Joshua 9

Shan

← Chapter 8 Jump to: Chapter 10 →

1မိူဝ်ႈဢၼ်ၶုၼ်လူင်ၵႃႈဢၼ်ယူႇၽၢႆႇဝၼ်းတူၵ်းၼမ်ႉႁွင်ႈ ယေႃးတၢၼ်ႇ ၵႃႈၼိူဝ်ႁၢၼ်ႉလွႆ၊ ၵႃႈတႂ်ႈတီႈဢၼ်ပၢင်ႇဢၼ်ပဵင်း၊ ၵႃႈတီႈၸွမ်းႁိမ်းၽင်ႇမႁႃႇပၢင်ႇလၢႆႇ တင်းသဵင်ႈတင်းမူတ်း သိုဝ်ႈလွႆ လေႇပၼုၼ်ႇ ဢၼ်ဝႃႈၶုၼ်လူင်မဵဝ်း ႁိတ်ႉတီႉ၊ ဢႃႇမေႃးရီႉ၊ ၶႃႇၼၼီႉ၊ ၽေႇရၸီႉ၊ ႁီႉဝီႉ၊ ယေႇပူႉသီႉ ၸိူဝ်းၼၼ်ႉ ငိၼ်းလွင်ႈမၼ်းတၢင်းမၼ်းၼၼ်ႉၸိုင်၊-

2ၶဝ်ၽွမ်ႉၵၼ်ၸူႉၵၼ်တုမ်ၵၼ် ႁႂ်ႈလႆႈတိုၵ်းတေႃး ယေႃးသူႉ ဢိၵ်ႇတင်း ၵူၼ်းမဵဝ်း ဢီႉသရေႇလႃႉ တင်းလၢႆဢေႃႈ။-

3ၵူၼ်းဝဵင်း ၵီႉပွင်ႇ တင်းလၢႆၵေႃႈ ငိၼ်းလွင်ႈတၢင်းဢၼ် ယေႃးသူႉ ႁဵတ်းတီႈဝဵင်း ယေႇရီႉၶူဝ်း ဢိၵ်ႇတင်းဝဵင်း ဢႃႇဢီႉ ၼၼ်ႉသေယဝ်ႉ၊-

4ႁဵတ်းပရီႉယႄႇလႄႈ ႁဵတ်းၸိူဝ်ႉၼင်ႇဢၼ်ပဵၼ်သၢၼ်ႇတမၢၼ်ႇၼၼ်ႉ ဢဝ်ထူင်ဢၼ်ၵဝ်ႇမွင်တၢင်ႇသႂ်ႇၵႃႈၼိူဝ်လီႈၶဝ်၊ ဢဝ်တဝ်ႈၼင်ၼမ်ႉၸပိတ်ႈဢၼ်ၵဝ်ႇမွင်ယွၵ်းၶၢတ်ႇၸွၵ်းႁုပ်ႇၼၼ်ႉ၊-

5တိုဝ်းသွၵ်းတိၼ်ဢၼ်ၵဝ်ႇမွင်ၵုပ်းမႄးၼၼ်ႉလႄႈ ၼုင်ႈမႆၶူဝ်းၼုင်ႈတၢင်းမႆဢၼ်ၵဝ်ႇမွင်ၼၼ်ႉဢေႃႈ။ တၢင်းၵိၼ်တၢင်းၶူပ်းၶဝ်ၵႃႈမီးၼၼ်ႉ ပဵၼ်ဢၼ်ႁႅင်ႈဢၼ်သႃးဝႆႉဢေႃႈ။-

6ၶဝ်ဢွၼ်ၵၼ်ၵႂႃႇၸူးၵႃႈတီႈ ယေႃးသူႉ ၵႃႈတီႈတပ်ႉ ၵီႉလႃႉၵႃႇလႃႉ ၼၼ်ႉသေလႄႈ လဝ်ႊလၢတ်ႈတီႈမၼ်းဢိၵ်ႇတင်းၵူၼ်းမဵဝ်း ဢီႉသရေႇလႃႉ တင်းလၢႆလႄႈဝႃႈ၊ ႁဝ်းၶႃႈလုၵ်ႉသေၵႃႈတီႈမိူင်းဢၼ်ၵႆပုၼ်ႉႁွတ်ႈမႃးၶႃႈယဝ်ႉ။ ႁဵတ်းမိၵ်ႉသႃႇႁႃယႃႉတၢင်းဢၼ်ထုၵ်ႇၵၼ်တင်းႁဝ်းၶႃႈသေၵမ်းၶႃႈ၊ ဝႃႈၼင်ႇၼႆဢေႃႈ။-

7ၵူၼ်းမဵဝ်း ဢီႉသရေႇလႃႉ တင်းလၢႆၵေႃႈ လၢတ်ႈတီႈၵူၼ်း ႁီႉဝီႉ ၸိူဝ်းၼၼ်ႉလႄႈဝႃႈ၊ ႁဝ်းဢမ်ႇႁူႉလွင်ႈဢၼ်သူယူႇၵႃႈတီႈႁိမ်းႁဝ်းႁိုဝ် ဢမ်ႇယူႇႁိုဝ်ၼၼ်ႉလႆႈ၊ ႁဝ်းတၵ်းႁဵတ်းမိၵ်ႉသႃႇႁႃယႃႉတၢင်းဢၼ်ထုၵ်ႇၵၼ်တင်းသူၸိူဝ်ႉၼင်ႇႁိုဝ်။ ဝႃႈၼင်ႇၼႆသေယဝ်ႉ၊-

8ၶဝ်ဢွၼ်ၵၼ်လဝ်ႊလၢတ်ႈတီႈ ယေႃးသူႉ လႄႈဝႃႈ၊ ႁဝ်းၶႃႈပဵၼ်ၶႃႈၸဝ်ႈႁဝ်းၶႃႈဢေႃႈ၊ ဝႃႈၼင်ႇၼႆဢေႃႈ။ ယေႃးသူႉ ၵေႃႈ ထၢမ်တီႈၶဝ်လႄႈဝႃႈ၊ သူပဵၼ်ၽူႈလႂ်။ သူလုၵ်ႉသေၵႃႈတီႈလႂ်မႃး၊ ဝႃႈၼင်ႇၼႆဢေႃႈ။-

9ၶဝ်ၶိုၼ်းလဝ်ႊလၢတ်ႈတီႈမၼ်းလႄႈဝႃႈ၊ ၶႃႈၸဝ်ႈႁဝ်းၶဝ်လုၵ်ႉသေၵႃႈတီႈမိူင်းဢၼ်ၵႆၼႃႇပုၼ်ႉမႃး ၵွပ်ႈပိူဝ်ႈၼႃႇမႃႉၸိုဝ်ႈသဵင်ထႃႇဝရႃႉၽြႃး ၽြႃးပဵၼ်ၸဝ်ႈ ၸဝ်ႈႁဝ်းၼၼ်ႉတီႈၶႃႈယဝ်ႉ။ ၶႃႈၸဝ်ႈႁဝ်းၶဝ် လႆႈငိၼ်းသတၢင်းသဵင်ၶၢဝ်ႇမၼ်းၸဝ်ႈ ဢိၵ်ႇတင်းၵႃႈဢၼ်မၼ်းၸဝ်ႈႁဵတ်းၵႃႈၼႂ်းမိူင်း ဢေႇၵိပ်ႉတူႉ ၊-

10တင်းၵႃႈဢၼ်မၼ်းၸဝ်ႈႁဵတ်းတီႈၶုၼ်လူင် ဢႃႇမေႃးရီႉ သွင်ပႃး ဢၼ်မီးၽၢႆႇဝၼ်းဢွၵ်ႇၼမ်ႉႁွင်ႈ ယေႃးတၢၼ်ႇ ဢၼ်ဝႃႈ သီႉႁုၼ်ႇ ၶုၼ်ႁေႃၶမ်း ႁေႇသၽုၼ်ႇ တင်း ဢေႃႇၶႃႉ ၶုၼ်ႁေႃၶမ်း ပႃႇသၢၼ်ႇ ဢၼ်ယူႇၵႃႈၼႂ်းဝဵင်း ဢႃႇသတႃႇရုတ်ႉ ၼၼ်ႉယဝ်ႉတီႈၶႃႈယဝ်ႉ။-

11ပိူဝ်ႈၼႆလႄႈ ၵူၼ်းဢၼ်ပဵၼ်ၵႄႇပဵၼ်ႁူဝ်ၶႃႈၸဝ်ႈႁဝ်းၶဝ် ဢိၵ်ႇတင်းၵူၼ်းဝၢၼ်ႈၵူၼ်းမိူင်းၶႃႈၸဝ်ႈႁဝ်းၶဝ်တင်းသဵင်ႈတင်းလူင်ၼၼ်ႉ သင်ႇလၢတ်ႈတီႈၶႃႈၸဝ်ႈႁဝ်းၶဝ်လႄႈဝႃႈ၊ ပႃးဢဝ်တၢင်းၵိၼ်တၢင်းၶူပ်းၵႃႈၼႂ်းမိုဝ်းသူ ပုၼ်ႈဢၼ်သူတၵ်းၵႂႃႇတၢင်းပႆတၢင်းသေလႄႈ ၵႂႃႇႁႂ်ႈလႆႈႁပ်ႉႁူဝ်တၢင်းၶဝ်ၼၼ်ႉလႄႈ၊ လဝ်ႊလၢတ်ႈတီႈၶဝ်လႄႈဝႃႈ၊ ႁဝ်းၶႃႈပဵၼ်ၶႃႈသူၸဝ်ႈၶႃႈဢေႃႈ။ ႁဵတ်းမိၵ်ႉသႃႇႁႃယႃႉလူၺ်ႈၵၼ်တင်းႁဝ်းၶႃႈသေၵမ်းၶႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆတီႈၶႃႈဢေႃႈ။-

12ၶဝ်ႈမုၼ်းၶႃႈၸဝ်ႈႁဝ်းၶဝ်ၼႆႉၸမ်ႉ၊ ၼႂ်းဝၼ်းဢၼ်ၶႃႈၸဝ်ႈႁဝ်းၶဝ် ဢွၵ်ႇမႃးႁႂ်ႈလႆႈႁွတ်ႈထိုင်ၵႃႈတီႈသူၸဝ်ႈၼၼ်ႉ ၶႃႈၸဝ်ႈႁဝ်းၶဝ် ဢဝ်ၵႃႈၼႂ်းႁိူၼ်းၶႃႈၸဝ်ႈႁဝ်းၶဝ်ၼႂ်းမိူဝ်ႈဢၼ်မၼ်းယင်းဢုၼ်ႇယင်းမႆႈယူႇၼၼ်ႉလႄႈ မႃးပုၼ်ႈဢၼ်တၵ်းႁဵတ်းတၢင်းၵိၼ်တၢင်းၶူပ်းတီႈၶႃႈဢေႃႈ။ မိူဝ်ႈလဵဝ်ၼႆႉၸမ်ႉ၊ တူၺ်းတီႈၶႃႈလူး၊ မီးတၢင်းဢၼ်ႁႅင်ႈၵႂႃႇသႃးၵႂႃႇယဝ်ႉတီႈၶႃႈဢေႃႈ။-

13တဝ်ႈထူင်ၼင် ဢၼ်ၶႃႈၸဝ်ႈႁဝ်းၶဝ်ဢဝ်ၼမ်ႉၸပိတ်ႈသႂ်ႇတဵမ်ဝႆႉၼႆႉ ပဵၼ်ဢၼ်မႂ်ႇတီႈၶႃႈဢေႃႈ။ တူၺ်းတီႈၶႃႈလူး၊ မီးတၢင်းဢၼ်ယွၵ်းသိၵ်ႇယဝ်ႉတီႈၶႃႈဢေႃႈ။ ၶူဝ်းၼုင်ႈတၢင်းမႆၸိူဝ်းၼႆႉ ၶႅပ်းတိၼ်ၸိူဝ်းၼႆႉၵေႃႈ၊ ၵဝ်ႇမွင်ၵႂႃႇၵွပ်ႈပိူဝ်ႈဢၼ် ၶၢဝ်းတၢင်းၵႆၼႃႇလူင်လၢင်ၼၼ်ႉတီႈၶႃႈဢေႃႈ၊ ဝႃႈၼင်ႇၼႆဢေႃႈ။

14ၶဝ်ၵေႃႈယင်းဢမ်ႇလဝ်ႊဢမ်ႇယွၼ်းဢၶႂၢင်ႉတီႈသူပ်းထႃႇဝရႃႉၽြႃးလႄႈ ဢဝ်တၢင်းၵိၼ်တၢင်းၶူပ်းၶဝ်ၼၼ်ႉၵိၼ်ဢေႃႈ။-

15ယေႃးသူႉ ၵေႃႈ ႁႂ်ႈၶဝ်ၵၢင်းလွတ်ႈတင်းဢမူႉသိုၵ်းသေလႄႈ ႁဵတ်းမိၵ်ႉသႃႇႁႃယႃႉတၢင်းဢၼ်ထုၵ်ႇၵၼ်တင်းၶဝ် ႁႂ်ႈၶဝ်လႆႈဢသၢၵ်ႈၵတ်းယဵၼ်ၶျၢမ်းသႃႇဢေႃႈ။ ၶုၼ်ပရဵၵ်ႈသၢတ်ႈတင်းလၢႆၵေႃႈ ႁဵတ်းတၢင်းဢၼ်ၵိၼ်ႇဢၼ်ဝႃႈ တီႈၶဝ်ၼၼ်ႉဢေႃႈ။-

16မိူဝ်ႈဢၼ်ႁဵတ်းမိၵ်ႉသႃႇႁႃယႃႉတၢင်းဢၼ်ထုၵ်ႇၵၼ်တင်းၶဝ်လႄႈ လႆႈသၢမ်ဝၼ်းယဝ်ႉၼၼ်ႉၸိုင်၊ ၶဝ်ငိၼ်းလွင်ႈဢၼ်ၶဝ်ၼၼ်ႉ ပဵၼ်ၵူၼ်းဢၼ်ၸမ်လႄႈယူႇၵႃႈတီႈႁိမ်းၶဝ်ဢေႃႈ။-

17ၵူၼ်းမဵဝ်း ဢီႉသရေႇလႃႉ တင်းလၢႆၵႂႃႇတၢင်းပႆတၢင်းလႄႈ ၼႂ်းဝၼ်းဢၼ်ထူၼ်ႈသၢမ်ဝၼ်းၼၼ်ႉႁွတ်ႈထိုင်ၵႃႈတီႈဝဵင်းၶဝ်ၼၼ်ႉဢေႃႈ။ ဝဵင်းၶဝ်ၼၼ်ႉၸမ်ႉ၊ ပဵၼ်ဝဵင်း ၵီႉပွင်ႇ ၊ ဝဵင်း ၶေႇၽီႉရႃႉ ၊ ဝဵင်း ပေႇရုတ်ႉ ၊ ဝဵင်း ၵီႉရယတ်ႉယႃႇရိမ်ႇ ဢေႃႈ။-

18ၵူၼ်းမဵဝ်း ဢီႉသရေႇလႃႉ တင်းလၢႆ ဢမ်ႇတိုၵ်းတေႃးယႃႉပႅတ်ႈၶဝ်ၼၼ်ႉ ၵွပ်ႈပိူဝ်ႈဢၼ်ၶုၼ်ပရဵၵ်ႈသၢတ်ႈတင်းလၢႆ ၵိၼ်ႇဝႃႈတီႈထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ၼၼ်ႉလႄႈ ပရဵၵ်ႈသၢတ်ႈတင်းသဵင်ႈတင်းလူင် တၢင်ႇဢပႅတ်ႈတီႈၶုၼ်ၸိူဝ်းၼၼ်ႉလႄႈ ပွင်ႉၶၢင်းပွင်ႉမိူၼ်ႇဢေႃႈ။-

19ၶုၼ်ၵႃႈမီးၸိူဝ်းၼၼ်ႉ ဢွၼ်ၵၼ်ၶိုၼ်းလၢတ်ႈတီႈပရဵၵ်ႈသၢတ်ႈတင်းသဵင်ႈတင်းလူင်လႄႈဝႃႈ၊ ၵွပ်ႈပိူဝ်ႈဢၼ်ႁဝ်းႁဵတ်းတၢင်းဢၼ် ၵိၼ်ႇဝႃႈတီႈထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ယဝ်ႉလႄႈ ႁဝ်းဢမ်ႇလႆႈတိူဝ်ႉလႆႈထုၵ်ႇၶဝ်။-

20ႁဝ်းတၵ်းလႆႈႁဵတ်းၸိူဝ်ႉၼင်ႇႁိုဝ်တီႈၶဝ်ဝႃႈၼႆၸမ်ႉ၊ ႁဝ်းၵူဝ်တၢမ်ႇဢပႅတ်ႈတၵ်းႁွတ်ႈထိုင်ၵႃႈၼိူဝ်ႁဝ်း ၵွပ်ႈပိူဝ်ႈဢၼ်ႁဝ်းၵိၼ်ႇဝႃႈတီႈၶဝ်မႅၼ်ႈၼၼ်ႉလႄႈ ႁဝ်းတၵ်းလႆႈႁႂ်ႈဢသၢၵ်ႈၶဝ်ၵတ်းယဵၼ်ၶျၢမ်းသႃႇယူႇဢေႃႈ၊ ဝႃႈၼင်ႇၼႆဢေႃႈ။-

21ၶုၼ်ၸိူဝ်းၼၼ်ႉသမ်ႉလၢတ်ႈထႅင်ႈလႄႈဝႃႈ၊ ႁႂ်ႈဢသၢၵ်ႈၶဝ် လႆႈၵတ်းယဵၼ်ၶျၢမ်းသႃႇတႃႉ၊ ဝႃႈၼင်ႇၼႆဢေႃႈ။ ၼင်ႇၼၼ်လႄႈ ၶဝ်ၼၼ်ႉ ပဵၼ်ၵေႃႉဢၼ်ၽၼ်းၽိုၼ်း၊ ၵေႃႉဢၼ်တဵၵ်းၼမ်ႉပုၼ်ႈပရဵၵ်ႈသၢတ်ႈတင်းသဵင်ႈတင်းလူင် မႅၼ်ႈၵႃႈၼင်ႇဢၼ် ၶုၼ်တင်းလၢႆမီးဢမိင်ႉၼၼ်ႉဢေႃႈ။

22ယေႃးသူႉ ႁွင်ႉဢဝ်ၶဝ်သေလႄႈလၢတ်ႈလႄႈဝႃႈ၊ သူၼႆႉပိၵ်ႉသမ်ႉယူႇၵႃႈတီႈႁိမ်းႁဝ်းယူႇသေၵေႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူလၢတ်ႈလႄႈဝႃႈ၊ ႁဝ်းၶႃႈလုၵ်ႉသေၵႃႈတီႈဢၼ်ၵႆၼႃႇလူင်လၢင်ပုၼ်ႉမႃးၶႃႈဢေႃႈ၊ ဝႃႈၼင်ႇၼႆလႄႈ ပႅတ်ႉလႅၼ်ႁဝ်းၼင်ႇႁိုဝ်။-

23တေႃႈလဵဝ်ၼႆႉ သူပဵၼ်ၵေႃႉဢၼ်ထုၵ်ႇၵိၼ်ႇထုၵ်ႇဝႃႈလႄႈ၊ ၵႃႈၼႂ်းသူၼႆႉ ၵေႃႉဢၼ်လႆႈၶၢမ်ႇႁဵတ်းၶႃႈဢၼ်ဝႃႈ ၵေႃႉဢၼ်ၽၼ်းၽိုၼ်း၊ ၵေႃႉဢၼ်တဵၵ်းၼမ်ႉပုၼ်ႈႁိူၼ်းၽြႃးပဵၼ်ၸဝ်ႈၵဝ် တၵ်းဢမ်ႇလႆႈထၢတ်ႇ၊ ဝႃႈၼင်ႇၼႆဢေႃႈ။-

24ၶဝ်ၵေႃႈၶိုၼ်းလဝ်ႊလၢတ်ႈတီႈ ယေႃးသူႉ လႄႈဝႃႈ၊ ၵွပ်ႈပိူဝ်ႈဢၼ်ၶႃႈၸဝ်ႈႁဝ်းၸိူဝ်းၼႆႉ လႆႈႁူႉလႆႈငိၼ်းလွင်ႈဢၼ်ထႃႇဝရႃႉၽြႃး ၽြႃးပဵၼ်ၸဝ်ႈ ၸဝ်ႈႁဝ်းသင်ႇလၢတ်ႈဝႆႉတီႈ မူဝ်းသေႇ ၶႃႈမၼ်းၸဝ်ႈၼၼ်ႉ ႁႂ်ႈလႆႈဢဝ်မိူင်းၼႆႉတင်းသဵင်ႈတင်းမူတ်းပၼ်တီႈသူၸဝ်ႈ ဢိၵ်ႇတင်းႁႂ်ႈလႆႈပႄႇၽဵဝ်ႈၵူၼ်းဝၢၼ်ႈၵူၼ်းမိူင်းၼႆႉ တင်းသဵင်ႈတင်းလူင်ပႅတ်ႈသေၵႃႈတီႈၽၢႆႇၼႃႈသူၸဝ်ႈၼၼ်ႉတႄႉတႄႉဝႃႈဝႃႈလႄႈ၊ ၶႃႈၸဝ်ႈႁဝ်းၶဝ် ၵူဝ်ဢသၢၵ်ႈၶႃႈၸဝ်ႈႁဝ်းၶဝ်တၵ်းသုမ်း ၵွပ်ႈပိူဝ်ႈသူၸဝ်ႈၼႃႇလူင်လၢင်လႄႈ လႆႈႁဵတ်းဢမူႉၼႆႉတီႈၶႃႈဢေႃႈ။-

25တေႃႈလဵဝ်ၼႆႉ တူၺ်းတီႈၶႃႈလူး၊ ၶႃႈၸဝ်ႈႁဝ်းၶဝ်ၼႆႉ မီးယူႇၵႃႈၼႂ်းမိုဝ်းၸဝ်ႈႁဝ်းတီႈၶႃႈဢေႃႈ။ ၵႃႈၼင်ႇဢၼ်ၸဝ်ႈႁဝ်းထၢင်ႇပဵၼ်ဢၼ်ထုၵ်ႇဢၼ်လီ၊ ဢၼ်မႅၼ်ႈၸွမ်းတြႃးၸိူဝ်ႉၼင်ႇႁိုဝ်တီႈၶႃႈၸဝ်ႈႁဝ်းၶဝ်ၼၼ်ႉ ႁဵတ်းသေၵမ်းတီႈၶႃႈ၊ ဝႃႈၼင်ႇၼႆဢေႃႈ။-

26ၼင်ႇၼၼ်လႄႈ မၼ်းႁဵတ်းတီႈၶဝ်လႄႈ ၵႄႇသႄႇၼုၵ်ႈဢဝ်ၶဝ် ၵႃႈၼႂ်းမိုဝ်းၵူၼ်းမဵဝ်း ဢီႉသရေႇလႃႉ တင်းလၢႆ ႁႂ်ႈၶဝ်ဢမ်ႇလႆႈဢဝ်ၶဝ်ၼၼ်ႉတၢႆလႄႈ၊-

27ၼႂ်းမိုဝ်ႉဝၼ်းၼၼ်ႉ ယေႃးသူႉ ၸီႇယၢင်ႇဝႆႉ ႁႂ်ႈၶဝ်ၼၼ်ႉလႆႈပဵၼ်ၵေႃႉဢၼ်ၽၼ်းၽိုၼ်း၊ ၵေႃႉဢၼ်တဵၵ်းၼမ်ႉပုၼ်ႈပရဵၵ်ႈသၢတ်ႈ ဢိၵ်ႇတင်း ပုၼ်ႈယိတ်ႈပလၢင်ႇထႃႇဝရႃႉၽြႃး ဢၼ်တႄႇဝႆႉၼႂ်းတီႈဢၼ်မၼ်းၸဝ်ႈလိူၵ်ႈၵဵပ်းဢဝ်ၼၼ်ႉ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။

← Chapter 8 Jump to: Chapter 10 →