2 Samuel 6

Tswana (BAEBELE e e Boitshepo) 1992

← Chapter 5 Jump to: Chapter 7 →

1Gape Dafite a phutha batho botlhe ba ba tlhophegileng ba Iseraele, ba le 30 000.

2Dafite a nanoga, a ya le batho botlhe ba o nang nabo, ba ya Baale-Juta, ba ya go tlhatlosa gone letlole la Modimo le le bidiwang ka leina, e bong leina la ga Jehofa wa masomosomo yo o dutseng mo ditšherubeng.

3Ba baya letlole la Modimo mo kareng e ntšha, ba e ntsha mo ntlong ya ga Abinatabe e e mo thabeng; mme Usa le Ahio, bomorwa Abinatabe ba kgweetsa kara e ntšha.

4Ba e ntsha mo ntlong ya ga Abinatabe e e mo thabaneng, e na le letlole la Modimo; Ahio a etelela letlole pele.

5Dafite le ba ntlo ya Iseraele botlhe ba letsa fa pele ga Jehofa ka diletso dingwe le dingwe tse di dirilweng ka logong lwa mofira, le diharepe, le disaletere, le meropana, le ka diphare, le disemebale.

6E rile ba fitlha mo seboping sa pholelo sa ga Nakone, Usa a ntshetsa letlole la Modimo letsogo, a le tshwara; ka dikgomo di ne di tilatila.

7Bogale jwa ga Jehofa jwa tukela Usa, mme Modimo wa mo iteela gone ka ntlha ya timelo ya gagwe; mme a swela gone fa letloleng la Modimo.

8Dafite a itumologa ka Jehofa a kgomogetse Usa; a raya felo foo leina a re, Peresausa, nako e sa le eno.

9Dafite a boifa Jehofa ka tsatsi leo; a re: “Letlole la ga Jehofa le ka tla jang kwa go nna?”

10Jalo Dafite a gana go isa letlole la ga Jehofa kwa go ene mo motseng wa ga Dafite; Dafite a le isa fa thoko mo ntlong ya ga Obete-etome wa Mogite.

11Letlole la ga Jehofa la nna mo ntlong ya ga Obete-etome wa Mogite ka dikgwedi di le tharo; mme Jehofa a segofatsa Obete-etome le ntlo yotlhe ya gagwe.

12Ga bolelelwa kgosi Dafite ga twe: “Jehofa o segofaditse ntlo ya ga Obete-etome, le tsotlhe tse e leng tsa gagwe, ka ntlha ya letlole la Modimo.” Dafite a ya a ntsha letlole la Modimo mo ntlong ya ga Obete-etome, a le isa mo motseng wa ga Dafite ka boitumelo.

13Ga dirala ya re bone ba ba rweleng letlole la ga Jehofa ba sena go tsamaya dikgato di le thataro, a dira tlhabelo ka kgomo le kgongwana e e nonneng.

14Dafite a bina fa pele ga Jehofa ka thata yotlhe ya gagwe; Dafite o ne a itlamile ka sekhutlana sa leloba.

15Jalo Dafite le ba ntlo ya Baiseraele botlhe ba tlhatlosa letlole la ga Jehofa ka meduduetso le ka medumo ya dinaka.

16Ga dirala ya re letlole la ga Jehofa le tla mo motseng wa ga Dafite, Mikale morwadia Saule, a bo a okometse ka fensetere, a bona kgosi Dafite a tlolaka a bina fa pele ga Jehofa; mme a mo nyatsa mo pelong ya gagwe.

17Ba isa letlole la ga Jehofa mo teng, ba le baya mo bonnong jwa lone, mo gare ga mogope o Dafite o o le tlhometseng; Dafite a isa ditshupelo tse di fisiwang le ditshupelo tsa kagiso fa pele ga Jehofa.

18E rile fela Dafite a sena go khutla go isa tshupelo e e fisiwang le ditshupelo tsa kagiso, a segofatsa batho mo ineng la ga Jehofa wa masomosomo.

19A abela batho botlhe, e bong bontsi jotlhe jwa Baiseraele, banna le basadi, a naya mongwe le mongwe papetlana ya senkgwe, le kabelo ya nama le papetlana ya ditshwabi tsa mefine. Mme batho botlhe ba tloga, mongwe le mongwe a ya ga gabo.

20Foo Dafite a boa a tla go segofatsa ba ntlo ya gagwe. Mme Mikale morwadia Saule, a tswa a ya go kgatlhantsha Dafite a re: “Ana kgosi ya Iseraele e ne e galalela jang gompieno, ya ikapola gompieno mo matlhong a malata a batlhanka ba yone, jaaka sephalamatlho se tle se ikapole se se na ditlhong.”

21Dafite a raya Mikale a re: “E ne e le fa pele ga Jehofa, yo o intshenketseng bogolo go rraago, le bogolo go botlhe ba ntlo ya gagwe, go tla a ntlhoma kgosana ya tšhaba ya ga Jehofa, ya Baiseraele; ke gone ke tlaa nyalakegang fela fa pele ga Jehofa.

22Ke tlaa nama ke itira lonyatso bogolo go mo, ke tlaa nna bobenyana le mo matlhong a me; mo malateng a o buileng ka ga one, mo go one ke tlaa tlotlega fela.”

23Mikale morwadia Saule ga a ka a bona ngwana, le go ya kwa letsatsing la loso lwa gagwe.

← Chapter 5 Jump to: Chapter 7 →