Joshua 9

Sotho 1951 (BIBELE)

← Chapter 8 Jump to: Chapter 10 →

1Ya na ya re ge dikgoši ka moka tše dib ego di agile mošono wa Jorodane, mo dithabeng le magoleng, le mo magomong ka moka a lewatle le legolo mo a yago a yo kgotlana le dithaba tša Libanoni, e lego Bahethe, le Baamoro, le Bakanana, le Bapheresi, le Bahefi, le Bajebusi, ge dikgoši tša bona di ekwa fao,

2tša kwana gore di tlo hlabana le Joshua le Baisiraele ka go ba dika.

3Le Bagibeoni ba kwa tše Joshua a di dirilego motse wa Jeriko le wa Ai.

4Bona ba loga maano; ba tšea mefago, ba beleša dipokolo tša bona mekotla ye e onetšego, le makuka a beine a a onetšego, a kgeretlanego mme a rokwa;

5Ba rwala dieta tše di mamilwego, ba apara diaparo tše di onetšego; gomme dinkgwa tša bona tša mefago e be e le tše thata di omeletše, di kumagane.

6Ba tla go Joshua mešašeng ya kua Giligala, ba bolela le banna ba Isiraele ba re: Re tšwa nageng ya kgole. Bjale dirang kgwerano le rena.

7Banna ba Isiraele ba rera Bahefi bao ba re: Mohlomong le agile hleng le rena; gona re ka dira bjang kgwerano le lena?

8Banna bala ba rera Joshua ba re: Rena re bahlanka ba gago. Joshua a fetola a re: Le bomang? Gomme le tšwa kae?

9Bona ba re: Rena bahlanka ba gago re tšwa nageng ya kgolelele. Re tla ka baka la leina la Morena Modimo wa lena; gobane re kwele tumo ya gagwe, le tšohle tše a di dirilego Egipita.

10Le tšohle tše a di dirilego dikgoši tšela tše pedi tša mošola wa Jorodane, e lego Sihoni kgoši ya Hesibone, le Ogo kgoši ya Basani e bego e dutše Asitherothe.

11Ke mo bagolo ba rena le baagi ba naga ya gešo ka moka ba re boditšego ba re: Tšeang mefago ya tsela le yo ba hlakanetša; Le ba botše le re: Re bahlanka ba lena; bjale dirang kgwerano le rena.

12Mola re wela tsela ya go tla fa go lena, dinkgwa tše tša rena di be di sa fiša, ge re di tšea nywakong ya rena gore e be mefago, gomme bjale šedi, di omeletše, di bile di kumagane.

13Makuka a a beine re a tšhetše beine e sa le a mafsa; bjale šea, a kgeretlane; diaparo tša rena di onaditšwe ke botelele bja tsela.

14Banna ba Isiraele ba ngwatha mefago ya banna bao; ba dira bjalo ba se ba botšiša molomo wa Morena.

15Joshua a dira leago le bona, a tlema kwano nabo ya go re: o tlo ba lesa ba phela; mme bagolo ba phuthego ba ba enela.

16Ya re ge go fetile matšatši a mararo ba gwerane le bona, ba kwa gobane ba agile kgauswi le bona; ba bile ba dutše hleng le bona.

17Gobane e itše ge Baisiraele ba tloga, ba fihla metseng ya bona ka tšatši la boraro, metse ya bona e le Gibeoni, le Kafira, le Beerothe, le Kiryathe-Jearima.

18Fela, Baisiraele ba lesa go ba bolaya, ka gobane bagolo ba phuthego ba be ba ba enetše ka Morena Modimo wa Isiraele. Phuthego yona ya omanya bagolo bao.

19Bjale bagolo ka moka ba botša phuthego ka moka ba re: Rena re ba enetše ka Morena Modimo wa Isiraele; bjale re ka se ke ra ba dira selo.

20Se re kago ba dira sona, ke go ba lesa ba phela, gore re se tlo welwa ke kgalefelo ka baka la keno ye re ba enetšego yona.

21Ke sona se bagolo ba se boletšego, ba re: A ba phele, e be baphaphi ba dikgong le bagi ba meetse ba phuthego ka moka, ka mo bagolo ka moka ba bolelago ka gona.

22Joshua a ba bitša, a ba rera a re: Le re foretšeng la re: Re kgolelele le lena, mola le dutše hleng le rena?

23Bjale le tšwilwe; gomme mo go lena go ka se ke gwa fela bohlanka bja go phapha dikgong le go gela Ngwako wa Modimo wa ka meetse.

24Bona ba fetola ba re: Rena bahlanka ba gago re boditšwe gobane Morena Modimo wa gago o kile a laela Moshe mohlanka wa gagwe, a re a le nee naga ya ka moka, le gore go fedišwe baagi ba naga ye ge le fihla; mme rena ra boifela bophelo bja rena gagolo; ra ba ra dira sona se.

25Bjale ke rena ba; re seatleng sa gago; re dire ka mo o bonago e le botse le go loka.

26Gomme Joshua a ba dira ka mokgwa woo; a ba namolela diatleng tša Baisiraele, ba se ke ba ba bolaya.

27A ba bea ya ba baphaphi ba dikgong mohla woo, le bagi ba meetse ba phuthego le aletare ya Morena. Le bjale go sa eme ka mokgwa woo; ke ba felo mo Morena a tlogo go kgetha.

← Chapter 8 Jump to: Chapter 10 →