Revelation 11

Shan

← Chapter 10 Jump to: Chapter 12 →

1ၵမ်းၼၼ်ႉ ၵဝ်ႁပ်ႉၶၢမ်ႇဢဝ်မႆႉဢေႃႈလႅမ်ႈၼိုင်ႈ ဢၼ်မိူၼ်ၸိူဝ်ႉၼင်ႇၶွၼ်ႉတဝ်ႉၼၼ်ႉသေယဝ်ႉ၊ လၢတ်ႈပၼ်တီႈၵဝ်လႄႈဝႃႈၸမ်ႉ၊ လုၵ်ႉလႄႈတႅၵ်ႈတူၺ်းပိၵ်ႈမၢၼ်ႇၸဝ်ႈ ဢိၵ်ႇတင်းယိတ်ႈပလၢင်ႇ တင်းၶဝ်ၸိူဝ်းဢၼ်ၵူဝ်းၵႂၢႆႇ ၼႂ်းပိၵ်ႈမၢၼ်ႇၸဝ်ႈၼၼ်ႉတႃႉ။-

2ယႃႇပေတႅၵ်ႈတူၺ်းတမ်ႇတိူင်း ပိၵ်ႈမၢၼ်ႇၸဝ်ႈၼၼ်ႉ။ ယႃႇမၼ်းတႃႉ။ လွင်ႈမၼ်းၸမ်ႉ ဢၢပ်ႈပၼ်တီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆယဝ်ႉ။ ၶဝ်ၼၼ်ႉ တၵ်းယဵပ်ႇယမ်ႈ ဝဵင်းဢၼ်မူတ်းၸၢင်ႇ သီႇသိပ်းပၢႆသွင်လိူၼ်ဢေႃႈ။-

3ၵဝ်တၵ်းပၼ်ဢၶႂၢင်ႉဝႆႉ တီႈၵေႃႉဢၼ်ၶၢမ်ႇသၢၵ်ႈသေႇၵဝ် သွင်ပႃးၼၼ်ႉဢေႃႈ။ ၶဝ်ၼၼ်ႉ တၵ်းၼုင်ႈၶူဝ်းၼင်ပေႃ ယူႇသေလႄႈ ႁဵတ်းပရေႃးၽႅတ်ႈမိုဝ်ႉဝၼ်း ႁဵင်ၼိုင်ႈပၢႆသွင်ပၢၵ်ႇပၢႆႁူၵ်းသိပ်းဝၼ်းဢေႃႈ။

4ၶဝ်ၼၼ်ႉၸမ်ႉ ပဵၼ်တူၼ်ႈ သၢၼ်ႇလုၼ်ႇ သွင်တူၼ်ႈ ဢိၵ်ႇတင်း ၶူင်ႇတီႈတႆႈၽႆးသွင်ဢၼ်၊ ဢၼ်ပူၵ်းတင်ႈဝႆႉၵႃႈတီႈ ၽၢႆႇၼႃႈၸဝ်ႈလိၼ်မိူင်းဢေႃႈ။-

5ပေႃးသေၵေႃႉသေၵူၼ်းမီးဢလူဝ်ႇ ၶႂ်ႈၼိၵ်ႈၸၢၵ်ႈငႅၼ်းသႄးၶဝ်ၸိုင် ၽႆးၸၢင်ႈဢွၵ်ႇသေၵႃႈၼႂ်းသူပ်းၶဝ်လႄႈ ဢိုၼ်ရၢၼ်ႇသူႇၶဝ်တင်းလၢႆၼၼ်ႉပႅတ်ႈဢေႃႈ။ ပေႃးသေၵေႃႉသေၵူၼ်းမီးဢလူဝ်ႇ ၶႂ်ႈၼိၵ်ႈၸၢၵ်ႈငႅၼ်းသႄးၶဝ်ၸိုင် မၼ်းတၵ်းလႆႈၶၢမ်ႇတၢင်းဢၼ် ဢဝ်တၢႆၸိူဝ်ႉၼင်ႇၼၼ်ဢေႃႈ။

6ၶဝ်ၼၼ်ႉ လႆႈဢၶႂၢင်ႉတၢင်းဢၼ် ဢိုတ်းဝႆႉၽႃႉၵၢင်ႁၢဝ် ႁႂ်ႈၽူၼ်ဢမ်ႇလႆႈတူၵ်း ၼႂ်းၶိင်ႇမိုဝ်ႉဝၼ်းဢၼ်ၶဝ်ႁဵတ်းပရေႃးၽႅတ်ႈၼၼ်ႉ ဢိၵ်ႇတင်းဢၶႂၢင်ႉဢၼ်တၵ်းႁႂ်ႈၼမ်ႉၵူႈမဵဝ်းပဵၼ်လိူတ်ႈ တင်းဢၶႂၢင်ႉဢၼ်တၵ်းဢဝ်တၢမ်ႇ ၵူႈၸိူဝ်ႉၵူႈပိူင် ပၼ်တၢမ်ႇတီႈလိၼ်မိူင်း ၼႂ်းၶိင်ႇၵႃႈဢၼ်ၶဝ်မီးဢလူဝ်ႇၼၼ်ႉဢေႃႈ။

7မိူဝ်ႈဢၼ်ၶဝ် ၶၢမ်ႇသၢၵ်ႈသေႇယဝ်ႉၼၼ်ႉၸိုင် တူဝ်ထိူၼ်ႇႁၢႆႉဢၼ်ဢွၵ်ႇသေၵႃႈၼႂ်းၶုမ်ၼႂ်းႁူး ဢၼ်လိုၵ်ႉၼႃႇသေပိူၼ်ႈၼၼ်ႉ တၵ်းတိုၵ်းတေႃးၶဝ်လႄႈ ပႄႉၼႅင်ႇဢေႃႈ။ တၵ်းဢဝ်ၶဝ်တၢႆဢေႃႈ။-

8တူဝ်တၢႆၶဝ်တၵ်းၵိုတ်းဝႆႉ ၵႃႈၼႂ်းသဵၼ်ႈတၢင်းဝဵင်းလူင် ဢၼ်ၸွမ်းၼင်ႇဢၼၢၵ်ႈၵႃႈၼႂ်းႁွင်ႉႁဵၵ်ႈဝႃႈ သေႃးတုမ်ႇ တင်း ဢေႇၵိပ်ႉတူႉ ဢၼ်ဝႃႈတီႈဢၼ် ၸဝ်ႈၶဝ်ၶၢမ်ႇတၢင်းတၢႆ ၵႃႈၼိူဝ်သဝ်လၵ်းဝႃးၵၢပ်ႈၼၼ်ႉဢေႃႈ။-

9ၵႃႈၼႂ်းၵူၼ်းၵူႈၸိူဝ်ႉၵူႈမဵဝ်း ဢၼ်လၢတ်ႈၵႂၢမ်းၽႃႇသႃႇၵူႈၸိူဝ်ႉၵူႈပိူင်ၼၼ်ႉ ၵမ်ႈၽွင်ႈတၵ်းလႆႈတူၺ်းလႆႈႁၼ် တူဝ်တၢႆၸိူဝ်းၼၼ်ႉ သၢမ်ဝၼ်းပၢႆၶိုင်ႈတဵမ်တဵမ်လႄႈ ႁႄႉၶႅၼ်လွင်ႈတၢင်းဢၼ် ဢဝ်တူဝ်တၢႆၶဝ်ၽင်ၵႃႈၼႂ်းပႃႇႁဵဝ်ႈသၢင်းၶႅင်းဢေႃႈ။-

10ၶဝ်ၸိူဝ်းဢၼ်ယူႇၵႃႈၼိူဝ်လိၼ်မိူင်းၼႆႉၼၼ်ႉ မိူဝ်ႈဢၼ်ႁၼ်တူဝ်တၢႆၸိူဝ်းၼၼ်ႉၸိုင် တၵ်းဢွၼ်ၵၼ်ၸူမ်းသိူဝ်းလႄႈ မူၼ်ႈပျေႃႇဢေႃႈ။ ၵေႃႉၼိုင်ႈလႄႈၵေႃႉၼိုင်ႈ တၵ်းပၼ်လၢၵ်ႈသွင်ႇၵႂႃႇၸူးတီႈၵၼ်ဢေႃႈ။ လွင်ႈမၼ်းၸမ်ႉ ပရေႃးၽႅတ်ႈသွင်ပႃးၼၼ်ႉ လႆႈယႃႉယူၵ်ႉၼိၵ်ႈၸၢၵ်ႈငႅၼ်းသႄး ၶဝ်ၸိူဝ်းဢၼ် ယူႇၵႃႈၼိူဝ်လိၼ်မိူင်းၼႆႉၼၼ်ႉ ၼႃႇလူင်လၢင်ယဝ်ႉ၊ ဝႃႈၼင်ႇၼႆဢေႃႈ။

11လိုၼ်းၼၼ်ႉ ပူၼ်ႉသၢမ်ဝၼ်းပၢႆၶိုင်ႈသေယဝ်ႉ၊ ဢသၢၵ်ႈဝီႉၺိၺ်ႇလုၵ်ႉသေၵႃႈတီႈ ၽြႃးပဵၼ်ၸဝ်ႈလႄႈ ၶဝ်ႈၵႃႈၼႂ်းၶဝ်လႄႈ ၶဝ်ၼၼ်ႉၵေႃႈၸုၵ်းယူႇဢေႃႈ။ ၶဝ်ၸိူဝ်းဢၼ်ႁၼ် ၵႃႈမီးတင်းသဵင်ႈတင်းလူင်ၼၼ်ႉ ၵူဝ်ႁႄၼႃႇလူင်လၢင်ဢေႃႈ။-

12မိူဝ်ႈဢၼ်ၶဝ်ငိၼ်းသဵင်လူင် ဢၼ်ဢွၵ်ႇသေၵႃႈတီႈၵၢင်ႁၢဝ်မႃးလႄႈ လၢတ်ႈတီႈၶဝ်လႄႈဝႃႈ၊ ၶိုၼ်ႈမႃးၵႃႈတီႈၼႆႈတႃႉ၊ ဝႃႈၼင်ႇၼႆၼၼ်ႉၸိုင် ၶဝ်ၶိုၼ်ႈၵႃႈၼိူဝ်ၵၢင်ႁၢဝ် လူၺ်ႈၵၼ်တင်းမွၵ်ႇၵုမ်ႈလႄႈ ရၢၼ်ႇသူႇၶဝ်တင်းလၢႆၵေႃႈႁၼ်ယူႇဢေႃႈ။

13ၼႂ်းၶိင်ႇၼႃႇရီႇၼၼ်ႉ ပဵၼ်တၢင်းဢၼ်ဢိင်ႇသၼ်ႇ ဢၼ်ယႂ်ႇၼႃႇလူင်လၢင်လႄႈ လမ်းဝဵင်းသိပ်းပုၼ်ႈပုၼ်ႈၼိုင်ႈ လူမ်ႉပင်းၵႂႃႇဢေႃႈ။ ၼႂ်းတၢင်းဢၼ်ဢိင်ႇသၼ်ႇၼၼ်ႉ ၵူၼ်းၸဵတ်းႁဵင်တၢႆဢေႃႈ။ ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇၼၼ်ႉ ၵူဝ်ႁႄလႄႈ ဢွၼ်ၵၼ်ယွင်ႈယေႃးၽြႃးပဵၼ်ၸဝ်ႈ ဢၼ်ပဵၼ်ၸဝ်ႈၵၢင်ႁၢဝ်ၼၼ်ႉယူႇဢေႃႈ။

14ဢႃႉမင်ႇၵလႃႇတူႉတီႉယႃႉ ပူၼ်ႉၵႂႃႇယဝ်ႉ၊ ဢႃႉမင်ႇၵလႃႇတႃႉတီႉယႃႉ တၵ်းၸဵဝ်းမႃးၶၼ်ၶၼ်ၽႂ်းၽႂ်းဢေႃႈ။

15မိူဝ်ႈဢၼ်တမၢၼ်ႇၵၢင်ႁၢဝ် သတ်ႉတမႃႉ ပဝ်ႇၼႄးၶရႃႇၼၼ်ႉၸိုင် သဵင်ယႂ်ႇသဵင်လူင်ၼမ်ၼႃႇလၢတ်ႈၵႃႈတီႈ ၵၢင်ႁၢဝ်ၼၼ်ႉလႄႈဝႃႈၸမ်ႉ မိူင်းလေႃးၵီႇၼႆႉ ပဵၼ်မိူင်းၸဝ်ႈ ဢၼ်ပဵၼ်ၸဝ်ႈႁဝ်းၼၼ်ႉယဝ်ႉ။ ပဵၼ်မိူင်း ၶရိၸ်ႈ မၼ်းၸဝ်ႈၼၼ်ႉယဝ်ႉ။ မၼ်းၵေႃႈ တၵ်းၸၢမ်ႇၸႃးၵူႈၵမ်ႇၽႃႇ သိုပ်ႇသိုပ်ႇတၢမ်းတၢမ်းဢေႃႈ၊ ဝႃႈၼင်ႇၼႆဢေႃႈ။-

16ၶဝ်ၸိူဝ်းဢၼ်ဢသၢၵ်ႈယႂ်ႇသၢဝ်းသီႇပႃး ဢၼ်ၼင်ႈယူႇၵႃႈၼိူဝ်ပလၢင်ႇတူဝ်ၸဝ်ႈၵဝ်ႇ ၵႃႈတီႈၽၢႆႇၼႃႈၽြႃးပဵၼ်ၸဝ်ႈၼၼ်ႉ ၶုပ်ႉမူပ်ႇလႄႈၵူဝ်းၵႂၢႆႇၽြႃးပဵၼ်ၸဝ်ႈယူႇသေလႄႈ-

17ဢွၼ်ၵၼ်လဝ်ႊလၢတ်ႈလႄႈဝႃႈ၊ ထႃႇဝရႃႉၸဝ်ႈၽြႃးပဵၼ်ၸဝ်ႈ ဢၼ်ပျေႉၸုမ်ႇတင်းဢၼၼ်ႇတႃႉတၼ်းၶူဝ်းလႄႈ မီးယူႇၼႂ်းၶိင်ႇၵႃႇလႃႉ ပိတ်ႈၸူႉပၢၼ်ႇ ဢိၵ်ႇတင်းဢတိၵ်ႈတီႈၶႃႈ၊ ပိူဝ်ႈဢၼ်ၸဝ်ႈႁဝ်းလႆႈဢဝ်မႁႃႇတၼ်းၶူဝ်းၸဝ်ႈသေလႄႈ ၸၢမ်ႇၸႃးၼၼ်ႉလႄႈ ႁဝ်းၶႃႈယွင်ႈယေႃးၵျေးၸူးၸဝ်ႈတီႈၶႃႈဢေႃႈ။-

18တေႃးသႃႉတၢင်းၸႂ်မႆႈၶႆႈၸႃႉၵူၼ်းမဵဝ်းတင်းလၢႆဢွၵ်ႇလႄႈ တေႃးသႃႉတၢင်းၸႂ်မႆႈၶႆႈၸႃႉၸဝ်ႈႁဝ်းၵေႃႈ ႁွတ်ႈထိုင်တီႈၶႃႈယဝ်ႉ။ ၶိင်ႇၵႃႇလႃႉဢၼ်ၸဝ်ႈႁဝ်းတၵ်းၸီႇယၢင်ႇတြႃး တီႈၶဝ်ၸိူဝ်းဢၼ်တၢႆၵႂႃႇယဝ်ႉၼၼ်ႉလႄႈ ဢဵတ်းလူပၼ်သူႉၵျေးၸူး တီႈၶႃႈၸဝ်ႈႁဝ်း ဢၼ်ဝႃႈပရေႃးၽႅတ်ႈ ဢိၵ်ႇတင်းၵူၼ်းမူတ်းၸၢင်ႇတင်းလၢႆ တင်းၶဝ်ၸိူဝ်းဢၼ်ရူဝ်ႇသေႇၵူဝ်ယမ် ၼႃႇမႃႉၸိုဝ်ႈသဵင်ၸဝ်ႈႁဝ်းလဵၵ်ႉလဵၵ်ႉယႂ်ႇယႂ်ႇၼၼ်ႉလႄႈ ယႃႉၽဵဝ်ႈပႅတ်ႈၶဝ်ၸိူဝ်းဢၼ် ယႃႉၽဵဝ်ႈပႅတ်ႈလိၼ်မိူင်းၼႆႉၼၼ်ႉ ႁွတ်ႈမႃးတီႈၶႃႈယဝ်ႉ၊ ဝႃႈၼင်ႇၼႆဢေႃႈ။

19ၵမ်းၼၼ်ႉ ၼႂ်းမိူင်းၵၢင်ႁၢဝ်ၼၼ်ႉ ပိၵ်ႈမၢၼ်ႇၽြႃးပဵၼ်ၸဝ်ႈ ၽုၺ်ႇဝႆႉလႄႈ တိူၵ်ႈပတီႉၺိၺ်ႇထၢင်ႇသႃး ၵႃႈၼႂ်းပိၵ်ႈမၢၼ်ႇၸဝ်ႈၼၼ်ႉဢေႃႈ။ မိူဝ်ႈၼၼ်ႉ ပဵၼ်တၢင်းဢၼ်ၽႃႉမႅပ်ႈ၊ တၢင်းဢၼ်သဵင်လင်သဵင်မေႃး၊ တၢင်းဢၼ်ၽႃႉလင်၊ တၢင်းဢၼ်ဢိင်ႇသၼ်ႇ၊ တၢင်းဢၼ်မၢၵ်ႇႁဵပ်းလုၵ်ႈယႂ်ႇၼႃႇလူင်လၢင် တူၵ်းလူင်းဢေႃႈ။

← Chapter 10 Jump to: Chapter 12 →