Joshua 11

Shan

← Chapter 10 Jump to: Chapter 12 →

1မိူဝ်ႈဢၼ် ယႃႇၽိၼ်း ၶုၼ်လူင် ႁႃႇၸေႃႇ ငိၼ်းလွင်ႈမၼ်းတၢင်းမၼ်းၼၼ်ႉၸိုင်၊ မၼ်းပွႆႇၸႂ်ႉၸူးၵႃႈတီႈ ယေႃးပပ်ႉ ၶုၼ်လူင် မႃႇတုၼ်ႇ ၊ ၶုၼ်လူင် သီႉမြုၼ်ႇ ၊ ၶုၼ်လူင် ဢႃႇၶသပ်ႉ ၊-

2ဢိၵ်ႇတင်းၵႃႈတီႈၶုၼ်လူင်တင်းလၢႆ ဢၼ်မီးၵႃႈတီႈပွတ်းတၢင်းႁွင်ႇၵႃႈၼိူဝ်ႁၢၼ်ႉလွႆ၊ ၵႃႈၼႂ်းပၢင်ႇပဵင်း ဢႃႇရၽႃႉ ၵႃႈတီႈၽၢႆႇတၢင်းၸၢၼ်း ဝဵင်း ၵိၼ်ႇၼီႇသရႅတ်ႉ ၊ ၵႃႈတႂ်ႈတီႈဢၼ်ပၢင်ႇဢၼ်ပဵင်း၊ ၵႃႈၼိူဝ်တီႈဢၼ်သုင် မိူင်း တေႃႇရႃႉ ၽၢႆႇဝၼ်းတူၵ်းၸိူဝ်းၼၼ်ႉ၊-

3ဢိၵ်ႇတင်းၵႃႈတီႈၵူၼ်း ၶႃႇၼၼီႉ ဢၼ်ယူႇဝၼ်းတူၵ်းဝၼ်းဢွၵ်ႇၵူၼ်း ဢႃႇမေႃးရီႉ ၊ ၵူၼ်း ႁိတ်ႉတီႉ ၊ ၵူၼ်း ၽေႇရၸီႉ ၊ ၵူၼ်း ယေႇပူႉသီႉ ဢၼ်ယူႇၵႃႈၼိူဝ်ႁၢၼ်ႉလွႆ၊ ၵူၼ်း ႁီႉဝီႉ ဢၼ်ယူႇၵႃႈတီႈတိၼ်လွႆ ႁေႇရမုၼ်ႇ မိူင်း မီႉၸပႃႇ ၸိူဝ်းၼၼ်ႉလႄႈ၊-

4ၶဝ်ၼၼ်ႉဢွၼ်ၵၼ်ပႃးဢဝ်ပူဝ်ႇပႃႇၶဝ် ၵူၼ်းဢၼ်ၼမ်ၼႃႇလူင်လၢင် ဢၼ်ၼပ်ႉဢၢၼ်ႇပဵၼ်ၸိူဝ်ႉၼင်ႇမဵတ်ႉႁိၼ်မဵတ်ႉသၢႆး ၼမ်ႉသမ်ႇမုၵ်ႉတြႃႇၼၼ်ႉ ဢိၵ်ႇတင်းမႃႉလႂ်၊ လေႃႉရထႃးလႂ် ၼမ်ၼႃႇလူင်လၢင်ဢွၵ်ႇမႃးဢေႃႈ။-

5ၶုၼ်လူင်ၵႃႈမီးၼၼ်ႉၸူႉၵၼ်တုမ်ၵၼ်သေလႄႈ ၶီႇမႃးလႄႈၶျႃးတပ်ႉယူႇမုၵ်ႉလဵဝ်ၵၼ် ၵႃႈတီႈႁိမ်းၼွင် မေႇရုမ်ႇ ၼၼ်ႉ ႁႂ်ႈလႆႈတိုၵ်းတေႃးမဵဝ်း ဢီႉသရေႇလႃႉ ဢေႃႈ။-

6ထႃႇဝရႃႉၽြႃးမီးဢမိင်ႉတီႈ ယေႃးသူႉ လႄႈဝႃႈ၊ ယႃႇပေၵူဝ်ပေႁႄၵွပ်ႈပိူဝ်ႈၶဝ်။ ၵဝ်တၵ်းဢဝ်ၶဝ်ၵႃႈမီးၼၼ်ႉ ဢၢပ်ႈပၼ်တီႈတၢင်းတၢႆ ၵႃႈတီႈၽၢႆႇၼႃႈမဵဝ်း ဢီႉသရေႇလႃႉ ဝၼ်းမိူဝ်ႈၽုၵ်ႈၵႃႈတီႈၶိင်ႇၼႆႉၼၼ်ႉဢေႃႈ။ မႂ်းတၵ်းလႆႈတႅပ်းဢဵၼ်တိၼ်မႃႉၶဝ်ၸိူဝ်းၼၼ်ႉၶၢတ်ႇလႄႈ ဢဝ်ၽႆးတုတ်ႇရထႃးၶဝ်ၸိူဝ်းၼၼ်ႉပႅတ်ႈဢေႃႈ၊ ဝႃႈၼင်ႇၼႆဢေႃႈ။-

7ယေႃးသူႉ ၵေႃႈၶီႇဢဝ်ၵူၼ်းသိုၵ်းမၼ်းတင်းလၢႆၵႂႃႇလႄႈ ၵိုင်ႉၵၢင်ႉႁူပ်ႉထူပ်းၶဝ်ၵႃႈတီႈႁိမ်းၼွင် မေႇရုမ်ႇ သေယဝ်ႉ၊ တိုၵ်းတေႃးဢေႃႈ။-

8ထႃႇဝရႃႉၽြႃးဢဝ်ၶဝ်ၼၼ်ႉ ဢၢပ်ႈပၼ်ၵႃႈၼႂ်းမိုဝ်းၵူၼ်းမဵဝ်း ဢီႉသရေႇလႃႉ တင်းလၢႆလႄႈ ၶဝ်တိုၵ်းတေႃးယႃႉပႅတ်ႈၶဝ်ၼၼ်ႉလႄႈ လိုပ်ႈၸွမ်းလမ်းၸွမ်းတေႃႇထိုင်ႁွတ်ႈဝဵင်းလူင် ၸီႉတုၼ်ႇ ၊ ဝဵင်း မီႉသရၽေႃႇသမိမ်ႈ ၊ ပၢင်ႇႁူၺ်ႈ မီႉၸႃႉ ၽၢႆႇဝၼ်းဢွၵ်ႇၼၼ်ႉလႄႈ တိုၵ်းတေႃးယႃႉပႅတ်ႈႁႂ်ႈထၼ်ႈပေႃး ဢမ်ႇၵိုတ်းဢမ်ႇၵျၢၼ်ႇဝႆႉသေၵေႃႉသေၵူၼ်းဢေႃႈ။-

9ယေႃးသူႉ ႁဵတ်းတီႈၶဝ်ၼၼ်ႉၸွမ်းၵႃႈၼင်ႇဢၼ်ထႃႇဝရႃႉၽြႃး သင်ႇလၢတ်ႈဝႆႉတီႈမၼ်းၼၼ်ႉလႄႈ တႅပ်းဢဵၼ်တိၼ်မႃႉၶဝ်ၸိူဝ်းၼၼ်ႉၶၢတ်ႇပႅတ်ႈလႄႈ ဢဝ်ၽႆးတုတ်ႇရထႃးၶဝ်ၸိူဝ်းၼၼ်ႉပႅတ်ႈဢေႃႈ။-

10မိူဝ်ႈၼၼ်ႉ ယေႃးသူႉ ဝၢႆႇၶိုၼ်းမႃးလႄႈတိုၵ်းဢဝ်ဝဵင်း ႁႃႇၸေႃႇ သေယဝ်ႉ၊ ဢဝ်တင်းလၢပ်ႇၶႃႈၽၼ်းၶုၼ်လူင်မၼ်းပႅတ်ႈဢေႃႈ။ မိူဝ်ႈဢွၼ်တၢင်းၼၼ်ႉ၊ ဝဵင်း ႁႃႇၸေႃႇ ပဵၼ်ငဝ်ႈပဵၼ်ႁူဝ် မိူင်းၸိူဝ်းၼၼ်ႉဢေႃႈ။-

11ၶဝ်ဢဝ်ၵူၼ်းၵႃႈဢၼ်မီး ၵႃႈၼႂ်းဝဵင်းၼၼ်ႉတၢႆလူၺ်ႈၶူမ်းလၢပ်ႇၶူမ်းလႅဝ်းလႄႈ ယႃႉၽဵဝ်ႈၶဝ်ၼၼ်ႉပႅတ်ႈ မူတ်းမူတ်းသဵင်ႈသဵင်ႈဢေႃႈ။ ၶဝ်ဢမ်ႇဝႆႉႁႂ်ႈၵေႃႉဢၼ် ထူၺ်ႈၸႂ်ဢွၵ်ႇထူၺ်ႈၸႂ်ၶဝ်ႈၼၼ်ႉ လႆႈၵိုတ်းၵျၢၼ်ႇယူႇသေၵေႃႉသေၵူၼ်း။ မၼ်းဢဝ်ၽႆးတုတ်ႇဝဵင်း ႁႃႇၸေႃႇ ၼၼ်ႉပႅတ်ႈဢေႃႈ။-

12ယေႃးသူႉ တိုၵ်းဢဝ်ၵႃႈပဵၼ်ဝဵင်းၶုၼ်လူင်ၸိူဝ်းၼၼ်ႉ ဢိၵ်ႇတင်းၶုၼ်လူင်ဝဵင်းၸိူဝ်းၼၼ်ႉလႄႈ တိုၵ်းတေႃးယႃႉပႅတ်ႈၶဝ်လူၺ်ႈၶူမ်းလၢပ်ႇၶူမ်းလႅဝ်းလႄႈ ယႃႉၽဵဝ်ႈၶဝ်ပႅတ်ႈသဵင်ႈသဵင်ႈမူတ်းမူတ်းၸွမ်းၵႃႈၼင်ႇဢၼ် မူဝ်းသေႇ ၶႃႈထႃႇဝရႃႉၽြႃး ၼၼ်ႉသင်ႇလၢတ်ႈဝႆႉၼၼ်ႉဢေႃႈ။-

13ၵူၺ်းၵႃႈ ၼွၵ်ႈသေဝဵင်း ႁႃႇၸေႃႇ ၼၼ်ႉ ဝဵင်းဢၼ်တႄႇယူႇၵႃႈၼိူဝ်လွႆၼိူဝ်ၵုင်းၸိူဝ်းၼၼ်ႉၸိုင် ၵူၼ်းမဵဝ်း ဢီႉသရေႇလႃႉ တင်းလၢႆ ဢမ်ႇတုတ်ႇၽႆးပႅတ်ႈ။ ယေႃးသူႉ တုတ်ႇၽႆးပႅတ်ႈဝဵင်းၼၼ်ႉဝဵင်းလဵဝ်ၵူၺ်းဢေႃႈ။-

14ၵူၺ်းၵွမ်ႉ ဢုၵ်ႉၸႃႇၵႃႈဢၼ်ႁိမ်လႆႈဢိၵ်ႇတင်းတရိၵ်ႈသၢၼ်ႇၵႃႈတီႈဝဵင်းၸိူဝ်းၼၼ်ႉၵူၺ်း ၵူၼ်းမဵဝ်း ဢီႉသရေႇလႃႉ တင်းလၢႆ ဢွၼ်ၵၼ်သိမ်းဢဝ်ပုၼ်ႈၶဝ်ဢေႃႈ။ ၶဝ်တိုၵ်းတေႃးယႃႉပႅတ်ႈၵူၼ်းၸိူဝ်းၼၼ်ႉ တင်းသဵင်ႈတင်းလူင် လူၺ်ႈၶူမ်းလၢပ်ႇၶူမ်းလႅဝ်း တေႃႇထိုင်ႁွတ်ႈၶဝ်ယႃႉၽဵဝ်ႈၶဝ်ၼၼ်ႉပႅတ်ႈဢေႃႈ။ ၶဝ်ဢမ်ႇႁႂ်ႈၵေႃႉဢၼ်ထူၺ်ႈၸႂ်ဢွၵ်ႇထူၺ်ႈၸႂ်ၶဝ်ႈၼၼ်ႉ လႆႈၵိုတ်းၵျၢၼ်ႇဝႆႉသေၵေႃႉသေၵူၼ်း။-

15ၵႃႈၼင်ႇဢၼ်ထႃႇဝရႃႉၽြႃး သင်ႇလၢတ်ႈဝႆႉတီႈ မူဝ်းသေႇ ၶႃႈမၼ်းၸဝ်ႈၼၼ်ႉ၊ မူဝ်းသေႇ သင်ႇလၢတ်ႈဝႆႉတီႈ ယေႃးသူႉ ဢေႃႈ။ ယေႃးသူႉ ၵေႃႈႁဵတ်းၸွမ်းၸိူဝ်ႉၼင်ႇၼၼ်ဢေႃႈ။ မၼ်းဢမ်ႇဢဝ်ၵိုတ်းဝႆႉၵျၢၼ်ႇဝႆႉ လွင်ႈတၢင်းၵႃႈဢၼ်ထႃႇဝရႃႉၽြႃး သင်ႇလၢတ်ႈဝႆႉတီႈ မူဝ်းသေႇ ၼၼ်ႉ သေၸိူဝ်ႉသေဢၼ်။

16ၼင်ႇၼၼ်လႄႈ ယေႃးသူႉ သိမ်းဢဝ်မိူင်းၼၼ်ႉတင်းမိူင်းဢၼ်ဝႃႈၵႃႈၼိူဝ်ႁၢၼ်ႉလွႆ၊ ၵႃႈတီႈပွတ်းတၢင်းၸၢၼ်းၵႃႈမီး၊ မိူင်း ၵေႃးသိၼ်ႇ တင်းမိူင်း၊ ၵႃႈတႂ်ႈတီႈဢၼ်ပၢင်ႇဢၼ်ပဵင်း ၵႃႈတီႈပၢင်ႇပဵင်း ဢႃႇရၽႃႉ ၊ ၵႃႈၼိူဝ်ႁၢၼ်ႉလွႆ ဢီႉသရေႇလႃႉ ဢိၵ်ႇတင်းၵႃႈတႂ်ႈတီႈဢၼ်ပၢင်ႇဢၼ်ပဵင်းမၼ်း၊-

17ဢၼ်ဝႃႈၸႃႉၸဵမ်လွႆ ႁႃႇလိၵ်ႉ ဢၼ်မီးၼႂ်းသဵၼ်ႈတၢင်း ၸီႉရႃႉ တေႃႇထိုင်ႁွတ်ႈဝဵင်း ပႃႉလၵတ်ႉ ၊ ဢၼ်မီးၼႂ်းပၢင်ႇႁူၺ်ႈ လေႇပၼုၼ်ႇ ၵႃႈတီႈတိၼ်လွႆ ႁေႇရမုၼ်ႇ ၼၼ်ႉလႄႈ ပႄႉၼႅင်ႇၶုၼ်လူင်တင်းသဵင်ႈတင်းလူင်ၸိူဝ်းၼၼ်ႉသေယဝ်ႉ၊ ၶႃႈၽၼ်းဢဝ်ၶဝ်တၢႆပႅတ်ႈဢေႃႈ။-

18ယေႃးသူႉ လႆႈတိုၵ်းသိုၵ်းၵၼ်တင်းၶုၼ်လူင်တင်းသဵင်ႈတင်းလူင်ၸိူဝ်းၼၼ်ႉ ၶိင်ႇၵႃႇလႃႉႁိုင်ၼႃႇဢေႃႈ။-

19ၼွၵ်ႈသေၵူၼ်း ႁီႉဝီႉ ဢၼ်ဝႃႈၵူၼ်းဝဵင်း ၵီႉပွင်ႇ ၸိူဝ်းၼၼ်ႉ၊ ဝဵင်းဢၼ်ႁဵတ်းမိၵ်ႉသႃႇႁႃယႃႉ တၢင်းဢၼ်ထုၵ်ႇၵၼ်တင်းၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉ ဢမ်ႇမီးသေတီႈသေဝဵင်း။ ၶဝ်လႆႈတိုၵ်းလႆႈသိမ်းဢဝ်ဝဵင်းၵႃႈမီးတင်းသဵင်ႈတင်းလူင်ၸိူဝ်းၼၼ်ႉဢေႃႈ။-

20လွင်ႈမၼ်းၸမ်ႉ ထႃႇဝရႃႉၽြႃး မီးဢလူဝ်ႇၶႂ်ႈႁႂ်ႈႁူဝ်ၸႂ်ၶဝ် ၵႅၼ်ႇၶႅင်တေႃႇထိုင်ႁွတ်ႈ ႁႂ်ႈၶဝ်ထၼ်ႈပေႃး ႁႄႉႁပ်ႉႁႄႉတိုၵ်းၵူၼ်းမဵဝ်း ဢီႉသရေႇလႃႉ တင်းလၢႆ ႁႂ်ႈမၼ်းၸဝ်ႈလႆႈယႃႉၽဵဝ်ႈၶဝ်ပႅတ်ႈမူတ်းမူတ်းသဵင်ႈသဵင်ႈ ဢိၵ်ႇတင်းႁႂ်ႈၶဝ်ဢမ်ႇလႆႈထူပ်းၵျေးၸူးၸဝ်ႈလႄႈ မၼ်းၸဝ်ႈလႆႈပႄႇၽဵဝ်ႈၶဝ်ပႅတ်ႈၸွမ်းၵႃႈၼင်ႇဢၼ်ထႃႇဝရႃႉၽြႃး သင်ႇလၢတ်ႈဝႆႉတီႈ မူဝ်းသေႇ ၼၼ်ႉဢေႃႈ။-

21ၼႂ်းၶိင်ႇမိူဝ်ႈၼၼ်ႉ ယေႃးသူႉ ၶီႇၵႂႃႇလႄႈ ပႄႇၽဵဝ်ႈၵူၼ်း ဢႃႇၼၵႃႉ တင်းလၢႆပႅတ်ႈသေၵႃႈတီႈၼိူဝ်ႁၢၼ်ႉလွႆ၊ ၵႃႈတီႈဝဵင်း ႁေႇပြုၼ်ႇ ၊ ဝဵင်း တေႇပီႉရႃႉ ၊ ဝဵင်း ဢႃႇၼပ်ႉ ၊ ၵႃႈၼိူဝ်ႁၢၼ်ႉလွႆ ယူႉတႃႉ ၊ ဢိၵ်ႇတင်းၵႃႈၼိူဝ်ႁၢၼ်ႉလွႆ ဢီႉသရေႇလႃႉ ၵႃႈမီးၼၼ်ႉလႄႈ ယႃႉၽဵဝ်ႈၶဝ်ဢိၵ်ႇတင်းဝဵင်းၶဝ်ပႅတ်ႈ သဵင်ႈသဵင်ႈမူတ်းမူတ်းဢေႃႈ။-

22ၼွၵ်ႈသေဢၼ်ၵိုတ်းၵျၢၼ်ႇဝႆႉၵႃႈၼႂ်းဝဵင်း ၵႃႇၸႃႉ ၊ ဝဵင်း ၵႃႇသႃႉ ၊ ဝဵင်း ဢႃႇၸုတ်ႉ ၸိူဝ်းၼၼ်ႉ၊ ၵူၼ်း ဢႃႇၼၵႃႉ ဢမ်ႇၵိုတ်းဢမ်ႇၵျၢၼ်ႇဝႆႉ ၵႃႈၼႂ်းမိူင်း ဢီႉသရေႇလႃႉ သေၵေႃႉသေၵူၼ်း။-

23ၼင်ႇၼၼ်လႄႈ ယေႃးသူႉ သိမ်းဢဝ်မိူင်းၼၼ်ႉတင်းမိူင်းၸွမ်းၵႃႈၼင်ႇဢၼ် ထႃႇဝရႃႉၽြႃးမီးဢမိင်ႉတီႈ မူဝ်းသေႇ ၼၼ်ႉလႄႈ ယေႃးသူႉ မႅင်ႇၽႄပၼ်ဢမူၺ်ႇတီႈၵူၼ်းမဵဝ်း ဢီႉသရေႇလႃႉ တင်းလၢႆ ၸွမ်းလူၺ်ႈမဵဝ်းၽႂ်မဵဝ်းမၼ်းသေယဝ်ႉ၊ သိုၵ်းထၢတ်ႇယဵၼ်ၵႂႃႇသေတင်းမိူင်းဢေႃႈ။

← Chapter 10 Jump to: Chapter 12 →