Joshua 16

Sotho 1951 (BIBELE)

← Chapter 15 Jump to: Chapter 17 →

1Tengwa la leloko la bana ba Josefa la tšwa, la šupa naga ya go thoma ka noka ya Jorodane motseng wa Jeriko ka thoko ya bohlabela, molala o rotogago o etšwa Jeriko wa ya dithabeng tša Bethele.

2Mollwane o tloga Bethele wa leba Lusi, wa fetela mellwaneng ya Baaraki le wa Atharothe,

3wa tloga o fologela bodikela o leba mellwaneng ya ba Japeleti go goma ka Bethe-Horoni ka thoko ya tlase, go fihla Gesere; magomo ke lewatle.

4Bana ba Josefa, Manase le Efuraimi ba neilwe naga yeo ya ba magae a bona.

5Naga ya Baefuraimi ka dilete tša bona še: Mollwane wa naga ya bona thoko ya bodikela ke Atharothe-Adara go fihla Bethe-Horoni ka tletlolo.

6O tšwela thoko ya Bodikela, Mikemethate gwa šala thoko ya leboa, wa tseb'o boela bohlabela wa fihla Thaanathe-Silo, wa feta o leba bohlabela go fihla Janoa.

7Kua Janoa o tloga o fologela Atarothe le Maarathe, wa fihla Jeriko wa goma ka noka ya Jorodane.

8Go tloga Thapua mollwane o leba bodikele nokeng ya Kana, wa go kgotla lewatle. Ke ona magae a lešika la Baefuraimi ka dilete tša bona.

9Go sa na le metse e mengwe ye e gafetšwego Baefuraimi e le mo nageng ya Bamanase, metse ka moka le metsana ya yona.

10Fela ba lesitše go raka Bakanana ba ba agilego Gesere. Ke ka baka leo Bakanana ba sa agilego le Baefuraimi le bjale; fela, ke bahlanka ba bona.

← Chapter 15 Jump to: Chapter 17 →