Joshua 2

Sotho 1951 (BIBELE)

← Chapter 1 Jump to: Chapter 3 →

1Bjale Joshua morwa wa Nuni, ba le moo Sithima, a roma banna ba babedi ba dihlodi, a ba laya ka thopeng a re: Yang le hloleng naga le motse wa Jeriko. Banna bao ba ya, ba tsena ngwakong wa mosadi wa seotswa, wa leina la Rahaba, ba robala gona.

2Kgoši ya Jeriko ya tsebišwa gore: Banna šeba, ba tsene mo bošego; ba tšwa go Baisiraele; ba tlile go hlola naga.

3Kgoši ya Jeriko ya roma banna ba tla go Rahaba ba re: Ntšha banna ba ba tlilego go wena, ba ba tsenego fa ngwakong wa gago; ka gobane ba tlile go hlola naga ka moka.

4Ge e le mosadi eo o be a utile banna ba babedi bao; bjale a re: Go bjalo, banna bao ba be ba tlile fa go nna; mme nna ke be ke sa tsebe mo ba tšwago.

5E itše ge kgoro e tswalelwa ka leswiswana, ba be ba tšwile; gomme nna ga ke tsebe mo ba ilego ntshe. Kitimang le ba hlomarele; le sa tlo ba swara.

6Anthe yena o be a ba nameditše godimo ga ngwako, a ba utile mo manting a a bego a a anegile hlakeng ya ngwako wa gagwe.

7Banna bala ba kitima ba ba nyaka tseleng ya go ya Jorodane madibogong. Bahlomaredi bao ge ba tšwile, kgoro ya tswalelwa.

8Ya re ba sešo ba yo robala, mosadi a rotogela go bona gona moo hlakeng;

9a bolela le bona a re: Nna ke tseba gobane Morena o le neile naga ye; ke tseba le gore re wetšwe ke go le tšhoga, le gore bohle ba ba agilego nageng ye ba nolegile moko ge le fihla.

10Ka gobane re kwele gobane Morena o gopišitše meetse a lewatle la mahlaka ge le fihla mohla le etšwa Egipita. Re kwele tše le di dirilego magoši ala a mabedi a Baamoro kua mošola wa Jorodane, boSihoni le Ogo, ka mo le ba dirilego ba gafiwamoka.

11Ra re go kwa tšeo, dipelo tša rena tša gakanega; ga go sa na wa pelo ye e tiilego ge go fihla bolena; ka gobane Morena Modimo wa lena ke Modimo wa kua godimo magodimong, le wa mono fase lefaseng.

12Bjale, ka gobane ke le dirile ka botho, le nkeneleng ka Morena gore le tlo ntira ka botho, le ba lapa la gešo ka moka; gomme le mpeele seka se se botegago,

13sa go re: Tate le mme, le dikgaetšedi, le banyanana ba ka ka moka, le ba ba nago nabo ka moka, le tlo re lesa ra phela, la re phemela lehu.

14Banna bao ba fetola ba re: Meoya ya rena e ka hwa bakeng sa lena; ge le sa re eke tabeng ye ya rena, gona mohla Morena a tlogo re nea naga ye, re tla go dira ka botho ra go botegela.

15Ya ba gona a ba fološago ka thapo ka lešoba la mo morakong, ka gobane ngwako wa gagwe o be o kgohlagane le morako ka ge a agile morakong.

16A ba rera a re: Rotogelang dithabeng gore le se ke la gahlana le ba ba ilego go le nyaka; le utame gona kua matšatši a mararo, bahlomaredi ba lena ba be ba boe. Ke mo le tlogo kgona go swara tsela ya lena.

17Banna bao ba re: Keno ye re go enetšego yona re ka se ke ra e senya.

18Bjale, mohla re tlago nageng ye, thapo e khubedu ye re fologago ka yona re hwetše o e tlemile mo lešobeng le, re hwetše o kgobile tatago, le mmago, le dikgaetšedi, le ba lapa la tatago ka moka.

19E a tlogo tšwela ntle ka mojako wa ngwako wa gago, e tlo ba molato wa gagwe ge a ka bolawa, e tlo ba e se wa rena. Fela, mang le mang e a tlogo ba fa ngwakong wa gago, e tlo ba molato wa rena ge a ka dirwa selo.

20Fela, ge o ka re seba, gona keno ye o re enitšitšego yona, e tlo senyega.

21Mosadi a re: A go be bjalo ka ge le boletše. Ke moka a ba lesa ba sepela, thapo e khubedu a e tlemelela gona moo lešobeng.

22Bona ba tloga ba ya dithabeng, ba fetša matšatši a mararo ba dutše gona; bahlomaredi ba bona ba ba ba boa ba ba tsomile tseleng ka moka ba ba hloka.

23Banna ba babedi bao ba fologa dithabeng, ba sela noka, ba tla go Joshua morwa wa Nuni, ba mo laodišetša tšohle tše ba di hweditšego.

24Ba mmotša ba re: Naga ka moka Morena o e neile rena; beng ba yona bohle ba a re boifa.

← Chapter 1 Jump to: Chapter 3 →