Joshua 6

Shan

← Chapter 5 Jump to: Chapter 7 →

1မိူဝ်ႈၼၼ်ႉ ဝဵင်း ယေႇရီႉၶူဝ်း ဢိုတ်းႁပ်းဝႆးၼႃႇလူင်လၢင် ၵွပ်ႈပိူဝ်ႈၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉလႄႈ ၵူၼ်းဢၼ်ၶဝ်ႈၵူၼ်းဢၼ်ဢွၵ်ႇ ဢမ်ႇမီးသေၵေႃႉသေၵူၼ်း။-

2ထႃႇဝရႃႉၽြႃးလၢတ်ႈတီႈ ယေႃးသူႉ လႄႈဝႃႈ၊ တူၺ်းလူး၊ ၵဝ်ဢဝ်ဝဵင်း ယေႇရီႉၶူဝ်း ဢိၵ်ႇတင်းၶုၼ်ႁေႃၶမ်းမၼ်း တင်းၵူၼ်းသိုၵ်းဢၼ်ႁႅင်းယႂ်ႇၼႃႇၸိူဝ်းၼၼ်ႉ ဢၢပ်ႈပၼ်ၵႃႈၼႂ်းမိုဝ်းမႂ်းယဝ်ႉ။-

3ပိူဝ်ႈၼႆလႄႈ သူတၵ်းလႆႈလဵပ်ႈႁွပ်ႈဝဵင်းၼၼ်ႉလႄႈ၊ ၵူၼ်းသိုၵ်းတင်းသဵင်ႈတင်းလူင် တၵ်းလႆႈႁဵတ်းတၢင်းဢၼ်လဵပ်ႈႁွပ်ႈဝဵင်းၼၼ်ႉ ပွၵ်ႈၼိုင်ႈဢေႃႈ။ မႂ်းတၵ်းလႆႈႁဵတ်းၸိူဝ်ႉၼင်ႇၼၼ်ႁူၵ်းဝၼ်းဢေႃႈ။-

4ယိတ်ႈပရေႃးႁဵၵ်ႈၸဵတ်းၵေႃႉ တၵ်းလႆႈဢဝ်ၼႄးၶရႃႇ ယူႉပီႉလီႉ ၸဵတ်းဢၼ် ဢွၼ်ႁူဝ်တိူၵ်ႈတႃႇၸဝ်ႈၵႂႃႇဢေႃႈ။ ၵႃႈတီႈဝၼ်းသတ်ႉတမႃႉၼၼ်ႉ၊ သူတၵ်းလႆႈလဵပ်ႈႁွပ်ႈဝဵင်းၼၼ်ႉႁႂ်ႈထၼ်ႈပေႃးထူၼ်ႈထိုင်ႁွတ်ႈၸဵတ်းပွၵ်ႈလႄႈ ယိတ်ႈပရေႃးႁဵၵ်ႈၸိူဝ်းၼၼ်ႉ တၵ်းလႆႈပဝ်ႇၼႄးၶရႃႇၸိူဝ်းၼၼ်ႉဢေႃႈ။-

5မိူဝ်ႈဢၼ်ၶဝ်ဢဝ်ၼႄးၶရႃႇ ယူႉပီႉလီႉ ပဝ်ႇသဵင်ဢၼ်ယၢဝ်းၼႃႇလူင်လၢင်လႄႈ သူငိၼ်းသဵင်ၼႄးၶရႃႇၼၼ်ႉၸိုင်၊ ၵူၼ်းတင်းသဵင်ႈတင်းလူင်တၵ်းလႆႈဢွၼ်ၵၼ်ႁဵတ်းတင်းသဵင်ဢၼ်ယႂ်ႇၼႃႇလူင်လၢင်ႁွင်ႉသႅၼ်ႇလႄႈ လမ်းဝဵင်းၼၼ်ႉတၵ်းလူမ်ႉပင်းၵႂႃႇ တင်းသဵင်ႈတင်းမူတ်းဢေႃႈ။ မိူဝ်ႈၼၼ်ႉၵူၼ်းတင်းလၢႆတၵ်းလႆႈၶိုၼ်ႈၸူးၵႃႈတီႈသိုဝ်ႈၽႂ်သိုဝ်ႈမၼ်းၵူႈၵေႃႉၵူႈၵူၼ်းဢေႃႈ၊ ဝႃႈၼင်ႇၼႆဢေႃႈ။-

6ယေႃးသူႉ လုၵ်ႈၸၢႆး ၼုၼ်ႇ ႁွင်ႉဢဝ်ယိတ်ႈပရေႃးႁဵၵ်ႈတင်းလၢႆသေလႄႈ သင်ႇလၢတ်ႈလႄႈဝႃႈ၊ သူဢွၼ်ၵၼ်ႁၢပ်ႇတိူၵ်ႈတႃႇပတီႉၺိၺ်ႇၸဝ်ႈၵႂႃႇလႄႈ ႁႂ်ႈယိတ်ႈပရေႃးႁဵၵ်ႈၸဵတ်းၵေႃႉ ဢဝ်ၼႄးၶရႃႇ ယူႉပီႉလီႉ ၸဵတ်းဢၼ် ဢွၼ်ႁူဝ်တိူၵ်ႈတႃႇထႃႇဝရႃႉၽြႃးၵႂႃႇတႃႉ၊ ဝႃႈၼင်ႇၼႆဢေႃႈ။-

7တီႈၵူၼ်းတင်းလၢႆၵေႃႈ၊ ၶဝ်လၢတ်ႈလႄႈဝႃႈ၊ သူဢွၼ်ၵၼ်ၵႂႃႇလႄႇလဵပ်ႈႁွပ်ႈဝဵင်းတႃႉ။ ႁႂ်ႈၵူၼ်းဢၼ်ယိပ်းၵမ်လၢၵ်ႈၼၢၵ်ႈၸိူဝ်းၼၼ်ႉ ဢွၼ်ႁူဝ်တိူၵ်ႈတႃႇထႃႇဝရႃႉၽြႃးၵႂႃႇတႃႉ၊ ဝႃႈၼင်ႇၼႆဢေႃႈ။

8ယေႃးသူႉ သင်ႇလၢတ်ႈတီႈၵူၼ်းတင်းလၢႆၼၼ်ႉသေယဝ်ႉ၊ ယိတ်ႈပရေႃးႁဵၵ်ႈဢၼ်ဢဝ်ၼႄးၶရႃႇ ယူႉပီႉလီႉ ၸဵတ်းဢၼ် ၵႂႃႇၵႃႈတီႈၽၢႆႇၼႃႈထႃႇဝရႃႉၽြႃးၸဵတ်းၵေႃႉၼၼ်ႉ ပဝ်ႇၼႄးၶရႃႇသေလႄႈၵႂႃႇဢေႃႈ။ တိူၵ်ႈတႃႇပတီႉၺိၺ်ႇထႃႇဝရႃႉၽြႃးၼၼ်ႉ ၸွမ်းလင်ၶဝ်ၼၼ်ႉၵႂႃႇဢေႃႈ။-

9ၵူၼ်းဢၼ်ယိပ်းၵမ်လၢၵ်ႈၼၢၵ်ႈၸိူဝ်းၼၼ်ႉ ဢွၼ်ႁူဝ်ယိတ်ႈပရေႃးႁဵၵ်ႈဢၼ်ပဝ်ႇၼႄးၶရႃႇၸိူဝ်းၼၼ်ႉၵႂႃႇလႄႈ၊ ၼႂ်းမိူဝ်ႈဢၼ် ယိတ်ႈပရေႃးႁဵၵ်ႈၸိူဝ်းၼၼ်ႉပဝ်ႇၼႄးၶရႃႇယူႇသေလႄႈၵႂႃႇယူႇၼၼ်ႉၸိုင်၊ တပ်ႉဢၼ်လိုၼ်းလင်ၼၼ်ႉ ဢွၼ်ၵၼ်ၸွမ်းၵႃႈတီႈ ၽၢႆႇလင်တိူၵ်ႈတႃႇၸဝ်ႈၼၼ်ႉဢေႃႈ။-

10ယေႃးသူႉ ၵေႃႈ သင်ႇလၢတ်ႈတီႈၵူၼ်းတင်းလၢႆလႄႈဝႃႈ၊ ၼႂ်းၸူဝ်ႈဢၼ်ဢမ်ႇပႆႇႁွတ်ႈထိုင်ဝၼ်းဢၼ်ၵဝ်သင်ႇလၢတ်ႈဝႆႉ ႁႂ်ႈလႆႈႁွင်ႉသႅၼ်ႇၼၼ်ႉၸိုင်၊ သူဢမ်ႇလႆႈႁွင်ႉသႅၼ်ႇလႃးလႃး ဢမ်ႇလႆႈႁဵတ်းသဵင်သေၸိူဝ်ႉသေပိူင်လႃးလႃး။ ဢမ်ႇလႆႈလၢတ်ႈၵႂၢမ်းသေၶေႃႈသေၵမ်း။ ႁွတ်ႈထိုင်ဝၼ်းၼၼ်ႉယဝ်ႉၸင်ႇ တၵ်းလႆႈႁွင်ႉသႅၼ်ႇဢေႃႈ၊ ဝႃႈၼင်ႇၼႆဢေႃႈ။-

11ၼင်ႇၼၼ်လႄႈ မၼ်းႁႂ်ႈတိူၵ်ႈတႃႇထႃႇဝရႃႉၽြႃးၼၼ်ႉ လဵပ်ႈႁွပ်ႈဝဵင်းလႄႇၵႂႃႇၸွမ်းၵႃႈတီႈႁိမ်းမၼ်းပွၵ်ႈၼိုင်ႈသေယဝ်ႉ၊ ၶဝ်ၶိုၼ်းၶဝ်ႈၵႃႈၼႂ်းတပ်ႉလႄႈ ႁႂ်ႈပူၼ်ႉၶိုၼ်းၵႃႈၼႂ်းတပ်ႉၼၼ်ႉသေဢေႃႈ။

12ယေႃးသူႉ လုၵ်ႉၶိင်ႇၵၢင်ၼႂ်ၸဝ်ႉၸဝ်ႉလႄႈ ယိတ်ႈပရေႃးႁဵၵ်ႈၸိူဝ်းၼၼ်ႉ ဢွၼ်ၵၼ်ႁၢပ်ႇဢဝ်တိူၵ်ႈတႃႇထႃႇဝရႃႉၽြႃးဢေႃႈ။-

13ယိတ်ႈပရေႃးႁဵၵ်ႈၸဵတ်းၵေႃႉ ဢၼ်ဢဝ်ၼႄးၶရႃႇ ယူႉပီႉလီႉ ၸဵတ်းဢၼ်ၵႂႃႇ ၵႃႈတီႈၽၢႆႇၼႃႈတိူၵ်ႈတႃႇထႃႇဝရႃႉၽြႃးၸိူဝ်းၼၼ်ႉ ၵႂႃႇယူႇတိၵ်းတိၵ်းသေလႄႈ ပဝ်ႇၼႄးၶရႃႇၸိူဝ်းၼၼ်ႉဢေႃႈ။ ၵူၼ်းဢၼ်ယိပ်းၵမ်ဢဝ်လၢၵ်ႈၼၢၵ်ႈၸိူဝ်းၼၼ်ႉ ဢွၼ်ႁူဝ်ၶဝ်ၼၼ်ႉၵႂႃႇလႄႈ ၼႂ်းမိူဝ်ႈဢၼ်ယိတ်ႈပရေႃးႁဵၵ်ႈၸိူဝ်းၼၼ်ႉ ယင်းတိုၵ်ႉပဝ်ႇၼႄးၶရႃႇယူႇသေလႄႈၵႂႃႇယူႇၼၼ်ႉၸိုင်၊ တပ်ႉဢၼ်လိုၼ်းလင်ၼၼ်ႉ ဢွၼ်ၵၼ်ၸွမ်းၵႃႈတီႈၽၢႆႇလင်တိူၵ်ႈတႃႇထႃႇဝရႃႉၽြႃးဢေႃႈ။-

14ဝၼ်းတူႉတီႉယႃႉၼၼ်ႉၵေႃႈ ၶဝ်လဵပ်ႈႁွပ်ႈဝဵင်းပွၵ်ႈၼိုင်ႈလႄႈ သမ်ႉၶိုၼ်းမႃးၵႃႈၼႂ်းတပ်ႉသေဢေႃႈ။ ၶဝ်ႁဵတ်းၸိူဝ်ႉၼင်ႇၼၼ် ႁူၵ်းဝၼ်းဢေႃႈ။-

15ဝၼ်းသတ်ႉတမႃႉၼၼ်ႉ ၶဝ်လုၵ်ႉၶိင်ႇၵၢင်ၼႂ်ၸဝ်ႉၸဝ်ႉၸဵမ်မိူဝ်ႈမိူင်းၸႃႉလႅင်းလႄႈ လဵပ်ႈႁွပ်ႈဝဵင်းၼၼ်ႉမိူၼ်ၸိူဝ်ႉၼင်ႇမိူဝ်ႈဢွၼ်တၢင်းၼၼ်ႉၸဵတ်းပွၵ်ႈဢေႃႈ။ ၼႂ်းဝၼ်းၼၼ်ႉၵူၺ်း၊ ၶဝ်လႆႈလဵပ်ႈႁွပ်ႈဝဵင်းၼၼ်ႉ တေႃႇထိုင်ႁွတ်ႈၸဵတ်းပွၵ်ႈဢေႃႈ။-

16ၼႂ်းပွၵ်ႈသတ်ႉတမႃႉၼၼ်ႉ၊ မိူဝ်ႈဢၼ်ယိတ်ႈပရေႃးႁဵၵ်ႈၸိူဝ်းၼၼ်ႉ ပဝ်ႇၼႄးၶရႃႇၸိူဝ်းၼၼ်ႉၸိုင် ယေႃးသူႉ သင်ႇလၢတ်ႈတီႈၵူၼ်းတင်းလၢႆလႄႈဝႃႈ၊ ဢွၼ်ၵၼ်ႁွင်ႉသႅၼ်ႇတႃႉ။ ထႃႇဝရႃႉၽြႃးပၼ်ဝဵင်းတီႈသူယဝ်ႉ။-

17ဝဵင်းဢိၵ်ႇတင်းၵႃႈဢၼ်မီးၼႂ်းမၼ်းတၵ်းလႆႈၶၢမ်ႇတၢင်းဢၼ်ၵိၼ်ႇဢၼ်ဝႃႈလႄႈ ဢဝ်ဢၢပ်ႈပၼ်တီႈထႃႇဝရႃႉၽြႃးဢေႃႈ။ ၵူၺ်းၵွမ်ႉ မႄႈမွၵ်ႇယႃႈ ရႃႇၶပ်ႉ ဢိၵ်ႇတင်းၵႃႈဢၼ်မီးလူၺ်ႈၵၼ်တင်းမၼ်း ၵႃႈၼႂ်းႁိူၼ်းမၼ်းၼၼ်ႉၵူၺ်း တၵ်းလႆႈၵတ်းယဵၼ်ၶျၢမ်းသႃႇ ၵွပ်ႈပိူဝ်ႈဢၼ်မၼ်းဢဝ်တမၢၼ်ႇၵူၼ်းၸႂ်ႉ ဢၼ်ႁဝ်းပွႆႇၸႂ်ႉၸိူဝ်းၼၼ်ႉ သိူင်ႇမႅပ်ႉဝႆႉၼၼ်ႉဢေႃႈ။-

18သူဢွၼ်ၵၼ်ႁဵတ်းတၢင်းသတီႉသေလႄႈ ဝႄႈပႅတ်ႈလွင်ႈတၢင်းဢၼ်ထုၵ်ႇၵိၼ်ႇထုၵ်ႇဝႃႈတႃႉ။ ပေႃးဢမ်ႇၼၼ် ၵူဝ်မိူဝ်ႈဢၼ် သူႁဵတ်းႁႂ်ႈမၼ်းၶၢမ်ႇတၢင်းဢၼ်ၵိၼ်ႇဢၼ်ဝႃႈယဝ်ႉၼၼ်ႉ၊ သူတၵ်းသိမ်းဢဝ်လွင်ႈတၢင်းဢၼ်ထုၵ်ႇၵိၼ်ႇထုၵ်ႇဝႃႈၼၼ်ႉသေလႄႈ ႁႂ်ႈတပ်ႉ ဢီႉသရေႇလႃႉ လႆႈၶၢမ်ႇတၢင်းဢၼ်ၵိၼ်ႇဢၼ်ဝႃႈၼၼ်ႉလႄႈ ယႃႉယူၵ်ႉမၼ်းဢေႃႈ။-

19ငိုၼ်းၶမ်း၊ ၶိူင်ႈတွင်းလိူင်၊ ၶိူင်ႈလဵၵ်းၵႃႈမီးၼၼ်ႉ ပဵၼ်ဢၼ်မူတ်းၸၢင်ႇပုၼ်ႈထႃႇဝရႃႉၽြႃးလႄႈ တၵ်းလႆႈဢွၼ်ၵၼ်ဢဝ်သႂၢင်းသႂ်ႇဝႆႉ ၵႃႈၼႂ်းၽၼ်ႇတႃႇၸဝ်ႈဢေႃႈ၊ ဝႃႈၼင်ႇၼႆဢေႃႈ။

20ၼင်ႇၼၼ်လႄႈ ၵူၼ်းတင်းလၢႆဢွၼ်ၵၼ်ႁွင်ႉသႅၼ်ႇလႄႈ ယိတ်ႈပရေႃးႁဵၵ်ႈၸိူဝ်းၼၼ်ႉၵေႃႈပဝ်ႇၼႄးၶရႃႇၸိူဝ်းၼၼ်ႉဢေႃႈ။ မိူဝ်ႈဢၼ်ၵူၼ်းတင်းလၢႆ ငိၼ်းသဵင်ၼႄးၶရႃႇၼၼ်ႉၸိုင် ၵူၼ်းတင်းလၢႆႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇလႄႈ လမ်းဝဵင်းၼၼ်ႉလူမ်ႉပင်းၵႂႃႇတင်းသဵင်ႈတင်းမူတ်း တေႃႇထိုင်ႁွတ်ႈထၼ်ႈပေႃးၵူၼ်းတင်းလၢႆလႆႈၶိုၼ်ႈၸူးၵႃႈၼႂ်းဝဵင်းၼၼ်ႉ ၵႃႈတီႈသိုဝ်ႈၽႂ်သိုဝ်ႈမၼ်းၵူႈၵေႃႉၵူႈၵူၼ်းလႄႈ သိမ်းဢဝ်ဝဵင်းၼၼ်ႉဢေႃႈ။-

21ၶဝ်ဢဝ်ၵႃႈဢၼ်မီးၵႃႈၼႂ်းဝဵင်းၼၼ်ႉ ဢၼ်ဝႃႈၵူၼ်းယိင်းၵူၼ်းၸၢႆး၊ လဵၵ်ႉလဵၵ်ႉ၊ ယႂ်ႇယႂ်ႇ၊ သူဝ်း၊ ဝူဝ်း၊ လီႈ ၼၼ်ႉသေလႄႈ ယႃႉပႅတ်ႈလူၺ်ႈၶူမ်းလၢပ်ႇၶူမ်းလႅဝ်း တင်းသဵင်ႈတင်းမူတ်းဢေႃႈ။-

22ယေႃးသူႉ သင်ႇလၢတ်ႈတီႈသွင်ၶႃ ဢၼ်ၵႂႃႇလွမ်တူၺ်းမိူင်းၼၼ်ႉလႄႈဝႃႈ၊ ၵႃႈၼင်ႇဢၼ်သွင်ၶိူဝ်လႆႈၵိၼ်ႇဝႃႈဝႆႉၼၼ်ႉ၊ သွင်ၶိူဝ်ၵႂႃႇၵႃႈၼႂ်းႁိူၼ်းမႄႈမွၵ်ႇယႃႈၼၼ်ႉသေလႄႈ ဢဝ်မႄႈယိင်းၼၼ်ႉဢိၵ်ႇတင်း ၵႃႈဢၼ်မီးတီႈမၼ်းၼၼ်ႉဢွၵ်ႇမႃးတႃႉ၊ ဝႃႈၼင်ႇၼႆလႄႈ၊-

23ၵူၼ်းဢွၼ်ႇဢၼ်ပဵၼ်ၶဵဝ်လွတ်ႈၽၢႆႇၼႂ်းၸိူဝ်းၼၼ်ႉ ၶဝ်ႈၵႂႃႇလႄႈဢဝ် ရႃႇၶပ်ႉ ဢိၵ်ႇတင်းပေႃႈမၼ်း၊ မႄႈမၼ်း၊ ပီႈၸၢႆးၼွင်ႉၸၢႆးမၼ်း၊ ၵႃႈဢၼ်မီးတီႈမၼ်းၸိူဝ်းၼၼ်ႉဢွၵ်ႇမႃးဢေႃႈ။ ပီႈၼွင်ႉၸိူဝ်ႉၶိူဝ်းမၼ်းၵႃႈမီးၵေႃႈ ၶဝ်ဢဝ်ဢွၵ်ႇမႃးလႄႈဝႆႉၵႃႈတီႈၼွၵ်ႈတပ်ႉ ဢီႉသရေႇလႃႉ သေယဝ်ႉ၊-

24ဢဝ်ၽႆးတုတ်ႇဝဵင်းဢိၵ်ႇတင်းၵႃႈဢၼ်မီးၵႃႈၼႂ်းဝဵင်းၼၼ်ႉပႅတ်ႈဢေႃႈ။ ၵူၺ်းၵႃႈ ငိုၼ်းၶမ်း၊ ၶိူင်ႈတွင်းလိူင်၊ ၶိူင်ႈလဵၵ်းၸိူဝ်းၼၼ်ႉၸိုင်၊ ၶဝ်ဢဝ်သႂၢင်းသႂ်ႇဝႆႉၵႃႈၼႂ်းၽၼ်ႇတႃႇထႃႇဝရႃႉၽြႃးဢေႃႈ။-

25ယေႃးသူႉ ပၼ်ဢသၢၵ်ႈ မႄႈမွၵ်ႇယႃႈ ရႃႇၶပ်ႉ ဢိၵ်ႇတင်းၵူၼ်းႁိူၼ်းၵူၼ်းယေး ပေႃႈမၼ်းတင်းၵႃႈဢၼ်မီးတီႈမၼ်းၸိူဝ်းၼၼ်ႉ ၵတ်းယဵၼ်ၶျၢမ်းသႃႇဢေႃႈ။ မၼ်းၼၼ်ႉလႆႈယူႇၵႃႈၼႂ်းၵူၼ်းမဵဝ်း ဢီႉသရေႇလႃႉ တင်းလၢႆ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။ လွင်ႈမၼ်းၸမ်ႉ ပဵၼ်ၵွပ်ႈပိူဝ်ႈဢၼ်မၼ်းဢဝ်တမၢၼ်ႇၵူၼ်းၸႂ်ႉ ဢၼ် ယေႃးသူႉ ပွႆႇၸႂ်ႉၵႂႃႇ ႁႂ်ႈလႆႈလွမ်တူၺ်းဝဵင်း ယေႇရီႉၶူဝ်း ၸိူဝ်းၼၼ်ႉ သိူင်ႇမႅပ်ႉဝႆႉၼၼ်ႉဢေႃႈ။-

26မိူဝ်ႈၼၼ်ႉ ယေႃးသူႉ ႁဵတ်းတၢင်းဢၼ်ၵိၼ်ႇဝႃႈလႄႈ လၢတ်ႈတီႈၶဝ်လႄႈဝႃႈ၊ ႁႂ်ႈၵေႃႉဢၼ်လုၵ်ႉလႄႈ ၶိုၼ်းတႄႇႁဵတ်းဝဵင်း ယေႇရီႉၶူဝ်း ၼႆႉၼၼ်ႉ ပဵၼ်ၵေႃႉဢၼ်ထုၵ်ႇၵိၼ်ႇထုၵ်ႇဝႃႈ ၵႃႈတီႈၽၢႆႇၼႃႈထႃႇဝရႃႉၽြႃးသေၵမ်းလူၺ်ႈ။ မၼ်းၼၼ်ႉတၵ်းသုမ်းၸွမ်းလုၵ်ႈၸၢႆးတူၼ်ႈမၼ်း တႄႇႁဵတ်းငဝ်ႈႁၢၵ်ႈလမ်းဝဵင်းလႄႈ တၵ်းသုမ်းၸွမ်းလုၵ်ႈၸၢႆးလိုၼ်းမၼ်းသေလႄႈ ပူၵ်းတင်ႈၽၵ်းတူဝဵင်းဢေႃႈ၊ ဝႃႈၼင်ႇၼႆဢေႃႈ။-

27ၼင်ႇၼၼ်လႄႈ ထႃႇဝရႃႉၽြႃးမီးယူႇလူၺ်ႈၵၼ်တင်း ယေႃးသူႉ လႄႈ သတၢင်းသဵင်ၶၢဝ်ႇမၼ်းၼၼ်ႉႁူင်ႁၢင်းၸွတ်ႇတူဝ်ႈၵႂႃႇ တင်းဝၢၼ်ႈတင်းမိူင်းဢေႃႈ။

← Chapter 5 Jump to: Chapter 7 →