Joshua 17

Sotho 1951 (BIBELE)

← Chapter 16 Jump to: Chapter 18 →

1Gwa tšwa tengwa la leloko la Manase, yena morwa wa ntlha wa Josefa. Makiri tatago Gileada, ka ge e le yena morwa wa ntlha wa Manase, o abetšwe la Gileada, ka gobane e be e le monna wa mohlabani.

2Le ba bangwe ba leloko la Manase ba fiwa naga ka dilete tša bona, e lego ba ga Abiesere, le ba ga Heleke, le ba ga Asiriele, le ba ga Sikema, le ba ga Hefere, le ba ga Semida. Ke bona bana ba masogana ba Manase morwa wa Josefa ka dilete tša bona.

3Tselofagadi morwa wa Hefere morwa wa Gileada morwa wa Makiri morwa wa Manase, o be a se na barwa, a ne barwedi fela; maina a bona šea: ke Mahla, le Noa, le Hogola, le Milika, le Thiritsa.

4Bona ba tla go Eleasara moperisita, le go Joshua morwa wa Nuni, le go ba bagolo, ba re: Morena o be a laetše Moshe a re: rena re newe naga le bana ba borena. Mme ba newa magae gotee le bana ba tatabo ka taelo ya Morena.

5Leloko la Manase la abelwa dikabelo tše lesome ka ntle ga naga ya Gileada le ya Basani ya kua mošola wa Jorodane;

6ka gobane basetsana bao ba ga Manase ba abetšwe magae gotee le banna ba leloko la gabo. Naga ya Gileada yona ya abelwa ba bangwe ba leloko la Manase.

7Mollwane wa ba ga Manase o tloga Asere Mikemethate, o lego ka thoko ya bohlabela ya Sikeme, gomme o ya go le letona wa fihla go ba ba agilego Ene-Thapua.

8Naga ya Thapua ya newa ba ga Manase, mola motse wa Thapua o neetšwe ba ga Efuraimi, ka ge o le mollwaneng wa ba ga Manase.

9Mollwane o fologela nokeng ya Kana, ka thoko ya borwa bja noka. Metse yeo ke ya ba ga Efuraimi, gomme e hlakane le ya ba ga Manase. Mollwane wa ba Manase o ka thoko ya leboa ya noka, gomme o felela lewatleng.

10Thoko ya borwa ya ba ya ba Efuraimi, ya leboa ya ba ya ba Manase; magomo ya ba lewatle. Ka thoko ya leboa e kgotlana le naga ya ba Asere; thoko ya bohlabela e kgotlana le ya ba Isashara.

11Mo nageng ya ba Isashara ba ga Manase ba neilwe metse, e lego wa Bethe-Seana, le wa Jobileama le dinakana tša wona, le baagi ba Doro le dinakana tša wona, le baagi ba Endoro le dinakana tša wona, le baagi ba Thaanake le dinakana tša wona, le baagi ba Megido le dinakana tša wona, le meboto e meraro.

12Fela, ba ga Manase ba peletšwe go tšea metse yeo, Bakanana ba kgona go dula metseng yeo.

13Ka morago, ge Baisiraele ba šetše ba tiile, ba dirile Bakanana bao bahlanka ba bona.

14Ba leloko la Josefa ba tla ba bolela le Joshua ba re: O reng o re nea magae ka tengwa le letee fela le kabelo e tee fela, mola re le setšhaba se segolo ka ge Morena a re šegofaditše ka mokgwa woo go fihla bjale?

15Joshua a re: Ge le le setšhaba se segolo, gona rotogelang sekgweng, le kgole naga ya Bapheresi le ya Barefaimi, ka gobane le re dithaba tša Efuraimi di re pitlagantše.

16Ba ga Josefa ba re: Dithaba tše di ka se re lekane; le gona Bakanana ka moka ba ba agilego meeding ba na le dikoloi tša ntwa tša tshipi, le bala ba ba dutšego Bethe-Seana le metsaneng ya gona, le ba ba lego molaleng wa Jeseriele.

17Joshua a rera batho bao ba leloko la Josefa e le ba Efuraimi le ba Manase, a re: Le setšhaba se segolo, le na le maatla a magolo; mme le ka se ke la newa kabelo e tee fela.

18Dithaba tše e tlo ba tša lena; gomme ka ge e le sethokgweng, le se reme le kgole; ke mo le tlogo tšea le naga e bataganego le sona; ka gobane Bakanana bao le tlo ba raka, le ge ba na le dikoloi tša tshipi, le ge ba tiile maatla.

← Chapter 16 Jump to: Chapter 18 →