Revelation 18

Shan

← Chapter 17 Jump to: Chapter 19 →

1လိုၼ်းၼၼ်ႉ ၵဝ်ႁၼ်တမၢၼ်ႇၵၢင်ႁၢဝ်တၢင်ႇပႃး ဢၼ်ပျေႉၸုမ်ႇတင်းတၼ်းၶူဝ်းဢၼ်ယႂ်ႇၼႃႇၼၼ်ႉ လုၵ်ႉသေၵႃႈတီႈၵၢင်ႁၢဝ်လူင်းမႃးဢေႃႈ။ ၵွပ်ႈပိူဝ်ႈသၢႆဢရွင်ႇမၼ်းၼၼ်ႉလႄႈ လိၼ်မိူင်းႁိူဝ်ႈလႅင်းယူႇဢေႃႈ။-

2မၼ်းႁဵတ်းတင်းသဵင်ဢၼ်ႁႅင်းၼႃႇႁွင်ႉသႅၼ်ႇလႄႈဝႃႈ၊ ဝဵင်းလူင် ပႃႇပူႉလုၼ်ႇ လူမ်ႉပင်းယဝ်ႉ။ လူမ်ႉပင်းယဝ်ႉ။ ပဵၼ်တီႈယူႇၽီႁၢႆႉၵႂႃႇယဝ်ႉ။ ပဵၼ်ၶုမ်ပဵၼ်ႁူးဝီႉၺိၺ်ႇ ဢၼ်ၵူဝ်ႈၵိူၵ်ႇၵူႈၸိူဝ်ႉၵူႈမဵဝ်းၵႂႃႇယဝ်ႉ။ ပဵၼ်တီႈဢိင်တီႈပိုင်ႈ ၼူၵ်ႉဢၼ်ၵူဝ်ႈၵိူၵ်ႇလႄႈ လီႁင်ႈၵူႈၸိူဝ်ႉၵူႈမဵဝ်းၵႂႃႇယဝ်ႉ။-

3လွင်ႈမၼ်းၸမ်ႉ ၵူၼ်းမဵဝ်းတင်းသဵင်ႈတင်းလူင် ဢွၼ်ၵၼ်ၵိၼ်ၼမ်ႉၸပိတ်ႈမေႇထုင်ႇ ဢၼ်ဢမ်ႇတြႃးမၼ်းယဝ်ႉ။ ၶုၼ်ႁေႃၶမ်းလေႃးၵီႇတင်းလၢႆ ႁဵတ်းမေႇထုင်ႇဢၼ်ဢမ်ႇတြႃး လူၺ်ႈၵၼ်တင်းမၼ်းယဝ်ႉ။ ၸဝ်ႈၵုၼ်ႇၸဝ်ႈသိၼ်လေႃးၵီႇတင်းလၢႆၵေႃႈ ၸၢင်ႈမၢၵ်ႈၸၢင်ႈမီး ၵွပ်ႈပိူဝ်ႈၵႃႇမၵုင်ႇၸေးၸိမ်ႇ တၢင်းဢၼ်မၼ်းလိူင်ႇၸႂ်ၼၼ်ႉယဝ်ႉ၊ ဝႃႈၼင်ႇၼႆဢေႃႈ။

4ၵဝ်ငိၼ်းသဵင်တၢင်ႇၸိူဝ်ႉတၢင်ႇဢၼ် ၵႃႈၼိူဝ်ၵၢင်ႁၢဝ်လႄႈလၢတ်ႈဝႃႈ၊ ၵူၼ်းမဵဝ်းၵဝ်ဢိူၺ်း၊ ဢွၼ်ၵၼ်ဢွၵ်ႇသေၵႃႈၼႂ်းမၼ်း ႁႂ်ႈလႆႈၵၢင်းလွတ်ႈ တင်းတၢင်းဢၼ်သိူၵ်ႈသမ်ႇၵၼ်တင်းဢပႅတ်ႈမၼ်း ဢိၵ်ႇတင်းတၢင်းဢၼ် ၶၢမ်ႇၽေးတၢမ်ႇမၼ်းၼၼ်ႉတႃႉ။-

5လွင်ႈမၼ်းၸမ်ႉ ဢပႅတ်ႈမၼ်းတင်းလၢႆ ၶိုတ်းထိုင်ၵၢင်ႁၢဝ်ပုၼ်ႉလႄႈ ၽြႃးပဵၼ်ၸဝ်ႈ ၶုၵ်းၸႂ်လႆႈ လွင်ႈတၢင်းဢၼ်ဢမ်ႇတြႃးမၼ်းၸိူဝ်းၼၼ်ႉယဝ်ႉ။-

6တွပ်ႇတႅၼ်းပၼ်ၸွမ်းၵႃႈၼင်ႇဢၼ် မၼ်းတွပ်ႇတႅၼ်းပၼ်ဢၵျူဝ်းဢပႅတ်ႈၼၼ်ႉတီႈမၼ်းတႃႉ။ ထၢပ်ႈထႅင်ႈသွင်ပုၼ်ႈလႄႈ ၸီႇယၢင်ႇၸွမ်းၵႃႈၼင်ႇ တၢင်းၵမ်တၢင်းၵျၢင်ႉမၼ်းၼၼ်ႉတႃႉ။ လိူဝ်တွၼ်းသွင်ပုၼ်ႈသေလႄႈ ထွၵ်ႇႁိုဝ်ႈပၼ် ပုၼ်ႈမၼ်းၵႃႈၼႂ်းၵွၵ်းဢၼ် မၼ်းထွၵ်ႇႁိုဝ်ႈၼၼ်ႉတႃႉ။-

7ၸွမ်းၵႃႈၼင်ႇဢၼ် မၼ်းယွင်ႈယေႃးတူဝ်ၸဝ်ႈၵဝ်ႇလႄႈ မူၼ်ႈပျေႃႇၼႂ်းၵႃႇမၵုင်ႇၼၼ်ႉ၊ ႁႂ်ႈဝူၺ်ႇတၼႃႇ တၢင်းဢၼ်ၼိၵ်ႈၸၢၵ်ႈငႅၼ်းသႄး ဢိၵ်ႇတင်းတၢင်းဢၼ်ၸႂ်ဢမ်ႇသႃႇလႄႈ ၶၢင်းၶီၶၢင်းၽၢၼ် ပဵၼ်ၵႃႈတီႈမၼ်းတႃႉ။ လွင်ႈမၼ်းၸမ်ႉ မၼ်းထၢင်ႇၼႂ်းၸႂ်လႄႈဝႃႈ ၵဝ်ၸမ်ႉပဵၼ်ၼၢင်းႁေႃၶမ်းဢေႃႈ။ ဢမ်ႇပဵၼ်မႄႈမူၵ်းမႄႈမၢႆႈ၊ ဢမ်ႇလႆႈႁူႉ တၢင်းဢၼ်ၸႂ်ဢမ်ႇသႃႇလႄႈ ၶၢင်းၶီၶၢင်းၽၢၼ်ၼၼ်ႉ၊ ဝႃႈၼင်ႇၼႆဢေႃႈ။-

8ပိူဝ်ႈၼႆလႄႈၼႂ်းဝၼ်းလဵဝ်ၵူၺ်း ၽေးတၢမ်ႇမၼ်းတင်းလၢႆ ဢၼ်ဝႃႈ ၽေးတၢင်းတၢႆ၊ ၽေးတၢင်းဢၼ်ၸႂ်ဢမ်ႇသႃႇလႄႈ ၶၢင်းၶီၶၢင်းၽၢၼ်၊ ၽေးတၢင်းဢၼ်ဢိုပ်းယၢၵ်ႈၸိူဝ်းၼၼ်ႉ တၵ်းႁွတ်ႈထိုင်ၵႃႈၼိူဝ်မၼ်းလႄႈ မၼ်းတၵ်းလႆႈၶၢမ်ႇ တၢင်းဢၼ်မႆႈၽႆးသုတ်းပႅတ်ႈဢေႃႈ။

9ၶုၼ်ႁေႃၶမ်းလေႃးၵီႇ ဢၼ်ႁဵတ်းမေႇထုင်ႇ ဢၼ်ဢမ်ႇတြႃးလူၺ်ႈၵၼ်တင်းမၼ်းလႄႈ မူၼ်ႈပျေႃႇၼႂ်းၵႃႇမၵုင်ႇၸိူဝ်းၼၼ်ႉ မိူဝ်ႈဢၼ်ႁၼ်ၵႂၼ်းၽႆးတီႈဢၼ်မၼ်းမႆႈၽႆးၼၼ်ႉၸိုင်၊-

10တၵ်းၸုၵ်းယူႇတီႈဢၼ်ၵႆ ၵွပ်ႈပိူဝ်ႈဢၼ်ၵူဝ်ႁႄဝူၺ်ႇတၼႃႇ တၢင်းဢၼ်ၼိၵ်ႈၸၢၵ်ႈငႅၼ်းသႄး ဢၼ်မၼ်းလႆႈၶၢမ်ႇၼၼ်ႉယူႇသေလႄႈ ဢွၼ်ၵၼ်ႁွင်ႉႁႆႈလႄႈ ၸႂ်ဢမ်ႇသႃႇ ၶၢင်းၶီၶၢင်းၽၢၼ် ၵွပ်ႈပိူဝ်ႈမၼ်းလႄႈဝႃႈ၊ ၸိုင်မၼ်းပဵၼ်ၸိူဝ်ႉၼင်ႇၼႆ၊ ၸိုင်မၼ်းပဵၼ်ၸိူဝ်ႉၼင်ႇၼႆ။ ဝဵင်းလူင် ပႃႇပူႉလုၼ်ႇ ဢိူၺ်း၊ ဝဵင်းဢၼ်ႁူင်ႁၢင်းဢိူၺ်း၊ ၼႂ်းၼႃႇရီႇၼိုင်ႈၵူၺ်း တၢင်းဢၼ်ၸီႇယၢင်ႇဢပႅတ်ႈမႂ်း ႁွတ်ႈထိုင်ၵႃႈၼိူဝ်မႂ်းယဝ်ႉလူင်ပႄႇ၊ ဝႃႈၼင်ႇၼႆဢေႃႈ။

11မိူၼ်ၸိူဝ်ႉၼင်ႇၼၼ် ၸဝ်ႈၵုၼ်ႇၸဝ်ႈသိၼ်လေႃးၵီႇတင်းလၢႆ တၵ်းဢွၼ်ၵၼ်ႁွင်ႉႁႆႈလႄႈ ၸႂ်ဢမ်ႇသႃႇၶၢင်းၶီၶၢင်းၽၢၼ်ယူႇဢေႃႈ။ လွင်ႈမၼ်းၸမ်ႉ ၵမ်းလိုၼ်း ၽူႈလႂ်တၵ်းဢမ်ႇလႆႈသိုဝ်ႉဢဝ်ဢုၵ်ႉၸႃႇ တၢင်းဢၼ်ၶဝ်ၵႃႉၶဝ်ၶၢႆဢၼ်ဝႃႈ-

12ၶမ်း၊ ငိုၼ်း၊ သႅင်လီ၊ ပူးလႄး၊ ပိၵ်ႈၶျေႃး၊ ၶတီႈပႃႇ၊ ၽႄး၊ ၽႃႈလႅင်၊ မႆႉထိၼ်ႇၵူႈမဵဝ်း၊ ၶိူင်ႈငႃးၸၢင်ႉၵူႈမဵဝ်း၊ ၶိူင်ႈမႆႉဢၼ်လီၵူႈမဵဝ်း၊ ၶိူင်ႈတွင်းလိူင်၊ ၶိူင်ႈလဵၵ်း၊ ၶိူင်ႈမၢၵ်ႇႁိၼ်ၽိူၵ်ႇ၊-

13ၵဵင်ႁွမ်၊ ဢမေႇမုင်ႇ၊ ၼၢမ်ႇသႃႇၵူႈမဵဝ်း၊ ၼမ်ႉမၼ်းႁွမ်၊ လေႃႇပၢၼ်ႇ ၊ ၼမ်ႉၸပိတ်ႈ၊ ၼမ်ႉမၼ်း၊ ၽွင်ၶဝ်ႈမုၼ်း၊ ၶဝ်ႈသၢၼ်ၵျုင်ႇ၊ ဝူဝ်း၊ သူဝ်း၊ မႃႉ၊ ရထႃး၊ ၶႃႈ၊ ဝီႉၺိၺ်ႇၵူၼ်းတင်းလၢႆၸိူဝ်းၼၼ်ႉ။-

14မၢၵ်ႇဢၼ်ၸႂ်မႂ်းၸပ်းၸွႆးၼႃႇလူင်လၢင်ၸိူဝ်းၼၼ်ႉၵေႃႈ ႁၢႆၵႂႃႇသဵင်ႈယဝ်ႉ။ ၶိူင်ႈဢၼ်ပီးဢၼ်မၼ်း၊ ၶိူင်ႈဢၼ်သၢင်ႇထုၵ်ႇၵႃႈမီး တင်းသဵင်ႈတင်းလူင် ႁၢႆၵႂႃႇသဵင်ႈယဝ်ႉ။ ၵမ်းလိုၼ်းဢမ်ႇလႆႈထူပ်းလႆႈႁၼ်။

15ၸဝ်ႈၵုၼ်ႇၸဝ်ႈသိၼ် ဢၼ်ဢိင်ပိုင်ႈမၼ်းလႄႈ ၸၢင်ႈလႆႈငိုၼ်းၵွပ်ႈပိူဝ်ႈဢၼ်သိုဝ်ႉဢၼ်ၶၢႆၶိူင်ႈ ၸိူဝ်ႉၼင်ႇၼၼ်ၸိူဝ်းၼၼ်ႉ တၵ်းၸုၵ်းယူႇတီႈဢၼ်ၵႆ ၵွပ်ႈပိူဝ်ႈဢၼ်ၵူဝ်ႁႄ ဝူၺ်ႇတၼႃႇ တၢင်းဢၼ်ၼိၵ်ႈၸၢၵ်ႈငႅၼ်းသႄး ဢၼ်မၼ်းလႆႈၶၢမ်ႇၼၼ်ႉယူႇသေလႄႈ ဢွၼ်ၵၼ်ႁွင်ႉႁႆႈလႄႈ ၸႂ်ဢမ်ႇသႃႇ ၶၢင်းၶီၶၢင်းၽၢၼ်လႄႈဝႃႈ-

16ၸိုင်မၼ်းပဵၼ်ၸိူဝ်ႉၼင်ႇၼႆ၊ ၸိုင်မၼ်းပဵၼ်ၸိူဝ်ႉၼင်ႇၼႆ။ ဝဵင်းလူင်ဢၼ်ၼုင်ႈမႆႈပိၵ်ႈၶျေႃး ဢိၵ်ႇတင်းၶူဝ်းလႅင်တင်းၶူဝ်းၵမ်ႇလႄႈ ႁၢင်ႈၶိူင်ႈၶမ်း၊ ၶိူင်ႈသႅင်လီ၊ ၶိူင်ႈပူးလႄးၼႆႉ၊-

17ၼႂ်းၼႃႇရီႇၼိုင်ႈၵူၺ်းလႄႈ ၸေးၸိမ်ႇဢၼ်ယႂ်ႇၼႃႇထၢၼ်ႇၼႆႉ လူႉလႅဝ်ယဝ်ႉလူင်ပႄႇ၊ ဝႃႈၼင်ႇၼႆဢေႃႈ။ ၵႄႇႁိူဝ်းသၢင်းၽေႃးတင်းသဵင်ႈတင်းလူင်၊ ၶဝ်ၸိူဝ်းဢၼ်ၶၢမ်ႈၼမ်ႉၵႂႃႇ ၵူႈတီႈၵူႈလႅၼ်တင်းသဵင်ႈတင်းလူင်၊ ၵူၼ်းႁိူဝ်းသၢင်းၽေႃးတင်းလၢႆ၊ ဢိၵ်ႇတင်းၸဝ်ႈၵုၼ်ႇၸဝ်ႈသိၼ်ပၢင်ႇလၢႆႇ ၵႃႈမီးၸိူဝ်းၼၼ်ႉ တၵ်းၸုၵ်းယူႇတီႈဢၼ်ၵႆလႄႈ၊-

18မိူဝ်ႈဢၼ်ႁၼ်ၵႂၼ်းၽႆး တီႈဢၼ်မၼ်းမႆႈၽႆးၼၼ်ႉၸိုင် တၵ်းႁွင်ႉသႅၼ်ႇလႄႈဝႃႈ၊ ဝဵင်းဢၼ်လႂ်တၵ်းမိူၼ်ၵၼ်တင်းဝဵင်းၼႆႉ၊ ဝႃႈၼင်ႇၼႆဢေႃႈ။-

19ၶဝ်ၼၼ်ႉ တၵ်းဢဝ်မုၼ်ႈလိၼ်ပိုၼ်သႂ်ႇၵႃႈၼိူဝ်ႁူဝ် တူဝ်ၸဝ်ႈၵဝ်ႇယူႇ၊ ႁွင်ႉႁႆႈလႄႈ ၸႂ်ဢမ်ႇသႃႇ ၶၢင်းၶီၶၢင်းၽၢၼ်ယူႇသေလႄႈဝႃႈ၊ ၸိုင်မၼ်းပဵၼ်ၸိူဝ်ႉၼင်ႇၼႆ၊ ၸိုင်မၼ်းပဵၼ်ၸိူဝ်ႉၼင်ႇၼႆ။ ဝဵင်းလူင်ဢၼ်ဢဝ်ၸေးၸိမ်ႇတူဝ်ၸဝ်ႈၵဝ်ႇ ပၼ်တီႈၶဝ်ၸိူဝ်းဢၼ်ဢုပ်ႉပိူင်ႇႁိူဝ်းသၢင်းၽေႃး ဢၼ်ၶၢမ်ႈပၢင်ႇလၢႆႇလႄႈ ႁႂ်ႈၸၢင်ႈလႆႈငိုၼ်းၼၼ်ႉၼႆႉ၊ ၼႂ်းၼႃႇရီႇၼိုင်ႈၵူၺ်း လူႉလႅဝ်ယဝ်ႉလူင်ပႄႇ၊ ဝႃႈၼင်ႇၼႆဢေႃႈ။

20ၸႃႉၸဵမ်ၵၢင်ႁၢဝ်လႄႈ ၵူၼ်းမူတ်းၸၢင်ႇ ဢိၵ်ႇတင်းတမၢၼ်ႇၸဝ်ႈ တင်းပရေႃးၽႅတ်ႈၶဝ်ဢိူၺ်း၊ တူၺ်းမၼ်းလႄႈ သိူဝ်းပျေႃႇတႃႉ။ ၽြႃးပဵၼ်ၸဝ်ႈယူႇၽၢႆႇသူသေလႄႈ ၸီႇယၢင်ႇတြႃးတီႈမၼ်းယဝ်ႉ၊ ဝႃႈၼင်ႇၼႆဢေႃႈ။-

21တမၢၼ်ႇၵၢင်ႁၢဝ် ဢၼ်ႁႅင်းယႂ်ႇၼႃႇပႃးၼိုင်ႈ ယွင်ႈဢဝ်မၢၵ်ႇႁိၼ် ဢၼ်မိူၼ်ၸိူဝ်ႉၼင်ႇမၢၵ်ႇႁိၼ်လူၺ်ၼၼ်ႉသေလႄႈ၊ ထိမ်ႈတူၵ်းသႂ်ႇၵႃႈၼႂ်းပၢင်ႇလၢႆႇသေယဝ်ႉ လၢတ်ႈလႄႈဝႃႈ၊ မိူၼ်ၸိူဝ်ႉၼင်ႇၼၼ် ဝဵင်း ပႃႇပူႉလုၼ်ႇ တၵ်းလႆႈၶၢမ်ႇ တၢင်းဢၼ်ဢဝ်တင်းႁႅင်းဢၼ်ယႂ်ႇၼႃႇထိမ်ႈတူၵ်းသႂ်ႇလႄႈ ၵမ်းလိုၼ်း ဢမ်ႇလႆႈပေႃႇလႆႈမီး။-

22သဵင်ၵေႃႉဢၼ်လဵတ်းတိင်ႇ၊ ၵေႃႉဢၼ်ႁႆႇသဵင်ဢူၼ်ႈသဵင်ဢွၼ်ႇ၊ ၵေႃႉဢၼ်ပဝ်ႇပီႇပဝ်ႇၼႄး၊ ၵေႃႉဢၼ်ပဝ်ႇၼႄးၶရႃႇ ၸိူဝ်းၼၼ်ႉၵေႃႈ ၵမ်းလိုၼ်း ဢမ်ႇလႆႈလင်လႆႈမေႃး ၵႃႈၼႂ်းမႂ်း။ ၶဝ်ၸိူဝ်းဢၼ် မေႃတိၼ်မေႃမိုဝ်းၵေႃႈ ၵမ်းလိုၼ်း ဢမ်ႇလႆႈပေႃႇလႆႈမီး ၵႃႈၼႂ်းမႂ်းသေၵေႃႉသေၵူၼ်း။ သဵင်လူၺ်ၶဝ်ႈၵေႃႈ ၵမ်းလိုၼ်း ဢမ်ႇလႆႈႁူၼ်ႈလႆႈမေႃး ၵႃႈၼႂ်းမႂ်း။-

23ဢၼ်လႅင်းဝၢၼ်ႇၽႆးတဵၼ်းၵေႃႈ ၵမ်းလိုၼ်း ဢမ်ႇလႆႈႁိူဝ်ႈလႆႈလႅင်း ၵႃႈၼႂ်းမႂ်း။ သဵင်ၽူႈၸၢႆး ၽူႈယိင်း သွင်ႇမင်ႇၵလႃႇၵေႃႈ ၵမ်းလိုၼ်း ဢမ်ႇလႆႈငိၼ်း ၵႃႈၼႂ်းမႂ်း။ လွင်ႈမၼ်းၸမ်ႉ ၸဝ်ႈၵုၼ်ႇၸဝ်ႈသိၼ်မႂ်းၸိူဝ်းၼၼ်ႉ ပဵၼ်မူးမၢတ်ႈၽွင်ႈမိူင်းလေႃးၵီႇယဝ်ႉ။ ၵူၼ်းၵူႈၸိူဝ်ႉၵူႈမဵဝ်းၼၼ်ႉ လႆႈၶၢမ်ႇတၢင်းဢၼ်ပႅတ်ႉလႅၼ် ၵွပ်ႈပိူဝ်ႈပရီႉယႄႇ တၢင်းဢၼ်မႂ်းၸေႃးမႂ်းႁဵတ်းၼၼ်ႉယဝ်ႉ၊ ဝႃႈၼင်ႇၼႆဢေႃႈ။-

24လိူတ်ႈပရေႃးၽႅတ်ႈ ဢိၵ်ႇတင်း လိူတ်ႈၵူၼ်းမူတ်းၸၢင်ႇတင်းလၢႆ တင်းလိူတ်ႈၵူၼ်းၵႃႈဢၼ်ဢဝ်တၢႆ ၵႃႈၼိူဝ်လိၼ်မိူင်းၼႆႉ တင်းသဵင်ႈတင်းလူင်ၼၼ်ႉၸိုင် ထူပ်းႁၼ်ၵႃႈၼႂ်းဝဵင်းၼၼ်ႉဢေႃႈ။

← Chapter 17 Jump to: Chapter 19 →