Joshua 15

Sotho 1951 (BIBELE)

← Chapter 14 Jump to: Chapter 16 →

1Tengwa la leloko la Bajuda, ka dilete tša bona, la šupa thoko ya borwa mellwaneng ya Edomo lešokeng la Sini, kua magomong a thoko ya borwa.

2Mollwane wa bona ka thoko ya borwa o tloga mo magomong a lewatle la letswai, mafelelong a lona a lebago thoko ya borwa.

3O leba thoko ya borwa ka morotoga wa diphepheng o fetela Sini, wa rotogela Kadese-Baranea, wa fetela Hetserone, wa rotogela Adara, wa aroga wa ya Kareka,

4wa feta Atsimona wa fihla nokeng ya Egipita, wa yo kgotla ka lewatle.

5Thoko ya bohlabela mollwane ke lewatle la letswai go fihla mo le tsenwago ke noka ya Jorodane. Gonamoo go gomago lewatle matsenong a Jorodane ke mo go thomago mollwane wa thoko ya leboa.

6O rotogela Bethe-Hogola, wa rarela Bethe-Araba ka thoko ya leboa, wa hlatlogela leswikeng la Bohani morwa wa Rubeni.

7O rotoga ka moedi wa Akore wa tla Debiri, wa arogela thoko ya leboa wa ya Giligala fala go lebanego le mmotwana wa Adumima ka thoko ya borwa bja nokana, wa fetela letsheng la Entsemese, wa tla sedibeng sa Rogele.

8O rotoga mo mogwereng wa Beni-Hinomi o rarela thaba ya Bajebusi ka thoko ya borwa, ke gona Jerusalema; mollwane o rotogela sehlweng sa thaba e bapetšego le mogwere wa Beni-Hinomi ka thoko ya bodikela mo molala wa Refaimi o gomago gona thoko ya leboa.

9Sehlweng sa thaba yeo mollwane o theogela sedibeng sa nokana ya Nefuthoa, wa fetela metseng ya Efurone, wa arogela Baala, ke gona Kiryathe-Jearima.

10Mollwane o tloga Baala wa leba bodikela thabeng ya Seire, o šika le lehlakore la thaba ya Jearima ka thoko ya leboa; ke gona Kaselone; wa fologela Bethe-Semese, wa fihla Thimina.

11O tšwa moo wa šika le thaba ya Ekironi ka thoko ya leboa, wa tloga o leba Sikerone, wa fetela thabeng ya Baala, wa tšwela Jabiniele wa yo kgotla le lewatle.

12Mollwane ka thoko yeo ya Bodikela ke lewatle le legolo. Ke yona mellwane ya ba Juda le dilete tša thoko tšohle.

13Ga e le Kalebe morwa wa Jefune o neilwe kabelo le bana ba Juda ka mo Morena a laetšego Joshua, e lego motse wa Araba, tatago Enaki; ke wona motse wa Heburone.

14Gona moo Kalebe a raka Baenaki ba bararo; ke Sesai, le Ahimane, le Thalamai, ba ba tswetšwego ke Enaki.

15A tšwa moo a rotogela go ba gaDebiri. Leina la motse woo kgaleng e be e le Kiryathe-Sefere.

16Kalebe a re: E a hulago motse wa Kiryathe-Sefere a o thopa, ke tlo mo nea Akisa morwedi waka ya ba mosadi wa gagwe.

17Othiniele morwa wa Kenasi ngwanabo Kalebe a o thopa; Kalebe a mo nea morwedi wa gagwe Akisa ya ba mosadi wa gagwe.

18Ya re ge a mmeka a mo otelela gore a kgopele tšhemo go tatagwe. Akisa, a šetše a nametše pokolo, a fologa. Kalebe a re: O hloma bjang?

19Yena a re: A nke o nkatle; ge o ntšeišitše nageng ya lesehla, gona a ko mphe didiba tša meetse. Ke mo Kalebe a mo neilego didiba tša tletlolo le tša tlase.

20Šea magae a ba leloko la Juda ka dilete tša bona:

21Metse ya ba leloko la Juda go tloga magomong a naga ka thoko ya borwa ke motse wa Kabatsiele, le wa Edere, le wa Jaguru,

22le wa Kina, le wa Dimona, le wa Adada,

23le wa Kedese, le wa Hatsora, le wa Jithinani,

24le wa Sifi, le wa Telema, le wa Bealothe,

25le wa Hatsora-Hadathe, le wa Kiryothe-Hatserone, ke gona Hatsora;

26le wa Amami, le wa Sema, le wa Molada,

27le wa Hasara-Gada, le wa Hasimone, le wa Bethe-Pelete,

28le wa Hasara-Suali, le wa Bereseba, le wa Bisiothia,

29le wa Baala, le wa Ijima, le wa Atsema,

30le wa Elitholada, le wa Kesila, le wa Horoma,

31le wa Tsikilaga, le wa Madimana, le wa Sanisana,

32le wa Lebaothe, le wa Silima, le wa Ajina, le wa Rimoni. Ka mokana ga yona ke metse e masome a mabedi le metšo e senyane le metsana ya yona.

33Metse ya mo molaleng ke motse wa Esithaolo, le wa Tsarea, le wa Asina,

34le wa Sanoa, le wa Enganime, le wa Thapua, le wa Enama,

35le wa Jaramuthe, le wa Adulama, le wa Soko, le wa Aseka,

36le wa Saarima, le wa Adithaima, le wa Gedera, le wa Gederothaima. Ke metse e lesome le metšo e mene le metsana ya yona.

37Le wa Tsenana, le wa Hadasha, le wa Migidala-Gada,

38le wa Dileana, le wa Mitsipe, le wa Jokotiele,

39le wa Lakisi, le wa Botsikathe, le wa Egilone,

40le wa Kabone, le wa Lahemasi, le wa Kithilisi,

41le wa Gederothe, le wa Bethe-Dagona, le wa Naama, le wa Makeda. Ke metse e lesome le metšo e selelago le metsana ya yona.

42Le wa Libina, le wa Ethere, le wa Ashani,

43le wa Jifitha, le wa Asina, le wa Netsiba,

44le wa Kegila, le wa Akasibe, le wa Maresa. Ke metse e senyane le metsana ya yona.

45Le wa Ekironi le dinakana tša wona le metsana ya wona,

46le go tloga Ekironi go fihla lewatleng, naga ka moka e šikago le motse wa Asidodo le metsana ya wona,

47le wa Asidodo le dinakana tša wona le metsana ya wona, le wa Gasa le dinakana tša wona le metsana ya wona, go fihla nokeng ya Egipita le lewatleng le e lego wona mollwane.

48Metse ya dithabeng ke wa Samiri, le wa Jathiri, le wa Soko,

49le wa Dana, le wa Kiryathe-Sana, ke gona Debiri,

50le wa Anaba, le wa Esithemo, le wa Anima,

51le wa Gosene, le wa Holoni, le wa Gilo. Ke metse e lesome le motšo o tee le metsana ya yona.

52Le wa Araba, le wa Duma, le wa Esegane,

53le wa Januma, le wa Bethe-Thapua, le wa Afeka,

54le wa Humuta, le wa Kiryathe-Araba, ke wona wa Heburone; le Tsioro. Ke metse e senyane le metsana ya yona.

55Le wa Maoni, le wa Karamele, le wa Sifi, le wa Juta,

56le wa Jeseriele, le wa Jokodeama, le wa Sanoa,

57le wa Kaini, le wa Gibea, le wa Thimina. Ke metse e lesome le metsana ya yona.

58Le wa Halahulu, le wa Bethe-Tsuri, le wa Gedora,

59le wa Maarathe, le Bethe-Anothe, le wa Elithekoni. Ke metse e selelago le metsana ya yona.

60Le wa Kiryathe-Baali, ke wola wa Kiryathe-Jearima, le motse wa Raba. Ke metse e mebedi le metsana ya yona,

61le wa Bethe-Araba wa lebaleng, le wa Medina, le wa Sekaka,

62le wa Mibisani, le wa Letswaing, le wa Engedi. Ke metse e selelago le metsana ya yona.

63Ge e le Bajebusi ba ba agilego Jerusalema, Bajuda ba šitilwe go ba raka. Ke ba baka leo Bajebusi le mehleng yeno ba sa dutšego Jerusalema.

← Chapter 14 Jump to: Chapter 16 →