Revelation 3

Shan

← Chapter 2 Jump to: Chapter 4 →

1တႅမ်ႈၸိူဝ်ႉၼင်ႇၼႆသေလႄႈ သင်ႇလၢတ်ႈၵႂႃႇတီႈတမၢၼ်ႇၸိူဝ်းၸဝ်ႈ ဢၼ်မီးယူႇၵႃႈၼႂ်းဝဵင်း သႃႇတီႉ ၼၼ်ႉတႃႉ။ ဢမိင်ႉၸဝ်ႈ ဢၼ်မီးဝီႉၺိၺ်ႇၽြႃးပဵၼ်ၸဝ်ႈၸဵတ်းပႃး ဢိၵ်ႇတင်းလၢဝ်ၸဵတ်းလုၵ်ႈၼၼ်ႉၸမ်ႉ၊ ၵဝ်ႁူႉတၢင်းၵမ်တၢင်းၵျၢင်ႉမႂ်းယူႇလႄႈ လွင်ႈဢၼ်မႂ်းပိၵ်ႉသမ်ႉပဵၼ်ၸိူဝ်ႉၼင်ႇႁၢင်ႈ ဢသၢၵ်ႈလိပ်းယူႇသေၵေႃႈ ပဵၼ်ဢၼ်တၢႆယူႇၼၼ်ႉယူႇဢေႃႈ။-

2ယင်းဢမ်ႇၼွၼ်းလႄႈပႂ်ႉယူႇတႃႉ။ ႁႂ်ႈလွင်ႈတၢင်းဢၼ် ယင်းၵိုတ်းယင်းၵျၢၼ်ႇဝႆႉလႄႈ ၸမ်တၵ်းတၢႆတင်းလၢႆၼၼ်ႉ ပဵၼ်ဢၼ်မၼ်ႈၶိူင်ႇတႃႉ။ ၵဝ်ထူပ်းလွင်ႈဢၼ်တၢင်းၵမ်တၢင်းၵျၢင်ႉမႂ်း ဢမ်ႇပႆႇၸေးၸုမ်ႇ ၵႃႈတီႈၽၢႆႇၼႃႈၽြႃးပဵၼ်ၸဝ်ႈၼၼ်ႉယဝ်ႉ။-

3ၵွပ်ႈႁွႆးၼႆႉ ၶုၵ်းၸႂ်လႆႈၶႆႈၸႂ်ထူပ်းလွင်ႈတၢင်းဢၼ် မႂ်းၶၢမ်ႇဢဝ်လႄႈ ထွမ်ႇဢဝ်ယဝ်ႉၼၼ်ႉသေလႄႈ ပႂ်ႉၵမ်ပႂ်ႉၸွမ်းတႃႉ။ ၶုၵ်းၸႂ်လႆႈမႆႈၸႂ်တႃႉ။ ပေႃးမႂ်းဢမ်ႇပႂ်ႉလႄႈယူႇၸိုင် ၵဝ်တၵ်းမႃးၵႃႈတီႈမႂ်းၸိူဝ်ႉၼင်ႇၽူႈလၵ်ႉၼၼ်ႉဢေႃႈ။ ၶိင်ႇၼႃႇရီႇဢၼ်ၵဝ်တၵ်းမႃးၼၼ်ႉၵေႃႈ မႂ်းတၵ်းဢမ်ႇလႆႈႁူႉ။-

4ၵူၺ်းၵႃႈ ၼႂ်းသူၵႃႈတီႈဝဵင်း သႃႇတီႉ ၼၼ်ႉ ယင်းမီးၶဝ်ၸိူဝ်းဢၼ်ဢမ်ႇႁႂ်ႈၶူဝ်းၼုင်ႈတူဝ်ၸဝ်ႈၵဝ်ႇ ၵူဝ်ႈၵိူၵ်ႇၼၼ်ႉယူႇ ဢိတ်းၼိုင်ႈဢေႃႈ။ ၶဝ်ၼၼ်ႉၵွပ်ႈပိူဝ်ႈဢၼ်ပဵၼ် ၵေႃႉဢၼ်ၵိုင်ႇထိူၵ်ႈလႄႈ တၵ်းၼုင်ႈၶူဝ်းဢၼ်ၽိူၵ်ႇဢၼ်ၶၢဝ်ယူႇသေလႄႈ ၵႂႃႇမႃးလူၺ်ႈၵၼ်တင်းၵဝ်ဢေႃႈ။

5ၵေႃႉဢၼ်ပႄႉၼႅင်ႇၼၼ်ႉ တၵ်းလႆႈၼုင်ႈၶူဝ်း ဢၼ်ၽိူၵ်ႇဢၼ်ၶၢဝ်ဢေႃႈ။ ၸိုဝ်ႈသဵင်ၵေႃႉၼၼ်ႉၸိုင် ၵဝ်တၵ်းဢမ်ႇမွတ်ႇပႅတ်ႈသေၵႃႈၼႂ်း လိၵ်ႈဢသၢၵ်ႈလႃးလႃး။ ၵဝ်တၵ်းႁပ်ႉတုင်းဢဝ်ၸိုဝ်ႈသဵင်မၼ်းၼၼ်ႉ ၵႃႈတီႈၽၢႆႇၼႃႈပေႃႈၵဝ် ဢိၵ်ႇတင်းၵႃႈတီႈၽၢႆႇၼႃႈ တမၢၼ်ႇၵၢင်ႁၢဝ်တင်းလၢႆဢေႃႈ။

6ဝီႉၺိၺ်ႇၸဝ်ႈမီးဢမိင်ႉတီႈ ၸိူဝ်းၸဝ်ႈတင်းလၢႆၸိူဝ်ႉၼင်ႇႁိုဝ်ဝႃႈၼႆ၊ ႁႂ်ႈၵေႃႉဢၼ်မီးႁူၼၼ်ႉ ငိၼ်းသေၵမ်းလူၺ်ႈ။

7တႅမ်ႈၸိူဝ်ႉၼင်ႇၼႆသေလႄႈ သင်ႇလၢတ်ႈၵႂႃႇတီႈတမၢၼ်ႇၸိူဝ်းၸဝ်ႈ ဢၼ်မီးယူႇၵႃႈၼႂ်းဝဵင်း ၽီႉလတေးလၽီႉ ၼၼ်ႉတႃႉ။ ဢမိင်ႉၸဝ်ႈဢၼ်မူတ်းၸၢင်ႇ၊ ၸဝ်ႈဢၼ်မၢၼ်ႇမႅၼ်ႈၸိုဝ်ႈၸႂ်ႈ၊ ၸဝ်ႈဢၼ်ယိပ်းၵမ်သေႃးၽၵ်းတူၶုၼ် တႃႇဝိတ်ႈ ၊ ၸဝ်ႈဢၼ်ၽုၺ်ႇဝႆႉႁႂ်ႈၽူႈလႂ်ထၼ်ႈပေႃး ဢမ်ႇဢိုတ်းလႆႈလႄႈ ဢိုတ်းဝႆႉႁႂ်ႈၽူႈလႂ်ထၼ်ႈပေႃး ဢမ်ႇၽုၺ်ႇလႆႈၼၼ်ႉၸမ်ႉ၊-

8ၵဝ်ႁူႉတၢင်းၵမ်တၢင်းၵျၢင်ႉမႂ်းယူႇဢေႃႈ။ ၵဝ်ၽုၺ်ႇၽၵ်းတူဢၼ်ၽူႈလႂ် ဢမ်ႇဢိုတ်းလႆႈၼၼ်ႉဝႆႉ ၵႃႈတီႈၽၢႆႇၼႃႈမႂ်းယဝ်ႉ။ လွင်ႈမၼ်းၸမ်ႉ မႂ်းမီးႁႅင်းဢိတ်းၼိုင်ႈလႄႈ ပႂ်ႉၵမ်ပႂ်ႉၸွမ်းၼုၵ်ႈၵပၢတ်ႈၵဝ်မႃးယဝ်ႉ။ ၼႃႇမႃႉၸိုဝ်ႈသဵင်ၵဝ်ၵေႃႈ မႂ်းဢမ်ႇပႄႇဢမ်ႇပႅတ်ႈ။

9တူၺ်းလူး၊ ၵဝ်တၵ်းဢဝ်ၵူၼ်း ၼႂ်းမုၵ်ႉၼႂ်းၸိူဝ်း ၸႃႇတၢၼ်ႇ ၵမ်ႈၽွင်ႈဢၼ်ဝႃႈ ၶဝ်ၸိူဝ်းဢၼ် ႁဵတ်းၸိူဝ်ႉၼင်ႇႁၢင်ႈပဵၼ်ၵူၼ်း ယူႉတႃႉ လႄႈ ယင်းဢမ်ႇပဵၼ်ဢၼ်မၢၼ်ႇဢၼ်မႅၼ်ႈ၊ ပဵၼ်ဢၼ်လၢတ်ႈၵႂၢမ်းမူႉသႃႇၼၼ်ႉ ဢၢပ်ႈပၼ်တီႈမႂ်းဢေႃႈ။ ၵဝ်တၵ်းႁဵတ်းႁႂ်ႈၶဝ် လႆႈမႃးၶုပ်ႉမူပ်ႇၵႃႈတီႈႁိမ်းတိၼ်မႂ်း ဢိၵ်ႇတင်းႁႂ်ႈၶဝ်လႆႈႁူႉလွင်ႈဢၼ်ၵဝ်ႁၵ်ႉမႂ်းၼၼ်ႉဢေႃႈ။-

10ပိူဝ်ႈဢၼ်မႂ်းပႂ်ႉၵမ်ပႂ်ႉၸွမ်း ၼုၵ်ႈၵပၢတ်ႈတြႃးဢၼ်ၸၢပ်ႈသႅင်ႇၵၼ်တင်း တၢင်းဢၼ်ယိူၼ်ႉၶၢမ်ႇၵဝ်ၼၼ်ႉလႄႈ ၵဝ်တၵ်းပႂ်ႉမႂ်းယူႇၼႂ်းၶိင်ႇၵႃႇလႃႉ တၢင်းဢၼ်ၸၢမ်းတူၺ်း ဢၼ်တၵ်းၸွတ်ႇတူဝ်ႈ မိူင်းလေႃးၵီႇၵူႈတီႈၵူႈလႅၼ် ႁႂ်ႈလႆႈၸၢမ်းတူၺ်းၵူၼ်းတင်းလၢႆ ဢၼ်ယူႇၵႃႈတီႈၼိူဝ်လိၼ်မိူင်းၼႆႉၼၼ်ႉဢေႃႈ။

11ၵဝ်တၵ်းၸဵဝ်းမႃးဢေႃႈ။ ၼင်ႇႁိုဝ်ၽူႈလႂ်တၵ်းဢမ်ႇလႆႈဢဝ်သရၽူႇမႂ်းၸိုင် ယိပ်းၵမ်လွင်ႈတၢင်းဢၼ် မႂ်းလႆႈမႃးယဝ်ႉၼၼ်ႉဝႆႉတႃႉ။-

12ၵေႃႉဢၼ်ပႄႉၼႅင်ႇၼၼ်ႉၸိုင် ၵဝ်တၵ်းႁႂ်ႈပဵၼ်သဝ်ၵႃႈၼႂ်းပိၵ်ႈမၢၼ်ႇၽြႃးပဵၼ်ၸဝ်ႈၵဝ်ၼၼ်ႉဢေႃႈ။ ၵမ်းလိုၼ်း မၼ်းတၵ်းဢမ်ႇလႆႈၶၢႆႉတီႈလႄႈဢွၵ်ႇၵႃႈၼွၵ်ႈ။ ၵဝ်တၵ်းဢဝ်ၼႃႇမႃႉၸိုဝ်ႈသဵင်ၽြႃးပဵၼ်ၸဝ်ႈၵဝ် ဢိၵ်ႇတင်းၼႃႇမႃႉၸိုဝ်ႈသဵင် ဝဵင်းၽြႃးပဵၼ်ၸဝ်ႈၵဝ် ဢၼ်ဝႃႈဝဵင်း ယေႇရူႉသလႅမ်ႇ ဢၼ်မႂ်ႇ ဢၼ်ဢွၵ်ႇသေၵႃႈတီႈ ၽြႃးပဵၼ်ၸဝ်ႈၵဝ်လႄႈ လူင်းသေၵႃႈၼိူဝ်ၵၢင်ႁၢဝ်မႃးၼၼ်ႉ တင်းၼႃႇမႃႉၸိုဝ်ႈသဵင်ၵဝ် ဢၼ်ပဵၼ်ဢၼ်မႂ်ႇၼၼ်ႉ တၢင်ႇသႂ်ႇၵႃႈၼိူဝ်ၵေႃႉၼၼ်ႉဢေႃႈ။

13ဝီႉၺိၺ်ႇၸဝ်ႈမီးဢမိင်ႉတီႈၸိူဝ်းၸဝ်ႈတင်းလၢႆ ၸိူဝ်ႉၼင်ႇႁိုဝ်ဝႃႈၼႆ၊ ႁႂ်ႈၵေႃႉဢၼ်မီးႁူၼၼ်ႉ ငိၼ်းသေၵမ်းလူၺ်ႈ။

14တႅမ်ႈၸိူဝ်ႉၼင်ႇၼႆသေလႄႈ သင်ႇလၢတ်ႈၵႂႃႇတီႈတမၢၼ်ႇၸိူဝ်းၸဝ်ႈ ဢၼ်မီးယူႇၵႃႈၼႂ်းဝဵင်း လေႃးတီႉၵီႉ ၼၼ်ႉတႃႉ။ ဢမိင်ႉ ဢႃႇမိၼ်ႇ၊ ၸဝ်ႈဢၼ်ၶၢမ်ႇသၢၵ်ႈသေႇ ဢၼ်မီးသဵတ်ႈၸႃႇလႄႈ မၢၼ်ႇမႅၼ်ႈ၊ ၸဝ်ႈဢၼ်ပဵၼ်ပၢႆၸိၵ်းၸွမ် ဝူၺ်ႇၼေႇယႃႉသတ်ႉတဝႃႇ ၽြႃးပဵၼ်ၸဝ်ႈၼၼ်ႉၸမ်ႉ၊-

15ၵဝ်ႁူႉတၢင်းၵမ်တၢင်းၵျၢင်ႉမႂ်းယူႇလႄႈ လွင်ႈဢၼ်မႂ်း ပဵၼ်ဢၼ်ၵတ်းၵေႃႈဢမ်ႇၸႂ်ႈ၊ ပဵၼ်ဢၼ်မႆႈၵေႃႈဢမ်ႇၸႂ်ႈ ၼၼ်ႉယူႇဢေႃႈ။ ၵဝ်မီးဢလူဝ်ႇ ၶႂ်ႈႁႂ်ႈသူပဵၼ်ဢၼ်ၵတ်း ဢမ်ႇၼၼ်ၵေႃႈ ပဵၼ်ဢၼ်မႆႈ ဢေႃႈ။-

16ၼင်ႇၼၼ်လႄႈ ၵွပ်ႈပိူဝ်ႈဢၼ်မႂ်း ပဵၼ်ဢၼ်ၵတ်းၵေႃႈဢမ်ႇၸႂ်ႈ၊ ပဵၼ်ဢၼ်မႆႈၵေႃႈဢမ်ႇၸႂ်ႈ၊ မီးႁၢမ်ႉဢုၼ်ႇဢုၼ်ႇၵူၺ်းၼၼ်ႉလႄႈ သူပ်းၵဝ်တၵ်းထူမ်ႇမႂ်းပႅတ်ႈယဝ်ႉ။-

17မႂ်းလၢတ်ႈလႄႈဝႃႈ၊ ၵဝ်ၸၢင်ႈမၢၵ်ႈၸၢင်ႈမီးဢေႃႈ။ ၽၼ်ႇတႃႇၼမ်ၼႃႇၵေႃႈ သိမ်းပႅင်းဝႆႉယဝ်ႉ။ ဢမ်ႇလူဝ်ႇထႅင်ႈသေၸိူဝ်ႉသေပိူင်ယဝ်ႉ၊ ဝႃႈၼင်ႇၼႆယူႇလႄႈ ဢမ်ႇႁူႉလွင်ႈဢၼ်တူဝ်ၸဝ်ႈၵဝ်ႇ ပဵၼ်တၢင်းဢၼ်ယၢပ်ႇၸႂ်ၶၢၼ်ၸႂ်၊ တၢင်းဢၼ်ထုၵ်ႇလီဢဵတ်းလူ၊ တၢင်းဢၼ်ယၢၵ်ႈဢၼ်ၽၢၼ်၊ တၢင်းဢၼ်တႃမွတ်ႇ၊ တၢင်းဢၼ်ဢမ်ႇမီးၶူဝ်းမီးလဵင်းၼၼ်ႉယူႇလူင်ပႄႇ။-

18ၵဝ်ပၼ်တၢင်းၵျၢမ်ႇတၢင်းပွင်တီႈမႂ်းလႄႈဝႃႈ၊ သိုဝ်ႉဢဝ်ၶမ်း ဢၼ်ဢဝ်ၼႂ်းၽႆးယဝ်ႉၼၼ်ႉ ႁႂ်ႈလႆႈပဵၼ်ၵေႃႉဢၼ်ၸၢင်ႈမၢၵ်ႈၸၢင်ႈမီး ၶူဝ်းလဵင်းဢၼ်ၽိူၵ်ႇဢၼ်ၶၢဝ် ပုၼ်ႈဢၼ်တၵ်းၼုင်ႈတၵ်းမႆ၊ ႁႂ်ႈလႆႈပဵၼ်ၵေႃႉဢၼ် ဢမ်ႇမီးလွင်ႈဢၼ်ယူႇတူဝ်ပူၺ်လႄႈ ဢူၵ်းဢၢႆၵႃႈတီႈၽၢႆႇၼႃႈပိူၼ်ႈ၊ ယႃႈယႃဢၼ်တၵ်းလႆႈၶၢတ်ႈသႂ်ႇ ၼႂ်းမၢၵ်ႇတႃမႂ်း ႁႂ်ႈမၢၵ်ႇတႃမႂ်းလႆႈႁၼ်ၼၼ်ႉတီႈၵဝ်တႃႉ၊ ဝႃႈၼင်ႇၼႆဢေႃႈ။-

19ၵဝ်ၸၢင်ႈၸႅတ်ႈထၢမ်ဢပႅတ်ႈ ၶဝ်ၸိူဝ်းဢၼ်ၵဝ်ႁၵ်ႉၵႃႈမီးတင်းသဵင်ႈတင်းလူင်ၼၼ်ႉလႄႈ သင်ႇသွၼ်ၶဝ်ဢေႃႈ။ ပိူဝ်ႈၼႆလႄႈ တိုၵ်းယူင်းၸႂ်တူဝ်ၸဝ်ႈၵဝ်ႇတႃႉ။ ၶုၵ်းၸႂ်လႆႈမႆႈၸႂ်တႃႉ။

20တူၺ်းလူး၊ ၵဝ်ၸုၵ်းယူႇၵႃႈတီႈၽၢႆႇၼႃႈ ၽၵ်းတူသေလႄႈ တွႆႇယူႇဢေႃႈ။ ၽူႈလႂ်သေဢမ်ႇဝႃႈ ၵေႃႉဢၼ်ငိၼ်းသဵင်ၵဝ်လႄႈ ၽုၺ်ႇၽၵ်းတူပၼ်ၼၼ်ႉ တီႈၵေႃႉၼၼ်ႉ ၵဝ်တၵ်းၶဝ်ၸူးလႄႈ ၵိၼ်ၶူပ်းလူၺ်ႈၵၼ်တင်းမၼ်းဢေႃႈ။ မၼ်းၵေႃႈတၵ်းလႆႈၵိၼ်ၶူပ်းလူၺ်ႈၵၼ်တင်းၵဝ်ဢေႃႈ။-

21တီႈၵေႃႉဢၼ်ပႄႉၼႅင်ႇၼၼ်ႉၸိုင်၊ ၵဝ်တၵ်းပၼ်ဢၶႂၢင်ႉ ဢၼ်လႆႈၼင်ႈယူႇလူၺ်ႈၵၼ်တင်းၵဝ် ၵႃႈၼိူဝ်ပလၢင်ႇၵဝ် မိူၼ်ၸိူဝ်ႉၼင်ႇဢၼ် ၵဝ်ပႄႉၼႅင်ႇလႄႈ ၼင်ႈယူႇလူၺ်ႈၵၼ်တင်းပေႃႈၵဝ် ၵႃႈၼိူဝ်ပလၢင်ႇမၼ်းၸဝ်ႈၼၼ်ႉဢေႃႈ။

22ဝီႉၺိၺ်ႇၸဝ်ႈ မီးဢမိင်ႉတီႈၸိူဝ်းၸဝ်ႈတင်းလၢႆ ၸိူဝ်ႉၼင်ႇႁိုဝ်ဝႃႈၼႆ၊ ႁႂ်ႈၵေႃႉဢၼ်မီးႁူၼၼ်ႉ ငိၼ်းသေၵမ်းလူၺ်ႈ။

← Chapter 2 Jump to: Chapter 4 →