Revelation 9

Shan

← Chapter 8 Jump to: Chapter 10 →

1မိူဝ်ႈဢၼ်တမၢၼ်ႇၵၢင်ႁၢဝ် ပိၼ်ႇၸမႃႉ ပဝ်ႇၼႄးၶရႃႇၼၼ်ႉၸိုင် ၵဝ်ႁၼ်လၢဝ်လုၵ်ႈၼိုင်ႈ လုၵ်ႉသေၵႃႈၼိူဝ်ၵၢင်ႁၢဝ် တူၵ်းလူင်းၵႃႈတီႈလိၼ်မိူင်းဢေႃႈ။ မၼ်းၼၼ်ႉၵေႃႈ လႆႈၶၢမ်ႇဢဝ်သေႃးၶုမ်သေႃးႁူး ဢၼ်လိုၵ်ႉၼႃႇသေပိူၼ်ႈၼၼ်ႉယဝ်ႉ။-

2မိူဝ်ႈဢၼ်မၼ်း ၽုၺ်ႇၶုမ်ၽုၺ်ႇႁူး ဢၼ်လိုၵ်ႉၼႃႇသေပိူၼ်ႈၼၼ်ႉယဝ်ႉၼၼ်ႉၸိုင် ဢၢႆၵႂၼ်းမိူၼ်ၸိူဝ်ႉၼင်ႇ ဢၢႆၵႂၼ်းမုၵ်ႉၽႆးဢၼ်ယႂ်ႇၼႃႇ ဢွၵ်ႇသေၵႃႈၼႂ်းၶုမ်ၼႂ်းႁူးၼၼ်ႉမႃးဢေႃႈ။ ၵွပ်ႈပိူဝ်ႈၵႂၼ်းၽႆး ၼႂ်းၶုမ်ၼႂ်းႁူးၼၼ်ႉလႄႈ ၵၢင်ဝၼ်းတင်းဢႃႇၵႃႇသႃႉၵၢင်ႁၢဝ် ပဵၼ်ဢၼ်လပ်းသိင်ႇၵႂႃႇဢေႃႈ။-

3မႅင်းၵႅင်းတင်းလၢႆ ဢွၵ်ႇသေၵႃႈၼႂ်းၵႂၼ်းၽႆးၼၼ်ႉ ၶိုၼ်ႈၵႃႈၼိူဝ်လိၼ်မိူင်းလႄႈ လႆႈတၼ်းၶူဝ်းၸိူဝ်ႉၼင်ႇတၼ်းၶူဝ်းမႅင်းငေႃး ၵႃႈၼိူဝ်လိၼ်ၼႆႉဢေႃႈ။-

4ၶဝ်လႆႈၶၢမ်ႇဢဝ်ပိင်းၺၢပ်ႈ လွင်ႈဢၼ်ပႄႇဝႆႉသေ ၸႃႉၸဵမ်ယိူဝ်ႈယႃႈ ၵႃႈၼိူဝ်လိၼ်မိူင်းလႄႈ လွင်ႈတၢင်းဢၼ်လိပ်းဢၼ်ၶဵဝ် ဢိၵ်ႇတင်း တူၼ်ႈမႆႉတင်းလၢႆသေလႄႈ တၵ်းလႆႈၼိၵ်ႈၸၢၵ်ႈငႅၼ်းသႄး ၶဝ်ၸိူဝ်းဢၼ်ဢမ်ႇလႆႈၶၢမ်ႇ တၢင်းဢၼ်တွၵ်ႇတၼ်းသိၵ်ႈၽြႃးပဵၼ်ၸဝ်ႈ တီႈၼႃႈၽၢၵ်ႇၼၼ်ႉၵူၺ်းဢေႃႈ။-

5ၶဝ်ဢမ်ႇလႆႈဢၶႂၢင်ႉ ဢၼ်လႆႈဢဝ်ၶဝ်ၼၼ်ႉတၢႆလႄႈ မီးဢၶႂၢင်ႉဢၼ်တၵ်းလႆႈ ႁႂ်ႈပဵၼ်ဝူၺ်ႇတၼႃႇဢၼ်ယႂ်ႇၼႃႇ ႁႃႈလိူၼ် တဵမ်တဵမ်ဢေႃႈ။ ဝူၺ်ႇတၼႃႇဢၼ်ၶဝ်ႁႂ်ႈပဵၼ်ၼၼ်ႉၸမ်ႉ ပဵၼ်ၸိူဝ်ႉၼင်ႇဝူၺ်ႇတၼႃႇ ဢၼ်မႅင်းငေႃးၸၢင်ႈၸီႈၵူၼ်းၼၼ်ႉဢေႃႈ။

6ၼႂ်းၶိင်ႇၵႃႇလႃႉမိုဝ်ႉဝၼ်းၼၼ်ႉ ၵူၼ်းတင်းလၢႆ တၵ်းႁႃတၢင်းတၢႆဢေႃႈ။ ႁႃသေၵေႃႈဢမ်ႇထူပ်းဢမ်ႇလႆႈ။ ပိၵ်ႉသမ်ႉၶႂ်ႈတၢႆၼႃႇလူင်လၢင်သေၵေႃႈ ၶုၼ်တၢႆတၵ်းလႅၼ်ႈပၢႆႈပႅတ်ႈၶဝ်ၵႂႃႇသေဢေႃႈ။

7ႁၢင်ႈၽၢင်မႅင်းၵႅင်းၸိူဝ်းၼၼ်ႉ၊ မိူၼ်ၸိူဝ်ႉၼင်ႇႁၢင်ႈၽၢင် မႃႉဢၼ်မႄးႁႅၼ်းဝႆႉ ပုၼ်ႈဢၼ်တၵ်းတိုၵ်းသိုၵ်းၼၼ်ႉဢေႃႈ။ ၵႃႈၼိူဝ်ႁူဝ်ၶဝ်ၵေႃႈ မိူၼ်ၸိူဝ်ႉၼင်ႇႁၢင်ႈတိုဝ်းသရၽူႇၶမ်းဝႆႉဢေႃႈ။ ၼႃႈၶဝ်ၵေႃႈ ပဵၼ်ၸိူဝ်ႉၼင်ႇၼႃႈၵူၼ်းဢေႃႈ။-

8ၶူၼ်ႁူဝ်ၶဝ်ၵေႃႈ ပဵၼ်ၸိူဝ်ႉၼင်ႇ ၶူၼ်ႁူဝ်ၽူႈယိင်းဢေႃႈ။ ၶဵဝ်ႈၶဝ်ၵေႃႈ ပဵၼ်ၸိူဝ်ႉၼင်ႇၶဵဝ်ႈသၢင်ႇသီႈဢေႃႈ။-

9ၶိူင်ႈဢၼ်ႁႄႉဢူၵ်းၶဝ်ၵေႃႈ ပဵၼ်ၸိူဝ်ႉၼင်ႇၶိူင်ႈလဵၵ်းဢၼ်ႁႄႉဢူၵ်းၼၼ်ႉဢေႃႈ။ သဵင်ဢၼ်ဝီးပိၵ်ႇၶဝ်ၵေႃႈ ပဵၼ်ၸိူဝ်ႉၼင်ႇသဵင်ရထႃးမႃႉၼမ်ၼႃႇဢၼ်တိုၵ်းသိုၵ်းလႄႈ ၶုၼ်ႇလႅၼ်ႈၼၼ်ႉဢေႃႈ။-

10ႁၢင်ၶဝ်ၵေႃႈ မိူၼ်ၸိူဝ်ႉၼင်ႇႁၢင်မႅင်းငေႃးလႄႈ ၵႃႈၼႂ်းႁၢင်ၶဝ်ၼၼ်ႉ မီးၼၢမ်လႅမ်ဢေႃႈ။ ၵႃႈၼႂ်းႁၢင်ၶဝ်ၼၼ်ႉ မီးဢၶႂၢင်ႉတၼ်းၶူဝ်း ဢၼ်လႆႈၼိၵ်ႈၸၢၵ်ႈငႅၼ်းသႄးၵူၼ်းတင်းလၢႆ ႁႃႈလိူၼ် တဵမ်တဵမ်ဢေႃႈ။-

11ၶုၼ်ႁေႃၶမ်းၶဝ်ၸမ်ႉ ပဵၼ်တမၢၼ်ႇၶုမ်ႁူးဢၼ်လိုၵ်ႉၼႃႇသေပိူၼ်ႈၼၼ်ႉဢေႃႈ။ ၸွမ်းၼင်ႇၵႂၢမ်းၽႃႇသႃႇ ႁေႇပြႄး ႁွင်ႉႁဵၵ်ႈၸိုဝ်ႈမၼ်းဝႃႈ ဢႃႇပတ်ႉတုင်ႇ ၊ ဝႃႈၼင်ႇၼႆလႄႈ ၸွမ်းၼင်ႇၵႂၢမ်းၽႃႇသႃႇ ႁေႇလသႃႉ ႁွင်ႉႁဵၵ်ႈၸိုဝ်ႈမၼ်းဝႃႈ၊ ဢႃပေႃးလျူင်ႇ ၊ ဝႃႈၼင်ႇၼႆဢေႃႈ။

12ဢႃႉမင်ႇၵလႃႇပႃးၼိုင်ႈပူၼ်ႉၵႂႃႇယဝ်ႉ။ ၵမ်းလိုၼ်း ဢႃႉမင်ႇၵလႃႇသွင်ပႃး တၵ်းမႃးထႅင်ႈလူးၵွၼ်ႇဢေႃႈ။

13မိူဝ်ႈဢၼ်တမၢၼ်ႇၵၢင်ႁၢဝ် သႃႉထမႃႉ ပဝ်ႇၼႄးၶရႃႇၼၼ်ႉၸိုင် ၵဝ်ငိၼ်းသဵင်ဢၼ်ဢွၵ်ႇၵႃႈၼႂ်းၶဝ်လႅမ် သီႇဢၼ် ၵႃႈတီႈယိတ်ႈပလၢင်ႇၶမ်း ဢၼ်မီးၵႃႈတီႈၽၢႆႇၼႃႈၽြႃးပဵၼ်ၸဝ်ႈၼၼ်ႉလႄႈ-

14လၢတ်ႈတီႈတမၢၼ်ႇၵၢင်ႁၢဝ် သႃႉထမႃႉ ဢၼ်မီးၼႄးၶရႃႇၼၼ်ႉလႄႈဝႃႈ၊ ပွႆႇတမၢၼ်ႇၵၢင်ႁၢဝ်သီႇပႃး ဢၼ်မတ်ႉၽုၵ်ႇဝႆႉမီးယူႇၵႃႈတီႈႁိမ်းၼမ်ႉႁွင်ႈလူင် ဢူႉၽရတ်ႉ ၸိူဝ်းၼၼ်ႉလွတ်ႈသေတႃႉ၊ ဝႃႈၼင်ႇၼႆဢေႃႈ။-

15မိူဝ်ႈၼၼ်ႉ တမၢၼ်ႇၵၢင်ႁၢဝ်သီႇပႃး ဢၼ်မႄးႁႅၼ်းဝႆႉပုၼ်ႈၼႃႇရီႇၼိုင်ႈ၊ ဝၼ်းၼိုင်ႈ၊ လိူၼ်ၼိုင်ႈ၊ ပီႊၼိုင်ႈ ႁႂ်ႈလႆႈဢဝ်ၵူၼ်းတင်းလၢႆ သၢမ်ပုၼ်ႈပုၼ်ႈၼိုင်ႈတၢႆၸိူဝ်းၼၼ်ႉ လႆႈၶၢမ်ႇတၢင်းဢၼ်ပွႆႇလွတ်ႈဢေႃႈ။-

16တၢင်းဢၼ်ၼပ်ႉဢၼ်ဢၢၼ်ႇၵူၼ်းသိုၵ်းၶီႇမႃႉၼၼ်ႉၸမ်ႉ မီးသွင်သၢင်ႇၶျေႇဢေႃႈ။ ၵဝ်ငိၼ်းတၢင်းဢၼ်ၼပ်ႉဢၼ်ဢၢၼ်ႇၼၼ်ႉဢေႃႈ။

17မိူၼ်ၸိူဝ်ႉၼင်ႇၼၼ် ၵဝ်ႁၼ်မႃႉ ဢိၵ်ႇတင်းၵူၼ်းသိုၵ်းၶီႇမႃႉ ဢၼ်မီးၶိူင်ႈဢၼ်ႁႄႉဢူၵ်း ဢၼ်ဢဝ်တင်းၽႆး၊ ၵၢၼ်ႉ၊ မၢၵ်ႇႁိၼ်ဝႃႇၵိၼ်ႇသူႉ မႄးႁႅၼ်းဝႆႉယဝ်ႉၸိူဝ်းၼၼ်ႉ ၵႃႈၼႂ်းပျႃႇတိၵ်ႈရူႇပႃႇရူင်ႇဢေႃႈ။ ႁူဝ်မႃႉၸိူဝ်းၼၼ်ႉပဵၼ်ၸိူဝ်ႉၼင်ႇႁူဝ်သၢင်ႇသီႈဢေႃႈ။ ၵႃႈၼႂ်းသူပ်းၶဝ်ၵေႃႈ ဢွၵ်ႇပဵဝ်ၽႆး၊ ၵႂၼ်းၽႆး တင်းၵၢၼ်ႉယူႇဢေႃႈ။-

18ၵွပ်ႈပိူဝ်ႈၽေးသၢမ်ပႃးဢၼ်ဝႃႈပဵဝ်ၽႆး၊ ၵႂၼ်းၽႆးတင်းၵၢၼ်ႉ ဢၼ်ဢွၵ်ႇၵႃႈၼႂ်းသူပ်းၶဝ်ၼၼ်ႉလႄႈ၊ ၵူၼ်းတင်းလၢႆသၢမ်ပုၼ်ႈပုၼ်ႈၼိုင်ႈတၢႆဢေႃႈ။-

19လွင်ႈမၼ်းၸမ်ႉ တၼ်းၶူဝ်းမႃႉၸိူဝ်းၼၼ်ႉ တႄႇယူႇၵႃႈၼႂ်းသူပ်းၶဝ် ဢိၵ်ႇတင်းၵႃႈၼႂ်းႁၢင်ၶဝ်ဢေႃႈ။ ႁၢင်ၶဝ်ၵေႃႈပျေႉၸုမ်ႇဝႆႉတင်းႁူဝ်လႄႈ မိူၼ်ၸိူဝ်ႉၼင်ႇငူးဢေႃႈ။-

20ၶဝ်ၸၢင်ႈဢဝ်တင်းႁၢင်ၶဝ်ၼၼ်ႉ ၼိၵ်ႈၸၢၵ်ႈငႅၼ်းသႄးဢေႃႈ။ ၶဝ်ၸိူဝ်းဢၼ်ၵိုတ်းၵျၢၼ်ႇယူႇလႄႈ ဢမ်ႇတၢႆလူၺ်ႈၽေးတၢမ်ႇၼၼ်ၼၼ်ႉ လွင်ႈၼင်ႇႁိုဝ် တၵ်းဢမ်ႇၵူဝ်းၵႂၢႆႇၽီ ဢိၵ်ႇတင်းရုၵ်ႈထူႉၶမ်း၊ ရုၵ်ႈထူႉငိုၼ်း၊ ရုၵ်ႈထူႉတွင်းလႅင်၊ ရုၵ်ႈထူႉမၢၵ်ႇႁိၼ်၊ ရုၵ်ႈထူႉမႆႉ၊ ဢၼ်ဢမ်ႇၸၢင်ႈႁၼ်၊ ဢမ်ႇၸၢင်ႈငိၼ်း၊ ဢမ်ႇၸၢင်ႈၵႂႃႇမႃးၸိူဝ်းၼၼ်ႉၸိုင် ယင်းဢမ်ႇၶုၵ်းၸႂ်လႆႈမႆႈၸႂ် လူၺ်ႈၶိူင်ႈပိူင် ဢၼ်ဢဝ်တင်းမိုဝ်း တူဝ်ၸဝ်ႈၵဝ်ႇႁဵတ်းၼၼ်ႉလႄႈ ယူႇဢေႃႈ။-

21တၢင်းဢၼ်ဢဝ်ဢသၢၵ်ႈၵူၼ်းတၢႆ၊ တၢင်းဢၼ်ၸၢင်ႈၸေႃႉၸၢင်ႈႁဵတ်းတီႈပိူၼ်ႈ၊ တၢင်းဢၼ်ဢိင်မေႇထုင်ႇဢၼ်ဢမ်ႇတြႃး၊ တၢင်းဢၼ်လၵ်ႉၶူဝ်းပိူၼ်ႈ ၸိူဝ်းၼၼ်ႉၵေႃႈ ၶဝ်ယင်းဢမ်ႇၶုၵ်းၸႂ်လႆႈမႆႈၸႂ်လႄႈ ယူႇဢေႃႈ။

← Chapter 8 Jump to: Chapter 10 →