Revelation 1

Shan

Jump to: Chapter 2 →

1ပျႃႇတိၵ်ႈ ယေႇသူႉၶရိၸ်ႈ ဢၼ်ၽြႃးပဵၼ်ၸဝ်ႈ ဢၢပ်ႈပၼ်တီႈမၼ်းၸဝ်ႈ ပုၼ်ႈလွင်ႈၼင်ႇႁိုဝ် မၼ်းၸဝ်ႈတၵ်းလႆႈၼႄပျႃး လွင်ႈတၢင်းဢၼ်တၵ်းလႆႈပဵၼ်မႃးၼႂ်း ၶိင်ႇၵႃႇလႃႉဢမ်ႇႁိုင်ဢမ်ႇၼၢၼ်းၼၼ်ႉ တီႈၶႃႈမၼ်းၸဝ်ႈတင်းလၢႆၼၼ်ႉၸိုင် တၵ်းဝႃႈလူးၵွၼ်ႇဢေႃႈ။ မၼ်းၸဝ်ႈၼၼ်ႉ ပွႆႇၸႂ်ႉတမၢၼ်ႇၵၢင်ႁၢဝ်မၼ်းၸဝ်ႈမႃးလႄႈ ၼႄပျႃးသၢႆငၢႆပျႃႇတိၵ်ႈၸဝ်ႈတီႈ ယူဝ်းႁၢၼ်ႇ ဢၼ်ပဵၼ်ၶႃႈမၼ်းၸဝ်ႈ၊-

2ဢၼ်ၶၢမ်ႇသၢၵ်ႈသေႇ လွင်ႈၼုၵ်ႈၵပၢတ်ႈၽြႃးပဵၼ်ၸဝ်ႈ ဢိၵ်ႇတင်းလွင်ႈတၢင်းဢၼ် ၶၢမ်ႇသၢၵ်ႈသေႇ ယေႇသူႉၶရိၸ်ႈ ၼၼ်ႉ ၸွမ်းၵႃႈၼင်ႇဢၼ် မၼ်းလႆႈႁၼ်ၼၼ်ႉဢေႃႈ။-

3ပိူဝ်ႈဢၼ်ၶိင်ႇၵႃႇလႃႉၸမ်တၵ်းႁွတ်ႈထိုင်လႄႈ ၶဝ်ၸိူဝ်းဢၼ်လူတူၺ်းၽတ်းဢၢၼ်ႇ ၵႂၢမ်းဢၼႃႇၵၢတ်ႈတီႉၸိူဝ်းၼႆႉသေလႄႈ ထွမ်ႇဢဝ်ပႂ်ႉၵမ်ပႂ်ႉၵျၢင်ႉၸွမ်း ၵႃႈၼင်ႇဢၼ် တႅမ်ႈဝႆႉၼၼ်ႉ မီးမင်ႇၵလႃႇဢေႃႈ။

4ၵဝ် ယူဝ်းႁၢၼ်ႇ ပၼ်ငိၼ်းၵႂႃႇတီႈၸိူဝ်းၸဝ်ႈၸဵတ်းပႃး၊ ဢၼ်မီးယူႇၵႃႈၼႂ်းမိူင်း ဢႃႇသီႉ ၼၼ်ႉၶႃႈဢေႃႈ။ ႁႂ်ႈၵျေးၸူး ဢိၵ်ႇတင်းတၢင်းၼိမ်ဢၼ်ပဵၼ်မႃးၵႃႈတီႈ ၽြႃးပဵၼ်ၸဝ်ႈ ဢၼ်မီးယူႇၼႂ်း ပိတ်ႈၸုၵ်ႈပၢၼ်ႇ၊ ဢတိၵ်ႈ၊ ဢၼႃႇၵၢတ်ႈၵႃႇလႃႉ သေႇသေႇၼၼ်ႉ ဢိၵ်ႇတင်း ၵႃႈတီႈဝီႉၺိၺ်ႇၸဵတ်းပႃး ဢၼ်မီးယူႇၵႃႈတီႈၽၢႆႇၼႃႈပလၢင်ႇၸဝ်ႈၼၼ်ႉ၊-

5တင်းၵႃႈတီႈ ယေႇသူႉၶရိၸ်ႈ ဢၼ်ပဵၼ်ၸဝ်ႈ ဢၼ်ၶၢမ်ႇသၢၵ်ႈသေႇ၊ ဢၼ်ပႂ်ႉသဵတ်ႈၸႃႇ၊ ဢၼ်ပဵၼ်လုၵ်ႈတူၼ်ႈၼႂ်းၶဝ်ၸိူဝ်းဢၼ်တၢႆယဝ်ႉ၊ ဢၼ်ပဵၼ်ပၢႆၸိၵ်းၸွမ် ၶုၼ်ႁေႃၶမ်းလေႃးၵီႇတင်းလၢႆၼၼ်ႉ မီးၼိူဝ်သူသေၵမ်းလူၺ်ႈ။ ႁႂ်ႈၸဝ်ႈဢၼ်ႁၵ်ႉႁဝ်းလႄႈ ဢဝ်တင်းလိူတ်ႈမၼ်းၸဝ်ႈသုၵ်ႈပွတ်ႈဢပႅတ်ႈႁဝ်းလႄႈ-

6ဢဝ်ႁဝ်းၶၢၼ်းဝႆႉၵႃႈၼႂ်း ဢရႃႇၶုၼ်ႁေႃၶမ်း ဢိၵ်ႇတင်းၵႃႈၼႂ်း ဢရႃႇယိတ်ႈပရေႃးႁဵၵ်ႈၵႃႈတီႈၽၢႆႇၼႃႈ ပေႃႈမၼ်းၸဝ်ႈၽြႃးပဵၼ်ၸဝ်ႈၼၼ်ႉ မီးမုၼ်သရေႇ၊ ဢႃႇၼႃႇၸၢၵ်ႈ ၵူႈၵမ်ႇၽႃႇ သိုပ်ႇသိုပ်ႇတၢမ်းတၢမ်း သေၵမ်းလူၺ်ႈ။ ဢႃႇမိၼ်ႇ။

7တူၺ်းလူး၊ မၼ်းၸဝ်ႈတၵ်းမႃး ဢိၵ်ႇလူၺ်ႈၵၼ်တင်းမွၵ်ႇၵုမ်ႈလႄႈ ၶဝ်ၸိူဝ်းဢၼ်တႅင်းသႂ်ႇမၼ်းၸဝ်ႈ ဢိၵ်ႇတင်းမၢၵ်ႇတႃၵူၼ်း ၵႃႈမီးတင်းသဵင်ႈတင်းလူင် တၵ်းလႆႈတူၺ်းႁၼ်မၼ်းၸဝ်ႈ ၼၼ်ႉဢေႃႈ။ ၵူၼ်းၵႃႈၼိူဝ်လိၼ်မိူင်းၵႃႈမီး ၵူႈၸိူဝ်ႉၵူႈၶိူဝ်း တၵ်းလႆႈႁႆႈ လႆႈႁွင်ႉ လႆႈပွင်ႉလႆႈၶၢင်း ၵွပ်ႈပိူဝ်ႈမၼ်းၸဝ်ႈၼၼ်ႉဢေႃႈ။ ၸိုဝ်ႈၸႂ်ႈတႄႉတႄႉဢေႃႈ။ ဢႃႇမိၼ်ႇ။

8ၵဝ်ပဵၼ် ဢႃႇလႃႇၽႃႉ ဢေႃႈ။ ဢေႃးမေႇၵႃႉ ၵေႃႈ ပဵၼ်ဢေႃႈဝႃႈၼႆ၊ ထႃႇဝရႃႉၸဝ်ႈၽြႃးပဵၼ်ၸဝ်ႈ၊ ဢၼ်မီးယူႇ ပိတ်ႈၸုၵ်ႈပၢၼ်ႇ၊ ဢတိၵ်ႈ၊ ဢၼႃႇၵၢတ်ႈၵႃႇလႃႉ သေႇသေႇလႄႈ ပျေႉၸုမ်ႇတင်း ဢၼၼ်ႇတႃႉတၼ်းၶူဝ်းၼၼ်ႉ မီးဢမိင်ႉဢေႃႈ။

9ၼႂ်းမိူဝ်ႈဢၼ်ၵဝ် ယူဝ်းႁၢၼ်ႇ ဢၼ်ပဵၼ်ပီႈသူ၊ ဢၼ်ပဵၼ်ၵေႃႉသေႈ ဢၼ်သိူၵ်ႈသမ်ႇလူၺ်ႈၵၼ်တင်းသူ ၼႂ်းၸႃႉၸဵမ်တုၵ်ႉၶႃႉတၢင်းၽၢၼ် ယေႇသူႉ ဢိၵ်ႇတင်း မိူင်းၸဝ်ႈ တင်းတၢင်းဢၼ်မၼ်းၸဝ်ႈယိူၼ်ႉၶၢမ်ႇၼၼ်ႉၼႆႉ မီးယူႇၵႃႈၼႂ်းၵုၼ် ပတ်ႉမူႉ ၊ ၵွပ်ႈပိူဝ်ႈ ၼုၵ်ႈၵပၢတ်ႈတြႃးၽြႃးပဵၼ်ၸဝ်ႈ ဢိၵ်ႇတင်း လွင်ႈတၢင်းဢၼ်ၶၢမ်ႇသၢၵ်ႈသေႇ ယေႇသူႉၶရိၸ်ႈ ၼၼ်ႉၸိုင်၊-

10လႆႈၶၢမ်ႇဢဝ် ဝီႉၺိၺ်ႇၸဝ်ႈ ၼႂ်းဝၼ်းၸဝ်ႈၽြႃးလႄႈ ငိၼ်းသဵင်ဢၼ်ယႂ်ႇၼႃႇမေႃးမႃးၵႃႈတီႈ ၽၢႆႇလင်ၵဝ် မိူၼ်ၸိူဝ်ႉၼင်ႇ သဵင်ၼႄးၶရႃႇၼၼ်ႉဢေႃႈ။-

11သဵင်ဢၼ်မေႃးမႃးၼၼ်ႉဝႃႈၸမ်ႉ တႅမ်ႈလွင်ႈတၢင်းဢၼ် မႂ်းႁၼ်ၼႆႉဝႆႉ ၼႂ်းၽိုၼ်လိၵ်ႈသေလႄႈ ပၼ်ၵႂႃႇၵႃႈတီႈ ၸိူဝ်းၸဝ်ႈၸဵတ်းပႃး ဢၼ်မီးယူႇၵႃႈၼႂ်းဝဵင်း ဢေးၽႅတ်ႈ ၊ ဝဵင်း သမိူဝ်ႇၼႃႉ ၊ ဝဵင်း ပေႇရၵမ်ႇ ၊ ဝဵင်း သႂႃႇတီႉရႃႉ ၊ ဝဵင်း သႃႇတီႉ ၊ ဝဵင်း ၽီႉလတေးလၽီႉ ၊ ဝဵင်း လေႃးတီႉၵီႉ ၸိူဝ်းၼၼ်ႉတႃႉ၊ ဝႃႈၼင်ႇၼႆဢေႃႈ။

12ၼင်ႇႁိုဝ်တၵ်းလႆႈႁၼ် ၵေႃႉဢၼ်ႁဵတ်းသဵင်မေႃးသေလႄႈ လၢတ်ႈၵႂၢမ်းတေႃႇၵၼ်တင်းၵဝ် ၸိူဝ်ႉၼင်ႇၼၼ်ၼၼ်ႉၸိုင် ၵဝ်ဝၢႆႇတူၺ်းဢေႃႈ။ ဝၢႆႇတူၺ်းသေယဝ်ႉ ၵဝ်လႆႈႁၼ်ၶူင်ႇတီႈတႆႈၽႆးၶမ်း၊ ၸဵတ်းဢၼ်-

13ဢိၵ်ႇတင်းၵေႃႉဢၼ်မိူၼ်ၸိူဝ်ႉၼင်ႇလုၵ်ႈၵူၼ်းၼၼ်ႉ၊ ၵေႃႉၼိုင်ႈ၊ ၵႃႈတီႈၼႂ်းၶိုင်ႈၵၢင်ၶူင်ႇတီႈတႆႈၽႆးၸဵတ်းဢၼ်ၼၼ်ႉဢေႃႈ။ ၵေႃႉၼၼ်ႉ ၼုင်ႈၶူဝ်းႁူမ်ႇသုမ်ႇလူင်း တေႃႇထိုင်ႁွတ်ႈၵႃႈတီႈတိၼ်လႄႈ ဢဝ်သၢႆဢႅဝ်ၶမ်း၊ ႁတ်ႉၵႃႈတီႈဢူၵ်းယူႇဢေႃႈ။-

14ႁူဝ်မၼ်းၸဝ်ႈ ဢိၵ်ႇတင်းၶူၼ်ႁူဝ်မၼ်းၸဝ်ႈၼၼ်ႉ ၶၢဝ်ဝႆႉမိူၼ်ၸိူဝ်ႉၼင်ႇၶူၼ်သူဝ်း၊ ဢၼ်ၶၢဝ်ၼၼ်ႉ ဢိၵ်ႇတင်း မိူၼ်ၸိူဝ်ႉၼင်ႇမူၺ်ႁႃႇ ၼၼ်ႉဢေႃႈ။ မၢၵ်ႇတႃမၼ်းၸဝ်ႈၵေႃႈ ပဵၼ်ၸိူဝ်ႉၼင်ႇပဵဝ်ၽႆးဢေႃႈ။-

15တိၼ်မၼ်းၸဝ်ႈၵေႃႈ မိူၼ်ၸိူဝ်ႉၼင်ႇတွင်းလိူင်ၸႅတ်ႈၸႅတ်ႈ ဢၼ်ဢဝ်ၵႃႈၼႂ်းၽႆးၼၼ်ႉဢေႃႈ။ သဵင်မၼ်းၵေႃႈ မိူၼ်ၸိူဝ်ႉၼင်ႇ သဵင်ၼမ်ႉသမ်ႇမုၵ်ႉတြႃႇဢေႃႈ။-

16မိုဝ်းၶွၼ်ၶႂႃမၼ်းၸဝ်ႈၵေႃႈ ယိပ်းၵမ်လၢဝ် ၸဵတ်းလုၵ်ႈယူႇဢေႃႈ။ ၵႃႈၼႂ်းသူပ်းမၼ်းၸဝ်ႈၵေႃႈ လၢပ်ႇသၢၼ်ႇလျၢၵ်ႉ ဢၼ်မီးၶူမ်းသွင်ၽၢႆႇ ဢၼ်ၽၢႆၼႃႇၼၼ်ႉ ဢွၵ်ႇယူႇဢေႃႈ။ ၼႃႈမၼ်းၸဝ်ႈၵေႃႈ ပဵၼ်ၸိူဝ်ႉၼင်ႇၵၢင်ဝၼ်း ဢၼ်ပႃးတင်းဢႁုင်ႇတၼ်းၶူဝ်းသေလႄႈ ႁိူဝ်ႈလႅင်းၼၼ်ႉဢေႃႈ။

17မိူဝ်ႈဢၼ်ၵဝ်ႁၼ်မၼ်းၸဝ်ႈၼၼ်ႉၸိုင် ၵဝ်ပဵၼ်ၸိူဝ်ႉၼင်ႇ ႁၢင်ႈတၵ်းတၢႆလႄႈ လူမ်ႉယူႇၵႃႈတီႈႁိမ်းတိၼ်မၼ်းၸဝ်ႈဢေႃႈ။ မၼ်းၸဝ်ႈၼၼ်ႉဢဝ်တင်းမိုဝ်းၶွၼ်ၶႂႃမၼ်းၸဝ်ႈ တၢင်ႇသႂ်ႇၵႃႈၼိူဝ်ၵဝ်ယူႇသေလႄႈဝႃႈ၊ ယႃႇပေမီးတၢင်းဢၼ်ၵူဝ်ဢၼ်ႁႄ၊ ၵဝ်ပဵၼ်ၵေႃႉဢၼ်ဢွၼ်တၢင်း ဢိၵ်ႇတင်း ၵေႃႉဢၼ်လိုၼ်းလင်သုတ်းဢေႃႈ။-

18ၵေႃႉဢၼ်ဢသၢၵ်ႈလိပ်းၵေႃႈ ပဵၼ်ဢေႃႈ။ ၵဝ်လႆႈတၢႆယဝ်ႉလႄႈ၊ တူၺ်းလူး၊ ၵဝ်ပျေႉၸုမ်ႇတင်းဢသၢၵ်ႈယူႇ၊ ၵူႈၵမ်ႇၽႃႇ သိုပ်ႇသိုပ်ႇတၢမ်းတၢမ်းဢေႃႈ။ ၵဝ်ဢုပ်ႉပိူင်ႇမရၼႃႉ တင်းမိူင်းမရၼႃႉဢေႃႈ။-

19ပိူဝ်ႈၼႆလႄႈ တႅမ်ႈလွင်ႈတၢင်းဢၼ်မႂ်းႁၼ်ယဝ်ႉၼၼ်ႉ ဢိၵ်ႇတင်းလွင်ႈတၢင်းဢၼ် မီးယူႇတေႃႈလဵဝ်ၼႆႉ တင်းလွင်ႈတၢင်းဢၼ်တၵ်းပဵၼ်မႃး ၵမ်းလိုၼ်း ၸိူဝ်းၼၼ်ႉဝႆႉတႃႉ။-

20တၢင်းဢၼ်လိုၵ်ႉဢၼ်လမ်ႇ လၢဝ်ၸဵတ်းလုၵ်ႈ ဢၼ်မီးယူႇၵႃႈၼႂ်းမိုဝ်းၶွၼ်ၶႂႃၵဝ် ဢိၵ်ႇတင်းၶူင်ႇတီႈတႆႈၽႆးၶမ်းၸဵတ်းဢၼ်ၼႆႉၸမ်ႉ ၶူင်ႇတီႈတႆႈၽႆးၶမ်းၸဵတ်းဢၼ်ၼႆႉ ပဵၼ်ၸိူဝ်းၸဝ်ႈၸဵတ်းပႃးဢေႃႈ။ လၢဝ်ၸဵတ်းလုၵ်ႈၵေႃႈ ပဵၼ်တမၢၼ်ႇဢၼ်ဢုပ်ႉၸိူဝ်းၸဝ်ႈ ၸဵတ်းပႃးၼၼ်ႉဢေႃႈ။

Jump to: Chapter 2 →