Revelation 22

Shan

← Chapter 21 Jump to:

1ၵမ်းၼၼ်ႉ တမၢၼ်ႇၵၢင်ႁၢဝ် ၼႄပျႃးၼမ်ႉႁွင်ႈ တီႈဢၼ်ၼမ်ႉဢသၢၵ်ႈလႆယူႇ ဢၼ်သႂ်လႅင်းၸိူဝ်ႉၼင်ႇ မၢၵ်ႇႁိၼ်ၸိင်ႇလႄႈ ဢွၵ်ႇသေၵႃႈတႂ်ႈပလၢင်ႇၽြႃးပဵၼ်ၸဝ်ႈ တင်းသူဝ်းဢွၼ်ႇမႃးၼၼ်ႉ တီႈၵဝ်ဢေႃႈ။-

2ၵႃႈၼႂ်းၶိုင်ႈၵၢင်သဵၼ်ႈတၢင်းလူင်ဝဵင်း ဢိၵ်ႇတင်း ၵႃႈတီႈႁိမ်းၽင်ႇႁွင်ႈသွင်ၽၢႆႇၼၼ်ႉ မီးတူၼ်ႈဢသၢၵ်ႈ ဢၼ်ၸၢင်ႈမၢၵ်ႇမၢၵ်ႇ သိပ်းသွင်မဵဝ်း လႄႈ ပၼ်မၢၵ်ႇမၼ်းယူႇ ၵူႈလိူၼ်ၼၼ်ႉဢေႃႈ။ မႂ်မၼ်းၵေႃႈ ၸၢင်ႈႁႂ်ႈ တၢင်းၶႆႈတၢင်းပဵၼ်ၵူၼ်း ၵူႈၸိူဝ်ႉၵူႈမဵဝ်းႁၢႆဢေႃႈ။-

3ၵမ်းလိုၼ်း ၽေးတၢင်းဢၼ်ၵိၼ်ႇဢၼ်ဝႃႈ တၵ်းဢမ်ႇလႆႈမီး သေၸိူဝ်ႉသေပိူင်။ ပလၢင်ႇၽြႃးပဵၼ်ၸဝ်ႈ ဢိၵ်ႇတင်းသူဝ်းဢွၼ်ႇ တၵ်းမီးယူႇၵႃႈၼိူဝ်ဝဵင်းၼၼ်ႉလႄႈ ၶႃႈၽြႃးပဵၼ်ၸဝ်ႈတင်းလၢႆ တၵ်းဢွၼ်ၵၼ်ႁဵတ်းဝၢတ်ႈၽြႃးယူႇဢေႃႈ။-

4ၶဝ်တၵ်းႁၼ်ၼႃႈမၼ်းၸဝ်ႈလႄႈ ၼႃႇမႃႉၸိုဝ်ႈသဵင်မၼ်းၸဝ်ႈ မီးဝႆႉယူႇၵႃႈတီႈၼႃႈၽၢၵ်ႇၶဝ်ဢေႃႈ။-

5ၼႂ်းဝဵင်းၼၼ်ႉ ၶိင်ႇၵၢင်ၶိုၼ်း တၵ်းဢမ်ႇမီး။ ဢမ်ႇလူဝ်ႇဝၢၼ်ႇၽႆးတဵၼ်း။ သၢႆဢရွင်ႇၵၢင်ဝၼ်းၵေႃႈ ဢမ်ႇလူဝ်ႇ။ လွင်ႈမၼ်းၸမ်ႉ ထႃႇဝရႃႉၸဝ်ႈၽြႃးပဵၼ်ၸဝ်ႈ တၵ်းပွႆႇသၢႆဢရွင်ႇမၼ်းၸဝ်ႈၸူး ၵႃႈတီႈၶဝ်လႄႈ ၶဝ်တၵ်းလႆႈၸၢမ်ႇၸႃးယူႇ ၵူႈၵမ်ႇၽႃႇ သိုပ်ႇသိုပ်ႇတၢမ်းတၢမ်းဢေႃႈ။

6တမၢၼ်ႇၵၢင်ႁၢဝ်ၵေႃႈ လၢတ်ႈလႄႈဝႃႈ၊ ၵႂၢမ်းၼႆႉပဵၼ်ၵႂၢမ်းသဵတ်ႈၸႃႇ၊ ၵႂၢမ်းဢၼ်မၢၼ်ႇမႅၼ်ႈ၊ၸိုဝ်ႈၸႂ်ႈဢေႃႈ။ ထႃႇဝရႃႉၸဝ်ႈၽြႃးပဵၼ်ၸဝ်ႈ ဢၼ်ဢုပ်ႉပိူင်ႇဝီႉၺိၺ်ႇပရေႃးၽႅတ်ႈတင်းလၢႆၼၼ်ႉ ပွႆႇၸႂ်ႉတမၢၼ်ႇၵၢင်ႁၢဝ်မၼ်းၸဝ်ႈမႃး ႁႂ်ႈလႆႈၼႄပျႃး လွင်ႈတၢင်းဢၼ် တၵ်းပဵၼ်မႃး ၼႂ်းၸူဝ်ႈၶိင်ႇၵႃႇလႃႉ ဢမ်ႇႁိုင်ဢမ်ႇၼၢၼ်းၸိူဝ်းၼၼ်ႉ ၵႃႈတီႈၶႃႈမၼ်းၸဝ်ႈတင်းလၢႆယဝ်ႉ။-

7တူၺ်းလူး၊ ၵဝ်တၵ်းၸဵဝ်းမႃး ၶၼ်ၶၼ်ၽႂ်းၽႂ်းဢေႃႈ။ ၵေႃႉဢၼ်ပႂ်ႉၵမ်ပႂ်ႉၸွမ်း ၵႂၢမ်းဢၼႃႇၵၢတ်ႈတီႉၽိုၼ်လိၵ်ႈၼႆႉၼၼ်ႉ မီးမင်ႇၵလႃႇဢေႃႈ၊ ဝႃႈၼင်ႇၼႆဢေႃႈ။

8ၵဝ် ယူဝ်းႁၢၼ်ႇ ၼႆႉ လႆႈငိၼ်းလႆႈႁၼ် လွင်ႈတၢင်းၸိူဝ်းၼႆႉဢေႃႈ။ မိူဝ်ႈဢၼ်လႆႈငိၼ်းလႆႈႁၼ်ယဝ်ႉၼၼ်ႉ ၵဝ်ၶုပ်ႉမူပ်ႇ ႁႂ်ႈလႆႈၵူဝ်းၵႂၢႆႇ ၵႃႈတီႈႁိမ်းတိၼ်တမၢၼ်ႇၵၢင်ႁၢဝ် ဢၼ်ၼႄပျႃး လွင်ႈတၢင်းၸိူဝ်းၼၼ်ႉ တီႈၵဝ်ၼၼ်ႉဢေႃႈ။-

9မၼ်းၵေႃႈလၢတ်ႈတီႈၵဝ်လႄႈဝႃႈ၊ ယႃႇပေႁဵတ်းသေၵမ်း။ ၵဝ်ၸမ်ႉ ပဵၼ်ၵေႃႉဢၼ်သၢင်ႈႁဵတ်းလူၺ်ႈၵၼ်တင်းမႂ်းလႄႈ ၶဝ်ႈပႃးၼႂ်းပီႈၼႂ်းၼွင်ႉမႂ်း ဢၼ်ဝႃႈ ပရေႃးၽႅတ်ႈ ဢိၵ်ႇတင်း ၶဝ်ၸိူဝ်းဢၼ် ပႂ်ႉၵမ်ပႂ်ႉၸွမ်း ၵႂၢမ်းၽိုၼ်လိၵ်ႈၼႆႉၼၼ်ႉဢေႃႈ။ ၵူဝ်းၵႂၢႆႇၽြႃးပဵၼ်ၸဝ်ႈတႃႉ၊ ဝႃႈၼင်ႇၼႆဢေႃႈ။

10ၵမ်းၼၼ်ႉ မၼ်းသမ်ႉလၢတ်ႈတီႈၵဝ် လႄႈဝႃႈၸမ်ႉ၊ ၵႂၢမ်းဢၼႃႇၵၢတ်ႈတီႉ ၽိုၼ်လိၵ်ႈၼႆႉၸိုင် ယႃႇပေတွၵ်ႇတၼ်းသိၵ်ႈ။ လွင်ႈမၼ်းၸမ်ႉ ၶိင်ႇၵႃႇလႃႉၸမ်တၵ်းႁွတ်ႈထိုင်ယဝ်ႉ။-

11ႁႂ်ႈၵေႃႉဢၼ်ဢမ်ႇတြႃးၼၼ်ႉ ႁဵတ်းဢၼ်ဢမ်ႇတြႃးယူႇ လူးၵွၼ်ႇတႃႉ။ ႁႂ်ႈၵေႃႉဢၼ်ၵူဝ်ႈၵိူၵ်ႇၼၼ်ႉ ၵူဝ်ႈၵိူၵ်ႇယူႇ လူးၵွၼ်ႇတႃႉ။ ႁႂ်ႈၵေႃႉဢၼ်သိုဝ်ႈတေႃႇၼၼ်ႉ သိုဝ်ႈတေႃႇယူႇ လူးၵွၼ်ႇတႃႉ။ ႁႂ်ႈၵေႃႉဢၼ်မူတ်းၸၢင်ႇၼၼ်ႉ မူတ်းၸၢင်ႇယူႇ လူးၵွၼ်ႇတႃႉ။

12တူၺ်းလူး၊ ၵဝ်တၵ်းၸဵဝ်းမႃး ၶၼ်ၶၼ်ၽႂ်းၽႂ်းဢေႃႈ။ ၵဝ်ပႃးဢဝ်ဢၵျူဝ်းဢပႅတ်ႈမႃးလႄႈ တၵ်းတႅၼ်းပၼ် ၸွမ်းၵႃႈၼင်ႇ တၢင်းၵမ်တၢင်းၵျၢင်ႉ တီႈၵူၼ်းၵူႈၵေႃႉၵူႈၵူၼ်း ႁင်းၽႂ်ႁင်းမၼ်းဢေႃႈ။-

13ၵဝ်ပဵၼ် ဢႃႇလႃႇၽႃႉ ဢေႃႈ။ ဢေႃးမေႇၵႃႉ ၵေႃႈပဵၼ်ဢေႃႈ။ ၵဝ်ပဵၼ်ၵေႃႉဢၼ် ဢွၼ်တၢင်းသုတ်း ဢိၵ်ႇတင်းၵေႃႉဢၼ် လိုၼ်းလင်သုတ်းဢေႃႈ။ တီႈတႄႇၸႃႉ ဢိၵ်ႇတင်း တီႈသုတ်းၵေႃႈပဵၼ်ဢေႃႈ။-

14ၶဝ်ၸိူဝ်းဢၼ်သၢႆႇလွႆး ၶူဝ်းၼုင်ႈတူဝ်ၸဝ်ႈၵဝ်ႇ ႁႂ်ႈလႆႈၸၢပ်ႈသႅင်ႇၵၼ်တင်း တူၼ်ႈဢသၢၵ်ႈလႄႈ ၶဝ်ႈၵႃႈၼႂ်းၽၵ်းတူဝဵင်းၼၼ်ႉ မီးမင်ႇၵလႃႇဢေႃႈ။-

15ၵႃႈတီႈၽၢႆႇၼွၵ်ႈၸမ်ႉ မီးၵေႃႉဢၼ်ပဵၼ်မႃ၊ ၵေႃႉဢၼ်ၸၢင်ႈၸေႃႉၸၢင်ႈႁဵတ်းတီႈပိူၼ်ႈ၊ ၵေႃႉဢၼ်ႁဵတ်းမေႇထုင်ႇဢၼ်ဢမ်ႇတြႃး၊ ၵေႃႉဢၼ်ဢဝ်ဢသၢၵ်ႈၵူၼ်းတၢႆ၊ ၵေႃႉဢၼ်ၵူဝ်းၵႂၢႆႇရုၵ်ႈထူႉ၊ ၵေႃႉဢၼ်ထုၵ်ႇၸႂ်ၵျိူၵ်ႈၸႂ် လွင်ႈတၢင်းဢၼ်ယႃႉသဵတ်ႈၸႃႇၼၼ်ႉလႄႈ ပွင်ႁဵတ်းယူႇၼၼ်ႉ တင်းသဵင်ႈတင်းလူင်ၼၼ်ႉဢေႃႈ။

16ၵဝ် ယေႇသူႉ ပွႆႇၸႂ်ႉတမၢၼ်ႇၵၢင်ႁၢဝ်ၵဝ်ၵႂႃႇ ႁႂ်ႈလႆႈၶၢမ်ႇသၢၵ်ႈသေႇတီႈသူ ပုၼ်ႈၸိူဝ်းၸဝ်ႈတင်းလၢႆဢေႃႈ။ ၵဝ်ၸမ်ႉ ပဵၼ်ႁၢၵ်ႈ တႃႇဝိတ်ႈ ဢေႃႈ။ ၸိူဝ်ႉၶိူဝ်းမၼ်းၵေႃႈ ပဵၼ်ဢေႃႈ။ လၢဝ်လူင် ဢၼ်ႁိူဝ်ႈလႅင်းၵေႃႈ ပဵၼ်ဢေႃႈ။

17ဝီႉၺိၺ်ႇၸဝ်ႈ ဢိၵ်ႇတင်း လုၵ်ႈယိင်းသၢဝ် ဢၼ်သွင်ႇမင်ႇၵလႃႇၼၼ်ႉ လၢတ်ႈလႄႈဝႃႈ၊ မႃးသေၵမ်း၊ ဝႃႈၼင်ႇၼႆဢေႃႈ။ ႁႂ်ႈၵေႃႉဢၼ်ငိၼ်းၼၼ်ႉ လၢတ်ႈလႄႈဝႃႈ၊ မႃးသေၵမ်း၊ ဝႃႈၼင်ႇၼႆသေၵမ်းလူၺ်ႈ။ ႁႂ်ႈၵေႃႉဢၼ်ယၢၵ်ႇၼမ်ႉၼၼ်ႉ မႃးသေၵမ်းလူၺ်ႈ၊ ႁႂ်ႈၵေႃႉဢၼ်မီးဢလူဝ်ႇၶႂ်ႈလႆႈၼၼ်ႉ ယင်းဢမ်ႇပၼ်ၵႃႈမၼ်း၊ၶၼ်မၼ်းလႄႈ ဢဝ်ၼမ်ႉဢသၢၵ်ႈသေၵမ်းလူၺ်ႈ။

18ၵဝ်ၶၢမ်ႇသၢၵ်ႈသေႇ ၵႃႈတီႈၶဝ် ၵႃႈဢၼ်ငိၼ်း ၵႂၢမ်းဢၼႃႇၵၢတ်ႈတီႉ ၽိုၼ်လိၵ်ႈၼႆႉၼၼ်ႉၸမ်ႉ၊ ပေႃးသေၵေႃႉသေၵူၼ်း ထၢပ်ႈလႄႈ သႂ်ႇဢၼ်မႂ်ႇ ၵႃႈၼႂ်းလွင်ႈတၢင်းၸိူဝ်းၼႆႉထႅင်ႈၸိုင် ၽြႃးပဵၼ်ၸဝ်ႈ တၵ်းႁႂ်ႈၽေးတၢမ်ႇဢၼ်တႅမ်ႈဝႆႉၵႃႈၼႂ်းလိၵ်ႈၼႆႉ ၼၼ်ႉ ႁွတ်ႈထိုင်ၵႃႈၼိူဝ်ၵေႃႉၼၼ်ႉဢေႃႈ။-

19ပေႃးသေၵေႃႉသေၵူၼ်း ၼုၵ်ႈၵႂၢမ်း ဢၼႃႇၵၢတ်ႈတီႉၽိုၼ်လိၵ်ႈၼႆႉ ၵမ်ႈၽွင်ႈဢွၵ်ႇပႅတ်ႈၸိုင်၊ ၽြႃးပဵၼ်ၸဝ်ႈတၵ်းၼုၵ်ႈဢၶႂၢင်ႉ တၢင်းဢၼ်ၵေႃႉၼၼ်ႉ ၸၢပ်ႈသႅင်ႇၵၼ်တင်းတူၼ်ႈဢသၢၵ်ႈ ဢိၵ်ႇတင်းဝဵင်းဢၼ်မူတ်းၸၢင်ႇ ဢၼ်တႅမ်ႈဝႆႉၼႂ်းၽိုၼ်လိၵ်ႈၼႆႉ ၼၼ်ႉ ဢွၵ်ႇပႅတ်ႈဢေႃႈ။

20ၸဝ်ႈဢၼ်ၶၢမ်ႇသၢၵ်ႈသေႇ လွင်ႈတၢင်းၸိူဝ်းၼႆႉၼၼ်ႉ လၢတ်ႈလႄႈဝႃႈ၊ ၵဝ်တၵ်းၸဵဝ်းမႃးၶၼ်ၶၼ်ၽႂ်းၽႂ်း ဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆဢေႃႈ။ ဢႃႇမိၼ်ႇ။ ၸဝ်ႈ ယေႇသူႉ တီႈၶႃႈ။ ၶႅၼ်းတေႃႈမႃးသေၵမ်းတီႈၶႃႈ။-

21ႁႂ်ႈၵျေးၸူး ၸဝ်ႈ ယေႇသူႉ မီးလူၺ်ႈၵၼ်တင်း ၵူၼ်းမူတ်းၸၢင်ႇတင်းလၢႆ သေၵမ်းလူၺ်ႈ။- ၵျၢမ်းပျႃႇတိၵ်ႈယဝ်ႉယဝ်ႉဢေႃႈ။

← Chapter 21 Jump to: