Revelation 2

Shan

← Chapter 1 Jump to: Chapter 3 →

1တႅမ်ႈၸိူဝ်ႉၼင်ႇၼႆသေလႄႈ သင်ႇလၢတ်ႈၵႂႃႇတီႈတမၢၼ်ႇၸိူဝ်းၸဝ်ႈ ဢၼ်မီးယူႇၵႃႈၼႂ်းဝဵင်း ဢေးၽႅတ်ႈ ၼၼ်ႉတႃႉ။ ဢမိင်ႉၸဝ်ႈ ဢၼ်ဢဝ်မိုဝ်းၶွၼ်ၶႂႃယိပ်းၵမ် လၢဝ်ၸဵတ်းလုၵ်ႈသေလႄႈ ၵႂႃႇမႃးယူႇၵႃႈၼႂ်းၶိုင်ႈၵၢင် ၶူင်ႇတီႈတႆႈၽႆး ၸဵတ်းဢၼ်ၼၼ်ႉဝႃႈၸမ်ႉ၊ ၵဝ်ႁူႉတၢင်းဢၼ်မႂ်းၵမ်ၵျၢင်ႉ၊ တၢင်းဢၼ်မႂ်းယၢပ်ႇၽိုတ်ႇ တင်းတၢင်းဢၼ်မႂ်း ယိူၼ်ႉၶၢမ်ႇၼၼ်ႉ၊-

2ဢိၵ်ႇတင်းလွင်ႈဢၼ်မႂ်းဢမ်ႇႁပ်ႉတုင်းဢဝ် ၶဝ်ၸိူဝ်းဢၼ်ဢမ်ႇတြႃးၼၼ်ႉလႆႈၼၼ်ႉ၊ လွင်ႈဢၼ်မႂ်းၸႅတ်ႈထၢမ်ၶဝ်ၸိူဝ်းဢၼ် ဢမ်ႇၸႂ်ႈတမၢၼ်ႇၸဝ်ႈ ဢၼ်ႁဵတ်းၸိူဝ်ႉၼင်ႇႁၢင်ႈတမၢၼ်ႇၸဝ်ႈၼၼ်ႉလႄႈ ႁူႉလွင်ႈဢၼ်ၶဝ်ပဵၼ် ၵေႃႉဢၼ်ပႅတ်ႉလႅၼ်ၼၼ်ႉ၊-

3လွင်ႈဢၼ်မႂ်းပျေႉၸုမ်ႇတင်းၶၼ်ႇထီႇလႄႈ ၶၢမ်ႇတၢင်းၽၢၼ်ၵွပ်ႈပိူဝ်ႈ ၼႃႇမႃႉၸိုဝ်ႈသဵင်ၵဝ်လႄႈ ႁႅင်းဢမ်ႇဢူၼ်ႈၼၼ်ႉယူႇဢေႃႈ။

4ၵူၺ်းၵႃႈ ၵဝ်မီးလွင်ႈဢၼ် တၵ်းတၢင်ႇဢပႅတ်ႈၵႃႈၼိူဝ်မႂ်း လူၺ်ႈလွင်ႈဢၼ်တၢင်းႁၵ်ႉမႅတ်ႈတႃႇ ဢၼ်မႂ်းမီးမိူဝ်ႈဢွၼ်တၢင်းၼၼ်ႉ သုတ်ႉယွမ်းၵႂႃႇယဝ်ႉၼၼ်ႉဢေႃႈ။-

5ပိူဝ်ႈၼႆလႄႈ ၶုၵ်းၸႂ်လႆႈၶႆႈၸႂ်ထူပ်း တီႈဢၼ်မႂ်းယူႇမိူဝ်ႈဢွၼ်တၢင်း ၸူဝ်ႈဢၼ်မႂ်းဢမ်ႇပႆႇၶၢႆႉပုတ်ႈၼၼ်ႉတႃႉ။ ၶုၵ်းၸႂ်လႆႈမႆႈၸႂ်တႃႉ။ ၵမ်ၵျၢင်ႉတၢင်းၵမ်တၢင်းၵျၢင်ႉ ဢၼ်ဢွၼ်တၢင်းၼၼ်ႉတႃႉ။ ပေႃးဢမ်ႇၼၼ် ၵဝ်တၵ်းၸဵဝ်းမႃးတီႈဢၼ်မႂ်းမီးဢေႃႈ။ ပေႃးမႂ်းဢမ်ႇၶုၵ်းၸႂ်လႆႈမႆႈၸႂ်လႄႈယူႇၸိုင် ၵဝ်တၵ်းၶၢႆႉတီႈၶူင်ႇတီႈတႆႈၽႆးမႂ်းပႅတ်ႈသေဢေႃႈ။

6ၼႂ်းဝႃႈၼၼ်သေၵေႃႈ တၢင်းၵမ်တၢင်းၵျၢင်ႉတပႄးတပၢၼ်း ၼီႉၵေႃးလႃႉ တင်းလၢႆ ဢၼ်ၵဝ်ၸင်းၼၼ်ႉၸိုင် မႂ်းၵေႃႈၸင်းဝႃႈၼႆ မီးတီႈလၢတ်ႈဢေႃႈ။

7ဝီႉၺိၺ်ႇၸဝ်ႈမီးဢမိင်ႉတီႈ ၸိူဝ်းၸဝ်ႈတင်းလၢႆၸိူဝ်ႉၼင်ႇႁိုဝ်ဝႃႈၼႆ၊ ႁႂ်ႈၵေႃႉဢၼ်မီးႁူၼၼ်ႉ ငိၼ်းသေၵမ်းလူၺ်ႈ။ တီႈၵေႃႉဢၼ်ပႄႉၼႅင်ႇၼၼ်ႉၸိုင် ၵဝ်တၵ်းပၼ်ဢၶႂၢင်ႉ ဢၼ်လႆႈၵိၼ်မၢၵ်ႇတူၼ်ႈဢသၢၵ်ႈ ဢၼ်မီးၼႂ်းသူၼ် ပႃႇရတီႉသူႉ ၽြႃးပဵၼ်ၸဝ်ႈၼၼ်ႉဢေႃႈ။

8တႅမ်ႈၸိူဝ်ႉၼင်ႇၼႆသေလႄႈ သင်ႇလၢတ်ႈၵႂႃႇတီႈတမၢၼ်ႇၸိူဝ်းၸဝ်ႈ ဢၼ်မီးယူႇၵႃႈၼႂ်းဝဵင်း သမိူဝ်ႇၼႃႉ ၼၼ်ႉတႃႉ။ ဢမိင်ႉၸဝ်ႈ ဢၼ်ဢွၼ်တၢင်း၊ ၸဝ်ႈဢၼ်လိုၼ်းလင်သုတ်း၊ ဢၼ်ဝႃႈၸဝ်ႈဢၼ်လႆႈတၢႆယဝ်ႉလႄႈ ဢသၢၵ်ႈလိပ်းယူႇၼၼ်ႉဝႃႈၸမ်ႉ၊-

9ၵဝ်ႁူႉတၢင်းဢၼ် မႂ်းၶၢမ်ႇတုၵ်ႉၶႃႉတင်းတၢင်းဢၼ် ပိၵ်ႉသမ်ႉမႂ်းမီးတၢင်းဢၼ်ပျေႉၸုမ်ႇလိူင်ႇၸႂ်ယူႇသေၵေႃႈ မႂ်းယၢၵ်ႈၽၢၼ်ယူႇ ဢိၵ်ႇတင်း တၢင်းဢၼ်ၶဝ်ၸိူဝ်းဢၼ်ႁဵတ်းၸိူဝ်ႉၼင်ႇႁၢင်ႈပဵၼ်ၵူၼ်း ယူႉတႃႉ လႄႈ ဢမ်ႇၸႂ်ႈၵူၼ်း ယူႉတႃႉ ၊ ပဵၼ်မုၵ်ႉၸုမ်း ၸႃႇတၢၼ်ႇ ၼၼ်ႉ သႄႉသွမ်းၼၼ်ႉယူႇဢေႃႈ။-

10ယႃႇပေၵူဝ်လွင်ႈတၢင်းဢၼ် မႂ်းတၵ်းလႆႈၶၢမ်ႇၼၼ်ႉသေၸိူဝ်ႉသေပိူင်။ မႃႇၼၢတ်ႈတၵ်းဢဝ်ၼႂ်းသူၵမ်ႈၽွင်ႈ ၶင်ဝႆႉၵႃႈၼႂ်းထွင်ႇ ႁႂ်ႈသူလႆႈၶၢမ်ႇတၢင်းဢၼ်ၸၢမ်းတူၺ်းလႄႈ သိပ်းဝၼ်းတဵမ်တဵမ် သူတၵ်းလႆႈၶၢမ်ႇတုၵ်ႉၶႃႉတၢင်းၽၢၼ်ဢေႃႈ။ မႂ်းပႂ်ႉသဵတ်ႈၸႃႇယူႇတေႃႇထိုင်ႁွတ်ႈထၼ်ႈပေႃးတၢႆတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင် ၵဝ်တၵ်းပၼ်သရၽူႇဢသၢၵ်ႈတီႈမႂ်းဢေႃႈ။

11ဝီႉၺိၺ်ႇၸဝ်ႈမီးဢမိင်ႉတီႈၸိူဝ်းၸဝ်ႈတင်းလၢႆ ၸိူဝ်ႉၼင်ႇႁိုဝ်ဝႃႈၼႆ၊ ႁႂ်ႈၵေႃႉဢၼ်မီးႁူၼၼ်ႉ ငိၼ်းသေၵမ်းလူၺ်ႈ၊ ၵေႃႉဢၼ်ပႄႉၼႅင်ႇၼၼ်ႉၸိုင် တၢင်းတၢႆတူႉတီႉယႃႉ ဢမ်ႇလႆႈၼိၵ်ႈၸၢၵ်ႈငႅၼ်းသႄးမၼ်း။

12တႅမ်ႈၸိူဝ်ႉၼင်ႇၼႆသေလႄႈ သင်ႇလၢတ်ႈၵႂႃႇတီႈတမၢၼ်ႇၸဝ်ႈ ဢၼ်မီးယူႇၵႃႈၼႂ်းဝဵင်း ပေႇရၵမ်ႇ ၼၼ်ႉတႃႉ။ ဢမိင်ႉၸဝ်ႈဢၼ်မီးလၢပ်ႇသၢၼ်ႇလျၢၵ်ႉဢၼ်မီးၶူမ်းသွင်ၽၢႆႇ ဢၼ်ၽၢႆၼႃႇၼၼ်ႉဝႃႈၸမ်ႉ၊-

13ၵဝ်ႁူႉတီႈယူႇမႂ်းဢၼ်ဝႃႈ တီႈဢၼ်ရႃႇၸႃႉပလၢင်ႇ ၸႃႇတၢၼ်ႇ တႄႇယူႇၼၼ်ႉယူႇဢေႃႈ။ မႂ်းၸွႆးၸပ်းယိပ်းၵမ် ၼႃႇမႃႉၸိုဝ်ႈသဵင်ၵဝ်လႄႈ ဢမ်ႇၸုၼ်ႉဢမ်ႇပႄႇ တြႃးတၢင်းဢၼ်ယုမ်ႇမၢတ်ႈၵဝ် ၼႂ်းၶိင်ႇၵႃႇလႃႉမိုဝ်ႉဝၼ်း ဢၼ်ႇတီႉပႃႉ ဢၼ်ပဵၼ်ၵေႃႉဢၼ်မီးသဵတ်ႈၸႃႇလႄႈ လႆႈၶၢမ်ႇသၢၵ်ႈသေႇၽၢႆႇၵဝ် ဢၼ်လႆႈၶၢမ်ႇတၢင်းဢၼ်ဢဝ်တၢႆ ၼႂ်းသူၵႃႈတီႈယူႇ ၸႃႇတၢၼ်ႇ ၼၼ်ႉဢေႃႈ။

14ၵူၺ်းၵႃႈၵဝ်မီးတီႈတၵ်း တၢင်ႇဢပႅတ်ႈတီႈမႂ်းဢိတ်းၼိုင်ႈ ၵွပ်ႈပိူဝ်ႈဢၼ်ၼႂ်းတီႈယူႇမႂ်းၼၼ်ႉ မီးၶဝ်ၸိူဝ်းဢၼ်ၸွႆးၸပ်းဢယူႇ ပႃႇလၢမ်ႇ ဢၼ်ဝႃႈၵေႃႉဢၼ်ပၼ် တၢင်းၵျၢမ်ႇတၢင်းပွင်တီႈၶုၼ် ပႃႇလၵ်ႈ လွင်ႈၼင်ႇႁိုဝ် မၼ်းတၵ်းဢဝ်လွင်ႈတၢင်းဢၼ်တၵ်းတိူဝ်ႉလႄႈ လူမ်ႉၼၼ်ႉ ၶျႃးဝႆႉၵႃႈတီႈၽၢႆႇၼႃႈၵူၼ်း ဢီႉသရေႇလႃႉ တင်းလၢႆ ႁႂ်ႈၶဝ်လႆႈၵိၼ်တူဝ်ယိတ်ႈ ဢၼ်ပုၵ်ႈၸေႃႇၵႃႈတီႈၽၢႆႇၼႃႈရုၵ်ႈထူႉလႄႈ ႁႂ်ႈၶဝ်ႁဵတ်းမေႇထုင်ႇဢၼ်ဢမ်ႇတြႃးၼၼ်ႉဢေႃႈ။-

15ၶဝ်ၸိူဝ်းဢၼ်ၸွႆးၸပ်းဢယူႇ တပႄးတပၢၼ်း ၼီႉၵေႃးလႃႉ တင်းလၢႆ ဢၼ်သၽေႃးမိူၼ်ၸိူဝ်ႉၼင်ႇဢယူႇၼၼ်ႉ ၵမ်ႈၽွင်ႈၵေႃႈ မီးတီႈမႂ်းမိူၼ်ၸိူဝ်ႉၼင်ႇၼၼ်ဢေႃႈ။-

16ပိူဝ်ႈၼႆလႄႈ ၶုၵ်းၸႂ်လႆႈမႆႈၸႂ်တႃႉ။ ပေႃးဢမ်ႇၼၼ်ၸိုင်၊ ၵဝ်တၵ်းၸဵဝ်းမႃးတီႈမႂ်းဢေႃႈ။ ၵဝ်တၵ်းဢဝ်တင်းလၢပ်ႇသၢၼ်ႇလျၢၵ်ႉ ဢၼ်မီးတီႈသူပ်းၵဝ်ၼႆႉၼၼ်ႉ တိုၵ်းတေႃးၶဝ်ၼၼ်ႉဢေႃႈ။

17ဝီႉၺိၺ်ႇၸဝ်ႈ မီးဢမိင်ႉတီႈၸိူဝ်းၸဝ်ႈတင်းလၢႆ ၸိူဝ်ႉၼင်ႇႁိုဝ်ဝႃႈၼႆ၊ ႁႂ်ႈၵေႃႉဢၼ်မီးႁူၼၼ်ႉ ငိၼ်းသေၵမ်းလူၺ်ႈ။ တီႈၵေႃႉဢၼ်ပႄႉၼႅင်ႇၼၼ်ႉၸိုင် ၵဝ်တၵ်းပၼ် မၼ်ႇၼႃႉ ဢၼ်သိူင်ႇဝႆႉမႅပ်ႉဝႆႉ ဢိၵ်ႇတင်းမၢၵ်ႇႁိၼ်ၽိူၵ်ႇ လုၵ်ႈၼိုင်ႈ တင်းၼႃႇမႃႉၸိုဝ်ႈသဵင်ဢၼ်မႂ်ႇ ဢၼ်ဢဝ်တင်းတူဝ်လိၵ်ႈဢႅၵ်ႉၶရႃႇ တၢင်ႇဝႆႉၵႃႈၼိူဝ်မၢၵ်ႇႁိၼ်ၼၼ်ႉဢေႃႈ။ လိူဝ်သေၵေႃႉဢၼ်လႆႈမၢၵ်ႇႁိၼ်ၼၼ်ႉ ၽူႈလႂ်ဢမ်ႇႁူႉၼႃႇမႃႉၸိုဝ်ႈသဵင်ၼၼ်ႉလႆႈ။

18တႅမ်ႈၸိူဝ်ႉၼင်ႇၼႆသေလႄႈ သင်ႇလၢတ်ႈၵႂႃႇတီႈ တမၢၼ်ႇၸိူဝ်းၸဝ်ႈ ဢၼ်မီးယူႇၵႃႈၼႂ်းဝဵင်း သႂႃႇတီႉရႃႉ ၼၼ်ႉတႃႉ။ ဢမိင်ႉ လုၵ်ႈၽြႃးပဵၼ်ၸဝ်ႈ ဢၼ်မၢၵ်ႇတႃမိူၼ်ၸိူဝ်ႉၼင်ႇ ပဵဝ်ၽႆးလႄႈ တိၼ်မိူၼ်ၸိူဝ်ႉၼင်ႇ တွင်းလိူင်ၸႅတ်ႈၸႅတ်ႈၼၼ်ႉဝႃႈၸမ်ႉ၊-

19ၵဝ်ႁူႉတၢင်းဢၼ်မႂ်းၵမ်ၵျၢင်ႉ၊ တၢင်းဢၼ်မႂ်းႁၵ်ႉပႅင်း၊ တၢင်းဢၼ်မႂ်း ယုမ်ႇမၢတ်ႈ၊ တၢင်းဢၼ်မႂ်း ႁဵတ်းပွင်ဢမူႉ၊ တၢင်းဢၼ်မႂ်း ယိူၼ်ႉၶၢမ်ႇ ဢိၵ်ႇတင်းလွင်ႈဢၼ် တၢင်းၵမ်တၢင်းၵျၢင်ႉ ဢၼ်ၵမ်ၵျၢင်ႉၵမ်းလိုၼ်းၼႆႉၼႃႇသေ တၢင်းၵမ်တၢင်းၵျၢင်ႉ ဢၼ်ၵမ်ၵျၢင်ႉၵမ်းဢွၼ်တၢင်းၼၼ်ႉယူႇဢေႃႈ။

20ၵူၺ်းၵႃႈၵဝ်မီးတီႈတၵ်း တၢင်ႇဢပႅတ်ႈတီႈမႂ်း ၵွပ်ႈပိူဝ်ႈဢၼ်မႂ်း ပၼ်ဢၶႂၢင်ႉဢၼ်မေးမႂ်း ယေႇၸပေႇလႃႉ ဢၼ်ႁွင်ႉႁဵၵ်ႈတူဝ်ၸဝ်ႈၵဝ်ႇ ပရေႃးၽႅတ်ႈမႄႈယိင်းၼၼ်ႉ လႆႈသင်ႇသွၼ်လႄႈ ၸူဝ်းဢဝ်ၶႃႈဢၼ်ၶၢမ်ႇတၢင်းၸႂ်ႉတၢင်းသွႆၵဝ်တင်းလၢႆ ႁႂ်ႈၶဝ်လႆႈႁဵတ်းမေႇထုင်ႇဢၼ်ဢမ်ႇတြႃး ဢိၵ်ႇတင်းႁႂ်ႈၶဝ်လႆႈၵိၼ်တူဝ်ယိတ်ႈဢၼ်ပုၵ်ႈၸေႃႇၵႃႈတီႈၽၢႆႇၼႃႈ ရုၵ်ႈထူႉၼၼ်ႉဢေႃႈ။

21ပိၵ်ႉသမ်ႉၵဝ်ပၼ်ၶိင်ႇၵႃႇလႃႉ ပုၼ်ႈဢၼ်မၼ်းတၵ်းလႆႈၶုၵ်းၸႂ်လႆႈမႆႈၸႂ်သေၵေႃႈ မၼ်းဢမ်ႇမီးၸႂ်ဢၼ်ၶႂ်ႈၶုၵ်းၸႂ်လႆႈမႆႈၸႂ်လူၺ်ႈ မေႇထုင်ႇဢၼ်ဢမ်ႇတြႃးတူဝ်ၸဝ်ႈၵဝ်ႇၼၼ်ႉ။-

22ပိူဝ်ႈၼႆလႄႈ ၵဝ်တၵ်းဢဝ်မၼ်းၶျႃးဝႆႉ ၵႃႈၼိူဝ်တီႈၼွၼ်းဢေႃႈ။ ၶဝ်ၸိူဝ်းဢၼ် ႁဵတ်းမေႇထုင်ႇဢၼ်ဢမ်ႇတြႃးလူၺ်ႈၵၼ်တင်းမၼ်းၼၼ်ႉၵေႃႈ ပေႃးၶဝ်ဢမ်ႇၶုၵ်းၸႂ်လႆႈမႆႈၸႂ်လူၺ်ႈ တၢင်းၵမ်တၢင်းၵျၢင်ႉၸိူဝ်ႉၼင်ႇၼၼ်ၼၼ်ႉၸိုင် ၵဝ်တၵ်းႁႂ်ႈႁွတ်ႈထိုင်ၵႃႈတီႈတုၵ်ႉၶႃႉတၢင်းၽၢၼ်ဢၼ် ယႂ်ႇၼႃႇဢေႃႈ။-

23လုၵ်ႈလၢင်းမၼ်းတင်းလၢႆၵေႃႈ ၵဝ်တၵ်းဢဝ်ႁႂ်ႈတၢႆပႅတ်ႈ လူၺ်ႈတၢင်းတၢႆဢေႃႈ။ ၵွပ်ႈပိူဝ်ႈၸိူဝ်ႉၼင်ႇၼၼ်လႄႈ ၸိူဝ်းၸဝ်ႈတင်းသဵင်ႈတင်းလူင် တၵ်းလႆႈႁူႉလွင်ႈဢၼ် ၵဝ်ပဵၼ်ၵေႃႉဢၼ်ၸႅတ်ႈထၢမ် ၸႅတ်ႈတူၺ်းတပ်းပွတ်ႇႁူဝ်ၸႂ်ဢေႃႈ။ ၵဝ်တၵ်းပၼ်ဢၵျူဝ်းဢပႅတ်ႈ ၸွမ်းၵႃႈၼင်ႇတၢင်းၵမ်တၢင်းၵျၢင်ႉ ဢၼ်သူၵမ်ၵျၢင်ႉႁင်းၽႂ်ႁင်းမၼ်းၼၼ်ႉဢေႃႈ။

24ၵဝ်ဝႃႈတီႈၶဝ်ၸိူဝ်းဢၼ် ယင်းၵိုတ်းယင်းၵျၢၼ်ႇယူႇၵႃႈၼႂ်းဝဵင်း သႂႃႇတီႉရႃႉ ၊ ဢၼ်ဢမ်ႇဢဝ်ဢယူႇမိၵ်ႉသႃႇတိၵ်ႉထီႉ၊ ဢၼ်ဢမ်ႇမိုတ်ႈဢမ်ႇၵိုဝ်းလွင်ႈတၢင်းဢၼ်လိုၵ်ႉဢၼ်လမ်ႇ ၸႃႇတၢၼ်ႇ မႅၼ်ႈၸိူဝ်ႉၼင်ႇဢၼ်ၶဝ်ႁွင်ႉႁဵၵ်ႈဝႃႈ ဢယူႇမိၵ်ႉသႃႇတိၵ်ႉထီႉၼၼ်ႉၸမ်ႉ သူဢွၼ်ၵၼ်ယိပ်းၵမ်ၵႃႈဢၼ်သူလႆႈၸိူဝ်းၼၼ်ႉယူႇ တေႃႇထိုင်ႁွတ်ႈမိူဝ်ႈဢၼ်ၵဝ်မႃးၼၼ်ႉတႃႉ။-

25လိူဝ်သေၼၼ်ႉ ၵဝ်ဢမ်ႇဢဝ်ၶူဝ်းတၢင်ႇၸိူဝ်ႉတၢင်ႇပိူင်တၢင်ႇသႂ်ႇၵႃႈၼိူဝ်သူ။-

26တီႈၵေႃႉဢၼ်ပႄႉၼႅင်ႇလႄႈၵမ်ၵျၢင်ႉတၢင်းၵမ်တၢင်းၵျၢင်ႉၵဝ် တေႃႇထိုင်ႁွတ်ႈတီႈသုတ်းတီႈၵွႆၼၼ်ႉၸိုင် ၵဝ်တၵ်းပၼ်ဢၶႂၢင်ႉဢၼ်လႆႈ ဢုပ်ႉပိူင်ႇၵူၼ်းမဵဝ်းတင်းလၢႆတီႈမၼ်း ၵႃႈၼင်ႇဢၼ်ပေႃႈၵဝ်ပၼ်ဢၶႂၢင်ႉတီႈၵဝ်ၼၼ်ႉလႄႈ၊-

27မၼ်းၼၼ်ႉ တၵ်းဢဝ်ၵၼ်းႁွၵ်ႇလဵၵ်း ဢုပ်ႉပိူင်ႇလႄႈ ယႃႉတႅၵ်ႇပႅတ်ႈမိူၼ်ၸိူဝ်ႉၼင်ႇဢၼ် ယႃႉတႅၵ်ႇပႅတ်ႈမေႃႈလိၼ်ၼၼ်ႉဢေႃႈ။-

28လၢဝ်လႅင်းၵေႃႈ တၵ်းပၼ်တီႈမၼ်းၼၼ်ႉဢေႃႈ။

29ဝီႉၺိၺ်ႇၸဝ်ႈမီးဢမိင်ႉတီႈၸိူဝ်းၸဝ်ႈတင်းလၢႆ ၸိူဝ်ႉၼင်ႇႁိုဝ်ဝႃႈၼႆ ႁႂ်ႈၵေႃႉဢၼ်မီးႁူၼၼ်ႉ ငိၼ်းသေၵမ်းလူၺ်ႈ။

← Chapter 1 Jump to: Chapter 3 →