2 Samuel 7

Tswana (BAEBELE e e Boitshepo) 1992

← Chapter 6 Jump to: Chapter 8 →

1Ga dirala e rile kgosi e setse e agile mo ntlong ya yone, Jehofa a e neile boikhutso mo babeng botlhe ba yone mo tikologong,

2kgosi ya raya Nathane moperofeti ya re: “Nna ke agile mo ntlong ya masetara, mme letlole la Modimo le agile mo teng ga matsela a a lepeletseng fela.”

3Nathane a raya kgosi a re: “Ya o dire gotlhe mo go mo pelong ya gago; gonne Jehofa o na nao.”

4Mme ya re bosigo joo lefoko la ga Jehofa la tla mo go Nathane la re:

5“Ya o reye motlhanka wa me Dafite o re: Jehofa o bua jaana a re: ‘A o tlaa nkagela ntlo ya go tla ke aga mo go yone?

6Gonne e sa le ka letsatsi le ke ntshitseng bana ba Iseraele mo Egepeto ka lone, nako ke eno, ga ke ise nke ke age mo ntlong, ke ntse ke tsamaya mo mogopeng le mo motlaaganeng fela.

7Mo mafelong otlhe kwa ke tsamaileng le bana botlhe ba Iseraele gone, a nkile ka bua lefoko le mongwe wa ditso tsa Iseraele, yo ke mo laotseng gore a otle batho ba me Baiseraele ka re: Ana go ntse jang ka lo sa nkagela ntlo ya masetara?’

8“Ke gone jaana o reye motlhanka wa me Dafite o re: Jehofa wa masomosomo o bua jaana a re: ‘Ke ne ka go tsaya mo mafulong, o setse dinku morago, gore o tle o nne kgosana ya batho ba me ya Baiseraele;

9ke ne ke ntse ke na nao gongwe le gongwe kwa o ntse o ya gone, ke tlositse baba botlhe ba gago fa pele ga gago; mme ke tlaa go direla leina le legolo, le le tshwanang le leina la ba bagolo ba ba mo lefatsheng.

10Ke tlaa baakanyetsa batho ba me Baiseraele bonno, ke ba tlhoma, gore ba age mo bonnong jo e leng jwa bone, ba sa tlhole ba sutisiwa; le gone bana ba boikepo ga ba ketla ba tlhola ba ba patika jaaka ga ntlha,

11le jaaka go simolola ka tsatsi le ke laotseng ka lone, gore go nne baatlhodi mo bathong ba me Baiseraele; ke tlaa go naya boikhutso mo babeng botlhe ba gago. Gape Jehofa o a go bolelela fa a tlaa go dira motse.

12E tlaa re malatsi a gago a sena go fela, o robala le borraeno, ke tlaa emisa wa losika lwa gago morago ga gago, yo o tlaa tswang mo mmeleng wa gago, mme ke tlaa tlhomamisa bogosi jwa gagwe.

13Ene o tlaa agela leina la me ntlo, mme ke tlaa tlhomamisa setulo sa gagwe sa bogosi ka bosakhutleng.

14Ke tlaa nna rraagwe, ene o tlaa nna morwaake; fa a dira boikepo, ke tlaa mmetsa ka thupa ya batho, le ka kgwathiso ya bana ba batho.

15Boutlwelo botlhoko jwa me ga bo ketla bo mo tlogela, jaaka ke bo tlositse mo go Saule yo ke mo tlositseng fa pele ga gago.

16Motse wa gago o tlaa tlhomamisiwa le bogosi jwa gago ka bosakhutleng fa pele ga gago; le setulo sa gago sa bogosi se tlaa tlhomamisiwa ka bosakhutleng.’ ”

17Nathane a bua le Dafite ka fa mafokong a otlhe le ka fa ponatshegelong e yotlhe fela.

18Foo Dafite kgosi a tsena, a dula fa pele ga Jehofa; mme a re: “Ana ke mang, Jehofa Modimo, le ntlo ya me ke eng, fa e bo ne ne o nterile fano jaana?

19Mo e ne e le selo se sebotlana mo matlhong a gago, Jehofa Modimo; o bile o buile le ka ga motse wa motlhanka wa gago go o segofaletsa lobaka lo loleele lo lo tlang; mo le gone e le ka fa mokgweng wa batho, Jehofa Modimo.

20Dafite o ka fela a go raya a reng? Gonne o a mo itse motlhanka wa gago, Jehofa Modimo.

21O dirile bogolo jotlhe jo ka ntlha ya lefoko la gago, le ka fa pelong ya gago go tla o bo itsise motlhanka wa gago.

22Ka ntlha ya moo o mogolo, Jehofa Modimo; gonne ga go na ope yo o tshwanang nao, le gone ga go na Modimo ope kwa ntle ga gago, ka fa go tsotlhe tse re di utlwileng ka ditsebe tsa rona.

23Go na le morafe ofe mo lefatsheng o o tshwanang le batho ba gago, ke gore, o o tshwanang le Baiseraele ba Modimo o ileng go ba ithekololela gore e nne tšhaba, le gore o itirele leina, le gore o ba direle dilo tse dikgolo, le lefatshe la gago go le direla dilo tse di boitshegang, fa pele ga batho ba gago, ba o tswang go ba ithekololela kwa Egepeto, ba tswa mo merafeng le mo medimong ya yone.

24O ne wa itlhomamisetsa batho ba gago Baiseraele gore e nne tšhaba mo go wena ka bosakhutleng; le wena Jehofa wa ba wa tla wa nna Modimo wa bone.

25“Jaana, Modimo, lefoko le o le buileng ka ga motlhanka wa gago le ka ga motse wa gagwe, a ko o le tlhomamise ka bosakhutleng, o tle o dire jaaka o buile.

26A leina la gago le godisiwe ka bosakhutleng, ka gore, Jehofa wa masomosomo ke Modimo o o okameng Iseraele; mme motse wa motlhanka wa gago Dafite o tlaa tlhomamisiwa fa pele ga gago.

27Gonne wena Jehofa wa masomosomo, Modimo wa Iseraele, o senoletse motlhanka wa gago wa re: ‘Ke tlaa go agela ntlo’; ke gone ka moo motlhanka wa gago o ikutlwileng mo pelong ya gagwe go go rapela ka morapelo o.

28“Jaana, Jehofa Modimo, o Modimo, le mafoko a gago ke boammaaruri, o tlhomamiseditse motlhanka wa gago selo se se molemo se.

29Ke gone jaana, a go go kgatlhe go segofatsa motse wa motlhanka wa gago, gore o tle o nnele ruri ka bosakhutleng fa pele ga gago; gonne wena, Jehofa Modimo, o se buile; a motse wa motlhanka wa gago o segofadiwe ka tshegofatso ya gago ka bosakhutleng.”

← Chapter 6 Jump to: Chapter 8 →