Joshua 13

Sotho 1951 (BIBELE)

← Chapter 12 Jump to: Chapter 14 →

1E itše ge Joshua a šetše a tšofetše, a atetšwe ke matšatši, Morena a mo rera a re: O tšofetše, o atetšwe ke matšatši; gomme go sa šetše naga e kgolokgolo e sešego ya tšewa.

2Naga e šetšego ke dilete ka moka tša Bafilisita le tša Bagesuri ka moka,

3go tloga ka nokeng ya Sihori e rarelago le la Egipita, go fihla mollwaneng wa Ekironi thoko ya leboa e balelwago go Bakanana, dikgošana tše tlhano tša Bafilisita, e lego ya Gasa, le ya Asidodo, le ya Asikaloni, le ya Gathi, le ya Ekironi, le yona naga yela ya Baafi ka thoko ya borwa.

4Go šetše le naga ka moka ya Bakanana, le Meara e lego ya Basidoni, go fihla Afeke, go fihla ka mellwane ya Baamoro,

5le naga ya Bagibili, le lehlakore la Libanoni la thoko ya bohlabela go tloga ka Baali-Gada ka tlase ga thaba ya Herimone, go fihla kua go tlago la Hamathi.

6Ka moka ba ba agilego dithabeng go tloga Libanoni go iša Misirefothe Majima, Basidoni ka moka, nna ke tlo ba raka ge Baisiraele ba fihla. O fele o le abele Baisiraele ka tengwa, ka mo ke go laetšego ka gona.

7Ba abele naga ye e sa le bjale, e be ya meloko e senyane le ya seripa sa Bamanase.

8Bao ba bangwe ba bona ba filwego magae a bona le Barubeni le Bagada, a Moshe a ba neilego ona kua mošola wa Jorodane thoko ya bohlabela. Yena Moshe mohlanka wa Morena o ba neile,

9go tloga ka Aroere lebotong la noka ya Arioni, le metse e lego moeding woo, le molala ka moka o tlogago Medeba wa goma ka Diboni,

10le metse ka moka ya Sihoni kgoši ya Baamoro e bego e buša Hesiboni go fihla mellwaneng ya Baamoni,

11le la Gileada, le la Bagesuri, le la Bamaakati, le thaba ka moka tša Herimone, le la Basani ka moka go goma ka Salika,

12le mmušo ka moka wa Ogo wa Basani e a bego a buša Asetarothe le Ederei, e le e a šaletšego wa mašalela a ba megwanggwang. Bona bao Moshe o ba fentše a ba raka.

13Fela, Baisiraele ba lesitše go raka Bagesuri, le Bamaakati, gomme Bagesuri le Bamaakati le bjale ba sa agile le Baisiraele.

14Ge e le leloko la Balefi, lona ga a ka a le neela karolo e ka bago ya bona, ka gobane karolo ya bona ke mello ya Morena Modimo wa Isiraele, ka mo a ba boditšego ka gona.

15Ba leloko la Rubeni Moshe o ba neile magae ka dilete tša bona.

16Mollwane wa bona o be o tloga Aroere lebotong la noka ya Arinoni, le metse e lego moeding woo, le molala ka moka wa Medeba,

17le Hesiboni, le metse ya gona ka moka e lego molaleng, e lego Diboni, le Bamothebaali, le Bethe-Baali-Meone,

18le Jatsa, le Kedemothe, le Mephate,

19le Kiyathaima, le Sinima, le Tserethe-Sahari mo thabeng ya legoleng,

20le Bethe-Peoro, le Asidodo-Pisiga, le Bethe-Jesimothe,

21le metse ka moka e lego nageng ya molala, le mmušo ka moka wa Sihoni kgoši ya Baamori e e bego e buša Hesiboni, yo Moshe a mo fentšego le dikgoši tša Midiani, e lego Efi, le Rekema, le Tsuri, le Huri, le Reba, balata ba Sihoni ba ba bego ba agile nageng yeo.

22Le Bileama morwa wa Beoro senoge sela Baisiraele ba mmolaile ka lerumo gotee le ba ba bolailwego.

23Mollwane wa Barubeni e be e le noka ya Jorodane; e be e le wona mollwane wa naga ya ba gabo Rubeni ka dilete le ka metse le metsana ya bona.

24Ba leloko la Gada, bona Bagada, Moshe o ba neile naga ka dilete tša bona.

25Mollwane wa bona e be e le Jasere le metse ka moka ya Gileada, le seripa sa naga ya Baamoni go fihla Aroere, thoko ya bohlabela ya Raba,

26le go tloga Mahanaime go fihla Ramathe-Mitsipa, le Betonima, le go tloga Mahanaime go fihla mollwaneng wa Debiri.

27Mo molaleng ke motse wa Bethe-Harama, le wa Bethe-Nimira, le wa Sukothe, le wa Tsafone o šadišitšwego go mmušo wa Sihoni kgoši ya Hesiboni, le noka ya Jorodane le lehwiti la yona, go fihla magomong a lewatle la Genetsareta, ka mošola wa Jorodane thoko ya Bohlabela.

28Ke yona naga ya Bagada ka dilete tša bona le metse le metsana ya bona.

29Ba seripa sa leloko la Manase Moshe o ba neile naga ya bona bao ba seripa sa leloko la Bamanase ka dilete tša bona.

30Naga ya bona ke ya Mahanaime, le ya Basani ka moka, mmušo ka moka wa Ogo kgoši ya Basani, le metsana ya Jairi, e lego mo nageng ya Basani, metsana e masome a selelago,

31le seripa sa naga ya Gileada, le Asetarothe, le Ederei, le metse ya mmušo wa Ogo e neetšwe Bamakiri morwa wa Manase, seripa sa bonabao bana ba Makiri ka dilete tša bona.

32Ke gona moo Moshe a ba agišitšego molaleng wa Moaba mošola wa Jorodane kua thoko ya bohlabela.

33Ge e le ba leloko la Lefi Moshe ga a ka a ba nea kabelo. Ya bona kabelo ke Morena Modimo wa Isiraele, ka mo a ba boditšego ka gona.

← Chapter 12 Jump to: Chapter 14 →