Revelation 10

Shan

← Chapter 9 Jump to: Chapter 11 →

1ၵဝ်ႁၼ်တမၢၼ်ႇၵၢင်ႁၢဝ် ဢၼ်ႁႅင်းယႂ်ႇပႃးၼိုင်ႈ ၼုင်ႈမႆမွၵ်ႇၵုမ်ႈယူႇသေလႄႈ လူင်းသေၵႃႈၼိူဝ်ၵၢင်ႁၢဝ်မႃးဢေႃႈ။ ၵႃႈၼိူဝ်ႁူဝ်မၼ်းၼၼ်ႉ မီးႁူင်းႁႆးဢေႃႈ။ ၼႃႈမၼ်းၵေႃႈ ပဵၼ်ၸိူဝ်ႉၼင်ႇ ၵၢင်ဝၼ်းဢေႃႈ။ တိၼ်မၼ်းၵေႃႈ ပဵၼ်ၸိူဝ်ႉၼင်ႇ သဝ်ထၢၼ်ႇၽႆးဢေႃႈ။-

2မၼ်းယိပ်းၵမ်ဢဝ် ၽိုၼ်လိၵ်ႈဢွၼ်ႇ ဢၼ်ၽုၺ်ႇဝႆႉၼၼ်ႉယူႇဢေႃႈ။ မၼ်းဢဝ်တိၼ်ၶွၼ်ၶႂႃမၼ်း ယဵပ်ႇသႂ်ႇ ၵႃႈၼိူဝ်ပၢင်ႇလၢႆႇ၊ ဢဝ်တိၼ်ၶွၼ်သၢႆႉမၼ်း ယဵပ်ႇသႂ်ႇၵႃႈၼိူဝ်လိၼ်မိူင်းလႄႈ-

3ႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇ မိူၼ်ၸိူဝ်ႉၼင်ႇဢၼ် သၢင်ႇသီႈႁွင်ႉသႅၼ်ႇၼၼ်ႉဢေႃႈ။ ႁွင်ႉသႅၼ်ႇသေယဝ်ႉ သဵင်ၽႃႉလင် ၸဵတ်းၵမ်း မေႃးမႃးဢေႃႈ။-

4မိူဝ်ႈဢၼ်သဵင်ၽႃႉလင်ၸဵတ်းၵမ်းမေႃးမႃးယဝ်ႉၼၼ်ႉ၊ ပိၵ်ႉသမ်ႉၵဝ်ငႃတႅမ်ႈသေၵေႃႈ၊ ၵဝ်ငိၼ်းသဵင်ဢၼ်ဢွၵ်ႇၵႃႈၼိူဝ်ၵၢင်ႁၢဝ်ၼၼ်ႉလႄႈဝႃႈ၊ သဵင်ၽႃႉလင်ၸဵတ်းၵမ်းၼၼ်ႉၸိုင် တွၵ်ႇတၼ်းသိၵ်ႈဝႆႉတႃႉ။ ယႃႇပေတႅမ်ႈ၊ ဝႃႈၼင်ႇၼႆဢေႃႈ။-

5မိူဝ်ႈၼၼ်ႉ တမၢၼ်ႇၵၢင်ႁၢဝ်ဢၼ်ၵဝ်ႁၼ်ၸုၵ်းယူႇ ၵႃႈၼိူဝ်ပၢင်ႇလၢႆႇတင်းလိၼ်ၼၼ်ႉ ယုၵ်ႉမိုဝ်းၶွၼ်ၶႂႃၶိုၼ်ႈၼိူဝ်ၵၢင်ႁၢဝ်သေယဝ်ႉ၊-

6ႁဵတ်းတၢင်းဢၼ်တိူင်ႇ ၵႃႈတီႈၸဝ်ႈဢၼ်ဢသၢၵ်ႈလိပ်းယူႇ ၵူႈၵမ်ႇၽႃႇသိုပ်ႇသိုပ်ႇတၢမ်းတၢမ်းလႄႈ ၽၢၼ်ႇသၢင်းႁဵတ်းပဵၼ် ၸႃႉၸဵမ်ၵၢင်ႁၢဝ်တင်းၵႃႈဢၼ်မီးၵႃႈၼႂ်းမၼ်း၊ လိၼ်မိူင်းတင်း ၵႃႈဢၼ်မီးၵႃႈၼႂ်းမၼ်း၊ ၼမ်ႉသမ်ႇမုၵ်ႉတြႃႇ တင်းၵႃႈဢၼ်မီးၵႃႈၼႂ်းမၼ်းတင်းလၢႆၼၼ်ႉလႄႈဝႃႈ၊-

7ၶိင်ႇၵႃႇလႃႉတၵ်းဢမ်ႇထိူင်းဢမ်ႇၼၢၼ်းလႄႈ ၼႂ်းၶိင်ႇဝၼ်းၵႃႇလႃႉဢၼ်တမၢၼ်ႇၵၢင်ႁၢဝ် သတ်ႉတမႃႉ တၵ်းပဝ်ႇသဵင်ၼႄးၶရႃႇၼၼ်ႉ လွင်ႈတၢင်းဢၼ်လိုၵ်ႉဢၼ်လမ်ႇၽြႃးပဵၼ်ၸဝ်ႈ ဢၼ်ၸၢပ်ႈသႅင်ႇၵၼ်တင်း တၢင်းဢၼ်မၼ်းၸဝ်ႈဝႆႉပျႃႇတိၵ်ႈ သတၢင်းသိူဝ်းပျေႃႇတီႈၶႃႈမၼ်းၸဝ်ႈဢၼ်ဝႃႈ ပရေႃးၽႅတ်ႈတင်းလၢႆၼၼ်ႉ၊ တၵ်းႁွတ်ႈထိုင်တၢင်းဢၼ်ပျေႉၸုမ်ႇယဝ်ႉဢေႃႈ၊ ဝႃႈၼင်ႇၼႆဢေႃႈ။

8သဵင်ၵႃႈၼိူဝ်ၵၢင်ႁၢဝ်ဢၼ်ၵဝ်ငိၼ်းၼၼ်ႉ သမ်ႉၶိုၼ်းလၢတ်ႈတီႈၵဝ်ထႅင်ႈလႄႈဝႃႈၸမ်ႉ ၵႂႃႇဢဝ်ၽိုၼ်လိၵ်ႈဢွၼ်ႇ ဢၼ်ၽုၺ်ႇဝႆႉ မီးယူႇၵႃႈၼႂ်းမိုဝ်းတမၢၼ်ႇၵၢင်ႁၢဝ် ဢၼ်ၸုၵ်းယူႇၵႃႈၼိူဝ်ပၢင်ႇလၢႆႇတင်းလိၼ်ၼၼ်ႉတႃႉ၊ မိူဝ်ႈဢၼ်ဝႃႈၼင်ႇၼႆၸိုင်-

9ၵဝ်ၵႂႃႇၸူးၵႃႈတီႈတမၢၼ်ႇၵၢင်ႁၢဝ်ၼၼ်ႉလႄႈ ယွၼ်းဝႃႈ၊ ပၼ်ၽိုၼ်လိၵ်ႈၼၼ်ႉသေၵမ်းၶႃႈ၊ ဝႃႈၼင်ႇၼႆဢေႃႈ။ မၼ်းၵေႃႈလၢတ်ႈလႄႈဝႃႈ၊ ဢဝ်လႄႈၵိၼ်တႃႉ။ တၵ်းႁႂ်ႈတွင်ႉမႂ်းၶူမ်ဢေႃႈ။ ၵူၺ်းၵႃႈ ၵႃႈၼႂ်းသူပ်းမႂ်း တၵ်းဝၢၼ်ၸိူဝ်ႉၼင်ႇၼမ်ႉၽိုင်ႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်-

10ၵဝ်ဢဝ်ၽိုၼ်လိၵ်ႈ ၵႃႈၼႂ်းမိုဝ်းတမၢၼ်ႇၵၢင်ႁၢဝ်ၼၼ်ႉလႄႈ ၵိၼ်ဢေႃႈ။ ၵႃႈၼႂ်းသူပ်းၵဝ် ဝၢၼ်ၸိူဝ်ႉၼင်ႇၼမ်ႉၽိုင်ႈဢေႃႈ။ မိူဝ်ႈဢၼ်ၵိၼ်ယဝ်ႉၼၼ်ႉ ၼႂ်းတွင်ႉၵဝ်ၶူမ်ဢေႃႈ။-

11ၶဝ်ၼၼ်ႉ လၢတ်ႈတီႈၵဝ်လႄႈဝႃႈ၊ မႂ်းၼႆႉတၵ်းလႆႈသမ်ႉၶိုၼ်းႁဵတ်းပရေႃးၽႅတ်ႈလႄႈ ႁေႃးလၢတ်ႈတီႈၵူၼ်းၵူႈၸိူဝ်ႉၵူႈမဵဝ်း ဢၼ်လၢတ်ႈၵႂၢမ်းၽႃႇသႃႇၵူႈၸိူဝ်ႉၵူႈပိူင် ဢိၵ်ႇတင်းတီႈၶုၼ်ႁေႃၶမ်းတင်းလၢႆဢေႃႈ၊ ဝႃႈၼင်ႇၼႆဢေႃႈ။

← Chapter 9 Jump to: Chapter 11 →