Joshua 6

Sotho 1951 (BIBELE)

← Chapter 5 Jump to: Chapter 7 →

1Motse wa Jeriko Baisiraele ba o hweditše o tswaletšwe o phekilwe, go se na e a tšwago, go se na e a tsenago.

2Morena a botša Joshua a re: Lebelela, motse wa Jeriko ke o gafetše diatleng tša gago, le kgoši ya wona le banna ba bagale.

3Bjale lena banna ba bahlabani ka moka, dikologang motse wo, le o potologe gatee. Le dire ka mokgwa wo matšatši a selelago.

4Baperisita ba ba šupago ba sware dinaka tša ngwaga wa mogobo tše di šupago ba ete polokelo pele. Ka tšatši la go šupa motse wo le o dikologe gašupa, mme baperisita ba tšame ba letša dinaka.

5E tlo re ge ba letša naka ya mogobo, gomme le ekwa ge e lla gona setšhaba ka moka se tšhele lehoa le legolo. Ke mo merako ya motse e tlo go phušoga; gomme ba o tsene, e mongwe le e mongwe mo go mo lebanego.

6Joshua morwa wa Nuni a bitša baperisita, a ba laela a re: Rwalang polokelo ya kgwerano; gomme baperisita ba ba šupago ba sware dinaka tša ngwaga wa mogobo, ba ete polokelo ya Morena pele.

7Setšhaba a se laela a re: Fetang, le dikologe motse; ba ba itlhamilego ba ete polokelo ya Morena pele.

8Gwa dirwa bjalo ka mo Joshua a boditšego setšhaba ka gona, baperisita ba ba šupago ba eta polokelo ya Morena pele ba swere dinaka tša ngwaga wa mogobo, ba tšama ba letša dinaka; polokelo ya Morena ya ba latela.

9Ba madira ba eta baperisita bao pele ba ba bego ba letša dinaka; madira a mangwe a latela polokelo; ba fela ba tšama ba letša dinaka.

10Setšhaba sona, Joshua o be a se laetše a re: Le se ke la tšhela lehoa; lena le se ke la kwatša lentšu, le polelo e se ke ya tšwa melomong ya lena, go be go tle letšatši, le ke tlogo le botša ka lona ka re: Tšhelang lehoa! Ke mo le tlogo tšhela lehoa.

11Gomme polokelo ya Morena ya dikologa motse, ya potologa gatee; ba tsebo boela mešašeng ba lala gona.

12Ka la ka moswana Joshua a tsoga e sa le bošego; baperisita ba rwala polokelo ya Morena.

13Baperisita ba ba šupago ba ba swerego dinaka tša ngwaga wa mogobo ba eta polokelo ya Morena pele, ba tšama ba letša dinaka tšeo; madira a ba eta pele; lešaba la latela polokelo ya Morena, dinaka di fela di letšwa.

14Ka lona tšatši leo la bobedi ba dikologile motse gatee, ba tsebo boela mešašeng; ba fetša matšatši a selelago ba dira ka mokgwa woo.

15Ka tšatši la go šupa ba tsoga e sa le bošego ka mahuba, ba dikologa motse ba dira gašupa; e be e le lona letšatši leo fela le ba dikologilego motse gašupa ka lona.

16Ya re ge ba o dikologa la go šupa, mme baperisita ba letša dinaka, Joshua a botša setšhaba a re: Tšhelang lehoa, gobane Morena o le neile motse!

17Fela, motse wo, le tšohle tše di lego mo go wona, e be segafiwamoka sa Morena. Ba ba tlogo phela ke Rahaba, mosadi yola wa seotswa, le ba ba nago nae ka ngwakong, gobane o kile a uta batseta ba re bego re ba romile.

18Segolothata le itote, mme le ile segafiwa; le se ke la tšea se se gafilwego, gore le se tlo dira mešaša ya Isiraele segafiwa, la e hlolela dikotsi.

19Silifera ka moka le gauta, le dibja tša mphiri le tša tshipi, e be tše di kgethetšwego Morena; di tšhelwe mahumong a Morena.

20Bjale setšhaba sa tšhela lehoa, gwa letšwa dinaka; ya na ya re ge setšhaba se ekwa mollo wa dinaka, sa tšhela lehoa le legolo; ya ba mo merako e phušogago; setšhaba sa namelela motseng, e mongwe le e mongwe a tsena ka mo a lebanego nago; ya ba gona go o thopa.

21Tšohle tše di bego di le mo go wona ba di dirile digafiwamoka, go thoma ka banna go iša go basadi, le go thoma ka masogana go iša go bakgalabje, le ka dikgomo, le ka dihuswane, le ka dipokolo, ba di fetša ka bogale bja marumo.

22Banna bala ba babedi ba ba kilego ba hlola naga, Joshua o be a ba boditše a re: Tsenang ngwakong wa mosadi yola wa seotswa, le ntšheng mosadi yeo, le bohle ba a nago nabo, le dire ka mo le mo enetšego ka gona.

23Ke mo masogana ao a bahlodi a tsenego, a ntšha Rahaba, le tatagwe, le mmagwe, le dikgaetšedi tša gagwe, le bohle ba a nago nabo, le ba moloko wa gabo; ba ba bea ka ntle ga mešaša ya Baisiraele.

24Motse ba o fiša ka mollo le tšohle tše di bego di le go wona. Disilifera le digauta, le dibja ka moka tša mphiri le tša tshipi, tšona ba di tšhela mahumong a Ngwako wa Morena.

25Ge e le Rahaba mosadi eo wa seotswa, le ba leloko la tatagwe, le bohle ba ba bego ba na nae, Joshua a ba lesa ba phela. Le bjale ba sa agile le Baisiraele; ka gobane Rahaba o kile a uta batseta bala ba Joshua a bego a ba romile go hlola motse wa Jeriko.

26Mehleng yeo Jošua o enišitše keno ya go re: Kotsi e tšwago go Morena e tlo wela eo, e a kago tsoga a aga motse wo wa Jeriko. E tlo re mohla a o theago, a hwelwa ke morwa wa gagwe e mogolo; ge a tsenya dimati tša wona o tlo hwelwa ke morwa wa gagwe e monyenyane.

27Gomme Morena a ema le Joshua; tumo ya gagwe ya kwala nageng ka moka.

← Chapter 5 Jump to: Chapter 7 →