Joshua 3

Sotho 1951 (BIBELE)

← Chapter 2 Jump to: Chapter 4 →

1Joshua a tsoga e sa le bosasa, a na le Baisiraele ka moka, ba tloga Sithima, ba tla nokeng ya Jorodane, ba lala gona moo ba sešo ba sela.

2Ge go fetile matšatši a mararo balaodi ba thetha le mešaša,

3ba laela setšhaba ba re: E re ge le bona polokelo ya kgwerano ya Morena Modimo wa lena e rwalwa ke baperisita ba Balefi, gona le lena le tsoge le latele.

4Fela, le lese ba sepele sebaka sa meelo e dikete tše pedi, e be gona le latelago. Le se ke la batamela; gore le kgone go bona tsela ye le tlogo e sepela, ka gobane tsela yeo ga le ešo la ba la e sepela.

5Jošua a botša setšhaba a re: Ikgetheng, ka gobane ka moswana Morena o tlo dira mohlolo mo go lena.

6Baperisita a ba botša a re: Rwalang polokelo ya kgwerano le ete setšhaba pele. Ba e rwala mme ba eta setšhaba pele.

7Morena a botša Joshua a re: Lehono ke tlo thoma go go godiša mo go Baisiraele, gore ba tsebe gobane ke ema le wena, bjalo ka ge ke be ke ema le Moshe.

8Baperisita ba ba rwelego polokelo ya kgwerano wena o ba laele o re: Ge le fihla magomong a meetse a Jorodane, le eme.

9Baisiraele Joshua a ba bitša a re: Batamelang mo, le tle le kwe se Morena Modimo wa lena a se bolelago.

10A bolela le bona a re: Se le tlogo tseba ka sona gore e a nago le lena ke Modimo e a phelago, le gore: Bakanana, le Bahethe, le Bahefi, le Bapheresi, le Bagirigasi, le Baamoro, le Bajebusi, o tlo ba raka ge le fihla:

11Sese: Le tlo bona polokelo ya Mong wa lefase lohle ge e sela noka ya Jorodane e le etile pele.

12Bjale ntšhang banna ba lesome le metšo e mebedi mo melokong ka moka ya Baisiraele, leloko le lengwe le le lengwe monna o tee.

13E tlo re ge dinao tša baperisita ba ba rwelego polokelo ya Morena Mong wa lefase lohle, di gata meetse a fologago a etšwa tletlolo, a tlo kgaolwa a ema bjalo ka leboto letee.

14Gomme setšhaba sa hlahlamologa sa tšwa mo mešašeng ya bona gore ba sele noka ya Jorodane. Baperisita ba eta setšhaba pele ba rwele polokelo.

15Ya re ge barwadi ba polokelo ba fihla nokeng ya Jorodane, mme maoto a baperisita ba ba rwelego polokelo ge a gata mo meetse a gomago ntshe -- ka gobane noka ya Jorodane lebakeng la go buna e e tlale e khurumetše maboto a yona thoko tšohle --

16Ke mo meetse a fologago a etšwa tletlolo a emego, a hlophologa, a ba bjalo ka leboto letee, a fihla kgolelele motseng wa Adama wo o bataganego le Tsarathane. Ga e le meetse a fologelago lewatleng la molala, e lego lewatle la letswai, a gopa; gomme setšhaba sa sela se lebane le motse wa Jeriko.

17Baperisita ba ba rwelego polokelo ya Morena ba be ba eme mo go omilego mo gare ga noka ya Jorodane. Baisiraele ka moka ba sela ka mo go omilego; setšhaba sa sela ka moka ga sona.

← Chapter 2 Jump to: Chapter 4 →