Joshua 1

Sotho 1951 (BIBELE)

Jump to: Chapter 2 →

1Mola Moshe mohlanka wa Modimo a hwile, Morena o boletše le Joshua morwa wa Nuni, mohlanka wa Moshe, a re:

2Moshe mohlanka wa ka o hwile. Bjale tsoga o sele noka ye ya Jorodane; wena le setšhaba se ka moka le ye nageng ye ke e neilego Baisiraele.

3Gohle mo dinao tša lena di tlogo gata gona ke le neile ka mokgwa wo ke boditšego Moshe ka re:

4Go goma ka lešoka, le ka dithaba tše tša Libanoni, le ka noka e kgolo ya Forate, naga ka moka ya Bahethe, go goma ka lewatle le legolo thoko ya bodikela, e tlo ba naga ya lena.

5Ga go na e a tlogo ema ge o fihla mehla yohle ya go phela ga gago. Ke tlo ema le wena bjalo ka ge ke be ke ema le Moshe. Nka se ke ka go lahla; nka se ke ka go tlogela.

6Tiiša maatla o dire senna; ka gobane ke wena o tlogo thopa naga ye nna ke e enetšego botatabo ka re ke tla ba nea yona ya ba madulo a bona.

7Fela, tiiša maatla o dire senna ruri ge o hlokomela melao ka moka ye Moshe motseta wa ka a go laetšego yona. O se ke wa e fapoga ka go ya go le letona goba go la ntsogošo; ke mo o tlogo letlega mo gohle mo o yago.

8Puku ye ya melao o se ke wa ba wa lesa go e bolela; o e akanye mosegare le bošego, gore o kgone go hlokomela tšohle tše di ngwadilwego mo go yona, mme wa dira tšona. Ke mo o tlogo ba le mahlatse ditseleng tša gago, ke mo o tlogo letlegelwa.

9Ke go laetše ge gore o tiiše maatla, o dire senna. O se ke wa tšhoga, o se ke wa gakanega, ka gobane Morena Modimo wa gago o ema le wena mo gohle mo o yago.

10Ke mo Joshua a laetšego balaodi ba setšhaba a re:

11Thethang le mešaša le laele setšhaba le re: Itokišetšeng mefago ka gobane go šetše matšatši a mararo; ke mo le tlogo sela noka ya Jorodane, la ya go tšea naga ye Morena Modimo wa lena a le neilego yona gore e be ya lena.

12Barubeni le Bagada le ba seripa sa Bamanase Joshua o boletše le bona a re:

13Le se lebale lentšu lela le Moshe mohlanka wa Modimo a le laetšego lona a re: Morena Modimo wa lena o le gorošitše a le nea naga ye.

14Bjale basadi ba lena le bana ba lena a ba šale; go šale le diruiwa tša lena mo nageng yeno, ye Moshe a le filego yona ka mošono wa Jorodane. Ge e le lena le sele, le swere marumo ka moka ba le lego banna ba bagale, le ete bana ba bolena pele, le ba thuše,

15go fihla ge Morena Modimo wa lena a gorošitše le bana ba bolena bjalo ka lena, gore le bona ba tšee naga ye Morena Modimo wa lena a ba neilego yona. Ke mo le tlo go kgona go boela mo nageng yeno ya lena ya ba magae a lena, a Moshe mohlanka wa Modimo a le filego ona ka mošono wa Jorodane thoko ya bohlabela.

16Ba fetola ba re: Tšohle tše o re laetšego tšona re tlo di dira, le gohle mo o re romago re tlo ya.

17Re tlo go kwa bjalo ka ge re be re ekwa Moshe. Segolothata ke ge Morena Modimo wa gago a ka ema le wena, bjalo ka ge a be a ema le Moshe.

18Mang le mang e a kago ganetša se o se bolelago, le e a sa kwego ge o re laya, o tlo bolawa. Segolothata ke gore o tiiše maatla, o dire senna.

Jump to: Chapter 2 →