Revelation 15

Shan

← Chapter 14 Jump to: Chapter 16 →

1ၵမ်းၼၼ်ႉ ၵဝ်ႁၼ်ၼီႉမိၵ်ႈလၢၵ်ႈၶၼႃႇလူင် ဢၼ်လီဢၢမ်းၼႃႇတၢင်ႇၸိူဝ်ႉတၢင်ႇမဵဝ်း ဢၼ်ဝႃႈတမၢၼ်ႇၵၢင်ႁၢဝ် ၸဵတ်းပႃး ဢၼ်မီးၽေးတၢမ်ႇ လိုၼ်းလင်သုတ်း ၸဵတ်းပိူင် ဢၼ်ႁႂ်ႈတၢင်းၸႂ်မႆႈၶႆႈၸႃႉ ၽြႃးပဵၼ်ၸဝ်ႈယဝ်ႉတူဝ် ၼၼ်ႉဢေႃႈ။

2ၵဝ်ႁၼ်ဢၼ်ပဵၼ်ၸိူဝ်ႉၼင်ႇ ပၢင်ႇလၢႆႇၽၢၼ်ႇ၊ ပၢင်ႇလၢႆႇၸမ်ႈ ဢၼ်လေႃးၵၼ်တင်းၽႆး ၼၼ်ႉလႄႈ ၶဝ်ၸိူဝ်းဢၼ်ၵၢင်းလွတ်ႈတင်း တူဝ်ထိူၼ်ႇႁၢႆႉ တင်းရုၵ်ႈထူႉမၼ်း၊ တင်းတၢင်းဢၼ်ၼပ်ႉဢၢၼ်ႇ ၼႃႇမႃႉၸိုဝ်ႈသဵင်မၼ်းသေလႄႈ ပႄႉၼႅင်ႇၼၼ်ႉ ယိပ်းၵမ်တိင်ႇ ၽြႃးပဵၼ်ၸဝ်ႈယူႇသေလႄႈ ၸုၵ်းယူႇၵႃႈတီႈႁိမ်းပၢင်ႇလၢႆႇၽၢၼ်ႇ၊ ပၢင်ႇလၢႆႇၸမ်ႈ ၼၼ်ႉဢေႃႈ။-

3ၶဝ်ၼၼ်ႉႁဵတ်းၵႂၢမ်း မူဝ်းသေႇ တင်းၵႂၢမ်းသူဝ်းဢွၼ်ႇ ၽြႃးပဵၼ်ၸဝ်ႈယူႇသေလႄႈ ဢွၼ်ၵၼ်လဝ်ႊလၢတ်ႈလႄႈဝႃႈ၊ ထႃႇဝရႃႉၸဝ်ႈၽြႃးပဵၼ်ၸဝ်ႈ ဢၼ်ပျေႉၸုမ်ႇတင်း ဢၼၼ်ႇတႃႉတၼ်းၶူဝ်းတီႈၶႃႈ၊ လွင်ႈတၢင်းဢၼ်ၸဝ်ႈႁဝ်း သၢင်ႈႁဵတ်းၸိူဝ်းၼၼ်ႉမျၢတ်ႈလီလႄႈ ပဵၼ်ဢၼ်လီဢၢမ်းၼႃႇလူင်လၢင်တီႈၶႃႈဢေႃႈ။ ၶုၼ်ႁေႃၶမ်းၵူၼ်းမဵဝ်းတင်းလၢႆတီႈၶႃႈ၊ လွင်ႈတၢင်းဢၼ်ၸဝ်ႈႁဝ်း ၵမ်ၵျၢင်ႉၸိူဝ်းၼၼ်ႉမၢၼ်ႇမႅၼ်ႈၸိုဝ်ႈၸႂ်ႈလႄႈ မူတ်းၸၢင်ႇတီႈၶႃႈဢေႃႈ။-

4ဢူဝ်းထႃႇဝရႃႉၽြႃး၊ ၽူႈလႂ်ယင်းဢမ်ႇရူဝ်ႇသေႇၵူဝ်ယမ်ၸဝ်ႈႁဝ်း၊ ယင်းဢမ်ႇယွင်ႈယေႃးၼႃႇမႃႉၸိုဝ်ႈသဵင်ၸဝ်ႈႁဝ်းလႄႈ တၵ်းလႆႈယူႇတီႈၶႃႈ။ လွင်ႈမၼ်းၸမ်ႉ ၸဝ်ႈႁဝ်းၶႃႈသူႇလဵဝ်ၵူၺ်း မူတ်းၸၢင်ႇတီႈၶႃႈဢေႃႈ။ ၵူၼ်းမဵဝ်းၵႃႈမီးတင်းသဵင်ႈတင်းလူင် တၵ်းမႃးလႄႈ ၵူဝ်းၵႂၢႆႇၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈဢေႃႈ။ လွင်ႈတၢင်းဢၼ်ၸဝ်ႈႁဝ်းၸီႇယၢင်ႇၸွမ်းၼင်ႇတြႃးၼၼ်ႉ ထၢင်ႇသႃးတီႈၶႃႈယဝ်ႉ၊ ဝႃႈၼင်ႇၼႆယူႇဢေႃႈ။

5လိုၼ်းၼၼ်ႉ ၵဝ်တူၺ်းလႄႈ ပိၵ်ႈမၢၼ်ႇၸဝ်ႈ ဢၼ်မီးသုမ်ႉထဵင်ၸဝ်ႈ တီႈဢၼ်ထမ်ႇမႃႉ ၼႃႈတၢင်းဢၼ်မၼ်းၸဝ်ႈ ၶၢမ်ႇသၢၵ်ႈသေႇၼၼ်ႉ ၽုၺ်ႇဝႆႉမီးယူႇဢေႃႈ။-

6တမၢၼ်ႇၵၢင်ႁၢဝ် ၸဵတ်းပႃး ဢၼ်မီးၽေးတၢမ်ႇ ၸဵတ်းပိူင် ၸိူဝ်းၼၼ်ႉ ၼုင်ႈၶူဝ်းဢၼ်ဢဝ်ပၢၼ်ႇတေႃးႁဵတ်း ဢၼ်ႁိူဝ်ႈလႅင်းမူတ်းၸၢင်ႇၼၼ်ႉယူႇ၊ ၵႃႈတီႈဢူၵ်းၵေႃႈ ႁတ်ႉတင်းသၢႆဢႅဝ်ၶမ်း ယူႇသေလႄႈ ဢွၵ်ႇမႃးဢေႃႈ။-

7ၼႂ်းသတ်ႉတဝႃႇ သီႇပႃး ပႃးၼိုင်ႈဢဝ် ၵွၵ်းၶမ်းၸဵတ်းလုၵ်ႈ ဢၼ်တဵမ်ဝႆႉတင်း တၢင်းၸႂ်မႆႈၶႆႈၸႃႉၽြႃးပဵၼ်ၸဝ်ႈ ဢၼ်ဢသၢၵ်ႈလိပ်းယူႇ ၵူႈၵမ်ႇၽႃႇသိုပ်ႇသိုပ်ႇတၢမ်းတၢမ်းၼၼ်ႉ ပၼ်တီႈတမၢၼ်ႇၵၢင်ႁၢဝ် ၸဵတ်းပႃး ၼၼ်ႉဢေႃႈ။-

8ပိၵ်ႈမၢၼ်ႇၸဝ်ႈၼၼ်ႉ တဵမ်ဝႆႉတင်းၵႂၼ်းၽႆး ၵွပ်ႈပိူဝ်ႈမုၼ်ဢႃႇၼူႉၽေႃႇၽြႃးပဵၼ်ၸဝ်ႈၼၼ်ႉလႄႈ ၸူဝ်ႈဢၼ်ၽေးတၢမ်ႇ ၸဵတ်းပိူင် ဢၼ်ပၼ်တီႈတမၢၼ်ႇၵၢင်ႁၢဝ် ၸဵတ်းပႃးၼၼ်ႉ ဢမ်ႇပႆႇသဵင်ႈပႆႇမူတ်းၼၼ်ႉၸိုင် ၽူႈလႂ်ဢမ်ႇၶဝ်ႈၵႃႈၼႂ်းပိၵ်ႈမၢၼ်ႇၸဝ်ႈလႆႈ။

← Chapter 14 Jump to: Chapter 16 →