Revelation 7

Shan

← Chapter 6 Jump to: Chapter 8 →

1ဝၢႆးၼၼ်ႉ ၵဝ်ႁၼ်တမၢၼ်ႇၵၢင်ႁၢဝ် သီႇပႃး ယိပ်းၵမ်လူမ်း ဢၼ်မီးၵႃႈၼိူဝ်လိၼ်မိူင်းသီႇၼႃႈယူႇသေလႄႈ ၸုၵ်းယူႇသီႇၼႃႈၼၼ်ႉ ႁႂ်ႈလူမ်းဢမ်ႇလႆႈထူဝ်းမႃးၵႃႈတီႈလိၼ်မိူင်း ဢိၵ်ႇတင်းပၢင်ႇလၢႆႇ တင်းတူၼ်ႈမႆႉတင်းလၢႆဢေႃႈ။-

2ၵဝ်ႁၼ်တမၢၼ်ႇၵၢင်ႁၢဝ်ပႃးၼိုင်ႈ ဢၼ်ပႃးဢဝ်တင်း တၼ်းသိၵ်ႈၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉ လုၵ်ႉသေၵႃႈတီႈၼႃႈတၢင်းဢွၵ်ႇ ၶိုၼ်ႈမႃးဢေႃႈ။ မၼ်းၼၼ်ႉၵေႃႈ ႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇတီႈ တမၢၼ်ႇၵၢင်ႁၢဝ်သီႇပႃး ဢၼ်လႆႈဢၶႂၢင်ႉတၢင်းဢၼ်ၼိၵ်ႈၸၢၵ်ႈငႅၼ်းသႄးလိၼ် ဢိၵ်ႇတင်းပၢင်ႇလၢႆႇၼၼ်ႉလႄႈဝႃႈ၊-

3ၸူဝ်ႈဢၼ်ႁဝ်းဢမ်ႇပႆႇတွၵ်ႇတၼ်းသိၵ်ႈ ၵႃႈတီႈၼႃႈၽၢၵ်ႇၶႃႈ ၽြႃးပဵၼ်ၸဝ်ႈတင်းလၢႆၼၼ်ႉၸိုင်၊ ယႃႇပေၼိၵ်ႈၸၢၵ်ႈငႅၼ်းသႄး လိၼ်ဢိၵ်ႇတင်းပၢင်ႇလၢႆႇ တင်းတူၼ်ႈမႆႉတင်းလၢႆသေၵမ်း၊ ဝႃႈၼင်ႇၼႆဢေႃႈ။-

4ၵဝ်ငိၼ်းတၢင်းဢၼ်ၼပ်ႉဢၼ်ဢၢၼ်ႇၶဝ်ၸိူဝ်းဢၼ်လႆႈၶၢမ်ႇ တၢင်းဢၼ်တွၵ်ႇတၼ်းသိၵ်ႈၼၼ်ႉလႄႈ ၵႃႈၼႂ်းၵူၼ်း ဢီႉသရေႇလႃႉ တင်းလၢႆ၊ ၵႃႈတီႈမဵဝ်းႁင်းၽႂ်ႁင်းမၼ်းၼၼ်ႉ ၵူၼ်း သႅၼ်ၼိုင်ႈပၢႆသီႇမိုၼ်ႇပၢႆသီႇႁဵင် လႆႈၶၢမ်ႇတၢင်းဢၼ် တွၵ်ႇတၼ်းသိၵ်ႈဝႆႉဢေႃႈ။-

5ၵႃႈၼႂ်းမဵဝ်း ယူႉတႃႉ မိုၼ်ႇၼိုင်ႈပၢႆသွင်ႁဵင်၊ ၵႃႈၼႂ်းမဵဝ်း ရူႉပိၼ်ႇ မိုၼ်ႇၼိုင်ႈပၢႆသွင်ႁဵင်၊ ၵႃႈၼႂ်းမဵဝ်း ၵၢတ်ႉ မိုၼ်ႇၼိုင်ႈပၢႆသွင်ႁဵင်၊-

6ၵႃႈၼႂ်းမဵဝ်း ဢႃႇသႃႇ မိုၼ်ႇၼိုင်ႈပၢႆသွင်ႁဵင်၊ ၵႃႈၼႂ်းမဵဝ်း ၼပ်ႉထလီႉ မိုၼ်ႇၼိုင်ႈပၢႆသွင်ႁဵင်၊ ၵႃႈၼႂ်းမဵဝ်း မၼႃႇသေႇ မိုၼ်ႇၼိုင်ႈပၢႆသွင်ႁဵင်၊-

7ၵႃႈၼႂ်းမဵဝ်း သီႉမုၼ်ႇ မိုၼ်ႇၼိုင်ႈပၢႆသွင်ႁဵင်၊ ၵႃႈၼႂ်းမဵဝ်း လေႇဝီႉ မိုၼ်ႇၼိုင်ႈပၢႆသွင်ႁဵင်၊ ၵႃႈၼႂ်းမဵဝ်း ဢီႉသၶႃႇ မိုၼ်ႇၼိုင်ႈပၢႆသွင်ႁဵင်၊-

8ၵႃႈၼႂ်းမဵဝ်း ၸေႇပူႉလုၼ်ႇ မိုၼ်ႇၼိုင်ႈပၢႆသွင်ႁဵင်၊ ၵႃႈၼႂ်းမဵဝ်း ယူဝ်းသႅပ်ႈ မိုၼ်ႇၼိုင်ႈပၢႆသွင်ႁဵင်၊ ၵႃႈၼႂ်းမဵဝ်း ပိၼ်ႇယႃႇမိၼ်ႇ မိုၼ်ႇၼိုင်ႈပၢႆသွင်ႁဵင်၊ ၸိူဝ်းၼၼ်ႉလႆႈၶၢမ်ႇတၢင်းဢၼ်တွၵ်ႇတၼ်းသိၵ်ႈဝႆႉဢေႃႈ။

9လိုၼ်းၼၼ်ႉ ၵဝ်တူၺ်းလႄႈႁၼ်ၵူၼ်းၼမ်ၼႃႇ ဢၼ်ၽူႈလႂ်ဢမ်ႇၼပ်ႉဢမ်ႇဢၢၼ်ႇလႆႈ ဢၼ်ဢွၵ်ႇသေၵႃႈၼႂ်းၵူၼ်းၵူႈၸိူဝ်ႉၵူႈၶိူဝ်း ဢၼ်လၢတ်ႈၵႂၢမ်းၽႃႇသႃႇၵူႈၸိူဝ်ႉၵူႈပိူင်ၼၼ်ႉ ၼုင်ႈၶူဝ်းၼုင်ႈဢၼ်ၽိူၵ်ႇဢၼ်ၶၢဝ်ယူႇ၊ ယိပ်းၵမ်ၵိင်ႇ တူၼ်ႈၸုၼ်ႇပလုၼ်ႇ လႄႈ ၸုၵ်းယူႇၵႃႈတီႈၽၢႆႇၼႃႈပလၢင်ႇၸဝ်ႈ ဢိၵ်ႇတင်းၽၢႆႇၼႃႈသူဝ်းဢွၼ်ႇယူႇဢေႃႈ။-

10ၶဝ်ၼၼ်ႉႁဵတ်းတင်းသဵင်ဢၼ်ယႂ်ႇၼႃႇ ႁွင်ႉသႅၼ်ႇလႄႈဝႃႈ၊ ႁႂ်ႈၽြႃးပဵၼ်ၸဝ်ႈႁဝ်း ဢၼ်ၼင်ႈယူႇၵႃႈၼိူဝ်ပလၢင်ႇၸဝ်ႈ ဢိၵ်ႇတင်းသူဝ်းဢွၼ်ႇၼႆႉ မီးၵတ်းယဵၼ်ၶျၢမ်းသႃႇ တၢင်းဢၼ်ၵႄႇၶျွတ်ႈဢဝ်သေၵမ်းလူၺ်ႈတီႈၶႃႈ၊ ဝႃႈၼင်ႇၼႆယူႇဢေႃႈ။-

11တမၢၼ်ႇၵၢင်ႁၢဝ်တင်းသဵင်ႈတင်းလူင် ဢၼ်ၸုၵ်းယူႇၵႃႈတီႈႁိမ်းၸႃႉၸဵမ်ပလၢင်ႇၸဝ်ႈလႄႈ ၵေႃႉဢၼ်ဢသၢၵ်ႈယႂ်ႇတင်းလၢႆ ဢိၵ်ႇတင်းသတ်ႉတဝႃႇသီႇပႃးၸိူဝ်းၼၼ်ႉ ၶုပ်ႉမူပ်ႇၵႃႈတီႈၽၢႆႇၼႃႈပလၢင်ႇၸဝ်ႈယူႇ၊ ၵူဝ်းၵႂၢႆႇၽြႃးပဵၼ်ၸဝ်ႈယူႇသေလႄႈ-

12ဢွၼ်ၵၼ်လဝ်ႊလၢတ်ႈလႄႈဝႃႈ၊ ဢႃႇမိၼ်ႇ၊ ႁႂ်ႈၽြႃးပဵၼ်ၸဝ်ႈႁဝ်းၼႆႉ မီးတၢင်းလီမင်ႇၵလႃႇ၊ မုၼ်ၽုင်း၊ ပိင်ႇၺႃႇ၊ တၢင်းဢၼ်ယွင်ႈယေႃးၵျေးၸူး၊ ၵုင်ႇသရေႇ၊ တၼ်းၶူဝ်းတၢင်းၵတ်ႉတၢင်းၶၼ် ၵူႈၵမ်ႇၽႃႇသိုပ်ႇသိုပ်ႇတၢမ်းတၢမ်း သေၵမ်းလူၺ်ႈတီႈၶႃႈ။ ဢႃႇမိၼ်ႇ၊ ဝႃႈၼင်ႇၼႆယူႇဢေႃႈ။

13မိူဝ်ႈၼၼ်ႉ ၵေႃႉဢၼ်ဢသၢၵ်ႈယႂ်ႇပႃးၼိုင်ႈ ထၢမ်တီႈၵဝ်လႄႈဝႃႈ၊ ၶဝ်ၸိူဝ်းဢၼ်ၼုင်ႈၶူဝ်းၼုင်ႈဢၼ်ၽိူၵ်ႇဢၼ်ၶၢဝ်ၼၼ်ႉပဵၼ်ၽူႈလႂ်၊ ၶဝ်လုၵ်ႉသေၵႃႈတီႈလႂ်မႃး၊ ဝႃႈၼင်ႇၼႆၼၼ်ႉၸိုင်၊-

14ၵဝ်ၵေႃႈ ၶိုၼ်းလဝ်ႊလၢတ်ႈလႄႈဝႃႈ၊ ၸဝ်ႈဢိူၺ်း၊ ၸဝ်ႈႁဝ်းႁူႉယူႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။ မၼ်းၵေႃႈလၢတ်ႈတီႈၵဝ်လႄႈဝႃႈ၊ ၶဝ်ၸိူဝ်းၼႆႉပဵၼ်ၶဝ်ၸိူဝ်းဢၼ်ဢွၵ်ႇသေၵႃႈၼႂ်းတုၵ်ႉၶႃႉတၢင်းၽၢၼ်မႃးလႄႈ ဢဝ်ၶူဝ်းၼုင်ႈတူဝ်ၸဝ်ႈၵဝ်ႇ သၢႆႇလွႆးၵႃႈၼႂ်းလိူတ်ႈသူဝ်းဢွၼ်ႇႁႂ်ႈၽိူၵ်ႇလီၶၢဝ်လီဢေႃႈ။-

15ပိူဝ်ႈၼႆလႄႈ ၶဝ်လႆႈတီႈယူႇၵႃႈတီႈၽၢႆႇၼႃႈပလၢင်ႇၽြႃးပဵၼ်ၸဝ်ႈလႄႈ လႆႈႁဵတ်းဝၢတ်ႈၽြႃးယူႇၵႃႈၼႂ်းပိၵ်ႈမၢၼ်ႇၸဝ်ႈ ၵူႈဝၼ်းၵူႈၶိုၼ်းဢမ်ႇထၢတ်ႇဢေႃႈ။ ၸဝ်ႈဢၼ်ၼင်ႈယူႇၵႃႈၼိူဝ်ပလၢင်ႇၼၼ်ႉ တၵ်းပိုတ်ႇမူဝ်းၵႃႇၸဝ်ႈလႄႈ ႁူမ်ႇၶဝ်ဝႆႉဢေႃႈ။-

16ၵမ်းလိုၼ်း ၶဝ်တၵ်းဢမ်ႇလႆႈဢိုပ်းတၢင်းၵိၼ်တၢင်းၶူပ်းလႄႈ လႆႈယၢၵ်ႇၼမ်ႉယၢၵ်ႇၼၢႆး။ သၢႆၵၢင်ဝၼ်းတၵ်းဢမ်ႇလႆႈတိူဝ်ႉလႆႈထုၵ်ႇၶဝ်လႃးလႃး။ တၢင်းဢၼ်မႆႈဢၼ်ႁွၼ်ႉၵႃႈသင်သေဢမ်ႇဝႃႈ ၶဝ်တၵ်းဢမ်ႇလႆႈၶၢမ်ႇ။-

17လွင်ႈမၼ်းၸမ်ႉ သူဝ်းဢွၼ်ႇဢၼ်မီးယူႇၵႃႈၼႂ်းၶိုင်ႈၵၢင်ပလၢင်ႇၸဝ်ႈၼၼ်ႉ တၵ်းႁဵတ်းလဵင်ႉႁဵတ်းလူၶဝ်လႄႈ ၼႄပျႃးသဵၼ်ႈတၢင်းဢၼ်ၵႂႃႇၸူးၵႃႈတီႈ ၼမ်ႉဢွၵ်ႇႁူးဢသၢၵ်ႈၼၼ်ႉဢေႃႈ။ ၽြႃးပဵၼ်ၸဝ်ႈၵေႃႈ တၵ်းၸဵတ်ႉၼမ်ႉတႃၶဝ် ၵႃႈမီးတင်းသဵင်ႈတင်းလူင်ပႅတ်ႈသေ ၵႃႈၼႂ်းမၢၵ်ႇတႃၶဝ်ဢေႃႈ၊ ဝႃႈၼင်ႇၼႆဢေႃႈ။

← Chapter 6 Jump to: Chapter 8 →