Joshua 4

Shan

← Chapter 3 Jump to: Chapter 5 →

1မိူဝ်ႈဢၼ်ၵူၼ်းတင်းသဵင်ႈတင်းလူင်ၶၢမ်ႈၼမ်ႉႁွင်ႈ ယေႃးတၢၼ်ႇ သဵင်ႈသဵင်ႈမူတ်းမူတ်းယဝ်ႉၼၼ်ႉၸိုင်၊ ထႃႇဝရႃႉၽြႃးမီးဢမိင်ႉတီႈ ယေႃးသူႉ လႄႈဝႃႈ၊-

2လိူၵ်ႈၵဵပ်းဢဝ်ၵူၼ်းသိပ်းသွင်ၵေႃႉ ၵႃႈၼႂ်းၵူၼ်းတင်းလၢႆယေႈမဵဝ်းယေႈၵေႃႉလႄႈ၊-

3သင်ႇလၢတ်ႈတီႈၶဝ်လႄႈဝႃႈ၊ သူဢဝ်မၢၵ်ႇႁိၼ်သိပ်းသွင်လုၵ်ႈၵႃႈၼႂ်းၵၢင်ၼမ်ႉႁွင်ႈ ယေႃးတၢၼ်ႇ တီႈဢၼ်တိၼ်ယိတ်ႈပရေႃးႁဵၵ်ႈ ၸိူဝ်းၼၼ်ႉယဵပ်ႇသႂ်ႇမၼ်ႈမၼ်ႈၶိူင်ႇၶိူင်ႇၼၼ်ႉလႄႈ ဢဝ်ၵႂႃႇလူၺ်ႈၵၼ်တင်းသူသေလႄႈ ဝႆႉၵႃႈတီႈဢၼ်သူတၵ်းၶျႃးပၢင်မိူဝ်ႈၶမ်ႈၼႆႉၼၼ်ႉတႃႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆလႄႈ၊-

4ယေႃးသူႉ ႁွင်ႉဢဝ်ၵူၼ်းသိပ်းသွင်ၵေႃႉ ဢၼ်မၼ်းမၵ်းၶၢၼ်းဝႆႉထႃႈၼႂ်းၵူၼ်းမဵဝ်း ဢီႉသရေႇလႃႉ တင်းလၢႆ ယေႈမဵဝ်းယေႈၵေႃႉၼၼ်ႉၸိူဝ်းၼၼ်ႉသေလႄႈ၊-

5ယေႃးသူႉ သင်ႇလၢတ်ႈတီႈၶဝ်ၼၼ်ႉလႄႈဝႃႈ၊ ၶၢမ်ႈၵႂႃႇၵႃႈတီႈၽၢႆႇၼႃႈတိူၵ်ႈတႃႇ ထႃႇဝရႃႉၽြႃး ၽြႃးပဵၼ်ၸဝ်ႈသူ ၵႃႈၼႂ်းၵၢင်ၼမ်ႉႁွင်ႈ ယေႃးတၢၼ်ႇ လႄႈ ဢဝ်မၢၵ်ႇႁိၼ်ယေႈၵေႃႉယေႈလုၵ်ႈမႅၵ်ႇသႂ်ႇၵႃႈၼိူဝ်ႁူဝ်မႃႇသူ ၵႂႃႇၸွမ်းၵႃႈၼင်ႇဢၼ်ၼပ်ႉဢၢၼ်ႇမဵဝ်းၵႃႈၼႂ်းၵူၼ်းမဵဝ်း ဢီႉသရေႇလႃႉ ၼၼ်ႉတႃႉ။-

6ပေႃးႁဵတ်းၸိူဝ်ႉၼင်ႇၼၼ်ၸိုင် တၵ်းလႆႈပဵၼ်သၢၵ်ႈသေႇဝႆႉၵႃႈၼႂ်းသူပုၼ်ႈလွင်ႈၼင်ႇႁိုဝ် မိူဝ်ႈဢၼ်လုၵ်ႈလၢင်းသူတွင်ႈထၢမ် ၼႂ်းၶိင်ႇၵႃႇလႃႉၵမ်းလိုၼ်းပုၼ်ႉလႄႈဝႃႈ၊ မၢၵ်ႇႁိၼ်ၸိူဝ်းၼႆႉၸမ်ႉ၊ ၶႂ်ႈဝႃႈၸိူဝ်ႉၼင်ႇႁိုဝ်။ ဝႃႈၼင်ႇၼႆၼၼ်ႉ၊-

7သူတၵ်းလႆႈၶိုၼ်းလၢတ်ႈလႄႈဝႃႈ၊ ၼမ်ႉၼႂ်းၼမ်ႉႁွင်ႈ ယေႃးတၢၼ်ႇ ၼၼ်ႉ ၶၢတ်ႇၵႂႃႇၵႃႈတီႈၽၢႆႇၼႃႈတိူၵ်ႈတႃႇပတီႉၺိၺ်ႇထႃႇဝရႃႉၽြႃးဢေႃႈ။ မိူဝ်ႈဢၼ်တိူၵ်ႈတႃႇၸဝ်ႈၼၼ်ႉ ၶၢမ်ႈၼမ်ႉႁွင်ႈ ယေႃးတၢၼ်ႇ ၼၼ်ႉၸိုင်၊ ၼမ်ႉၼႂ်းၼမ်ႉႁွင်ႈ ယေႃးတၢၼ်ႇ ၶၢတ်ႇၵႂႃႇဢေႃႈ၊ ဝႃႈၼင်ႇၼႆၼၼ်ႉဢေႃႈ။ ၼင်ႇၼၼ်လႄႈ မၢၵ်ႇႁိၼ်ၸိူဝ်းၼႆႉ တၵ်းပဵၼ်ပုၼ်ႈဢၼ် ၵူၼ်းမဵဝ်း ဢီႉသရေႇလႃႉ တင်းလၢႆ တၵ်းလႆႈ ၶုၵ်းၸႂ်လႆႈၶႆႈၸႂ်ထူပ်းယူႇတႃႇသေႇဢမ်ႇထၢတ်ႇဢေႃႈ၊ ဝႃႈၼင်ႇၼႆသေယဝ်ႉ၊-

8ၵူၼ်းမဵဝ်း ဢီႉသရေႇလႃႉ တင်းလၢႆ ႁဵတ်းၸွမ်းၵႃႈၼင်ႇဢၼ် ယေႃးသူႉ သင်ႇလၢတ်ႈဝႆႉၼၼ်ႉလႄႈ ဢဝ်မၢၵ်ႇႁိၼ်သိပ်းသွင်လုၵ်ႈၵႃႈၼႂ်းၵၢင်ၼမ်ႉႁွင်ႈ ယေႃးတၢၼ်ႇ မႅၼ်ႈၵႃႈၼင်ႇဢၼ်ထႃႇဝရႃႉၽြႃး မီးဢမိင်ႉတီႈ ယေႃးသူႉ ၼၼ်ႉ၊ ၸွမ်းၵႃႈၼင်ႇဢၼ် ၼပ်ႉဢၢၼ်ႇမဵဝ်းၵႃႈၼႂ်းၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉ မႅၵ်ႇပႃးၵႂႃႇလူၺ်ႈၵၼ်တင်းၶဝ်ၸူးၵႃႈတီႈ တီႈဢၼ်တၵ်းၶျႃးပၢင်ၼၼ်ႉလႄႈ ၶျႃးဝႆႉၵႃႈတီႈၼၼ်ႈဢေႃႈ။-

9လႆႈသမ်ႉ ယေႃးသူႉ ဢဝ်မၢၵ်ႇႁိၼ်သိပ်းသွင်လုၵ်ႈပၵ်းဝႆႉၵႃႈၼႂ်းၵၢင်ၼမ်ႉႁွင်ႈ ယေႃးတၢၼ်ႇ ၵႃႈတီႈဢၼ်တိၼ်ယိတ်ႈပရေႃးႁဵၵ်ႈ ဢၼ်ႁၢပ်ႇတိူၵ်ႈတႃႇပတီႉၺိၺ်ႇၸဝ်ႈၸိူဝ်းၼၼ်ႉ ယဵပ်ႇသႂ်ႇၼၼ်ႉလႄႈ မီးယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။

10ယိတ်ႈပရေႃးႁဵၵ်ႈဢၼ်ႁၢပ်ႇတိူၵ်ႈတႃႇၸဝ်ႈၸိူဝ်းၼၼ်ႉ ၸုၵ်းယူႇၵႃႈၼႂ်းၵၢင်ၼမ်ႉႁွင်ႈ ယေႃးတၢၼ်ႇ တေႃႇထိုင်ႁွတ်ႈၵႃႈဢၼ်ထႃႇဝရႃႉၽြႃး မီးဢမိင်ႉတီႈ ယေႃးသူႉ ႁႂ်ႈလႆႈလၢတ်ႈဝႆႉတီႈၵူၼ်းတင်းလၢႆၼၼ်ႉ ထၼ်ႈပေႃးယဝ်ႉတူဝ်ႈယဝ်ႉတင်းသဵင်ႈတင်းမူတ်း ၸွမ်းၵႃႈၼင်ႇဢၼ် မူဝ်းသေႇ သင်ႇလၢတ်ႈဝႆႉတီႈ ယေႃးသူႉ ၼၼ်ႉဢေႃႈ။ ၵူၼ်းတင်းလၢႆၼၼ်ႉၵေႃႈ ႁိပ်ႈၼႅတ်ႈသေလႄႈၶၢမ်ႈဢေႃႈ။-

11ၵူၼ်းတင်းသဵင်ႈတင်းလူင်ၶၢမ်ႈတင်းသဵင်ႈတင်းမူတ်းသေယဝ်ႉ၊ တိူၵ်ႈတႃႇထႃႇဝရႃႉၽြႃး ဢိၵ်ႇတင်းယိတ်ႈပရေႃးႁဵၵ်ႈၸိူဝ်းၼၼ်ႉ ၶၢမ်ႈၵႃႈတီႈသိုဝ်ႈၼႃႈတႂ်ႈတႃၵူၼ်းတင်းလၢႆဢေႃႈ။-

12ၵူၼ်းမဵဝ်း ရူႉပိၼ်ႇ ၊ ၵူၼ်းမဵဝ်း ၵၢတ်ႉ ၊ ၵူၼ်းမဵဝ်း မၼႃႇသေႇ ၶိုင်ႈၼိုင်ႈၸိူဝ်းၼၼ်ႉ ယိပ်းၵမ်လၢၵ်ႈၼၢၵ်ႈသေလႄႈ ဢွၼ်ႁူဝ်ၵူၼ်းမဵဝ်း ဢီႉသရေႇလႃႉ တင်းလၢႆ ၶၢမ်ႈၵႂႃႇၸွမ်းၵႃႈၼင်ႇဢၼ် မူဝ်းသေႇ သင်ႇလၢတ်ႈဝႆႉၼၼ်ႉဢေႃႈ။-

13ၵူၼ်းသီႇမိုၼ်ႇၼိုင်ႈၸမ်ၸမ် ဢၼ်မႄးႁႅၼ်းဝႆႉႁႂ်ႈလႆႈတိုၵ်းသိုၵ်းၸိူဝ်းၼၼ်ႉ ၶၢမ်ႈၵႂႃႇၸူးၵႃႈတီႈပၢင်ႇပဵင်းဝဵင်း ယေႇရီႉၶူဝ်း သိုဝ်ႈၼႃႈတႂ်ႈတႃထႃႇဝရႃႉၽြႃး ႁႂ်ႈလႆႈတိုၵ်းသိုၵ်းဢေႃႈ။-

14ၼႂ်းဝၼ်းၼၼ်ႉ ထႃႇဝရႃႉၽြႃး ယုၵ်ႉယွင်ႈ ယေႃးသူႉ သိုဝ်ႈၼႃႈတႂ်ႈတႃၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၼၼ်ႉလႄႈ၊ ၶဝ်ၼၼ်ႉဢွၼ်ၵၼ်ၵူဝ်ႁႄမၼ်း ၸူဝ်ႈဢၼ်ဢသၢၵ်ႈမၼ်းယင်းလိပ်းယူႇၼၼ်ႉ မိူၼ်ၸိူဝ်ႉၼင်ႇဢၼ်ၶဝ်ၵူဝ်ႁႄ မူဝ်းသေႇ ၼၼ်ႉဢေႃႈ။-

15ထႃႇဝရႃႉၽြႃးသမ်ႉမီးဢမိင်ႉတီႈ ယေႃးသူႉ လႄႈဝႃႈ၊-

16သင်ႇလၢတ်ႈႁႂ်ႈယိတ်ႈပရေႃးႁဵၵ်ႈဢၼ်ႁၢပ်ႇတိူၵ်ႈတႃႇၶိူင်ႈဢၼ်ၶၢမ်ႇသၢၵ်ႈသေႇၸိူဝ်းၼၼ်ႉ ဢွၵ်ႇသေၵႃႈၼႂ်းၼမ်ႉႁွင်ႈ ယေႃးတၢၼ်ႇ ၼၼ်ႉၶိုၼ်ႈမႃးတႃႉ၊ ဝႃႈၼင်ႇၼႆလႄႈ၊-

17ယေႃးသူႉ သင်ႇလၢတ်ႈတီႈယိတ်ႈပရေႃးႁဵၵ်ႈၸိူဝ်းၼၼ်ႉလႄႈဝႃႈ၊ ဢွၵ်ႇသေၵႃႈၼႂ်းၼမ်ႉႁွင်ႈ ယေႃးတၢၼ်ႇ ၶိုၼ်ႈမႃးတႃႉ၊ ဝႃႈၼင်ႇၼႆဢေႃႈ။-

18မိူဝ်ႈဢၼ်ယိတ်ႈပရေႃးႁဵၵ်ႈဢၼ်ႁၢပ်ႇတိူၵ်ႈတႃႇပတီႉၺိၺ်ႇထႃႇဝရႃႉၽြႃးၸိူဝ်းၼၼ်ႉ ဢွၵ်ႇသေၵႃႈၼႂ်းၵၢင်ၼမ်ႉႁွင်ႈ ယေႃးတၢၼ်ႇ ၶိုၼ်ႈမႃးလႄႈ ၽႃႇတိၼ်ၶဝ်ယဵပ်ႇၵႃႈၼိူဝ်ၵုင်းၼၼ်ႉၸိုင်၊ ၼမ်ႉၼႂ်းၼမ်ႉႁွင်ႈ ယေႃးတၢၼ်ႇ ၼၼ်ႉ ၶိုၼ်းမႃးၵႃႈတီႈ တီႈမၼ်းၼၼ်ႉလႄႈ ထူမ်ႈၽင်ႇမၼ်းတင်းသဵင်ႈတင်းမူတ်း မိူၼ်ၸိူဝ်ႉၼင်ႇမိူဝ်ႈဢွၼ်တၢင်းၼၼ်ႉဢေႃႈ။-

19လိူၼ်ပထမႃႉ ဝၼ်းတႃႉသမႃႉၼၼ်ႉ၊ ၵူၼ်းတင်းလၢႆဢွၼ်ၵၼ်ဢွၵ်ႇသေၵႃႈၼႂ်းၼမ်ႉႁွင်ႈ ယေႃးတၢၼ်ႇ ၶိုၼ်ႈမႃးလႄႈ ၶျႃးတပ်ႉယူႇၵႃႈတီႈ ၵီႉလႃႉၵႃႇလႃႉ ၵႃႈတီႈလႅၼ်လိၼ်ၽၢႆႇဝၼ်းဢွၵ်ႇ ဝဵင်း ယေႇရီႉၶူဝ်း ၼၼ်ႉဢေႃႈ။-

20မၢၵ်ႇႁိၼ်သိပ်းသွင်လုၵ်ႈ ဢၼ်ၶဝ်ဢဝ်ဢွၵ်ႇသေၵႃႈၼႂ်းၼမ်ႉႁွင်ႈ ယေႃးတၢၼ်ႇ ၸိူဝ်းၼၼ်ႉၸိုင်၊ ယေႃးသူႉ ဢဝ်ပၵ်းဝႆႉၵႃႈတီႈ ၵီႉလႃႉၵႃႇလႃႉ ၼၼ်ႉဢေႃႈ။-

21တီႈၵူၼ်းမဵဝ်း ဢီႉသရေႇလႃႉ တင်းလၢႆၵေႃႈ မၼ်းလၢတ်ႈလႄႈဝႃႈ၊ မိူဝ်ႈဢၼ်လုၵ်ႈလၢင်းသူတွင်ႈထၢမ်တီႈပေႃႈၶဝ် ၼႂ်းၶိင်ႇၵႃႇလႃႉၵမ်းလိုၼ်းၼၼ်ႉလႄႈဝႃႈ၊ မၢၵ်ႇႁိၼ်ၸိူဝ်းၼႆႉၸမ်ႉ၊ ၶႂ်ႈဝႃႈၸိူဝ်ႉၼင်ႇႁိုဝ်။ ဝႃႈၼင်ႇၼႆၼၼ်ႉၸိုင်၊-

22သူတၵ်းလႆႈႁႂ်ႈလုၵ်ႈလၢင်းသူႁူႉလႄႈဝႃႈ၊ ၵူၼ်းမဵဝ်း ဢီႉသရေႇလႃႉ တင်းလၢႆၼႆႉ ပႆၵႃႈၼိူဝ်လိၼ်ဢၼ်ယူတ်းဢၼ်ႁႅင်ႈသေလႄႈ ၶၢမ်ႈၼမ်ႉႁွင်ႈ ယေႃးတၢၼ်ႇ ၼႆႉမႃးဢေႃႈ၊ ဝႃႈၼင်ႇၼႆဢေႃႈ။-

23ထႃႇဝရႃႉၽြႃး ၽြႃးပဵၼ်ၸဝ်ႈသူ ႁႂ်ႈၼမ်ႉၼႂ်းၼမ်ႉႁွင်ႈ ယေႃးတၢၼ်ႇ ယူတ်းႁႅင်ႈၵႂႃႇၵႃႈတီႈၽၢႆႇၼႃႈသူတေႃႇထိုင်ႁွတ်ႈသူထၼ်ႈပေႃးလႆႈၶၢမ်ႈမႃးမိူၼ်ၸိူဝ်ႉၼင်ႇဢၼ် ထႃႇဝရႃႉၽြႃး ၽြႃးပဵၼ်ၸဝ်ႈသူႁဵတ်းတီႈပၢင်ႇလၢႆႇ ဢေႇတုမ်ႇ ဢၼ်မၼ်းၸဝ်ႈႁႂ်ႈယူတ်းႁႅင်ႈၵႂႃႇၵႃႈတီႈၽၢႆႇၼႃႈႁဝ်း တေႃႇထိုင်ႁွတ်ႈႁဝ်းထၼ်ႈပေႃးလႆႈၶၢမ်ႈမႃးၼၼ်ႉ၊-

24ႁႂ်ႈၵူၼ်းၼိူဝ်လိၼ်မိူင်းတင်းသဵင်ႈတင်းလူင် လႆႈႁူႉလွင်ႈဢၼ်မိုဝ်းထႃႇဝရႃႉၽြႃး မီးႁႅင်းတၼ်းၶူဝ်းဢၼ်ယႂ်ႇၼႃႇ ဢိၵ်ႇတင်းႁႂ်ႈၶဝ်လႆႈၵူဝ်လႆႈႁႄထႃႇဝရႃႉၽြႃး ၽြႃးပဵၼ်ၸဝ်ႈသူယူႇတႃႇသေႇဢေႃႈ၊ ဝႃႈၼင်ႇၼႆဢေႃႈ။

← Chapter 3 Jump to: Chapter 5 →