ်းလႆႈႁဵတ်းဝၢတ်ႈတီႈၽြႃးဢၼ်လႂ် ဢၼ်ဝႃႈတီႈၽြႃးဢၼ်ပူႇပေႃႈသူႁဵတ်းဝၢတ်ႈၵႃႈတီႈၽၢႆႇပုၼ်ႉၼမ်ႉႁွင်ႈလူင် ၸိူဝ်းၼၼ်ႉႁိုဝ်။ ဢမ်ႇၼၼ် တီႈၽြႃးၵူၼ်းမိူင်း ဢႃႇမေႃးရီႉ တီႈဢၼ်သူယူႇၼႆႉၸိူဝ်းၼၼ်ႉႁိုဝ်ၼၼ်ႉတႃႉ။ ၵဝ်ဢိၵ်ႇတင်းၵူၼ်းႁိူၼ်းၵူၼ်းယေးၵဝ်ၸမ်ႉ၊ တၵ်းႁဵတ်းဝၢတ်ႈတီႈထႃႇဝရႃႉၽြႃးၵူၺ်းဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

16ၵူၼ်းတင်းလၢႆၵေႃႈ ၶိုၼ်းလၢတ်ႈလႄႈဝႃႈ၊ ႁႂ်ႈလွင်ႈတၢင်းဢၼ်ၸုၼ်ႉပႅတ်ႈထႃႇဝရႃႉၽြႃး ႁႂ်ႈလႆႈႁဵတ်းဝၢတ်ႈတီႈၽြႃးတၢင်ႇသူႇတၢင်ႇပႃးၼၼ်ႉ ၵႆၵၼ်တင်းႁဝ်းၶႃႈသေၵမ်းလူၺ်ႈ။-

17လွင်ႈမၼ်းၸမ်ႉ ထႃႇဝရႃႉၽြႃး ၽြႃးပဵၼ်ၸဝ်ႈႁဝ်းၶႃႈ ၼုၵ်ႈဢဝ်ႁဝ်းၶႃႈဢိၵ်ႇတင်းပေႃႈႁဝ်းၶႃႈၸိူဝ်းၼၼ်ႉ ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ တီႈဢၼ်ၶၢမ်ႇႁဵတ်းၶႃႈၼၼ်ႉလႄႈ ၼႄပျႃးၼီႉမိၵ်ႈလၢၵ်ႈၶၼႃႇဢၼ်ယႂ်ႇၼႃႇတင်းလၢႆ ၵႃႈတီႈသိုဝ်ႈၼႃႈတႂ်ႈတႃႁဝ်းၶႃႈလႄႈ ၸွမ်းပႂ်ႉႁဝ်းၶႃႈၵႃႈၼႂ်းသဵၼ်ႈတၢင်း ၵႃႈဢၼ်ႁဝ်းၶႃႈၵႂႃႇႁဝ်းၶႃႈပႆ ဢိၵ်ႇတင်းၵႃႈၼႂ်းၵူၼ်းမဵဝ်းၵႃႈဢၼ်ႁဝ်းၶႃႈၽႃႇလတ်းၵႃႈၼႂ်းၶဝ်ၼၼ်ႉမႃးယဝ်ႉၶႃႈယဝ်ႉ။-

18ထႃႇဝရႃႉၽြႃး ႁေႃႈၵူၼ်းၵႃႈဢၼ်ယူႇၵႃႈတီႈမိူင်းၼႆႉဢၼ်ဝႃႈ ၵူၼ်း ဢႃႇမေႃးရီႉ ၸိူဝ်းၼၼ်ႉဢွၵ်ႇပႅတ်ႈသေၵႃႈတီႈၽၢႆႇၼႃႈႁဝ်းၶႃႈယဝ်ႉၶႃႈယဝ်ႉ။ ပိူဝ်ႈၼႆလႄႈ ႁဝ်းၶႃႈတၵ်းႁဵတ်းဝၢတ်ႈတီႈထႃႇဝရႃႉၽြႃးၶႃႈဢေႃႈ။ မၼ်းၸဝ်ႈၼၼ်ႉ ပဵၼ်ၽြႃးပဵၼ်ၸဝ်ႈႁဝ်းၶႃႈၶႃႈယဝ်ႉ၊ ဝႃႈၼင်ႇၼႆဢေႃႈ။-

19ယေႃးသူႉ ၵေႃႈလၢတ်ႈတီႈၵူၼ်းတင်းလၢႆလႄႈဝႃႈ၊ သူဢမ်ႇႁဵတ်းဝၢတ်ႈတီႈထႃႇဝရႃႉၽြႃးလႆႈ။ မၼ်းၸဝ်ႈၼၼ်ႉပဵၼ်ၽြႃးဢၼ်မူတ်းၸၢင်ႇ၊ ၽြႃးဢၼ်ယုမ်ႇငၢႆႈလွင်ႈဢၼ်ဢပႅတ်ႈမီးၼၼ်ႉဢေႃႈ။ မၼ်းၸဝ်ႈတၵ်းဢမ်ႇယိူၼ်ႉၶၢမ်ႇဢပႅတ်ႈဢၼ်သူပူၼ်ႉလိူဝ်၊ ဢပႅတ်ႈဢၼ်သူၽိတ်းပိူင်ႈၸိူဝ်းၼၼ်ႉ။-

20ပေႃးသူၸုၼ်ႉပႅတ်ႈထႃႇဝရႃႉၽြႃးလႄႈ ႁဵတ်းဝၢတ်ႈတီႈၽြႃးတၢင်ႇဝၢၼ်ႈတၢင်ႇမိူင်းၸိုင်၊ မၼ်းၸဝ်ႈတၵ်းဝၢႆႇၶိုၼ်းလႄႈ ၼိၵ်ႈၸၢၵ်ႈငႅၼ်းသႄးသူ ယႃႉၽဵဝ်ႈသူပႅတ်ႈ လိုၼ်းသေဢၼ်မၼ်းၸဝ်ႈႁဵတ်းၵျေးၸူးတီႈသူယဝ်ႉၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊-

21ၵူၼ်းတင်းလၢႆၶိုၼ်းလဝ်ႊလၢတ်ႈတီႈ ယေႃးသူႉ လႄႈဝႃႈ၊ ဢမ်ႇၸႂ်ႈၶႃႈ။ ႁဝ်းၶႃႈတၵ်းႁဵတ်းဝၢတ်ႈတီႈထႃႇဝရႃႉၽြႃးၵူၺ်းၶႃႈဢေႃႈ၊ ဝႃႈၼင်ႇၼႆဢေႃႈ။-

22ယေႃးသူႉ ၵေႃႈလၢတ်ႈတီႈၵူၼ်းတင်းလၢႆလႄႈဝႃႈ၊ တူဝ်သူပဵၼ်ၵေႃႉဢၼ်ၶၢမ်ႇသၢၵ်ႈသေႇ ယူႇၽၢႆႇၼိုင်ႈတင်းတၢင်းသူလွင်ႈဢၼ်သူလိူၵ်ႈၵဵပ်းဢဝ် ထႃႇဝရႃႉၽြႃး ႁႂ်ႈလႆႈႁဵတ်းဝၢတ်ႈတီႈမၼ်းၸဝ်ႈၼၼ်ႉယဝ်ႉ၊ ဝႃႈၼင်ႇၼႆသေယဝ်ႉ၊ ၶဝ်ၼၼ်ႉဢွၼ်ၵၼ်ၶိုၼ်းလဝ်ႊလၢတ်ႈလႄႈဝႃႈ၊ ႁဝ်းၶႃႈပဵၼ်ၵေႃႉဢၼ်ၶၢမ်ႇသၢၵ်ႈသေႇၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

23မၼ်းၵေႃႈလၢတ်ႈလႄႈဝႃႈ၊ ပေႃးပဵၼ်ၸိူဝ်ႉၼင်ႇၼႆၸိုင်၊ ပႄႇပႅတ်ႈၽြႃးတၢင်ႇဝၢၼ်ႈတၢင်ႇမိူင်း ဢၼ်မီးၵႃႈၼႂ်းသူၸိူဝ်းၼၼ်ႉသေလႄႈ ဢဝ်ႁူဝ်ၸႂ်သူၵူမ်ႈၵွမ်းၸူးတီႈထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ တႃႉ၊ ဝႃႈၼင်ႇၼႆဢေႃႈ။-

24ၵူၼ်းတင်းလၢႆၵေႃႈ ဢွၼ်ၵၼ်လဝ်ႊလၢတ်ႈတီႈ ယေႃးသူႉ လႄႈဝႃႈ၊ ႁဝ်းၶႃႈတၵ်းႁဵတ်းဝၢတ်ႈတီႈထႃႇဝရႃႉၽြႃး ၽြႃးပဵၼ်ၸဝ်ႈႁဝ်းၶႃႈၶႃႈဢေႃႈ။ တၵ်းထွမ်ႇဢဝ်ၵႂၢမ်းမၼ်းၸဝ်ႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

25ယေႃးသူႉ ႁဵတ်းပတီႉၺိၺ်ႇလူၺ်ႈၵၼ်တင်းၵူၼ်းတင်းလၢႆ ၼႂ်းဝၼ်းၼၼ်ႉလႄႈ ဝႆႉထုင်းၽိင်ႈတြႃး ဢိၵ်ႇတင်းလွင်ႈတၢင်းဢၼ်ၸီႇယၢင်ႇဝႆႉၼၼ်ႉ ပုၼ်ႈၶဝ်ၵႃႈတီႈဝဵင်း သေႇၶိမ်ႇ ၼၼ်ႉဢေႃႈ။-

26ၵႂၢမ်းၼၼ်ႉၵေႃႈ ယေႃးသူႉ တႅမ်ႈသႂ်ႇဝႆႉၵႃႈၼႂ်းထမ်ႇမႃႉၵျၢမ်းလိၵ်ႈၽြႃးပဵၼ်ၸဝ်ႈလႄႈ ဢဝ်မၢၵ်ႇႁိၼ်လူင်ပူၵ်းတင်ႈဝႆႉ ၵႃႈတီႈတႂ်ႈတူၼ်ႈမႆႉၼိမ် ဢၼ်မီးၵႃႈႁိမ်းထႃႇၼႃႉတီႈမူတ်းၸၢင်ႇထႃႇဝရႃႉၽြႃးၼၼ်ႉသေယဝ်ႉ၊-

27ယေႃးသူႉ လၢတ်ႈတီႈၵူၼ်းတင်းသဵင်ႈတင်းလူင်လႄႈဝႃႈ၊ တူၺ်းလူး၊ မၢၵ်ႇႁိၼ်ၼႆႉတၵ်းလႆႈပဵၼ်သၢၵ်ႈသေႇယူႇၽၢႆႇၼိုင်ႈတင်းႁဝ်းဢေႃႈ။ မၼ်းလႆႈငိၼ်းၵႂၢမ်းဢၼ်ထႃႇဝရႃႉၽြႃး မီးဢမိင်ႉဝႆႉတီႈႁဝ်းၵူႈၸိူဝ်ႉၵူႈပိူင်ၼၼ်ႉယဝ်ႉ။ ပိူဝ်ႈၼႆလႄႈ မၼ်းတၵ်းလႆႈပဵၼ်သၢၵ်ႈသေႇယူႇၽၢႆႇၼိုင်ႈတင်းသူ ႁႂ်ႈသူၵၢင်းလွတ်ႈတင်း တၢင်းဢၼ်ထဵင်ပႅတ်ႈၽြႃးပဵၼ်ၸဝ်ႈၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊-

28ယေႃးသူႉ ပွႆႇၵူၼ်းတင်းလၢႆၶိုၼ်းမိူဝ်းၵႂႃႇၸူးၵႃႈတီႈ တီႈဢၼ်ၶဝ်လႆႈၶၢမ်ႇဢမူၺ်ႇၼၼ်ႉ ႁင်းၽႂ်ႁင်းမၼ်းသေဢေႃႈ။

29လိုၼ်းၼၼ်ႉၸင်ႇ၊ ယေႃးသူႉ လုၵ်ႈၸၢႆး ၼုၼ်ႇ ၶႃႈထႃႇဝရႃႉၽြႃးၼၼ်ႉ၊ ဢသၢၵ်ႈလႆႈပၢၵ်ႇပၢႆသိပ်းပီႊသေယဝ်ႉ ႁွတ်ႈဢၼိၵ်ႈၸႃႉသေဢေႃႈ။-

30ၶဝ်ဢဝ်မၼ်းသၢင်းၵျူဝ်ႇၵႃႈတီႈလိၼ် တီႈဢၼ်မၼ်းၶၢမ်ႇဢမူၺ်ႇ ၵႃႈၼႂ်းဝဵင်း တီႉမၼႃႇသေႃႇရႃႉ ဢၼ်မီးၵႃႈၼိူဝ်ႁၢၼ်ႉလွႆ ဢေႇၽရိမ်ႇ ၽၢႆႇတၢင်းႁွင်ႇၵုင်း ၵႃႇသႃႉ ၼၼ်ႉဢေႃႈ။-

31ၼႂ်းၸူဝ်ႈပၢၼ် ယေႃးသူႉ ၼၼ်ႉ ဢိၵ်ႇတင်းၼႂ်းၸူဝ်ႈပၢၼ်ၵူၼ်းဢၼ်ပဵၼ်ၵႄႇပဵၼ်ႁူဝ် ဢၼ်ဢသၢၵ်ႈယင်းလိပ်းယူႇ လိုၼ်း ယေႃးသူႉ လႄႈ ႁူႉလွင်ႈတၢင်းၵႃႈဢၼ်ထႃႇဝရႃႉၽြႃး ႁဵတ်းပုၼ်ႈမဵဝ်း ဢီႉသရေႇလႃႉ ၼၼ်ႉၸိူဝ်းၼၼ်ႉ၊ ၵူၼ်းမဵဝ်း ဢီႉသရေႇလႃႉ တင်းလၢႆ ႁဵတ်းဝၢတ်ႈတီႈထႃႇဝရႃႉၽြႃးဢေႃႈ။-

32လုပ်ႇ ယူဝ်းသႅပ်ႈ ဢၼ်ၵူၼ်းမဵဝ်း ဢီႉသရေႇလႃႉ တင်းလၢႆ ဢဝ်ၵႃႈတီႈမိူင်း ဢေႇၵိပ်ႉတူႉ မႃးၸိူဝ်းၼၼ်ႉၸိုင်၊ ၶဝ်ဢဝ်သၢင်းၵျူဝ်ႇဝႆႉ ၵႃႈၼႂ်းဢိူင်ႇဝဵင်း သေႇၶိမ်ႇ ၵႃႈတီႈၵႂၢၵ်ႈလိၼ်ဢၼ် ယႃႇၵုပ်ႈ ဢဝ်တင်းငိုၼ်းပၢၵ်ႇၵျၢပ်ႈသိုဝ်ႉဢဝ်တီႈလုၵ်ႈၸၢႆး ႁႃႇမေႃႇ ၵေႃႉဢၼ်ပဵၼ်ပေႃႈ သေႇၶိမ်ႇ ၼၼ်ႉ ၸိူဝ်းၼၼ်ႉၼၼ်ႉဢေႃႈ။ ၵႂၢၵ်ႈလိၼ်ၼၼ်ႉ ပဵၼ်လိၼ်ဢမူၺ်ႇၵူၼ်းမဵဝ်း ယူဝ်းသႅပ်ႈ ၸိူဝ်းၼၼ်ႉဢေႃႈ။-

33ဢေးလႃႇၸႃႇ လုၵ်ႈၸၢႆး ဢႃႇရုၼ်ႇ ၼၼ်ႉၵေႃႈ ႁွတ်ႈဢၼိၵ်ႈၸႃႉသေဢေႃႈ။ ၶဝ်ဢဝ်မၼ်းသၢင်းၵျူဝ်ႇၵႃႈတီႈၵုင်း ၽီႉၼႁတ်ႉ လုၵ်ႈၸၢႆးမၼ်း ဢၼ်ၵူၼ်းတင်းလၢႆပၼ်တီႈလုၵ်ႈၸၢႆးမၼ်းၼၼ်ႉ ၵႃႈၼိူဝ်ႁၢၼ်ႉလွႆ ဢေႇၽရိမ်ႇ ၼၼ်ႉဢေႃႈ။ လိၵ်ႈမၢတ်ႈလွင်ႈယေႃးသူႉယဝ်ႉယဝ်ႉဢေႃႈ။

← Chapter 23 Jump to: