Revelation 16

Shan

← Chapter 15 Jump to: Chapter 17 →

1ၵဝ်ငိၼ်းသဵင်ဢၼ်ယႂ်ႇၼႃႇ ၵႃႈၼႂ်းပိၵ်ႈမၢၼ်ႇၸဝ်ႈ လၢတ်ႈတီႈတမၢၼ်ႇၵၢင်ႁၢဝ် ၸဵတ်းပႃးၼၼ်ႉလႄႈဝႃႈ၊ ၵႂႃႇတႃႉ၊ ဢဝ်ၵွၵ်းတၢင်းၸႂ်မႆႈၶႆႈၸႃႉ ၽြႃးပဵၼ်ၸဝ်ႈၸဵတ်းလုၵ်ႈ သွၼ်းလေႃႇတူၵ်းသႂ်ႇ ၵႃႈၼိူဝ်လိၼ်မိူင်းတႃႉ၊ ဝႃႈၼင်ႇၼႆဢေႃႈ။

2ပႃးပထမႃႉၵႂႃႇလႄႈ ဢဝ်ၵွၵ်းတူဝ်ၸဝ်ႈၵဝ်ႇ သွၼ်းလေႃႇတူၵ်းသႂ်ႇၵႃႈၼိူဝ်လိၼ်မိူင်းသေယဝ်ႉ တုမ်ႇၸဵပ်းတုမ်ႇၽီ ဢၼ်ႁၢႆႉၼႃႇ ဢွၵ်ႇၵႃႈတီႈၶဝ်ၸိူဝ်းဢၼ် ၶၢမ်ႇတၼ်းသိၵ်ႈ လၢၵ်ႈမၢတ်ႈ တူဝ်ထိူၼ်ႇႁၢႆႉလႄႈ ၵူဝ်းၵႂၢႆႇရုၵ်ႈထူႉမၼ်းၼၼ်ႉဢေႃႈ။

3ပႃးတူႉတီႉယႃႉ ဢဝ်ၵွၵ်းတူဝ်ၸဝ်ႈၵဝ်ႇ သွၼ်းလေႃႇတူၵ်းသႂ်ႇၵႃႈၼိူဝ်ပၢင်ႇလၢႆႇသေယဝ်ႉ ပၢင်လၢႆႇၼၼ်ႉပဵၼ်လိူတ်ႈၵႂႃႇ ၸိူဝ်ႉၼင်ႇလိူတ်ႈၵူၼ်းဢၼ်တၢႆၼၼ်ႉဢေႃႈ။ သတ်ႉတဝႃႇၵႃႈဢၼ် ဢသၢၵ်ႈလိပ်းယူႇၵႃႈၼႂ်းပၢင်ႇလၢႆႇၼၼ်ႉ တင်းသဵင်ႈတင်းလူင် တၢႆဢေႃႈ။

4ပႃးတႃႉတီႉယႃႉ ဢဝ်ၵွၵ်းတူဝ်ၸဝ်ႈၵဝ်ႇ သွၼ်းလေႃႇတူၵ်းသႂ်ႇၵႃႈၼိူဝ် ၼမ်ႉႁွင်ႈၼမ်ႉၵႄး ဢိၵ်ႇတင်းၼမ်ႉဢွၵ်ႇႁူး တင်းလၢႆသေယဝ်ႉ၊ လွင်ႈတၢင်းၸိူဝ်းၼၼ်ႉပဵၼ်လိူတ်ႈၵႂႃႇဢေႃႈ။-

5ၵဝ်ငိၼ်းတမၢၼ်ႇၵၢင်ႁၢဝ် ဢၼ်ပႂ်ႉၼမ်ႉၸိူဝ်းၼၼ်ႉ လဝ်ႊလၢတ်ႈလႄႈဝႃႈ၊ ၸဝ်ႈဢၼ်မီးယူႇ ပိတ်ႈၸုၵ်ႈပၢၼ်ႇ၊ ဢတိၵ်ႈ၊ ဢၼႃႇၵၢတ်ႈၵႃႇလႃႉသေႇသေႇတီႈၶႃႈ၊ ၸဝ်ႈႁဝ်းသိုဝ်ႈတေႃႇ ၼႂ်းလွင်ႈတၢင်းဢၼ် ၸဝ်ႈႁဝ်းၸီႇယၢင်ႇတြႃး ၸိူဝ်ႉၼင်ႇၼၼ်ၼၼ်ႉတီႈၶႃႈဢေႃႈ။-

6ပိူဝ်ႈဢၼ်ၶဝ် ထွၵ်ႇလိူတ်ႈၵူၼ်းမူတ်းၸၢင်ႇ ဢိၵ်ႇတင်းပရေႃးၽႅတ်ႈတင်းလၢႆပႅတ်ႈလႄႈ ၸဝ်ႈႁဝ်းတိုၵ်းလိူတ်ႈပၼ်တီႈၶဝ် တီႈၶႃႈယဝ်ႉ။ ၶဝ်ၵေႃႈထိူၵ်ႈၶၢမ်ႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

7ၵဝ်ငိၼ်းယိတ်ႈပလၢင်ႇ လဝ်ႊလၢတ်ႈလႄႈဝႃႈ၊ ၸႂ်ႈတႄႉတႄႇဢေႃႈ။ ထႃႇဝရႃႉၸဝ်ႈၽြႃးပဵၼ်ၸဝ်ႈ ၸဝ်ႈဢၼ်ပျေႉၸုမ်ႇတင်းဢၼၼ်ႇတႃႉတၼ်းၶူဝ်းတီႈၶႃႈ၊ လွင်ႈတၢင်းဢၼ်ၸဝ်ႈႁဝ်းၸီႇယၢင်ႇၸိူဝ်းၼၼ်ႉ မၢၼ်ႇမႅၼ်ႈ ၸိုဝ်ႈၸႂ်ႈ သိုဝ်ႈတေႃႇ တီႈၶႃႈဢေႃႈ၊ ဝႃႈၼင်ႇၼႆဢေႃႈ။

8ပႃးၸတုၵ်ႉထႃႉ ဢဝ်ၵွၵ်းတူဝ်ၸဝ်ႈၵဝ်ႇ သွၼ်းလေႃႇတူၵ်းသႂ်ႇ ၵႃႈၼိူဝ်ၵၢင်ဝၼ်းသေယဝ်ႉ ၵၢင်ဝၼ်း လႆႈဢၶႂၢင်ႉဢၼ်ႁႂ်ႈ ၽႆးမႆႈၵူၼ်းတင်းလၢႆဢေႃႈ။-

9ၵူၼ်းတင်းလၢႆ လႆႈၶၢမ်ႇတၢင်းဢၼ်မႆႈ ၵွပ်ႈပိူဝ်ႈဢႁူင်ႇဢၼ်မႆႈယႂ်ႇၼႃႇၼၼ်ႉလႄႈ ဢွၼ်ၵၼ်ၵိၼ်ႇလႃႇၼႃႇမႃႉၸိုဝ်ႈသဵင် ၽြႃးပဵၼ်ၸဝ်ႈဢၼ်ဢုပ်ႉပိူင်ႇၽေးတၢမ်ႇၸိူဝ်းၼၼ်ႉဢေႃႈ။ ၶဝ်ဢမ်ႇၶုၵ်းၸႂ်လႆႈမႆႈၸႂ်ႁႂ်ႈလႆႈ ယွင်ႈယေႃးၽြႃးပဵၼ်ၸဝ်ႈ။

10ပႃးပိၼ်ႇၸမႃႉ ဢဝ်ၵွၵ်းတူဝ်ၸဝ်ႈၵဝ်ႇ သွၼ်းလေႃႇတူၵ်းသႂ်ႇၵႃႈၼိူဝ် ပလၢင်ႇတူဝ်ထိူၼ်ႇႁၢႆႉသေယဝ်ႉ မိူင်းမၼ်းပဵၼ်ဢၼ်လပ်းသိင်ႇၽိတ်းၽိတ်းၵႂႃႇဢေႃႈ။ ၵူၼ်းမိူင်းမၼ်းတင်းလၢႆ ယၢပ်ႇၸႂ်ႁႅင်းယႂ်ႇၼႃႇလႄႈ ၵဵဝ်ႉၵၢပ်ႈလိၼ်ႉတူဝ်ၸဝ်ႈၵဝ်ႇဢေႃႈ။-

11ၵွပ်ႈပိူဝ်ႈဝူၺ်ႇတၼႃႇ ဢၼ်တူဝ်ၸဝ်ႈၵဝ်ႇ လႆႈၶၢမ်ႇဢိၵ်ႇတင်းတုမ်ႇၸဵပ်းတုမ်ႇၽီတင်းလၢႆၼၼ်ႉလႄႈ ၶဝ်ဢွၼ်ၵၼ်ၵိၼ်ႇလႃႇ ၽြႃးပဵၼ်ၸဝ်ႈ၊ ၸဝ်ႈမိူင်းၵၢင်ႁၢဝ်ဢေႃႈ။ ၶဝ်ဢမ်ႇၶုၵ်းၸႂ်လႆႈမႆႈၸႂ်လူၺ်ႈ တၢင်းၵမ်တၢင်းၵျၢင်ႉတူဝ်ၸဝ်ႈၵဝ်ႇတင်းလၢႆၼၼ်ႉ။

12ပႃးသႃႉထမႃႉ ဢဝ်ၵွၵ်းတူဝ်ၸဝ်ႈၵဝ်ႇ သွၼ်းလေႃႇတူၵ်းသႂ်ႇ ၵႃႈၼိူဝ်ၼမ်ႉႁွင်ႈလူင် ဢူႉၽရတ်ႉ သေယဝ်ႉ ပုၼ်ႈလွင်ႈၼင်ႇႁိုဝ် တၵ်းလႆႈမႄးသဵၼ်ႈတၢင်းသၢႆတႃႈ ပုၼ်ႈၶုၼ်ႁေႃၶမ်း မိူင်းတၢင်းဝၼ်းဢွၵ်ႇတင်းလၢႆ တၵ်းၵႂႃႇၸိုင် ၼမ်ႉၼႂ်းၼမ်ႉႁွင်ႈၼၼ်ႉ ယူတ်းႁႅင်ႈၵႂႃႇသေဢေႃႈ။-

13မိူဝ်ႈၼၼ်ႉ ၵဝ်ႁၼ် ဝီႉၺိၺ်ႇဢၼ်ၵူဝ်ႈၵိူၵ်ႇ သၢမ်ပႃး ပဵၼ်မိူၼ်ၸိူဝ်ႉၼင်ႇ တူဝ်ၶဵတ်ႇၼၼ်ႉ ဢွၵ်ႇသေၵႃႈၼႂ်း သူပ်းၼၵႃး၊ ၵႃႈၼႂ်း သူပ်းတူဝ်ထိူၼ်ႇႁၢႆႉ၊ ၵႃႈၼႂ်း သူပ်းမိၵ်ႉသႃႇပရေႃးၽႅတ်ႈၸိူဝ်းၼၼ်ႉမႃးဢေႃႈ။-

14ၶဝ်ၼၼ်ႉ ပဵၼ်ဝီႉၺိၺ်ႇၽီႁၢႆႉ ဢၼ်ၼႄပျႃးၼီႉမိၵ်ႈလၢၵ်ႈၶၼႃႇ ၼမ်ၼႃႇၼၼ်ႉဢေႃႈ။ ဝီႉၺိၺ်ႇၸိူဝ်းၼၼ်ႉ ဢွၵ်ႇသေလႄႈ ၵႂႃႇၸူးၵႃႈတီႈၶုၼ်ႁေႃၶမ်းတင်းလၢႆ ဢၼ်မီးၵႃႈၼႂ်းမိူင်းလေႃးၵီႇ တင်းသဵင်ႈတင်းလူင်လႄႈ ႁႂ်ႈၶဝ်ၸူႉၵၼ်တုမ်ၵၼ် ႁႂ်ႈလႆႈတိုၵ်းသိုၵ်း ၼႂ်းဝၼ်းယႂ်ႇဝၼ်းလူင်ၽြႃးပဵၼ်ၸဝ်ႈ ဢၼ်ပျေႉၸုမ်ႇတင်းဢၼၼ်ႇတႃႉတၼ်းၶူဝ်းၼၼ်ႉဢေႃႈ။

15သဵင်ၸဝ်ႈၸမ်ႉ၊ ၵဝ်မႃးၸိူဝ်ႉၼင်ႇ ၽူႈလၵ်ႉဢေႃႈ။ ၵေႃႉဢၼ်တိုၼ်ႇယူႇလႄႈ ပႂ်ႉၶူဝ်းၼုင်ႈတၢင်းမႆတူဝ်ၸဝ်ႈၵဝ်ႇယူႇ ႁႂ်ႈဢမ်ႇလႆႈၵႂႃႇမႃးတူဝ်ပူၺ် ဢမ်ႇမီးၶူဝ်းၼုင်ႈတၢင်းမႆလႄႈ လႆႈမီးလွင်ႈဢၼ်လီဢူၵ်းလီဢၢႆ ၵႃႈတီႈၽၢႆႇၼႃႈပိူၼ်ႈၼၼ်ႉ မီးမင်ႇၵလႃႇဢေႃႈ၊ ဝႃႈၼင်ႇၼႆဢေႃႈ။-

16ၶဝ်ႁႂ်ႈၶဝ်ၼၼ်ႉ ၸူႉၵၼ်တုမ်ၵၼ်ၵႃႈၼႂ်းတီႈဢၼ်ၸွမ်းၼင်ႇ ၵႂၢမ်းၽႃႇသႃႇ ႁေႇပြႄး လႆႈၸိုဝ်ႈ ဢႃႇမၵေႇတူင်ႇ ၼၼ်ႉဢေႃႈ။

17ပႃးသတ်ႉတမႃႉ ဢဝ်ၵွၵ်းတူဝ်ၸဝ်ႈၵဝ်ႇ သွၼ်းလေႃႇတူၵ်းသႂ်ႇ ၵႃႈၼိူဝ်ဢႃႇၵႃႇသႃႉ ၵၢင်ႁၢဝ်သေယဝ်ႉ သဵင်ယႂ်ႇသဵင်လူင် ဢၼ်လၢတ်ႈလႄႈဝႃႈ ယဝ်ႉတူဝ်ယဝ်ႉ၊ ဝႃႈၼင်ႇၼႆၼၼ်ႉ ဢွၵ်ႇသေၵႃႈၼႂ်း ပလၢင်ႇၸဝ်ႈ ဢၼ်မီးၵႃႈၼႂ်းပိၵ်ႈမၢၼ်ႇၵၢင်ႁၢဝ် ၼၼ်ႉမႃးဢေႃႈ။-

18မိူဝ်ႈၼၼ်ႉ ပဵၼ်တၢင်းဢၼ်ၽႃႉမႅပ်ႈ၊ တၢင်းဢၼ်သဵင်လင်သဵင်မေႃး၊ တၢင်းဢၼ်ၽႃႉလင်၊ တၢင်းဢၼ်ဢိင်ႇသၼ်ႇ ဢၼ်ယႂ်ႇၼႃႇဢေႃႈ။ ၸႃႉၸဵမ်ၶိင်ႇၵႃႇလႃႉ ဢၼ်ၵူၼ်းတင်းလၢႆပဵၼ်မႃးၵႃႈၼိူဝ် လိၼ်မိူင်းၼႆႉၼၼ်ႉ၊ ၼီႉမိၵ်ႈလၢၵ်ႈၶၼႃႇ ၸိူဝ်ႉၼင်ႇၼၼ် ဢိၵ်ႇတင်းတၢင်းဢၼ်ဢိင်ႇသၼ်ႇ ဢၼ်ယႂ်ႇထၢၼ်ႇၼၼ်ႉ ဢမ်ႇပႆႇတွၼ်ႉပဵၼ်သေပွၵ်ႈ။

19ဝဵင်းလူင်ၼၼ်ႉ တႅၵ်ႇပဵၼ် သၢမ်ၽၢၵ်ႇ ၵႂႃႇလႄႈ ဝဵင်းဢၼ်ၵူၼ်းၵူႈၸိူဝ်ႉၵူႈၶိူဝ်းယူႇၼၼ်ႉ လူမ်ႉပင်းဢေႃႈ။ ၽြႃးပဵၼ်ၸဝ်ႈၶုၵ်းၸႂ်လႆႈၶႆႈၸႂ်ထူပ်း ဝဵင်း ပႃႇပူႉလုၼ်ႇ ႁႂ်ႈလႆႈတိုၵ်းပၼ် ၵွၵ်းၼမ်ႉၸပိတ်ႈတေႃးသႃႉ တင်းၸႂ်မႆႈမၼ်းၸဝ်ႈ ဢၼ်ၵျၢမ်းယၢပ်ႇၼႃႇၼၼ်ႉဢေႃႈ။-

20ၵုၼ်ၼႂ်းၼမ်ႉ ၵႃႈမီးတင်းသဵင်ႈတင်းလူင် လႅၼ်ႈဢွၵ်ႇပၢႆႈၵႂႃႇဢေႃႈ။ လွႆတင်းလၢႆၵေႃႈ လပ်ႉႁၢႆၵႂႃႇဢေႃႈ။-

21မၢၵ်ႇႁဵပ်းလူင် ဢၼ်ၼၵ်းၸွႆႉၸင်ႈမၼ်း မီးသိပ်းၼိုင်ႈၵေႃႈ တူၵ်းသေၵႃႈၼိူဝ်ၵၢင်ႁၢဝ်သႂ်ႇ ၵႃႈၼိူဝ်ၵူၼ်းတင်းလၢႆဢေႃႈ။ ပိူဝ်ႈဢၼ်မၢၵ်ႇႁဵပ်းၼၼ်ႉ ပဵၼ်ၽေးတၢမ်ႇ ဢၼ်ယႂ်ႇၼႃႇလႄႈ ၵူၼ်းတင်းလၢႆဢွၼ်ၵၼ်ၵိၼ်ႇလႃႇၽြႃးပဵၼ်ၸဝ်ႈ ၵွပ်ႈပိူဝ်ႈၽေးတၢမ်ႇ မၢၵ်ႇႁဵပ်းၼၼ်ႉဢေႃႈ။

← Chapter 15 Jump to: Chapter 17 →