Revelation 17

Shan

← Chapter 16 Jump to: Chapter 18 →

1ၼႂ်းတမၢၼ်ႇၵၢင်ႁၢဝ် ၸဵတ်းပႃး ဢၼ်မီးၵွၵ်း ၸဵတ်းလုၵ်ႈၼၼ်ႉ၊ ပႃးၼိုင်ႈမႃး တၵ်ႉလၢတ်ႈၵဝ်လႄႈဝႃႈ၊ မႃးတႃႉ။ ၵဝ်တၵ်းၼႄပျႃး တၢင်းဢၼ်ၸီႇယၢင်ႇဢမူႉတီႈမႄႈမွၵ်ႇယႃႈလူင် ဢၼ်ၼင်ႈယူႇၵႃႈၼိူဝ်ၼမ်ႉ ဢၼ်ၼမ်ၼႃႇၼၼ်ႉတီႈမႂ်းဢေႃႈ။-

2ၶုၼ်ႁေႃၶမ်းလေႃးၵီႇတင်းလၢႆ ႁဵတ်းမေႇထုင်ႇဢၼ်ဢမ်ႇတြႃး လူၺ်ႈၵၼ်တင်းမၼ်းၼၼ်ႉယဝ်ႉ။ ၵူၼ်းၵႃႈၼိူဝ်လိၼ်မိူင်းတင်းလၢႆမဝ်းလူၺ်ႈ ၼမ်ႉၸပိတ်ႈမေႇထုင်ႇဢၼ်ဢမ်ႇတြႃးမၼ်းၼၼ်ႉယဝ်ႉ၊ ဝႃႈၼင်ႇၼႆယူႇလႄႈ၊-

3ဢဝ်တင်းဝီႉၺိၺ်ႇၸဝ်ႈဢဝ်ၵဝ်ၵႂႃႇသူင်ႇ ၵႃႈၼႂ်းထိူၼ်ႇဢေႃႈ။ ၵဝ်ႁၼ်မႄႈယိင်းၵေႃႉၼိုင်ႈ ဢၼ်ၼင်ႈယူႇၵႃႈၼိူဝ် တူဝ်ထိူၼ်ႇလႅင် ဢၼ်မီးတဵမ်ဝႆႉတင်း ၼႃႇမႃႉၸိုဝ်ႈသဵင် ဢၼ်ယႃႉသရေႇၽြႃးပဵၼ်ၸဝ်ႈ၊ ဢၼ်မီးႁူဝ် ၸဵတ်းလုၵ်ႈ ဢိၵ်ႇတင်းၶဝ် သိပ်းလႅမ်ႈ ၼၼ်ႉဢေႃႈ။-

4မႄႈယိင်းၼၼ်ႉ ၼုင်ႈၶူဝ်းဢၼ်လႅင် ဢိၵ်ႇတင်းၶူဝ်းဢၼ်ၵမ်ႇသေလႄႈ ႁၢင်ႈၶိူင်ႈၶမ်း၊ ၶိူင်ႈသႅင်၊ ၶိူင်ႈပူးလႄး တင်းလၢႆယူႇဢေႃႈ။ မၼ်းယိပ်းၵမ်ဢဝ် ၵွၵ်းၶမ်း ဢၼ်တဵမ်ဝႆႉတင်းၶိူင်ႈ ဢၼ်ဝူၺ်ႇဢၼ်ႁင်ႈ ဢိၵ်ႇတင်းတၢင်းဢၼ် ၵူဝ်ႈၵိူၵ်ႇမေႇထုင်ႇ ဢၼ်ဢမ်ႇတြႃးတူဝ်ၸဝ်ႈၵဝ်ႇ ၼၼ်ႉယူႇဢေႃႈ။-

5ၼႃႇမႃႉၸိုဝ်ႈသဵင် ဢၼ်ဢဝ်တူဝ်လိၵ်ႈတႅမ်ႈသႂ်ႇ ၵႃႈတီႈၼႃႈၽၢၵ်ႇမၼ်းၼၼ်ႉ ဝႃႈၸမ်ႉ၊ ပဵၼ်တၢင်းဢၼ်လိုၵ်ႉဢၼ်လမ်ႇ၊ ဝဵင်းလူင် ပႃႇပူႉလုၼ်ႇ ၊ မႄႈမွၵ်ႇယႃႈ၊ မႄႈတၢင်းဢၼ်ဝူၺ်ႇဢၼ်ႁင်ႈ တင်းလၢႆဢေႃႈ၊ ဝႃႈၼင်ႇၼႆဢေႃႈ။

6ၵဝ်ႁၼ်မႄႈယိင်းၼၼ်ႉ မဝ်းလူၺ်ႈ လိူတ်ႈၵူၼ်းမူတ်းၸၢင်ႇ ဢိၵ်ႇတင်း လိူတ်ႈၶဝ်ၸိူဝ်းဢၼ်ၶၢမ်ႇသၢၵ်ႈသေႇလွင်ႈ ယေႇသူႉ ၼၼ်ႉယူႇဢေႃႈ။ မိူဝ်ႈဢၼ်ႁၼ်ၸိူဝ်ႉၼင်ႇၼၼ်ၸိုင် ၵဝ်ဢၢမ်းၼႃႇလူင်လၢင်လႄႈယူႇဢေႃႈ။-

7တမၢၼ်ႇၵၢင်ႁၢဝ်ၼၼ်ႉၵေႃႈ လၢတ်ႈတီႈၵဝ်လႄႈဝႃႈ၊ ႁဵတ်းသင်လႄႈ မႂ်းဢၢမ်းၼႃႇလူင်လၢင်ယူႇၼင်ႇႁိုဝ်။ ၵဝ်တၵ်းလၢတ်ႈပၼ် တၢင်းဢၼ်လိုၵ်ႉဢၼ်လမ်ႇမႄႈယိင်းၼၼ်ႉ ဢိၵ်ႇတင်း တၢင်းဢၼ်လိုၵ်ႉဢၼ်လမ်ႇ တူဝ်ထိူၼ်ႇႁၢႆႉ ဢၼ်မီးႁူဝ်ၸဵတ်းလုၵ်ႈ တင်းၶဝ်သိပ်းလႅမ်ႈလႄႈ ပႃးတင်းမႄႈယိင်းၼၼ်ႉတီႈမႂ်းဢေႃႈ။-

8တူဝ်ထိူၼ်ႇႁၢႆႉ ဢၼ်မႂ်းႁၼ်တေႃႈလဵဝ်ၼႆႉၼၼ်ႉ ယၢမ်ႈလႆႈပဵၼ်မႃးယဝ်ႉ၊ ဢၼ်ယင်းတိုၵ်ႉပဵၼ်ယူႇဢမ်ႇမီး၊ တၵ်းလုၵ်ႉသေ ၵႃႈၼႂ်းၶုမ် ၼႂ်းႁူး ဢၼ်လိုၵ်ႉၼႃႇသေပိူၼ်ႈၼၼ်ႉ ၶိုၼ်ႈမႃးလႄႈၵႂႃႇၸူး ၵႃႈတီႈတၢင်းလူႉတၢင်းလႅဝ်ဢေႃႈ။ ၵူၼ်းၵႃႈၼိူဝ်လိၼ်မိူင်း ဢၼ်ၸႃႉၸဵမ်ၵမ်ႇၽႃႇၸႃႉတႄႇလႄႈ ဢမ်ႇၶဝ်ႈၸရၢင်းၼႂ်း ၽိုၼ်လိၵ်ႈဢသၢၵ်ႈတင်းလၢႆၼၼ်ႉ မိူဝ်ႈဢၼ်ႁၼ်တူဝ်ထိူၼ်ႇႁၢႆႉ ဢၼ်ယၢမ်ႈလႆႈပဵၼ်မႃးယဝ်ႉ၊ ဢၼ်ယင်းတိုၵ်ႉပဵၼ်ယူႇဢမ်ႇမီး၊ ဢၼ်တၵ်းသမ်ႉပဵၼ်မႃးၼၼ်ႉၸိုင် တၵ်းဢၢမ်းၼႃႇလူင်လၢင်ဢေႃႈ။

9ၼႂ်းလွင်ႈတီႈႁဵင်းၼႆႉ၊ မီးၺၢၼ်ႇဢၼ်ပျေႉၸုမ်ႇတင်း ပိင်ႇၺႃႇဝႆႉဢေႃႈ။ ႁူဝ်ၸဵတ်းလုၵ်ႈၸမ်ႉ၊ ပဵၼ်လွႆၸဵတ်းႁူၺ်ႇ ဢၼ်မႄႈယိင်းၼၼ်ႉ ၼင်ႈယူႇဢေႃႈ။-

10ၶုၼ်ႁေႃၶမ်းၸဵတ်းပႃး ၵေႃႈပဵၼ်ဢေႃႈ။ ႁႃႈပႃးတူၵ်းယဝ်ႉ၊ ပႃးၼိုင်ႈယင်းမီးယူႇဢေႃႈ။ ပႃးၼိုင်ႈတၵ်းပဵၼ်လူးၵွၼ်ႇဢေႃႈ။ မိူဝ်ႈဢၼ်ပဵၼ်ၼၼ်ႉၸိုင် မၼ်းတၵ်းလႆႈတႄႇယူႇၵမ်းဢွၼ်ႇၼိုင်ႈၵူၺ်းဢေႃႈ။-

11တူဝ်ထိူၼ်ႇႁၢႆႉ ဢၼ်ယၢမ်ႈပဵၼ်မႃးယဝ်ႉ၊ ဢၼ်ယင်းတိုၵ်ႉပဵၼ်ယူႇဢမ်ႇမီးၼၼ်ႉ ပဵၼ်ၶုၼ်ႁေႃၶမ်း ဢၼ်ထူၼ်ႈထိုင်ပႅတ်ႇပႃးဢေႃႈ။ ဢၼ်ၶဝ်ႈပႃးၼႂ်းၸဵတ်းပႃး ၵေႃႈပဵၼ်ဢေႃႈ။ မၼ်းတၵ်းလႆႈၵႂႃႇၸူး ၵႃႈတီႈတၢင်းလူႉတၢင်းလႅဝ်ဢေႃႈ။

12ၶဝ်သိပ်းလႅမ်ႈ ဢၼ်မႂ်းလႆႈႁၼ်ၼၼ်ႉၸမ်ႉ ပဵၼ်ၶုၼ်ႁေႃၶမ်းသိပ်းပႃး ဢၼ်ဢမ်ႇပႆႇလႆႈၵိၼ်မိူင်းဢေႃႈ။ ၶဝ်တၵ်းလႆႈဢႃႇၼႃႇၸၢၵ်ႈ ၶုၼ်ႁေႃၶမ်းလူၺ်ႈၵၼ်တင်းတူဝ်ထိူၼ်ႇႁၢႆႉၼၼ်ႉ ၼႃႇရီႇၼိုင်ႈဢေႃႈ။-

13ၶဝ်ၼၼ်ႉသၽေႃး တၵ်းမိူၼ်ၵၼ်လႄႈ ဢဝ်တၼ်းၶူဝ်းဢႃႇၼႃႇၸၢၵ်ႈ တူဝ်ၸဝ်ႈၵဝ်ႇ ဢၢပ်ႈပၼ်တီႈတူဝ်ထိူၼ်ႇႁၢႆႉၼၼ်ႉဢေႃႈ။-

14ၶဝ်တၵ်းဢွၼ်ၵၼ် တိုၵ်းတေႃးသူဝ်းဢွၼ်ႇလႄႈ သူဝ်းဢွၼ်ႇတၵ်းပႄႉၼႅင်ႇၶဝ်ဢေႃႈ။ လွင်ႈမၼ်းၸမ်ႉ သူဝ်းဢွၼ်ႇၼၼ်ႉ ပဵၼ်ၸဝ်ႈၼိူဝ်ၸဝ်ႈတင်းသဵင်ႈတင်းလူင်၊ ၶုၼ်ႁေႃၶမ်းၼိူဝ်ၶုၼ်ႁေႃၶမ်း တင်းသဵင်ႈတင်းလူင်ဢေႃႈ။ ၶဝ်ၸိူဝ်းဢၼ်မီးလူၺ်ႈၵၼ်တင်းမၼ်းၸဝ်ႈၼၼ်ႉ ပဵၼ်ၵေႃႉဢၼ်မၼ်းၸဝ်ႈ ႁွင်ႉဢဝ်၊ ၵေႃႉဢၼ်မၼ်းၸဝ်ႈ လိူၵ်ႈၵဵပ်း၊ ၵေႃႉဢၼ်မီး သဵတ်ႈၸႃႇဢေႃႈ။

15ၼမ်ႉတင်းလၢႆ ဢၼ်မႂ်းႁၼ်လႄႈ မႄႈမွၵ်ႇယႃႈၼင်ႈယူႇၼၼ်ႉၸမ်ႉ၊ ပဵၼ်ၵူၼ်းၵူႈၸိူဝ်ႉၵူႈမဵဝ်း ဢၼ်လၢတ်ႈၵႂၢမ်းၽႃႇသႃႇ ၵူႈၸိူဝ်ႉၵူႈပိူင် ပဵၼ်မုၵ်ႉပဵၼ်ၸိူဝ်းဝႆႉၼၼ်ႉဢေႃႈ။-

16ၶဝ်သိပ်းလႅမ်ႈ ဢၼ်မႂ်းႁၼ်ၼၼ်ႉ ဢိၵ်ႇတင်းတူဝ်ထိူၼ်ႇႁၢႆႉၼၼ်ႉ တၵ်းၸင်းမႄႈမွၵ်ႇယႃႈလႄႈ ယႃႉပႅတ်ႈၸေးၸိမ်ႇမၼ်းဢေႃႈ။ တၵ်းထွတ်ႇၶူဝ်းၼုင်ႈမၼ်းလႄႈ ၶူပ်းၵိၼ်ၼိူဝ်ႉမၼ်းဢေႃႈ။ တူဝ်မၼ်းၵေႃႈ တၵ်းဢဝ်တုတ်ႇၽႆးပႅတ်ႈဢေႃႈ။-

17လွင်ႈမၼ်းၸမ်ႉ ၽြႃးပဵၼ်ၸဝ်ႈ ပၼ်တၢင်းၵျၢမ်ႇတၢင်းပွင်တီႈၶဝ် ႁႂ်ႈၶဝ်လႆႈႁဵတ်းၸွမ်းဢလူဝ်ႇၽြႃးပဵၼ်ၸဝ်ႈ ဢိၵ်ႇတင်းႁႂ်ႈသၽေႃးၶဝ် လႆႈမိူၼ်ၵၼ်လႄႈ ဢဝ်မိူင်းတူဝ်ၸဝ်ႈၵဝ်ႇတင်းလၢႆ ဢၢပ်ႈပၼ်တီႈတူဝ်ထိူၼ်ႇႁၢႆႉ တေႃႇထိုင်ႁွတ်ႈၸူဝ်ႈဢၼ် ၼုၵ်ႈၵပၢတ်ႈၸဝ်ႈ ဢမ်ႇပႆႇပျေႉၸုမ်ႇ ၼၼ်ႉဢေႃႈ။

18မႄႈယိင်းဢၼ်မႂ်းႁၼ်ၼၼ်ႉၸမ်ႉ၊ ပဵၼ်ဝဵင်းလူင် ဢၼ်ဢုပ်ႉပိူင်ႇၶုၼ်ႁေႃၶမ်းလေႃးၵီႇ တင်းသဵင်ႈတင်းလူင်ဢေႃႈ၊ ဝႃႈၼင်ႇၼႆဢေႃႈ။

← Chapter 16 Jump to: Chapter 18 →