Joshua 8 — Shan

1ထႃႇဝရႃႉၽြႃးသမ်ႉမီးဢမိင်ႉတီႈ ယေႃးသူႉ လႄႈဝႃႈ၊ ယႃႇပေၵူဝ်ပေႁႄ။ ယႃႇပေၸႂ်လူႉ။ ႁွင်ႉဢဝ်ၵူၼ်းသိုၵ်း ဢၼ်ပႃးလူၺ်ႈၵၼ်တင်းမႂ်းၵႃႈမီးတင်းသဵင်ႈတင်းလူင်သေလႄႈ ဢွၼ်ၵၼ်လုၵ်ႉလႄႈၶိုၼ်ႈၵႂႃႇၵႃႈတီႈဝဵင်း ဢႃႇဢီႉ တႃႉ။ တူၺ်းလူး၊ ၵဝ်တၵ်းဢဝ်ၶုၼ်လူင် ဢႃႇဢီႉ ဢိၵ်ႇတင်းၵူၼ်းမၼ်းတင်းလၢႆ၊ ဝဵင်းမၼ်း၊ လိၼ်မၼ်းဢၢပ်ႈပၼ်ၵႃႈၼႂ်းမိုဝ်းမႂ်းဢေႃႈ။-

2မႂ်းတၵ်းလႆႈႁဵတ်းတီႈဝဵင်း ဢႃႇဢီႉ တင်းၶုၼ်လူင်မၼ်း မိူၼ်ၸိူဝ်ႉၼင်ႇဢၼ်မႂ်းႁဵတ်းတီႈဝဵင်း ယေႇရီႉၶူဝ်း တင်းၶုၼ်လူင်မၼ်းၼၼ်ႉဢေႃႈ။ သူတၵ်းလႆႈသိမ်းဢဝ်ဢုၵ်ႉၸႃႇဢၼ်ႁိမ်လႆႈ ဢိၵ်ႇတင်းတရိၵ်ႈသၢၼ်ႇတင်းလၢႆၼၼ်ႉၵူၺ်းပုၼ်ႈသူဢေႃႈ။ မႂ်းဝႆႉတပ်ႉသိုၵ်းမူၵ်းၵႃႈတီႈၽၢႆႇလင်ဝဵင်းၼၼ်ႉတႃႉ၊ ဝႃႈၼင်ႇၼႆသေယဝ်ႉ၊-

3ယေႃးသူႉ ဢိၵ်ႇတင်းၵူၼ်းသိုၵ်းတင်းသဵင်ႈတင်းလူင်ဢွၼ်ၵၼ်လုၵ်ႉႁႂ်ႈလႆႈၶိုၼ်ႈၸူးဝဵင်း ဢႃႇဢီႉ ၼၼ်ႉဢေႃႈ။ ယေႃးသူႉ ၼၼ်ႉ လိူၵ်ႈၵဵပ်းဢဝ်ၵူၼ်းသိုၵ်းဢၼ်ႁႅင်းယႂ်ႇၼႃႇ သၢမ်မိုၼ်ႇသေလႄႈ ပွႆႇၸႂ်ႉၵႂႃႇၶိင်ႇၵၢင်ၶိုၼ်းလႄႈ၊-

4သင်ႇလၢတ်ႈတီႈၶဝ်လႄႈဝႃႈ၊ တူၺ်းလူး၊ သူႁဵတ်းတပ်ႉသိုၵ်းမူၵ်းယူႇၵႃႈတီႈၽၢႆႇလင်ဝဵင်းႁႂ်ႈလႆႈတိုၵ်းဝဵင်းၼၼ်ႉတႃႉ။ ယႃႇပေၵႂႃႇႁႂ်ႈယၢၼ်ၵၼ်တင်းဝဵင်းၼႃႇလူင်လၢင်။ ၽွမ်ႉၵၼ်မႄးႁႅၼ်းဝႆႉထႃႈတႃႉ။-

5ၵဝ်ဢိၵ်ႇတင်းၵူၼ်းဢၼ်ပႃးတီႈၵဝ်တင်းသဵင်ႈတင်းလူင်ၼၼ်ႉ တၵ်းသုတ်ႉၸပ်းသုတ်ႉၸူးၵႃႈတီႈႁိမ်းဝဵင်းဢေႃႈ။ မိူဝ်ႈဢၼ်ၶဝ်ဢွၵ်ႇမႃးႁႂ်ႈလႆႈတိုၵ်းတေႃးႁဝ်းမိူၼ်ၸိူဝ်ႉၼင်ႇမိူဝ်ႈဢွၼ်တၢင်းၼၼ်ႉၸိုင်၊ ႁဝ်းတၵ်းဢွၵ်ႇပၢႆႈၶိုၼ်းသေၵႃႈတီႈၽၢႆႇၼႃႈၶဝ်၊-

6တေႃႇထိုင်ႁွတ်ႈထၼ်ႈပေႃးႁဝ်းတၵ်းႁႂ်ႈၶဝ်ၽၢတ်ႇယၢၼ်ၵၼ်တင်းဝဵင်းၵွပ်ႈပိူဝ်ႈဢၼ်ၶဝ်တၵ်းလိုပ်ႈၸွမ်းႁဝ်းၼၼ်ႉဢေႃႈ။ လွင်ႈမၼ်းၸမ်ႉ ၶဝ်တၵ်းလၢတ်ႈလႄႈဝႃႈ၊ ၶဝ်ဢွၵ်ႇပၢႆႈသေၵႃႈတီႈၽၢႆႇၼႃႈႁဝ်း မိူၼ်ၸိူဝ်ႉၼင်ႇမိူဝ်ႈဢွၼ်တၢင်းၼၼ်ႉယဝ်ႉ၊ ဝႃႈၼင်ႇၼႆဢေႃႈ။ ၼင်ႇၼၼ်လႄႈ ႁဝ်းတၵ်းဢွၵ်ႇပၢႆႈသေၵႃႈတီႈၽၢႆႇၼႃႈၶဝ်ၼၼ်ႉဢေႃႈ။-

7မိူဝ်ႈၼၼ်ႉ သူတၵ်းလႆႈလုၵ်ႉသေၵႃႈတီႈတပ်ႉသိုၵ်းမူၵ်းၼၼ်ႉလႄႈ တိုၵ်းဢဝ်ဝဵင်းၼၼ်ႉဢေႃႈ။ လွင်ႈမၼ်းၸမ်ႉ ထႃႇဝရႃႉၽြႃး ၽြႃးပဵၼ်ၸဝ်ႈသူ တၵ်းဢဝ်ဢၢပ်ႈပၼ်ၵႃႈၼႂ်းမိုဝ်းသူဢေႃႈ။-

8မိူဝ်ႈဢၼ်တိုၵ်းဢဝ်ဝဵင်းလႄႈ လႆႈယဝ်ႉၼၼ်ႉသူတၵ်းလႆႈဢဝ်ၽႆးတုတ်ႇဝဵင်းဢေႃႈ။ သူတၵ်းလႆႈႁဵတ်းၸွမ်းၵႃႈၼင်ႇဢၼ် ထႃႇဝရႃႉၽြႃးမီးဢမိင်ႉဝႆႉၼၼ်ႉဢေႃႈ။ ၼေႈ၊ ၵဝ်သင်ႇလၢတ်ႈတီႈသူဝႆႉယဝ်ႉ၊ ဝႃႈၼင်ႇၼႆဢေႃႈ။

9ၼင်ႇၼၼ်လႄႈ ယေႃးသူႉ ပွႆႇၸႂ်ႉၶဝ်ၵႂႃႇလႄႈ ၶဝ်ၼၼ်ႉဢွၼ်ၵၼ်ၵႂႃႇႁႂ်ႈလႆႈႁဵတ်းသိုၵ်းမူၵ်းလႄႈ ယူႇၵႃႈၼႂ်းဝူင်ႈၵၢင်ဝဵင်း ပေႇသလႃႉ တင်းဝဵင်း ဢႃႇဢီႉ ၵႃႈတီႈၽၢႆႇဝၼ်းတူၵ်းဝဵင်း ဢႃႇဢီႉ ၼၼ်ႉဢေႃႈ။ ယေႃးသူႉ ၸမ်ႉ ယူႇၵႃႈၼႂ်းၵူၼ်းတင်းလၢႆယူႇႁႂ်ႈပူၼ်ႉၶိုၼ်းသေဢေႃႈ။-

10ၶိင်ႇၵၢင်ၼႂ်ၸဝ်ႉၸဝ်ႉ ယေႃးသူႉ လုၵ်ႉလႄႈၼပ်ႉဢၢၼ်ႇၵူၼ်းတင်းလၢႆသေယဝ်ႉ၊ ဢိၵ်ႇလူၺ်ႈၵၼ်တင်းၵူၼ်းဢၼ်ပဵၼ်ၵႄႇပဵၼ်ႁူဝ် ၼႂ်းမဵဝ်း ဢီႉသရေႇလႃႉ ၸိူဝ်းၼၼ်ႉ ဢွၼ်ၵၼ်ၶီႇၶိုၼ်ႈၵႂႃႇၸူးၵႃႈတီႈၽၢႆႇၼႃႈ ၵူၼ်းဝဵင်း ဢႃႇဢီႉ တင်းလၢႆၼၼ်ႉဢေႃႈ။-

11ၵူၼ်းသိုၵ်းဢၼ်ပႃးလူၺ်ႈၵၼ်တင်းမၼ်းၵႃႈမီးတင်းသဵင်ႈတင်းလူင်ၼၼ်ႉဢွၼ်ၵၼ်ၶိုၼ်ႈလႄႈ သုတ်ႉၸပ်းသုတ်ႉၸူးသေယဝ်ႉ၊ ႁွတ်ႈထိုင်ၵႃႈတီႈၽၢႆႇၼႃႈဝဵင်းလႄႈ ၶျႃးတပ်ႉယူႇၵႃႈတီႈၽၢႆႇတင်းႁွင်ႇဝဵင်း ဢႃႇဢီႉ ၼၼ်ႉဢေႃႈ။ ၼႂ်းဝူင်ႈၵၢင်ၶဝ်တင်းဝဵင်း ဢႃႇဢီႉ ၼၼ်ႉ မီးၶူင်ႈႁူၺ်ႈဢၼ်ၼိုင်ႈဢေႃႈ။-

12မၼ်းသမ်ႉဢဝ်ၵူၼ်းႁႃႈႁဵင်ၸမ်ၸမ်ဝႆႉ ႁႂ်ႈလႆႈႁဵတ်းသိုၵ်းမူၵ်းၵႃႈၼႂ်းၵႄႈဝူင်ႈၵၢင်ဝဵင်း ပေႇသလႃႉ တင်းဝဵင်း ဢႃႇဢီႉ ၽၢႆႇဝၼ်းတူၵ်းဝဵင်း ဢႃႇဢီႉ ၼၼ်ႉဢေႃႈ။-

13ၼင်ႇၼၼ်လႄႈ မိူဝ်ႈဢၼ်ၶဝ်ၶျႃးတီႈယူႇပၼ်တီႈၵူၼ်းတင်းလၢႆ ဢၼ်ဝႃႈ ပူဝ်ႇပႃႇၵႃႈဢၼ်မီးၽၢႆႇတၢင်းႁွင်ႇဝဵင်း ဢိၵ်ႇတင်းၵူၼ်းသိုၵ်းမူၵ်းဢၼ်မီးၽၢႆႇတၢင်းဝၼ်းတူၵ်းဝဵင်းၸိူဝ်းၼၼ်ႉယဝ်ႉၼၼ်ႉၸိုင်၊ ၼႂ်းၶိုၼ်းၼၼ်ႉၵမ်းလဵဝ် ယေႃးသူႉ ၵႂႃႇၸူးၵႃႈၼႂ်းၵၢင်ၶူင်ႈႁူၺ်ႈဢေႃႈ။-

14မိူဝ်ႈဢၼ်ၶုၼ်လူင် ဢႃႇဢီႉ ႁၼ်လွင်ႈတၢင်းၼၼ်ႉၸိုင်၊ ၶဝ်ဢွၼ်ၵၼ်ႁိပ်ႈၼႅတ်ႈလႄႈလုၵ်ႉၸဝ်ႉၸဝ်ႉသေလႄႈ ၵူၼ်းၸၢႆးဝဵင်းၼၼ်ႉၸိူဝ်းၼၼ်ႉဢၼ်ဝႃႈ ၶုၼ်လူင်ဢိၵ်ႇတင်းၵူၼ်းမၼ်းတင်းသဵင်ႈတင်းလူင်ၼၼ်ႉ ၶီႇၵႂႃႇၸူးၵႃႈတီႈဢၼ်ၶဝ်ၶိၼ်းၵၼ်ဝႆႉ ၵႃႈတီႈၽၢႆႇၼႃႈပၢင်ႇပဵင်း ဢႃႇရၽႃႉ ၼၼ်ႉ ႁႂ်ႈလႆႈတိုၵ်းၵၼ်တင်း ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉဢေႃႈ။ ၵူၺ်းၵႃႈ မၼ်းဢမ်ႇႁူႉလွင်ႈဢၼ် တပ်ႉသိုၵ်းမူၵ်းမီးၵႃႈတီႈၽၢႆႇလင်ဝဵင်းၼၼ်ႉ။-

15ယေႃးသူႉ ဢိၵ်ႇတင်း ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၼၼ်ႉ ႁဵတ်းၸိူဝ်ႉၼင်ႇႁၢင်ႈသုမ်းသေလႄႈ ဢွၼ်ၵၼ်ဢွၵ်ႇပၢႆႈၸွမ်းသဵၼ်ႈတၢင်းထိူၼ်ႇဢေႃႈ။-

16ၵူၼ်းၸၢႆးၵႃႈဢၼ်မီးၵႃႈၼႂ်းဝဵင်းၼၼ်ႉ လႆႈၶၢမ်ႇတၢင်းဢၼ်ႁွင်ႉဢဝ်ႁႂ်ႈလႆႈလိုပ်ႈၸွမ်းလမ်းၸွမ်းၶဝ်ၼၼ်ႉလႄႈ၊ ၶဝ်ဢွၼ်ၵၼ်လိုပ်ႈၸွမ်းလမ်းၸွမ်း ယေႃးသူႉ လႄႈ မီးတၢင်းဢၼ်ၽၢတ်ႇယၢၼ်ၵၼ်တင်းဝဵင်းၵႂႃႇဢေႃႈ။-

17ၵူၼ်းၸၢႆးၼႂ်းဝဵင်း ဢႃႇဢီႉ တင်းဝဵင်း ပေႇသလႃႉ ဢၼ်ယင်းဢမ်ႇလိုပ်ႈၸွမ်းလမ်းၸွမ်းၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉလႄႈယူႇၼၼ်ႉ ဢမ်ႇမီးသေၵေႃႉသေၵူၼ်း။ ၶဝ်ပွႆႇဝဵင်းပဝ်ႇဝဵင်းၵူင်ဝႆႉယူႇသေလႄႈ ဢွၼ်ၵၼ်လိုပ်ႈၸွမ်းလမ်းၸွမ်းၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉဢေႃႈ။-

18ထႃႇဝရႃႉၽြႃးၵေႃႈ မီးဢမိင်ႉတီႈ ယေႃးသူႉ လႄႈဝႃႈ၊ ဢဝ်ႁွၵ်ႇဢၼ်မႂ်းယိပ်းၵမ်ၼၼ်ႉ ယဵင်းငႃသႂ်ႇၵႃႈတီႈဝဵင်း ဢႃႇဢီႉ တႃႉ။ ၵဝ်တၵ်းဢဝ်ဝဵင်းၼၼ်ႉဢၢပ်ႈပၼ်ၵႃႈၼႂ်းမိုဝ်းမႂ်းဢေႃႈ၊ ဝႃႈၼင်ႇၼႆလႄႈ၊ ယေႃးသူႉ ဢဝ်ႁွၵ်ႇဢၼ်မၼ်းယိပ်းၵမ်ၼၼ်ႉ ယဵင်းငႃသႂ်ႇၵႃႈတီႈဝဵင်းၼၼ်ႉဢေႃႈ။-

19ၵူၼ်းသိုၵ်းမူၵ်းၸိူဝ်းၼၼ်ႉ လုၵ်ႉသေၵႃႈတီႈယူႇၶဝ်ၼၼ်ႉၵမ်းလဵဝ်လႄႈ လႅၼ်ႈၵႂႃႇၼႂ်းမိူဝ်ႈဢၼ်မၼ်းယိုၼ်ႈမိုဝ်းမၼ်းၼၼ်ႉလႄႈ ၶဝ်ႈႁွတ်ႈၶဝ်ႈထိုင်မႅၼ်ႈၵႃႈၼႂ်းဝဵင်းသေယဝ်ႉ၊ သိမ်းဢဝ်ဝဵင်းလႄႈႁိပ်ႈၼႅတ်ႈဢဝ်ၽႆးတုတ်ႇဢေႃႈ။-

20မိူဝ်ႈဢၼ်ၵူၼ်းဝဵင်း ဢႃႇဢီႉ ၸိူဝ်းၼၼ်ႉတူၺ်းၶိုၼ်းလႄႈ ႁၼ်ၵႂၼ်းၽႆးဢၼ်မႆႈဝဵင်းၼၼ်ႉၶိုၼ်ႈၵႃႈၼိူဝ်ၽႃႉၵၢင်ႁၢဝ်ယူႇၼၼ်ႉၸိုင်၊ ၶဝ်ဢမ်ႇၸၢင်ႈႁဵတ်းၸိူဝ်ႉၼင်ႇႁိုဝ် ႁႂ်ႈလႆႈပၢႆႈၵႂႃႇၸူးၵႃႈတီႈသေတီႈသေတၢင်းလႆႈ။ ၶဝ်ၸိူဝ်းဢၼ်ဢွၵ်ႇပၢႆႈၵႂႃႇၸူးၵႃႈတီႈထိူၼ်ႇၼၼ်ႉၵေႃႈ ဢွၼ်ၵၼ်ဝၢႆႇၶိုၼ်းလႄႈ တိုၵ်းတေႃးၶဝ်ၸိူဝ်းဢၼ်လိုပ်ႈၸွမ်းလမ်းၸွမ်းၼၼ်ႉဢေႃႈ။-

21ယေႃးသူႉ ဢိၵ်ႇတင်းၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၸိူဝ်းၼၼ်ႉ ႁၼ်လွင်ႈဢၼ်ၵူၼ်းတပ်ႉသိုၵ်းမူၵ်းၸိူဝ်းၼၼ်ႉလႆႈဝဵင်းလႄႈ ၵႂၼ်းၽႆးဢွၵ်ႇယူႇၵႃႈတီႈဝဵင်းၼၼ်ႉသေယဝ်ႉ၊ သမ်ႉဢွၼ်ၵၼ်ဝၢႆႇၶိုၼ်းလႄႈတိုၵ်းတေႃးဢဝ်တၢႆ ၵူၼ်းဝဵင်း ဢႃႇဢီႉ ၸိူဝ်းၼၼ်ႉဢေႃႈ။-

22ၵူၼ်းၽၢႆႇၶဝ်သမ်ႉဢွၵ်ႇသေၵႃႈၼႂ်းဝဵင်းမႃးတိုၵ်းတေႃးၶဝ်ၼၼ်ႉလႄႈ ၶဝ်ၼၼ်ႉမီးၵႃႈၼႂ်းၵႄႈဝူင်ႈၵၢင်ၵူၼ်းမဵဝ်း ဢီႉသရေႇလႃႉ တင်းလၢႆၸိူဝ်ႉၼင်ႇၼၼ်၊ ၵမ်ႈၽွင်ႈၽၢႆႇၼိုင်ႈ၊ ၵမ်ႈၽွင်ႈၽၢႆႇၼိုင်ႈလႄႈ ၶဝ်တိုၵ်းတေႃးယႃႉပႅတ်ႈၶဝ်ၼၼ်ႉထၼ်ႈပေႃး ၶဝ်ဢမ်ႇပၼ်ႁႂ်ႈၶဝ်ၼၼ်ႉလွတ်ႈ၊ ဢမ်ႇပၼ်ၶဝ်ၼၼ်ႉၵိုတ်းသေၵေႃႉသေၵူၼ်းဢေႃႈ။-

23ၶဝ်တီႉလႆႈတူဝ်လိပ်းၶုၼ်လူင် ဢႃႇဢီႉ လႄႈ ဢွၼ်ၵၼ်ဢဝ်မႃးၸူးၵႃႈတီႈ ယေႃးသူႉ ဢေႃႈ။-

24ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ ဢဝ်ၵူၼ်းဝဵင်း ဢႃႇဢီႉ တင်းသဵင်ႈတင်းလူင် တၢႆၵႃႈတီႈပၢင်ႇပဵင်းဢၼ်ဝႃႈထိူၼ်ႇ တီႈဢၼ်ၶဝ်လိုပ်ႈၸွမ်းလမ်းၸွမ်းၼၼ်ႉယဝ်ႉတူဝ်ႈယဝ်ႉလႄႈ ၶဝ်ၵႃႈမီးၼၼ်ႉလူမ်ႉတၢႆလူၺ်ႈၶူမ်းလၢပ်ႇၶူမ်းလႅဝ်းထၼ်ႈပေႃး ႁွတ်ႈထိုင်တၢင်းဢၼ် လူႉလႅဝ်ပႅတ်ႈၼၼ်ႉသေယဝ်ႉ၊ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်သမ်ႉၶိုၼ်းမႃးၵႃႈတီႈဝဵင်း ဢႃႇဢီႉ လႄႈ ယႃႉၽဵဝ်ႈၶဝ်ပႅတ်ႈလူၺ်ႈၶူမ်းလၢပ်ႇၶူမ်းလႅဝ်းဢေႃႈ။-

25ၶဝ်ၸိူဝ်းဢၼ်လူမ်ႉတၢႆၼႂ်းဝၼ်းၼၼ်ႉၸဵမ်ယိင်းၸဵမ်ၸၢႆး ဢၼ်ဝႃႈၵူၼ်းၼႂ်းဝဵင်း ဢႃႇဢီႉ ၵႃႈမီးတင်းသဵင်ႈတင်းလူင် မီးသေမိုၼ်ႇပၢႆသွင်ႁဵင်ၼိုင်ႈဢေႃႈ။-

26ယေႃးသူႉ ဢမ်ႇၵူႈဢမ်ႇသိမ်းဢဝ်မိုဝ်းမၼ်း ဢၼ်ဢဝ်ႁွၵ်ႇယဵင်းငႃယူႇၼၼ်ႉတေႃႇထိုင်ႁွတ်ႈထၼ်ႈပေႃး မၼ်းယႃႉၽဵဝ်ႈၵူၼ်းဝဵင်း ဢႃႇဢီႉ ၵႃႈမီးၼၼ်ႉပႅတ်ႈတင်းသဵင်ႈတင်းမူတ်းၼၼ်ႉ။-

27ၵွမ်ႉၵႃႈ တရိၵ်ႈသၢၼ်ႇဢိၵ်ႇတင်းဢုၵ်ႉၸႃႇဝဵင်းၼၼ်ႉဢၼ်ႁိမ်လႆႈၼၼ်ႉၵူၺ်း ၵူၼ်းမဵဝ်း ဢီႉသရေႇလႃႉ တင်းလၢႆ သိမ်းဢဝ်ႁႂ်ႈပဵၼ် ဢုၵ်ႉၸႃႇဢၼ်ႁိမ်ဢဝ်ပုၼ်ႈတူဝ်ၸဝ်ႈၵဝ်ႇ ၸွမ်းၵႃႈၼင်ႇၵႂၢမ်းဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈ ယေႃးသူႉ ၼၼ်ႉဢေႃႈ။-

28ယေႃးသူႉ ၵေႃႈ ဢဝ်ၽႆးတုတ်ႇဝဵင်း ဢႃႇဢီႉ လႄႈ ႁႂ်ႈပဵၼ်ပုမ်ႇလိၼ်ၵွင်လိၼ်ယူႇတႃႇသေႇဢၼ်ဝႃႈ တီႈဢၼ်ယႃႉၽဵဝ်ႈပႅတ်ႈတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။-

29မၼ်းဢဝ်ၶုၼ်လူင် ဢႃႇဢီႉ ႁွႆႈဝႆႉၵႃႈတီႈတူၼ်ႈမႆႉ တေႃႇထိုင်ႁွတ်ႈၶိင်ႇႁူဝ်ၶမ်ႈလႄႈ မိူဝ်ႈဢၼ်ၵၢင်ဝၼ်းၶမ်ႈၼၼ်ႉၸိုင်၊ ယေႃးသူႉ မီးဢမိင်ႉလႄႈၶဝ်ဢဝ်တူဝ်တၢႆမၼ်းၶျႃးတူၵ်းၵႃႈတီႈတူၼ်ႈမႆႉသေယဝ်ႉ၊ ဢဝ်ပႅတ်ႈဝႆႉၵႃႈတီႈႁူးၽၵ်းတူဝဵင်းၼၼ်ႉသေလႄႈ ဢဝ်မၢၵ်ႇႁိၼ်ၵွင်သႂ်ႇၵႃႈၼိူဝ်မၼ်း ၵွင်ယႂ်ႇၼႃႇလူင်လၢင်မီးယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။

30မိူဝ်ႈၼၼ်ႉ ယေႃးသူႉ တႄႇႁဵတ်းယိတ်ႈပလၢင်ႇပုၼ်ႈထႃႇဝရႃႉၽြႃး ၽြႃးပဵၼ်ၸဝ်ႈ ၵူၼ်းမဵဝ်း ဢီႉသရေႇလႃႉ တင်းလၢႆ ၵႃႈၼိူဝ်လွႆ ဢေးပႃႇလႃႉ ၊-

31ၸွမ်းၵႃႈၼင်ႇဢၼ် မူဝ်းသေႇ ၶႃႈထႃႇဝရႃႉၽြႃး သင်ႇလၢတ်ႈဝႆႉတီႈၵူၼ်းမဵဝ်း ဢီႉသရေႇလႃႉ တင်းလၢႆလႄႈ မႅၼ်ႈၵႃႈၼင်ႇဢၼ်တႅမ်ႈသႂ်ႇမီးဝႆႉၵႃႈၼႂ်းၵျၢမ်းပိင်းၺၢပ်ႈတီႉ မူဝ်းသေႇ ဢၼ်ဝႃႈယိတ်ႈပလၢင်ႇဢၼ်ဢဝ်မၢၵ်ႇႁိၼ်ဢၼ်ဢမ်ႇထၢၵ်ႇဢမ်ႇမႄးၸိူဝ်းၼၼ်ႉႁဵတ်း ဢၼ်ၵူၼ်းယင်းဢမ်ႇဢဝ်ၶိူင်ႈလဵၵ်းယုၵ်ႉသႂ်ႇၵႃႈၼိူဝ်မၼ်း၊ ဝႃႈၼင်ႇၼႆၼၼ်ႉသေလႄႈ ဢွၼ်ၵၼ်သၢၵ်ႈၵၢပ်ႈယိတ်ႈဢၼ်တုတ်ႇၽႆးပုၼ်ႈထႃႇဝရႃႉၽြႃးလႄႈ ပုၵ်ႈၸေႃႇယိတ်ႈမိၵ်ႉသႃႇႁႃယႃႉ ၵႃႈၼိူဝ်ၼၼ်ႉဢေႃႈ။-

32မၼ်းၵူးတႅမ်ႈပိင်းၺၢပ်ႈတြႃး မူဝ်းသေႇ ဢၼ် မူဝ်းသေႇ တႅမ်ႈဝႆႉၼၼ်ႉသႂ်ႇၵႃႈၼိူဝ်မၢၵ်ႇႁိၼ်ၸိူဝ်းၼၼ်ႉ ၵႃႈတီႈသိုဝ်ႈၼႃႈတႂ်ႈတႃ ၵူၼ်းမဵဝ်း ဢီႉသရေႇလႃႉ တင်းလၢႆဢေႃႈ။-

33ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်၊ ၵူၼ်းဢၼ်ပဵၼ်ၵႄႇပဵၼ်ႁူဝ်ၶဝ်၊ ၶုၼ်ပူဝ်ႇၶဝ်၊ ၵူၼ်းဢၼ်ၸီႇယၢင်ႇတြႃးၶဝ်ဢၼ်ဝႃႈ ၵူၼ်းမဵဝ်းၶဝ်ၸႅတ်ႈၸႅတ်ႈ ဢိၵ်ႇတင်းၵူၼ်းတၢင်ႇဝၢၼ်ႈတၢင်ႇမိူင်းၸိူဝ်းၼၼ်ႉ ဢွၼ်ၵၼ်ၸုၵ်းယူႇၵႃႈတီႈသွင်ၽၢႆႇတိူၵ်ႈတႃႇၸဝ်ႈ ၵႃႈတီႈၽၢႆႇၼႃႈ ယိတ်ႈပရေႃးႁဵၵ်ႈၵူၼ်းမဵဝ်း လေႇဝီႉ ဢၼ်ႁၢပ်ႇတိူၵ်ႈတႃႇပတီႉၺိၺ်ႇထႃႇဝရႃႉၽြႃးၸိူဝ်းၼၼ်ႉ ၵႃႈတီႈၽၢႆႇၼႃႈလွႆ ၵေႇရၸိမ်ႇ ၵူၼ်းၶိုင်ႈၼိုင်ႈ ၵႃႈတီႈၽၢႆႇၼႃႈလွႆ ဢေးပႃႇလႃႉ ၵူၼ်းၶိုင်ႈၼိုင်ႈ ၸွမ်းၵႃႈၼင်ႇဢၼ် မူဝ်းသေႇ ၶႃႈထႃႇဝရႃႉၽြႃးသင်ႇလၢတ်ႈဝႆႉ လွင်ႈဢၼ်ၶဝ်တၵ်းလႆႈပၼ်တၢင်းလီတီႈၵူၼ်းမဵဝ်း ဢီႉသရေႇလႃႉ တင်းလၢႆ မိူဝ်ႈဢွၼ်တၢင်းၼၼ်ႉသေယဝ်ႉ၊-

34မၼ်းၽတ်းႁေႃးၵႂၢမ်းတြႃးၵႃႈမီး ဢၼ်ဝႃႈတၢင်းလီမင်ႇၵလႃႇ ဢိၵ်ႇတင်းတၢင်းဢၼ်ၵိၼ်ႇဢၼ်ဝႃႈ ဢႃႉမင်ႇၵလႃႇၸွမ်းၵႃႈဢၼ်တႅမ်ႈသႂ်ႇဝႆႉၵႃႈၼႂ်းၵျၢမ်းပိင်းၺၢပ်ႈတီႉၼၼ်ႉဢေႃႈ။-

35ၼႂ်းၵႂၢမ်းဢၼ် မူဝ်းသေႇ သင်ႇလၢတ်ႈဝႆႉၼၼ်ႉ ၵႂၢမ်းဢၼ် ယေႃးသူႉ ဢမ်ႇၽတ်းဢမ်ႇႁေႃးၵႃႈတီႈၽၢႆႇၼႃပရဵၵ်ႈသၢတ်ႈၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ဢိၵ်ႇတင်းၵူၼ်းယိင်း၊ လုၵ်ႈဢွၼ်ႇ၊ ၵူၼ်းတၢင်ႇဝၢၼ်ႈတၢင်ႇမိူင်းဢၼ်မီးယူႇၵႃႈတီႈၶဝ်ၼၼ်ႉၸိူဝ်းၼၼ်ႉ ဢမ်ႇမီးသေၶေႃႈသေၵမ်း။