Joshua 7

Sotho 1951 (BIBELE)

← Chapter 6 Jump to: Chapter 8 →

1Fela, Baisiraele ba be ba obile molato wa segafiwa; ke gobane Akane, morwa wa Kerami, morwa wa Sabadi, morwa wa Sera, wa leloko la Juda, o be a tšere tše di gafilwego; mme bogale bja Morena bja tukela Baisiraele.

2Mola ba le Jeriko, Joshua o be a romile banna, gore ba ye motseng wa Ai o lego kgauswi le Betheabena, thoko ya bohlabela bja Bethele. O be a ba boditšhe a re: Rotogang, le hlole naga. Mme ba yo hlola Ai.

3Bona bao ba be ba boile ba botša Joshua ba re: Go se ke gwa rotoga batho ka moka. A go rotoge banna ba e ka bago ba dikete tše pedi tše tharo, ba hule motse wa Ai. O se ke wa lapiša batho ka moka ka go ya ntshe, gobane ga ba nene.

4Gwa rotoga banna ba e ka bago ba dikete tše tharo ba ya ntshe; mme ba rakwa ke banna ba Ai.

5Banna ba Ai ba bolaya ba e ka bago ba masome a mararo le metšo e selelago ba bona; ba ba rakarakiša go tloga kgorong ba ba fihliša Sebarima, ba ba bolaya motheogeng. Gomme setšhaba sa gakanega; dipelo tša ba bjalo ka meetse.

6Joshua a gagola diaparo tša gagwe, a khunama a inamela fase pele ga polokelo ya Morena la ba la dikela, a na le bagolo ba Baisiraele; ba itšhela lerole dihlogong.

7Joshua a re: Joo, Morena Mong wa rena! O reng o sedišitše setšhaba se noka ya Jorodane, mme wa se gafela diatleng tša Baamoro gore ba se senye? A mola re ka be re itulele mošola wa Jorodane!

8Aowii! Mong wa rena! Ke tlo reng? Isiraele o neetše manaba a gagwe dietse.

9Bakanana le ba ba agilego nageng ye ka moka ba tlo di kwa, ba re tiela gare, ba fediša leina la rena lefaseng. Bjale leina la gago le legolo o tlo le dirang?

10Morena a fetola a re: Tsoga hle! O reng o patlame fao fase?

11Isiraele o sentše. Ba sentše kgwerano ya ka ye ke ba laetšego yona; ba bile ba tšere digafiwa, ba bile ba utswitše ba latola, ba di uta mo dilong tša bona.

12Ka gona Baisiraele ba ka se ke ba ema manaba a bona a fihla; ba tlo neela manaba dietse, gobane ba na le seila. Nka se ke ka hlwa ke ema le lena ge le sa tloše seila seo mo go lena.

13Tsoga gee, o kgethe setšhaba se, o re: Itokišetšeng la ka moswana, gobane Morena Modimo wa Isiraele o re: Mo go wena Isiraele go na le seila; ka gona o ka se eme ge manaba a gago a fihla, ge seila seo se sa tlošwe mo go lena.

14Ka moswana le batameleng ka meloko ya lena; gomme leloko le Morena a tlogo le ntšha ka tengwa, le batamele ka mašika. Gomme lešika le Morena a tlogo le tanya, le batamele ka magoro. Gomme kgoro ye Morena a tlogo e tanya, e batamele ka banna ba yona.

15Gomme e a tlogo tanywa a ne seila, a fišwe ka mollo, yena le tšohle tše a nago natšo, ka baka la gobane o sentše kgwerano ya Morena, le gobane o dirile tša bošilo mo go Isiraele.

16Ka la ka moswana Joshua a tsoga e sa le bošego, a batametša Baisiraele ka meloko, mme gwa tanywa leloko la Juda.

17Gwa batametšwa mašika a Juda; gwa tanywa lešika la Sera. Gwa batametšwa lešika la Sera, gwa tanywa kgoro ya Sabadi.

18Gwa batametšwa kgoro ya gagwe ka banna, gwa tanywa Akane morwa wa Kerami, morwa wa Sabadi, morwa wa Sera wa leloko la Juda.

19Joshua a bolela le Akane a re: Ngwanaka! Lesa go retwe Morena Modimo wa Isiraele; lesa go godišwe yena, mme o mpotše se o se dirilego; o se ke wa mphihlela selo.

20Akane a fetola a botša Joshua a re: Ruri, ke rumotše Morena Modimo wa Isiraele, ke dirile ka gore le ka gore.

21Mo go dithebola ka bona kobo e botse ya Sineara, le sekele tše makgolo a mabedi tša silifera, le tshipi ya gauta ya boima bja sekele tše masome a mahlano; ka di kganyoga, ka di tšea šedile, di epetšwe fase mo mokutwaneng wa ka, le disilifera di gona moo.

22Joshua a roma bahlanka, ba kitima ba ya mokutwaneng; ka kgonthe ba hwetša di epetšwe mo mokutwaneng, le disilifera di le gona moo.

23Ba di ntšha mo mokutwaneng, ba di tliša go Joshua le go Baisiraele bohle; ba di bea pele ga Morena.

24Bjale Joshua, le Baisiraele ka moka ba ba bego ba na le yena, ba tšea Akane morwa wa Sera, ba tšea le disilifera tšeo, le kobo yela, le gauta, ba tšea le barwa ba gagwe le barwedi ba gagwe, le dikgomo tša gagwe, le dipokolo le dihuswane, le mokutwana wa gagwe, le tšohle tše a bego a na natšo, ba ba rotošetša moeding wa Akore.

25Joshua a re: O re hlokofaditše ka baka lang? Bjale Morena o tlo hlokofatša wena. Ke mo Baisiraele ka moka ba ba thumilego ka maswika; ba ba fiša ka mollo; ba ba kgatla ka maswika.

26Ba ba kgatlela mokgobo o mogolo wa maswika; le bjale o sa le gona. Gomme Morena a boa bogaleng bja gagwe. Ke ka baka leo felo fao le bjale go sa bitšwago moedi wa Akore (wa tlhokofalo).

← Chapter 6 Jump to: Chapter 8 →