Revelation 21

Shan

← Chapter 20 Jump to: Chapter 22 →

1ၵၢင်ႁၢဝ်ဢၼ်မႂ်ႇ ဢိၵ်ႇတင်း လိၼ်မိူင်းဢၼ်မႂ်ႇၵေႃႈ ၵဝ်ႁၼ်ဢေႃႈ။ ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ ၵၢင်ႁၢဝ်မိူဝ်ႈဢွၼ်ၼႆႉ ဢိၵ်ႇတင်း လိၼ်မိူင်းမိူဝ်ႈဢွၼ်ၼႆႉၼၼ်ႉ ၶၢႆႉတီႈၵႂႃႇသဵင်ႈယဝ်ႉ။ ၸႃႉၸဵမ်မိူဝ်ႈၼၼ်ႉလႄႈ ၼမ်ႉသမ်ႇမုၵ်ႉတြႃႇ ဢမ်ႇမီး။-

2ၵဝ်ႁၼ်ဝဵင်းဢၼ်မူတ်းၸၢင်ႇ ဢၼ်ဝႃႈဝဵင်း ယေႇရူႉသလႅမ်ႇ ဢၼ်မႂ်ႇၼၼ်ႉ မႄးႁႅၼ်းဝႆႉမိူၼ်ၸိူဝ်ႉၼင်ႇဢၼ် လုၵ်ႈယိင်းသၢဝ်ဢၼ်သွင်ႇမင်ႇၵလႃႇ ႁၢင်ႈၶိူင်ႈပုၼ်ႈၽူဝ်မၼ်းၼၼ်ႉလႄႈ လုၵ်ႉသေၵႃႈတီႈၽြႃးပဵၼ်ၸဝ်ႈ ၵႃႈၼိူဝ်ၵၢင်ႁၢဝ် လူင်းမႃးဢေႃႈ။-

3ၵဝ်ငိၼ်းသဵင်ဢၼ်ယႂ်ႇၵႃႈ ၼိူဝ်ၵၢင်ႁၢဝ်ၼၼ်ႉ လၢတ်ႈလႄႈဝႃႈ၊ တူၺ်းလူး၊ သုမ်ႉထဵင်ၽြႃးပဵၼ်ၸဝ်ႈ မီးယူႇၼႂ်းၵူၼ်းတင်းလၢႆဢေႃႈ။ မၼ်းၸဝ်ႈတၵ်းၵိင်းဝၢပ်ႈယူႇ လူၺ်ႈၵၼ်တင်းၶဝ်ဢေႃႈ။ ၶဝ်တၵ်းပဵၼ်ၵူၼ်းမၼ်းၸဝ်ႈဢေႃႈ။ ၽြႃးပဵၼ်ၸဝ်ႈတူဝ်ၸဝ်ႈၵဝ်ႇ တၵ်းယူႇလူၺ်ႈၵၼ်တင်းၶဝ်လႄႈ ပဵၼ်ၽြႃးပဵၼ်ၸဝ်ႈၶဝ်ဢေႃႈ။-

4မၼ်းၸဝ်ႈတၵ်းၸဵတ်ႉၼမ်ႉတႃ ဢၼ်မီးၵႃႈတီႈတႃၶဝ်ၼၼ်ႉပႅတ်ႈ တင်းသဵင်ႈတင်းမူတ်းဢေႃႈ။ ၵမ်းလိုၼ်းၽေးတၢင်းတၢႆ ဢမ်ႇလႆႈမီး။ တၢင်းဢၼ်ၸႂ်ဢမ်ႇသႃႇလႄႈ ၶၢင်းၶီၶၢင်းၽၢၼ်၊ တၢင်းဢၼ်ႁွင်ႉသႅၼ်ႇ၊ တၢင်းဢၼ်ယၢပ်ႇ၊ဢၼ်ၽိုတ်ႇၵေႃႈ ဢမ်ႇလႆႈမီး။ လွင်ႈမၼ်းၸမ်ႉ လွင်ႈတၢင်းဢၼ်ယၢမ်ႈပဵၼ်မႃးယဝ်ႉ မိူဝ်ႈဢွၼ်တၢင်းၸိူဝ်းၼၼ်ႉ ၶၢႆႉတီႈၵႂႃႇသဵင်ႈယဝ်ႉ။

5ၸဝ်ႈဢၼ်ၼင်ႈယူႇၵႃႈၼိူဝ်ပလၢင်ႇၸဝ်ႈၼၼ်ႉၵေႃႈ လၢတ်ႈလႄႈဝႃႈ၊ လွင်ႈတၢင်းၵႃႈမီးတင်းသဵင်ႈတင်းလူင်ၸိုင်၊ ၵဝ်ၽၢၼ်ႇသၢင်းႁဵတ်းပဵၼ် ဢၼ်မႂ်ႇ ယဝ်ႉ၊ ဝႃႈၼင်ႇၼႆဢေႃႈ။ ၵမ်းၼၼ်ႉ မၼ်းၸဝ်ႈၵေႃႈမီးဢမိင်ႉလႄႈဝႃႈ၊ တႅမ်ႈဝႆႉတႃႉ။ ၵႂၢမ်းၼႆႉပဵၼ်ၵႂၢမ်းသဵတ်ႈၸႃႇ၊ ၵႂၢမ်းဢၼ်မၢၼ်ႇမႅၼ်ႈ၊ၸိုဝ်ႈၸႂ်ႈယဝ်ႉ၊ ဝႃႈၼင်ႇၼႆဢေႃႈ။

6မၼ်းၸဝ်ႈၵေႃႈ သမ်ႉလၢတ်ႈတီႈၶဝ်လႄႈဝႃႈ၊ လွင်ႈတၢင်းယဝ်ႉတူဝ်ယဝ်ႉ၊ ၵဝ်ပဵၼ် ဢႃႇလႃႇၽႃႉ ဢေႃႈ၊ ဢေႃးမေႇၵႃႉ ၵေႃႈပဵၼ်ဢေႃႈ။ တီႈတႄႇၸႃႉ ဢိၵ်ႇတင်း တီႈသုတ်းၵေႃႈပဵၼ်ဢေႃႈ။ ယင်းဢမ်ႇဢဝ်ၵႃႈမၼ်း၊ၶၼ်မၼ်းလႄႈ ၵဝ်တၵ်းပၼ်ၼမ်ႉဢွၵ်ႇႁူးဢသၢၵ်ႈ တီႈၵေႃႉဢၼ်ယၢၵ်ႇၼမ်ႉၼၼ်ႉဢေႃႈ။-

7ၵေႃႉဢၼ်ပႄႉၼႅင်ႇၼၼ်ႉ တၵ်းလႆႈၶၢမ်ႇဢမူၺ်ႇ လွင်ႈတၢင်းၸိူဝ်းၼႆႉဢေႃႈ။ ၵဝ်တၵ်းပဵၼ်ၽြႃးပဵၼ်ၸဝ်ႈမၼ်းဢေႃႈ။ မၼ်းၵေႃႈတၵ်းပဵၼ်လုၵ်ႈၵဝ်ဢေႃႈ။-

8ၵေႃႉဢၼ်ၸၢင်ႈၵူဝ်ၸၢင်ႈႁႄ၊ ၵေႃႉဢၼ်ဢမ်ႇယုမ်ႇမၢတ်ႈ၊ ၵေႃႉဢၼ်ပဵၼ်ဢၼ်ဝူၺ်ႇဢၼ်ႁင်ႈ၊ ၵေႃႉဢၼ်ဢဝ်ဢသၢၵ်ႈၵူၼ်းတၢႆ၊ ၵေႃႉဢၼ်ႁဵတ်းမေႇထုင်ႇဢၼ်ဢမ်ႇတြႃး၊ ၵေႃႉဢၼ်ၸၢင်ႈၸေႃႉ၊ၸၢင်ႈႁဵတ်းတီႈပိူၼ်ႈ၊ ၵေႃႉဢၼ်ၵူဝ်းၵႂၢႆႇရုၵ်ႈထူႉ၊ ၵေႃႉဢၼ်ယႃႉသဵတ်ႈၸႃႇ တင်းသဵင်ႈတင်းလူင်ၼၼ်ႉၸမ်ႉ၊ တၵ်းလႆႈပုၼ်ႈလႆႈတႃႇ တူဝ်ၸဝ်ႈၵဝ်ႇ ၵႃႈၼႂ်းၼွင်ၽႆး ဢၼ်လေႃးၵၼ်တင်း ၵၢၼ်ႉ ဢၼ်ဝႃႈတၢင်းတၢႆတူႉတီႉယႃႉ ၼၼ်ႉဢေႃႈ၊ ဝႃႈၼင်ႇၼႆဢေႃႈ။

9ၼႂ်းတမၢၼ်ႇၵၢင်ႁၢဝ်ၸဵတ်းပႃး ဢၼ်ပႃးတင်း ၵွၵ်းၸဵတ်းလုၵ်ႈ ဢၼ်တဵမ်ဝႆႉတင်းၽေးတၢမ်ႇ ဢၼ်လိုၼ်းလင်သုတ်း ၸဵတ်းပိူင်ၼၼ်ႉ ပႃးၼိုင်ႈမႃးတၵ်ႉလၢတ်ႈၵဝ်လႄႈဝႃႈ၊ မႃးတႃႉ၊ ၵဝ်တၵ်းၼႄပျႃးလုၵ်ႈယိင်းသၢဝ် ဢၼ်သွင်ႇမင်ႇၵလႃႇ ဢၼ်ဝႃႈ မေးသူဝ်းဢွၼ်ႇ ၼၼ်ႉ တီႈမႂ်းဢေႃႈ၊ ဝႃႈၼင်ႇၼႆသေယဝ်ႉ၊-

10ပႃးတင်းဝီႉၺိၺ်ႇၸဝ်ႈ ဢဝ်ၵဝ်ၵႂႃႇသူင်ႇ ၵႃႈတီႈလွႆဢၼ်ယႂ်ႇသုင်ၼႃႇ သေလႄႈ ၼႄပျႃးဝဵင်း ယေႇရူႉသလႅမ်ႇ ဢၼ်မူတ်းၸၢင်ႇ ဢၼ်ပျေႉၸုမ်ႇတဵမ်ဝႆႉ တင်းမုၼ်ၽြႃးပဵၼ်ၸဝ်ႈလႄႈ လုၵ်ႉသေၵႃႈတီႈၽြႃးပဵၼ်ၸဝ်ႈ လူင်းမႃးၵႃႈၼိူဝ်ၵၢင်ႁၢဝ်ၼၼ်ႉ တီႈၵဝ်ဢေႃႈ။-

11ငဝ်းသၢႆဢရွင်ႇဝဵင်းၼၼ်ႉ မိူၼ်ၸိူဝ်ႉၼင်ႇသႅင်လီ ဢၼ်မျၢတ်ႈၼႃႇသေပိူၼ်ႈ၊ ဢၼ်ပဵၼ်ၸိူဝ်ႉၼင်ႇ ၼၵႃးသွႆႈ ဢၼ်သႂ်လႅင်း၊ ၸိူဝ်ႉၼင်ႇ မၢၵ်ႇႁိၼ်ၸိင်ႇ ဢေႃႈ။-

12လမ်းဝဵင်း ဢၼ်ယႂ်ႇသုင်ၼႃႇ ၵေႃႈ မီးဢေႃႈ။ ၽၵ်းတူ သိပ်းသွင်ႁူးၵေႃႈမီးဢေႃႈ။ ၵႃႈတီႈၽၵ်းတူသိပ်းသွင်ႁူးၼၼ်ႉ မီးတမၢၼ်ႇၵၢင်ႁၢဝ် သိပ်းသွင်ပႃးဢေႃႈ။ ၼႃႇမႃႉၸိုဝ်ႈသဵင်ၵူၼ်း ဢီႉသရေႇလႃႉ သိပ်းသွင်မဵဝ်းၵေႃႈ တႅမ်ႈဝႆႉမီးယူႇၵႃႈၼိူဝ်ၽၵ်းတူ ၸိူဝ်းၼၼ်ႉဢေႃႈ။-

13ၽၵ်းတူၸိူဝ်းၼၼ်ႉၸမ်ႉ မီးတၢင်းဝၼ်းဢွၵ်ႇၽၵ်းတူ သၢမ်ႁူး၊ တၢင်းႁွင်ႇၽၵ်းတူ သၢမ်ႁူး၊ တၢင်းၸၢၼ်းၽၵ်းတူ သၢမ်ႁူး၊ တၢင်းဝၼ်းတူၵ်းၽၵ်းတူ သၢမ်ႁူးဢေႃႈ။-

14တိၼ်လမ်းဝဵင်းၼၼ်ႉ မီးသိပ်းသွင်ထၢပ်ႈ ဢေႃႈ။ ၼႃႇမႃႉၸိုဝ်ႈသဵင်တမၢၼ်ႇၸဝ်ႈ သိပ်းသွင်ပႃးၵေႃႈ တႅမ်ႈဝႆႉမီးယူႇၵႃႈၼိူဝ်တိၼ်လမ်းဝဵင်း ၼၼ်ႉဢေႃႈ။

15ၵေႃႉဢၼ်လၢတ်ႈၵႂၢမ်းတေႃႇၵၼ်တင်းၵဝ်ၼၼ်ႉၸိုင် ပႃးမႆႉဢေႃႈၶမ်း ပုၼ်ႈဢၼ်တၵ်းတႅၵ်ႈ လႅမ်ႈၼိုင်ႈ ႁႂ်ႈလႆႈတႅၵ်ႈတူၺ်းဝဵင်း ဢိၵ်ႇတင်းၽၵ်းတူဝဵင်း တင်းလမ်းဝဵင်းယူႇဢေႃႈ။-

16ဝဵင်းၼၼ်ႉ ပဵၼ်သီႇၸဵင်ႇၶိုင်ႈလႄႈ ၼႃႈယၢဝ်းမၼ်း တင်းၼႃႈပွတ်းမၼ်း ထၢၼ်ႇပဵင်းၵၼ်ဢေႃႈ။ ၵေႃႉဢၼ်ဢဝ်မႆႉဢေႃႈၶမ်း တႅၵ်ႈတူၺ်းဝဵင်းၼၼ်ႉလႄႈ မီး ယူႇၸၼႃႇ ပၢၵ်ႇပၢႆသၢဝ်းၼိုင်ႈ ဢေႃႈ။ ၼႃႈယၢဝ်း၊ ၼႃႈပွတ်း၊ ဢၼ်သုင်ဝဵင်းၼၼ်ႉ ထၢၼ်ႇပဵင်းၵၼ်ဢေႃႈ။

17မၼ်းတႅၵ်ႈတူၺ်းဢၼ်သုင်လမ်းဝဵင်းလႄႈ ၸွမ်းၼင်ႇ သွၵ်ႇၵူၼ်း ဢၼ်ဝႃႈ သွၵ်ႇတမၢၼ်ႇၵၢင်ႁၢဝ်ၼၼ်ႉ မီးပၢၵ်ႇသီႇသိပ်းပၢႆသီႇသွၵ်ႇ ဢေႃႈ။-

18တူဝ်လမ်းဝဵင်းၼၼ်ႉ ပဵၼ်သႅင်ၼၵႃးသွႆႈ ဢေႃႈ။ ဝဵင်းၼၼ်ႉၵေႃႈ ပဵၼ်ၶမ်းၸႅတ်ႈၸႅတ်ႈ ဢၼ်မိူၼ်ၸိူဝ်ႉၼင်ႇၽၢၼ်ႇ၊ၼင်ႇၸမ်ႈ ဢၼ်သႂ်လႅင်း ၼၼ်ႉဢေႃႈ။-

19တိၼ်လမ်းဝဵင်းၸိူဝ်းၼၼ်ႉ ပျေႉၸုမ်ႇတင်း သႅင်လီ ၵူႈၸိူဝ်ႉၵူႈမဵဝ်းဢေႃႈ။ တိၼ်ပထမႃႉၸမ်ႉ ပဵၼ်သႅင်ၼၵႃးသွႆႈ ဢေႃႈ။ တိၼ်တူႉတီႉယႃႉၸမ်ႉ ပဵၼ်သႅင်ၼီႇလႃႇ ဢေႃႈ။ တိၼ်တႃႉတီႉယႃႉၸမ်ႉ ပဵၼ်သႅင်မႁူႇရႃႇ ဢေႃႈ။ တိၼ်ၸတုၵ်ႉထႃႉၸမ်ႉ ပဵၼ်သႅင်မျႃႉ ဢေႃႈ။-

20တိၼ်ပိၼ်ႇၸမႃႉၸမ်ႉ ပဵၼ်သႅင်ၸၢႆးၶႃးယွတ်ႇ ဢေႃႈ။ တိၼ်သႃႉထမႃႉၸမ်ႉ ပဵၼ်သႅင်လႅင် ဢေႃႈ၊ တိၼ်သတ်ႉတမႃႉၸမ်ႉ ပဵၼ်သႅင် ၶရူႉသူႉလိတ်ႉ ဢေႃႈ။ တိၼ်ဢႃႉထမ်ႇမႃႉၸမ်ႉ ပဵၼ်သႅင်ၶဵဝ် ဢေႃႈ။ တိၼ်ၼဝမႃႉၸမ်ႉ ပဵၼ်သႅင်ဢုၵ်ႉသၽူႉရႃႇ ဢေႃႈ။ တိၼ်တႃႉသမႃႉၸမ်ႉ ပဵၼ်သႅင်ၶရူႇသူႉပြတ်ႈ ဢေႃႈ။ တိၼ်ဢေႇၵႃႉတႃႉသမႃႉၸမ်ႉ ပဵၼ်သႅင်ဝႃႇၵိၼ်ႇသူႉ ဢေႃႈ။ တိၼ်တႂႃႇတႃႉသမႃႉၸမ်ႉ ပဵၼ်သႅင်မွၵ်ႇမၢၵ်ႇၶိူဝ် ဢေႃႈ။-

21မႂ်ၽၵ်းတူ သိပ်းသွင်မႂ် ၸိူဝ်းၼၼ်ႉ ပဵၼ်ပူးလႄး သိပ်းသွင်ၶႅပ်း ဢေႃႈ။ မႂ်ၽၵ်းတူႁင်းၽႂ်ႁင်းမၼ်း ပဵၼ်ပူးလႄး ယေႈမႂ်ယေႈၶႅပ်းဢေႃႈ။ သဵၼ်ႈတၢင်းလူင်ဝဵင်းၸိုင် ပဵၼ်ၶမ်းၸႅတ်ႈၸႅတ်ႈ ၸိူဝ်ႉၼင်ႇၽၢၼ်ႇ၊ၼင်ႇၸမ်ႈ ဢၼ်သႂ်လႅင်းၼၼ်ႉဢေႃႈ။-

22ၼႂ်းဝဵင်းၼၼ်ႉ ၵဝ်ဢမ်ႇႁၼ် ပိၵ်ႈမၢၼ်ႇၸဝ်ႈ။ လွင်ႈမၼ်းၸမ်ႉ ထႃႇဝရႃႉၸဝ်ႈၽြႃးပဵၼ်ၸဝ်ႈ ဢၼ်ပျေႉၸုမ်ႇတင်း ဢၼၼ်ႇတႃႉတၼ်းၶူဝ်း ဢိၵ်ႇတင်း သူဝ်းဢွၼ်ႇၼၼ်ႉ ပဵၼ်ပိၵ်ႈမၢၼ်ႇဝဵင်းၼၼ်ႉဢေႃႈ။-

23ဝဵင်းၼၼ်ႉ ဢမ်ႇမီးဢလူဝ်ႇငဝ်းဢရွင်ႇ ၵၢင်ဝၼ်း တင်းငဝ်းဢရွင်ႇ လိူၼ်။ လွင်ႈမၼ်းၸမ်ႉ မုၼ်ၽြႃးပဵၼ်ၸဝ်ႈ ႁႂ်ႈႁိူဝ်ႈလႅင်းယူႇ ၵႃႈၼႂ်းဝဵင်းၼၼ်ႉဢေႃႈ။ သူဝ်းဢွၼ်ႇၵေႃႈပဵၼ်ဝၢၼ်ႇၽႆးတဵၼ်း ဝဵင်းၼၼ်ႉယူႇဢေႃႈ။ ၵူၼ်းၵူႈၸိူဝ်ႉၵူႈမဵဝ်း တၵ်းဢိင်ပိုင်ႈဢၼ်လႅင်းဝဵင်းၼၼ်ႉ သေလႄႈ ၵႂႃႇမႃးဢေႃႈ။-

24ၶုၼ်ႁေႃၶမ်းလေႃးၵီႇတင်းလၢႆၵေႃႈ တၵ်းပႃးဢဝ်မုၼ်သရေႇတူဝ်ၸဝ်ႈၵဝ်ႇမႃး ၵႃႈၼႂ်းဝဵင်းၼၼ်ႉဢေႃႈ။-

25ၼႂ်းၶိင်ႇၵၢင်ဝၼ်း ဢမ်ႇၸၢင်ႈ ဢိုတ်းၽၵ်းတူဝဵင်းၼၼ်ႉ။ ၶိင်ႇၵၢင်ၶိုၼ်းၸမ်ႉ ဢမ်ႇမီး။-

26ၶဝ်တၵ်းပႃးဢဝ် မုၼ်သရေႇၵူၼ်း ၵူႈၸိူဝ်ႉၵူႈမဵဝ်းတင်းလၢႆ မႃးၵႃႈၼႂ်းဝဵင်းၼၼ်ႉဢေႃႈ။-

27လွင်ႈတၢင်းဢၼ်ၵူဝ်ႈဢၼ်ၵိူၵ်ႇ၊ လွင်ႈတၢင်းဢၼ်ဝူၺ်ႇဢၼ်ႁင်ႈ၊ လွင်ႈတၢင်းဢၼ်ယႃႉသဵတ်ႈၸႃႇ သေၸိူဝ်ႉသေပိူင် ဢမ်ႇလႆႈၶဝ်ႈၸူးလႄႈ ၶဝ်ၸိူဝ်းဢၼ်ၶဝ်ႈပႃး ၼႂ်းၸရၢင်းၽိုၼ်လိၵ်ႈဢသၢၵ်ႈသူဝ်းဢွၼ်ႇ ၼၼ်ႉၵူၺ်း တၵ်းလႆႈၶဝ်ႈၸူးဢေႃႈ။

← Chapter 20 Jump to: Chapter 22 →