Revelation 20

Shan

← Chapter 19 Jump to: Chapter 21 →

1ၵမ်းၼၼ်ႉ ၵဝ်ႁၼ်တမၢၼ်ႇၵၢင်ႁၢဝ် ပႃးၼိုင်ႈ ယိပ်းၵမ်ဢဝ်သေႃးၶုမ်သေႃးႁူး ဢၼ်လိုၵ်ႉၼႃႇသေပိူၼ်ႈ ဢိၵ်ႇတင်း ၸိူၵ်ႈလဵၵ်းလူင် ယူႇသေလႄႈ လုၵ်ႉသေၵႃႈၼိူဝ်ၵၢင်ႁၢဝ် လူင်းမႃးဢေႃႈ။-

2မၼ်းၼၼ်ႉ တီႉၵမ်ဢဝ်ၼၵႃး ဢၼ်ဝႃႈငူးၵဝ်ႇၵဝ်ႇ မိူဝ်ႈၵွၼ်ႇဢွၼ်ၼႆႉ ဢၼ်ပဵၼ် မႃႇၼၢတ်ႈၸႃႇတၢၼ်ႇ ၼၼ်ႉသေလႄႈ မတ်ႉၽုၵ်ႇဝႆႉ ပုၼ်ႈပီႊမိူင်း ႁဵင်ၼိုင်ႈလႄႈ၊-

3ဢဝ်ၶျႃးတူၵ်းသႂ်ႇ ၵႃႈၼႂ်းၶုမ်ၼႂ်းႁူး ဢၼ်လိုၵ်ႉၼႃႇသေပိူၼ်ႈလႄႈ ဢိုတ်းဝႆႉသေယဝ်ႉ၊ တွၵ်ႇတၼ်းသိၵ်ႈဝႆႉ လွင်ႈၼင်ႇႁိုဝ် ၸူဝ်ႈဢၼ်ပီႊမိူင်းႁဵင်ၼိုင်ႈၼၼ်ႉ ဢမ်ႇပႆႇသဵင်ႈၼၼ်ႉ မၼ်းတၵ်းဢမ်ႇလႆႈပႅတ်ႉလႆႈလႅၼ် ၵူၼ်းၵူႈၸိူဝ်ႉၵူႈမဵဝ်းဢေႃႈ။ မိူဝ်ႈဢၼ်ပီႊမိူင်းႁဵင်ၼိုင်ႈၼၼ်ႉ သဵင်ႈမူတ်းယဝ်ႉၼၼ်ႉၸိုင် မၼ်းတၵ်းလႆႈၶၢမ်ႇတၢင်းဢၼ် ပွႆႇလွတ်ႈၵမ်းဢွၼ်ႇၼိုင်ႈဢေႃႈ။

4ပလၢင်ႇၼမ်ၼႃႇၵေႃႈ ၵဝ်ႁၼ်ဢေႃႈ။ ၶဝ်ၸိူဝ်းဢၼ်ၼင်ႈယူႇ ၵႃႈၼိူဝ်ပလၢင်ႇၸိူဝ်းၼၼ်ႉ လႆႈဢၶႂၢင်ႉဢၼ်လႆႈ ၸီႇယၢင်ႇတြႃးဢေႃႈ။ ဝီႉၺိၺ်ႇၶဝ်ၸိူဝ်းဢၼ်လႆႈၶၢမ်ႇတၢင်းဢၼ် တႅပ်းၶေႃးၽၼ်းၶေႃး ၵွပ်ႈပိူဝ်ႈၼုၵ်ႈၵပၢတ်ႈၽြႃးပဵၼ်ၸဝ်ႈ ဢိၵ်ႇတင်း လွင်ႈတၢင်းဢၼ်ၶၢမ်ႇသၢၵ်ႈသေႇ ယေႇသူႉ ဢၼ်ဢမ်ႇၵူဝ်းၵႂၢႆႇတူဝ်ထိူၼ်ႇႁၢႆႉ ဢိၵ်ႇတင်းရုၵ်ႈထူႉမၼ်း၊ ဢၼ်ဢမ်ႇၶၢမ်ႇတၼ်းသိၵ်ႈလၢၵ်ႈမၢတ်ႈမၼ်း ၵႃႈတီႈၼႃႈၽၢၵ်ႇ ဢိၵ်ႇတင်းၵႃႈတီႈမိုဝ်းၼၼ်ႉၵေႃႈ ၵဝ်ႁၼ်ဢေႃႈ။ ၶဝ်ၼၼ်ႉဢသၢၵ်ႈလိပ်းယူႇသေလႄႈ ၸၢမ်ႇၸႃးလူၺ်ႈၵၼ်တင်း ၸဝ်ႈၶရိၸ်ႈ ပီႊမိူင်းႁဵင်ၼိုင်ႈတဵမ်တဵမ်ဢေႃႈ။-

5ၵူၼ်းတၢႆ ဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉ ၸူဝ်ႈဢၼ် ပီႊမိူင်းႁဵင်ၼိုင်ႈၼၼ်ႉ ဢမ်ႇပႆႇသဵင်ႈပႆႇမူတ်းၼၼ်ႉၸိုင် ဢသၢၵ်ႈဢမ်ႇလႆႈလိပ်း။ တၢင်းဢၼ်လုၵ်ႉၶိုၼ်းၼႆႉၸမ်ႉ ပဵၼ်တၢင်းဢၼ် လုၵ်ႉၶိုၼ်း ပထမႃႉ ဢေႃႈ။-

6ၵေႃႉဢၼ်လႆႈၶဝ်ႈၸၢမ်ႇၸႃး ၼႂ်းတၢင်းဢၼ် လုၵ်ႉၶိုၼ်းပထမႃႉၼၼ်ႉ ပဵၼ်ၵေႃႉဢၼ်မီးမင်ႇၵလႃႇ၊ ၵေႃႉဢၼ်မူတ်းၸၢင်ႇဢေႃႈ။ ၵေႃႉၸိူဝ်ႉၼင်ႇၼၼ်ၼၼ်ႉ ၵၢင်းလွတ်ႈတင်း တၢင်းတၢႆတူႉတီႉယႃႉ လႄႈ တၵ်းလႆႈပဵၼ်ယိတ်ႈပရေႃးႁဵၵ်ႈၽြႃးပဵၼ်ၸဝ်ႈ တင်းယိတ်ႈပရေႃးႁဵၵ်ႈၸဝ်ႈၶရိၸ်ႈလႄႈ ၸၢမ်ႇၸႃးလူၺ်ႈၵၼ်တင်း ၸဝ်ႈၶရိၸ်ႈ ပီႊမိူင်းႁဵင်ၼိုင်ႈတဵမ်တဵမ်ဢေႃႈ။

7မိူဝ်ႈဢၼ်ပီႊမိူင်းႁဵင်ၼိုင်ႈၼၼ်ႉသဵင်ႈမူတ်းယဝ်ႉၼၼ်ႉၸိုင်၊ ၸႃႇတၢၼ်ႇ တၵ်းလႆႈဢၶႂၢင်ႉဢၼ်လွတ်ႈသေၵႃႈၼႂ်းထွင်ႇလႄႈ၊-

8ဢွၵ်ႇၶိုၼ်းၵႂႃႇႁႂ်ႈလႆႈပႅတ်ႉလႅၼ်ၵူၼ်းၵူႈၸိူဝ်ႉၵူႈမဵဝ်း ဢၼ်ယူႇၵႃႈၼိူဝ်လိၼ်မိူင်းသီႇၼႃႈပႅတ်ႇၽၢႆႇ ဢၼ်ဝႃႈ ၵေႃးၵႃႉ တင်း မႃႇၵေႃးၵႃႉ ဢၼ်ၼပ်ႉဢၢၼ်ႇၼမ်ၼႃႇ ၸိူဝ်ႉၼင်ႇသၢႆးၼမ်ႉသမ်ႇမုၵ်ႉတြႃႇၼၼ်ႉ ဢိၵ်ႇတင်းႁႂ်ႈၶဝ်လႆႈၸူႉၵၼ်တုမ်ၵၼ် ပုၼ်ႈဢၼ်တၵ်းတိုၵ်းသိုၵ်းဢေႃႈ။-

9ၶဝ်ၼၼ်ႉၶိုၼ်ႈမႃးၵႃႈၼိူဝ်ၼႃႈလိၼ်သေလႄႈ ဝႅင်းႁွပ်ႈတပ်ႉၵူၼ်းမူတ်းၸၢင်ႇတင်းလၢႆ ဢိၵ်ႇတင်းဝဵင်းၸဝ်ႈဢၼ်လီႁၵ်ႉၼႃႇၼၼ်ႉဢေႃႈ။ မိူဝ်ႈၼၼ်ႉ ၽႆးတူၵ်းသေၵႃႈတီႈၽြႃးပဵၼ်ၸဝ်ႈ ၵႃႈၼိူဝ်ၵၢင်ႁၢဝ်မႃးလႄႈ ဢိုၼ်ၶဝ်ပႅတ်ႈဢေႃႈ။-

10မႃႇၼၢတ်ႈဢၼ်ပႅတ်ႉလႅၼ်ၶဝ်ၼၼ်ႉၵေႃႈ လႆႈၶၢမ်ႇတၢင်းဢၼ် ၶျႃးတူၵ်းသႂ်ႇ ၵႃႈၼႂ်းၼွင်ၽႆး ဢၼ်လေႃးၵၼ်တင်း ၵၢၼ်ႉ၊ တီႈဢၼ်တူဝ်ထိူၼ်ႇႁၢႆႉ ဢိၵ်ႇတင်းမိၵ်ႉသႃႇပရေႃးၽႅတ်ႈ မီးၼၼ်ႉ သေယဝ်ႉ၊ ၶဝ်ၼၼ်ႉ တၵ်းလႆႈၶၢမ်ႇဝူၺ်ႇတၼႃႇ ဢၼ်ယႂ်ႇၼႃႇလူင်လၢင် ၵူႈဝၼ်းၵူႈၶိုၼ်း ၵမ်ႇၽႃႇသိုပ်ႇသိုပ်ႇတၢမ်းတၢမ်းဢေႃႈ။

11ၵမ်းၼၼ်ႉ ၵဝ်ႁၼ်ပလၢင်ႇလူင် ဢၼ်ၽိူၵ်ႇဢၼ်ၶၢဝ် ဢိၵ်ႇတင်း ၸဝ်ႈဢၼ်ၼင်ႈယူႇၵႃႈၼိူဝ်ပလၢင်ႇ ၼၼ်ႉဢေႃႈ။ ၵၢင်ႁၢဝ်တင်းလိၼ်မိူင်း ပၢႆႈဢွၵ်ႇသေၵႃႈတီႈၽၢႆႇၼႃႈၸဝ်ႈၼၼ်ႉၵႂႃႇလႄႈ တီႈပုၼ်ႈ ဢၼ်ၶဝ်တၵ်းယူႇ ဢမ်ႇမီး။

12ၵဝ်ႁၼ်ၶဝ်ၸိူဝ်းဢၼ်တၢႆၵႂႃႇယဝ်ႉ ၸဵမ်လဵၵ်ႉၸဵမ်ယႂ်ႇၼၼ်ႉ ၸုၵ်းယူႇၵႃႈတီႈ ၽၢႆႇၼႃႈပလၢင်ႇၸဝ်ႈဢေႃႈ။ ၽိုၼ်လိၵ်ႈတင်းလၢႆၵေႃႈ ၽုၺ်ႇဝႆႉမီးယူႇဢေႃႈ။ ၽိုၼ်လိၵ်ႈတၢင်ႇၽိုၼ်ဢၼ်ဝႃႈ ၽိုၼ်လိၵ်ႈဢသၢၵ်ႈၼၼ်ႉၵေႃႈ ၽုၺ်ႇဝႆႉမီးယူႇဢေႃႈ။ ၶဝ်ၸိူဝ်းဢၼ်တၢႆယဝ်ႉၼၼ်ႉ လႆႈၶၢမ်ႇတၢင်းဢၼ် ၸီႇယၢင်ႇတြႃး ၸွမ်းၵႃႈၼင်ႇဢၼ်တၢင်းၵမ်တၢင်းၵျၢင်ႉၶဝ်မီးၼၼ်ႉ မႅၼ်ႈၼင်ႇလွင်ႈတၢင်းဢၼ် တႅမ်ႈဝႆႉၵႃႈၼႂ်းၽိုၼ်လိၵ်ႈၸိူဝ်းၼၼ်ႉဢေႃႈ။-

13ၼမ်ႉသမ်ႇမုၵ်ႉတြႃႇ ဢဝ်ၵူၼ်းတၢႆတင်းလၢႆ ဢၼ်မီးၵႃႈၼႂ်းမၼ်းၼၼ်ႉ ဢၢပ်ႈပၼ်ဢေႃႈ။ မရၼႃႉ ဢိၵ်ႇတင်း မိူင်းမရၼႃႉ ၵေႃႈ ဢဝ်ၵူၼ်းတၢႆတင်းလၢႆ ဢၼ်မီးၵႃႈတီႈၼႂ်းၶဝ်ၼၼ်ႉ ဢၢပ်ႈပၼ်ဢေႃႈ။ ၵူၼ်းႁင်းၽႂ်ႁင်းမၼ်းၼၼ်ႉ လႆႈၶၢမ်ႇတၢင်းဢၼ်ၸီႇယၢင်ႇတြႃး ၸွမ်းၵႃႈၼင်ႇဢၼ် တၢင်းၵမ်တၢင်းၵျၢင်ႉၶဝ်မီးၼၼ်ႉဢေႃႈ။

14မိူဝ်ႈၼၼ်ႉ မရၼႃႉ ဢိၵ်ႇတင်းမိူင်းမရၼႃႉၼၼ်ႉ လႆႈၶၢမ်ႇတၢင်းဢၼ် ၶျႃးတူၵ်းသႂ်ႇၵႃႈၼႂ်းၼွင်ၽႆးဢေႃႈ။ တၢင်းတၢႆၼၼ်ႉၸမ်ႉ၊ ပဵၼ်တၢင်းတၢႆ တူႉတီႉယႃႉဢေႃႈ။ ၼွင်ၽႆး ၵေႃႈပဵၼ်ဢေႃႈ။-

15ပေႃးသေၵေႃႉသေၵူၼ်း ဢမ်ႇၶဝ်ႈပႃး ၼႂ်းၸရၢင်းၽိုၼ်လိၵ်ႈဢသၢၵ်ႈၼၼ်ႉၸိုင်၊ ၵေႃႉၼၼ်ႉ လႆႈၶၢမ်ႇတၢင်းဢၼ်ၶျႃးတူၵ်းသႂ်ႇၵႃႈၼႂ်းၼွင်ၽႆးဢေႃႈ။

← Chapter 19 Jump to: Chapter 21 →